A JEꞌ JUꞌUNAꞌ, RAJIꞌ TIꞌ U YET WINIQUIROB JUDÍO A CU TSICBAROB U TꞌɅN HEBREO
HEBREOS
A Cꞌujoꞌ caj tsicbanʌjij tiꞌ toꞌonex soc ic najtiquex u tꞌʌn
1
Chꞌic uch,
a Cꞌujoꞌ,
quij,
caj u tꞌʌnob ic nunquirex u winiquirob judío.
Yaꞌab u tenin caj u tꞌan tiꞌob,
caj u tsꞌaja u tucurob yʌjtseqꞌuirob u tꞌʌn Cꞌuj quir u tsicbarob tiꞌ ic nunquirex a baꞌ u cꞌat Cꞌuj.
A jun xotꞌoꞌ caj tsꞌaꞌb tiꞌ jujunturi mac uch,
u jer jun xotꞌ u tꞌʌn caj tsꞌaꞌb tiꞌ u jer mac.
Bayiriꞌ caj esaj yaꞌab baꞌ tiꞌob soc yerob a baꞌ u cꞌat Cꞌuj.
2 Chen a jeꞌ qꞌuinaꞌ,
quireꞌ tab u xur tꞌʌn rajiꞌ caj u tꞌʌnajoꞌonex,
tan u cꞌʌnic u parar quir u tꞌʌnic toꞌonex.
A Cꞌujoꞌ caj u betaj tu cotor baꞌ,
cax a ruꞌumoꞌ,
cax a caꞌananoꞌ caj u cꞌʌnaj Jesús quir u betic a caꞌananoꞌ,
quir u betic ich yocꞌocab xan.
A Cꞌujoꞌ,
caj u toc rʌc tsꞌaj tiꞌ u parar tu cotor baꞌ soc rajiꞌ yʌnin u parar.
3 An ten bic cu sasir ic yumoꞌ,
bayiriꞌ a Jesúsoꞌ cu yesic u mucꞌ u Tet Cꞌuj.
Mʌꞌ ja wirej,
pꞌeririꞌob,
Jesús quet yejer u Tet.
Rajiꞌ,
yejer tu cotor u mucꞌ cu cʌnantic a jeꞌ yocꞌocab.
Mʌꞌ ja wirej,
rajiꞌ cu cʌnantic tu cotor aroꞌ quireꞌ jach chich u mucꞌ u tꞌʌn.
Rajiꞌ caj tsꞌoc u rʌc rucꞌsic u siꞌpir tu cotor mac ich cruz.
Caj curaj ich u noj Cꞌuj ich caꞌanan,
a mac jach manan u mucꞌ.
Caj curaj ich u noj Cꞌuj quir u bin sʌjtaꞌbir ten tu cotor mac.
A yʌjmasirob u tꞌʌn Cꞌujoꞌ, jach noꞌj, chen a noꞌjoꞌ a raꞌ yʌnin u parar Cꞌuj, jach manan noꞌj
4 U parar Cꞌuj jach manan tiꞌ u yʌjmasirob u tꞌʌn Cꞌuj.
Jach manan tiꞌ quireꞌ baxuc u cꞌat Cꞌuj,
rajen tsꞌaꞌb tiꞌ u mucꞌ ten Cꞌuj,
cax a tiꞌob yʌjmasirob u tꞌʌn Cꞌuj.
5 Mʌꞌ ja wirej,
a Cꞌujoꞌ mʌꞌ biqꞌuin caj u yaꞌaraj tiꞌ yʌjmasirob u tꞌʌn Cꞌuj,
mʌꞌ tuririꞌ caj u yaꞌaraj tiꞌ yʌjmasirob u tꞌʌn Cꞌuj:
A techoꞌ,
quij Cꞌuj,
in pararech,
bajeꞌrer caj in wesaj a techoꞌ,
in pararech quij.
Bayiriꞌ xan mʌꞌ tu yaꞌaraj Cꞌuj tiꞌ yʌjmasirob u tꞌʌn:
Rajiꞌ in pararoꞌ,
a tenoꞌ in Tet.
6 Caj tuchiꞌtaꞌb ten Cꞌuj u parar,
a tuririꞌ u pararoꞌ.
A raꞌ caj rochaꞌb ten u nʌꞌ ich yocꞌocab.
Caj yaꞌaraj Cꞌuj:
A techexoꞌ,
ʌjmasirechex in tꞌʌn,
caꞌ a cꞌujintex in parar,
tu cotorechex caꞌ a cꞌujintex in parar quij.
7 Uꞌyex baꞌ caj yaꞌaraj Cꞌuj tiꞌ yʌjmasirob u tꞌʌn uch:
Wa ber caj betaꞌb ten Cꞌuj yʌjmasirob u tꞌʌn robob irob a icꞌoꞌ quir u cꞌʌnic a tiꞌoboꞌ.
Robob caj betaꞌb ten Cꞌuj yʌjmasirob u tꞌʌn irob cꞌacꞌ soc u cꞌʌnic a tiꞌoboꞌ.
8 Uꞌyex baꞌ caj u yaꞌaraj Cꞌuj tiꞌ u parar:
Tiꞌ a cutanoꞌ tech Cꞌuj tu cu bin u reyintiquechob mac.
Munt qꞌuin cu bin u reyintiquechob mac.
Jach taj tech cu bin u reyintiquechob mac quireꞌ a techoꞌ mʌnaꞌ a cꞌasir a techoꞌ.
9 Mʌꞌ ja wirej,
a techoꞌ ca yajquintic a tsoyoꞌ,
chen a cꞌasoꞌ ca pꞌactic.
Rajen a tenoꞌ in Cꞌujech tin quiꞌquint a wor jach manan tiꞌ a wet manob,
quireꞌ tan in tetic tech quireꞌ u reyintiquechob mac.
10 Caj wʌcꞌʌs aꞌaraj tiꞌ u parar:
A techoꞌ u Jaj Tsꞌurirech tu cotor mac.
A techoꞌ caj a betaj yocꞌocab tu yʌnxchun yejer u jach chichir a mucꞌ.
A bʌjiriꞌ ta betaj a caꞌananoꞌ yejer u jach chichir a mucꞌ xan.
11 Rajen,
cax caꞌ bin xuruc aroꞌ,
chen a techoꞌ munt qꞌuin tiꞌ yʌnech.
A caꞌananoꞌ jeꞌ u rabareꞌ an ten bic cu rabar nocꞌ quireꞌ uchben.
12 Irej nocꞌ cu cꞌoxar cu buquintic u jer.
Cu bin cꞌaxbir tech a caꞌananoꞌ.
Chen a bʌjiriꞌ a techoꞌ raꞌiriꞌech,
mʌꞌ a quimin a techoꞌ munt qꞌuin.
13 A Cꞌujoꞌ mix biqꞌuin caj yaꞌaraj tiꞌ yʌjmasirob u tꞌʌn:
Curen teꞌ tin noj hasta quin tsꞌic tech in mucꞌ soc in rucꞌsic a mac a cu pꞌactiquech soc mʌꞌ u wʌcꞌʌs pꞌactiquechob.
Baxuc caj u yaꞌaraj Cꞌuj ich u tꞌʌn.
14 Mʌꞌ ja wirej,
caj betaꞌb ten Cꞌuj yʌjmasirob u tꞌʌn soc u yamtic a mac tetaꞌb quir u yacsic tu yor.
Robob yʌjmasirob u tꞌʌn Cꞌuj raꞌ u pixamob a cu tarob ich Cꞌuj.