Caꞌ ij quiꞌ cʌnantex ic bʌjex soc mʌꞌ u tubur toꞌonex u tꞌʌn Cꞌuj
2
Quireꞌ a Cristojoꞌ jach manan u mucꞌ tiꞌ yʌjmasirob u tꞌʌn Cꞌuj,
rajen caꞌ ij quibex a baꞌ tij cuꞌyex soc mʌꞌ ic pꞌʌtiquexiꞌ.
2 Mʌꞌ ja wirej,
ic toc erex u tꞌʌn caj masaꞌb toꞌonex ten yʌjmasir u tꞌʌn Cꞌuj tiꞌ Moisés uch chʌcaꞌan yiricob wa jach taj,
quireꞌ a mac a mʌꞌ tu cꞌʌmobiꞌ uch a mʌꞌ tu quibobiꞌ,
toc seb caj tsꞌaꞌb u mucꞌyaj uch.
3 Baxuc a toꞌonex xanoꞌ,
Wa mʌꞌ ic sariquex ic xiquinex tu quij cuꞌyiquex u tsicbarob u jach tsoyir u tꞌʌn Cꞌuj.
Mʌꞌ cꞌuchaꞌan yor u taquicoꞌonex Cꞌuj tu quic binex mucꞌyaj.
Mʌꞌ ja wirej,
jach noꞌj u jach tsoyir u tꞌʌn Cꞌuj quireꞌ pʌyber toc tsecꞌtaꞌb tiꞌ ten u bʌjiriꞌ Jaj Tsꞌur tu tsecꞌtaj.
Mʌꞌ ja wirej,
robob a mac a tu yubob tiꞌ caj u yacsob tu yorob tiꞌ,
jeroj pachir caj u masajob tiꞌ toꞌonex.
4 Mʌꞌ jaririꞌoꞌ,
a Cꞌujoꞌ u bʌjiriꞌ xan,
caj u yesaj jach yaꞌab carem beyaj yejer a baꞌ mʌꞌ yiramʌnob uch,
mʌꞌ biqꞌuin yiramʌnob mac soc yer mac jach taj.
Cax tsꞌab u mucꞌ u Tajꞌor u Pixam Cꞌuj tiꞌ toꞌonex an ten bic u cꞌat Cꞌuj.
Caj waysaꞌb Jesús ten Cꞌuj soc baxuc toꞌonex a yacsmʌnob tu yorob
5 Mʌꞌ ja wirej,
a tenob quin tsicbarob tiꞌ a ricꞌben yocꞌocaboꞌ yejer a ricꞌben caꞌananoꞌ.
Robob bin u caꞌ betbirob ten Cꞌuj soc a tiꞌ taroꞌ a Cꞌujoꞌ jeꞌ u reyinticob tu junan.
Mʌꞌ u chaꞌbʌr u reyintaꞌ yʌjmasirob u tꞌʌn.
6 Mʌꞌ ja wirej,
quij,
tiꞌ tsꞌibaꞌan ich u tꞌʌn Cꞌuj uch bic tabar tan u tꞌanan Cꞌuj ten mac tan yaꞌaric:
Baꞌwir a xiboꞌ,
Cꞌuj quen,
soc a tucrej tiꞌ?
Jot a tiꞌoꞌ.
Baꞌwir a xiboꞌ quireꞌ cu quimij?
Baꞌwir caꞌ a cʌnantej?
7 Mʌꞌ yaꞌabir u qꞌuinin ca chaꞌic u cuxtar a xiboꞌ teꞌ ich yocꞌocab.
Mʌꞌ u cꞌuchur tiꞌ baxuc u mucꞌ yʌjmasirob a tꞌʌn Cꞌuj,
quij.
Caj a tsꞌajaj xib a mucꞌ tiꞌ bayiriꞌ xan,
caj a tsꞌaja u beyaj quir u betic a baꞌ jach manan tsoy.
8 A techoꞌ Cꞌuj,
caj a chaꞌaj u tsꞌurintej a xiboꞌ tu cotor a baꞌ a tiꞌ yʌn ich yocꞌocab.
Quireꞌ a Cꞌujoꞌ caj u tsꞌajaj tiꞌ xib soc rajiꞌ cu tsꞌurintic tu cotor baꞌ yʌn teꞌ ich yocꞌocabaꞌ,
rajen rajiꞌ caꞌ u tsꞌurintej,
chen tiꞌ toy yʌn baꞌ mʌꞌ toy rʌc u tsꞌurintej ich yocꞌocab.
9 Chen ij quirmʌnex Jesús,
a mac jach manan u mucꞌ,
a yʌjmasirob u tꞌʌn Cꞌujoꞌ,
mʌꞌ quet u mucꞌ yejer Jesús.
Barej caj u jamach pꞌʌtaj u mucꞌ Jesús,
quireꞌ u bʌjiriꞌ tu chꞌaj u winquirir an ten bic toꞌonex teꞌ ich yocꞌocabaꞌ.
Bajeꞌrer tij quirex Jesús caj tsꞌaꞌb u jach chichir u mucꞌ wa ber caj acsaꞌb ich u noj Cꞌuj tu cu bin sʌjtaꞌbir ten tu cotor mac,
quireꞌ caj quimij ich cruz.
Mʌꞌ ja wirej,
quireꞌ jach tsoy tu tꞌʌn Cꞌuj rajen rajiꞌ caj u betaj tu cotor aroꞌ soc Jesús caꞌ quimic tiꞌ tu cotor mac.
10 Tu cotor baꞌ rajiꞌ yʌnin Cꞌuj,
quireꞌ rajiꞌ caj u betaj tu cotor baꞌ rajen a Cꞌujoꞌ u jach tsꞌurir tu cotor baꞌ.
Rajiꞌ xan,
u cꞌat u yacsic tu cotor a yacsmʌnob tu yorob ich caꞌanan quireꞌ u pararob Cꞌuj a yacsmʌnob tu yorob.
Mʌꞌ ja wirej,
rajen chaꞌb ten Cꞌuj ij cʌjtaquirex quireꞌ a baꞌ mucꞌyajnʌij caꞌ u taquej mac,
rajen jach manan cꞌuchaꞌan yor tiꞌ tu cotor baꞌ.
11 Mʌꞌ ja wirej,
a mac tan u pꞌobar tiꞌob u siꞌpir tiꞌob,
bayiriꞌ xan,
a robob a tan u pꞌobarob u siꞌpirob ten Jesús,
quet bayiriꞌ,
pꞌeriꞌ u Tetob.
Rajen rajiꞌ mʌꞌ ju chꞌic u suraquir u yaꞌaric a robob u bʌjob quireꞌ rajiꞌ yʌninob Cꞌuj.
12 Mʌꞌ ja wirej,
tiꞌ tsibaꞌan ich u tꞌʌn Cꞌuj,
tan yaꞌaric:
Jeꞌ in bin in tꞌʌnic in witsꞌinob tiꞌ tech Cꞌuj,
quij.
Jeꞌ in cꞌayob tiꞌ tech Cꞌuj ʌcʌtan tu cotor mac a tu yacsob tu yorob tiꞌ tech tu cu muchꞌquinticob u bʌj quir u cꞌujintiquech Cꞌuj.
13 Tiꞌ wʌcꞌʌs tsꞌibaꞌan ich u tꞌʌn Cꞌuj tu cu yaꞌaric:
Jeꞌ in wacsic tin wor tiꞌ Cꞌuj,
quij.
Caj wʌcꞌʌs tsꞌibtaꞌb xan tu cu yaꞌaric:
Teꞌ yʌnenaꞌ yejer in pararob a ta tsꞌaj ten Cꞌuj.
14 Mʌꞌ ja wirej,
quij,
a mac a pꞌeriꞌ u tet pꞌeriꞌ u yoꞌnen xan.
Rajen u bʌjiriꞌ Jesús caj u chꞌaj u winiquir caꞌ u rubs u mucꞌ a quisinoꞌ soc mʌꞌ u quinsic mac.
15 A baxucoꞌ Jesús mʌꞌ u chaꞌic mac u sʌjticob u quimin mac.
A tiꞌoboꞌ uch irob u cꞌurewob quisin,
rajen caj u sʌjtob u quiminob u burur qꞌuin.
16 Mʌꞌ ja wirej,
jach chʌcaꞌan caꞌ ic najtex tarij ic Jaj Tsꞌurirex quir u taquic a mac a cu tar ich u yoꞌnen Abraham,
mʌꞌ tarij quir u taquic yʌjmasirob u tꞌʌn Cꞌuj uch.
17 Rajen,
a Jesúsoꞌ caj waysaꞌb uch an ten bic a toꞌonexoꞌ soc u wʌcꞌʌs bʌjiriꞌ caj mucꞌyaj irej toꞌonex quic mucꞌyajex quireꞌ tu yiraj otsiroꞌonex.
Mʌꞌ ja wirej,
rajiꞌ u sacerdote a jach manan noꞌj quir u yamtic yitsꞌinob tan u tꞌʌnic toꞌonex Cꞌuj.
Bayiriꞌ caj u cꞌubaj u bʌj soc u rʌc rucꞌsic ic siꞌpirex ich u cruz.
18 Quireꞌ u bʌjiriꞌ Jesús caj mucꞌyajnʌjij wa ber tumtaꞌb yor ten a quisinoꞌ,
rajen bajeꞌrer toc tiꞌ yʌn Jesús quir u taquic a mac a tan u tumtaꞌr yor ten quisin.