Jesucristo jach manan noꞌj tiꞌ u nunquir u winiquirob judío u cꞌabaꞌ Moisés
3
In wet acsʌꞌorirex a techexoꞌ a mac a tetaꞌb ten Cꞌuj soc rajiꞌ yʌninechex Cꞌuj.
Rajiꞌ caj u tꞌʌn techex quir u tsꞌic techex a cuxtarex a cu tar ich caꞌanan.
Tucrex Jesús.
Mʌꞌ ja wirej,
rajiꞌ tuchiꞌtaꞌb ten Cꞌuj quir u tsꞌic toꞌonex a baꞌ cu yaꞌaric Cꞌuj,
bayiriꞌ rajiꞌ u sacerdote a jach manan noꞌjoꞌ tiꞌ Cꞌuj a mac a quij cariquex ij cꞌujintiquex.
2 An ten bic Moisés caj u rʌc quibaj a baꞌ araꞌb ten Cꞌuj uch wa ber caj cuxaꞌan Moisés ich u racꞌob uch.
Baxuc xan,
ic Jaj Tsꞌurirex Jesucristo caj u rʌc quibaj tu cotor a baꞌ araꞌb ten Cꞌuj.
Mʌꞌ ja wirej,
quireꞌ a Jesúsoꞌ caj tsꞌaꞌb u mucꞌ ten Cꞌuj.
3 Jach tsoy caꞌ ic sʌjtiquex ic nunquirex Moisés,
chen jach manan caꞌ ic sʌjtex ic Jaj Tsꞌurirex Jesucristo.
Mʌꞌ ja wirej,
rajiꞌ irej a mac ic sʌjtiquex a cu cꞌʌxic yatoch,
mʌꞌ ic sʌjtiquex yatoch a cꞌax ten mac.
4 Jujuntur yatoch cꞌax ten xib.
Bayiriꞌ xan,
tu cotor baꞌ a tiꞌ yʌn ich yocꞌocab toc betaꞌb ten Cꞌuj.
5 Jach taj a Moisésoꞌ tu betaj u beyaj Cꞌuj,
caj u quibaj tu cotor baꞌ a raꞌ u qꞌuininoꞌ tiꞌ yʌn Moisés ich u yet winiquirob judío uch.
Mʌꞌ ja wirej,
u beyaj Cꞌuj tiꞌ Moisés quir u tsecꞌtic u tꞌʌn Cꞌuj tiꞌ u yet winiquirob judío.
A mun tsꞌaꞌb ten Cꞌuj tiꞌ Moisés raꞌ tu toc masaj tiꞌ u yet winiquirob judío uch cax a cu bin tar caꞌ bin cꞌuchuc tu qꞌuinin.
6 Bayiriꞌ xan,
ic Jaj Tsꞌurirex Jesucristo caj u toc rʌc quibaj tu cotor a baꞌ araꞌb ten Cꞌuj.
Chen ju mucꞌoꞌ tsꞌaꞌb tiꞌ ten Cꞌuj jach manan tiꞌ Jesús cax a Moisésoꞌ,
quireꞌ rajiꞌ Jesús u parar Cꞌuj.
Wa quij quiꞌ quibiquex tu cotor a baꞌ araꞌb ten Cꞌuj tiꞌ toꞌonex mix quic pꞌʌtiquex u tꞌʌn hasta u qꞌuinin caꞌ bin uruc quir u taquicoꞌonex,
jeꞌ u quiꞌ acsicoꞌonex quireꞌ rajiꞌ yʌninoꞌonex Cꞌuj.
Jeꞌ u tar yor mac a Cꞌuj yʌnin
7 Mʌꞌ ja wirej,
wa baxucoꞌ,
jach manan tsoy caꞌ ij quibex u tꞌʌn Cꞌuj an ten bic caj araꞌb ten u Tajꞌor u Pixam Cꞌuj uch,
tu cu yaꞌaric tiꞌ a mac tsꞌaꞌb u tucur quir u tsicbar a baꞌ u cꞌat Cꞌuj.
Uꞌyex baꞌ cu yaꞌaric Cꞌuj:
Bajeꞌrer wa ber ca wuꞌyiquex u tꞌʌniquechex Cꞌuj.
8 Mʌꞌ a chichquintiquex a joꞌrex irechex a nunquirex caj u chichquintob u joꞌrob uch.
Mʌꞌ ja wirej,
a nunquirex caj u chichquintob u joꞌrob ich tʌcay ruꞌum uch,
caj u pꞌʌtob in tꞌʌn,
quij Cꞌuj.
9 Mʌꞌ ja wirej,
a nunquirex mʌꞌ tu yacsob tu yorob tiꞌ ten,
quij Cꞌuj,
cax tu yirob in carem beyaj ich tʌcay ruꞌum tu caj in pʌy u berob cuarenta yaxqꞌuin.
10 Rajen caj tsꞌiquijen,
quij Cꞌuj,
yejer a nunquirex,
a raꞌ cuxaꞌanob a raꞌ u qꞌuininoꞌ.
Rajen caj in waꞌaraj:
Robob mʌꞌ cꞌuchaꞌan yorob u tucricob taj mʌꞌ biqꞌuin cꞌuchaꞌan yor u tucricob taj,
robob mʌꞌ u quetquintic yorob yejer a baꞌ tin betaj.
11 Rajen caj tsꞌiquijen yejer a nunquirex caj in toc chich araj tiꞌob mʌꞌ biqꞌuin quin bin in wacsic tiꞌob ich u ruꞌumin a tin toc araj:
Jeꞌ in tsꞌic techexeꞌ.
12 Rajen in wet acsʌꞌorirex,
quiꞌ cʌnantex a bʌjex soc mʌꞌ a chichquintic a joꞌrex soc mʌꞌ a pꞌʌtiquex a wacsiquex ta worex tiꞌ Cꞌuj,
a mac cʌjaꞌan ich caꞌanan,
quij.
13 Rajen caꞌ ic pacran chich ariquex tiꞌ ic bʌjobechex hasta caꞌ bin uruc ic Jaj Tsꞌurirex.
Rajraꞌ caꞌ ic pacran chich arex tiꞌ ic bʌjobechex soc mʌꞌ ic tus pʌyiquex ic siꞌpirex soc mʌꞌ u chichtar ij joꞌrex ten ic siꞌpirex.
14 Rajen caꞌ ic pacran chich ariquex tiꞌ ic bʌjobechex.
Quireꞌ caꞌ bin uruc ic Jaj Tsꞌurirex Jesucristo jeꞌ ic pacran cꞌʌmiquex a baꞌ rajiꞌ yʌnin,
wa quij quibejex a baꞌ tu yaꞌaraj toꞌonex,
tan ij cacsiquex tij corex tiꞌ an ten bic pʌyber caj ij yʌn acsex tij corex tiꞌ caj ic yʌn quibex u tꞌʌn uch.
15 Mʌꞌ ja wirej,
caꞌ ij quibex a baꞌ cu chich aric toꞌonex,
quireꞌ tu toc araj uch,
quij:
Jeroj ta wuꞌyajex in tꞌʌn bajeꞌrer,
rajen mʌꞌ a chichquintic a joꞌrex an ten bic a nunquirex uch tu chichquintajob u joꞌrob ich tʌcay ruꞌum uch.
16 Mʌꞌ ja wirej,
a mac a tu yubob u tꞌʌn Cꞌuj uch ich tʌcay ruꞌum.
Raꞌiriꞌ u bʌjiriꞌ tu pꞌʌtob u tꞌʌn Cꞌuj.
Robob,
tu cotor u winiquirob judío a paꞌy u berob ten Moisés caj jocꞌob ich u ruꞌumin Egipto uch.
17 Mʌꞌ ja wirej,
u winiquirob israel,
a tu pʌyob u siꞌpirob,
caj quimob ich tʌcay ruꞌum.
Robob caj u tsꞌiquintob Cꞌuj cuarenta yaxqꞌuin a tiꞌ quimob ich tʌcay ruꞌum.
18 U winiquirob israel a mac mʌꞌ tu quibob u tꞌʌn Cꞌuj ich tʌcay ruꞌum uch caj araꞌb ten Cꞌuj tiꞌob tan u chich araꞌ ten Cꞌuj:
“Jach taj,
quij Cꞌuj,
mʌꞌ biqꞌuin quin bin in wacsiquechex tu ruꞌumin a tin toc araj:
Jeꞌ in tsꞌic techexeꞌ,
quij.”
19 Rajen ij querex u winiquirob israel mʌꞌ cꞌuchaꞌan yorob u yocar tu ruꞌumin a tu yaꞌaraj Cꞌuj:
Jeꞌ in tsꞌic techex.
Quireꞌ mʌꞌ tu yacsob tu yorob tiꞌ.