4
Rajen,
a Cꞌujoꞌ,
tiꞌ toy cu tsꞌic toꞌonex u tꞌʌn bajeꞌrer,
“Jeꞌ u yacsic toꞌonex.”
Rajen caꞌ ij cʌnantiquex ic bʌjex soc cꞌuchaꞌan ij corex ij cocarex quir ic jeꞌsic ic bʌjex yejer Cꞌuj.
Caꞌ ij cʌnantex ic bʌjex wa jix tʌco cu tus tucric mʌꞌ ju yocar.
2 A Cꞌujoꞌ caj u tsꞌajaj tiꞌ ic nunquirex u jach tsoyir u tꞌʌn an ten bic caj u tsꞌajaj tiꞌ a toꞌonexoꞌ.
Chen ic nunquirex ich a tʌcay ruꞌumoꞌ,
cax tu yubob a baꞌ araꞌb tiꞌob ten Cꞌuj mʌꞌ baꞌwir tiꞌob quireꞌ mʌꞌ tu quibob u tꞌʌn,
quireꞌ mʌꞌ tu yacsob tu yorob.
3 A toꞌonexoꞌ,
bajeꞌrer tan ij cocarex quir ic jeꞌsic ic bʌjex yejer Cꞌuj wa tij cacsex tij corex tiꞌ Cꞌuj.
Mʌꞌ ja wirej,
a uchoꞌ caj araꞌb ten Cꞌuj tiꞌ ic nunquirex:
Rajen tan in chich ariquechex,
“Jach taj,
mʌꞌ biqꞌuin robob cu bin yocarob tu ruꞌumin a tin toc araj:
Jeꞌ in tsꞌic tiꞌob,
quireꞌ ta tsꞌiquintajenex.”
quij Cꞌuj.
Mʌꞌ ja wirej,
a Cꞌujoꞌ caj tsꞌoc u betic a yocꞌocabeꞌ toc cꞌuchaꞌan yor mac u yocor u jeꞌsic u bʌj yejer Cꞌuj.
4 Aroꞌ,
quij,
taj,
quireꞌ tiꞌ toc tsꞌibaꞌan ich u jer junxotꞌ u tꞌʌn Cꞌuj uch.
Raꞌ tan u tsicbʌtic tiꞌ u qꞌuinin sábado.
Uꞌyex baꞌ cu yaꞌaric Cꞌuj tiꞌ sábado:
Caj cꞌuchij u qꞌuinin sábado quireꞌ tu tsꞌocsaj u beyaj Cꞌuj tu caj u betaj yocꞌocab jeroj tu jeꞌsaj u bʌj.
5 Baxuc xan,
tiꞌ toc tsꞌbaꞌan ich u tꞌʌn Cꞌuj tu cu yaꞌaric:
Mʌꞌ biqꞌuin quin bin in wacsic tiꞌob quir u jeꞌsicob u bʌj yejeren,
quij Cꞌuj.
6 Baxuc caj yaꞌaraj Cꞌuj rajen,
a Cꞌujoꞌ quiꞌ yor u yacsic mac u jeꞌsic u bʌj yejer Cꞌuj cax jun yarob.
Quireꞌ u winiquirob israel,
a paꞌy u ber ten Moisés uch ich tʌcay ruꞌum tu yubob u jach tsoyir u tꞌʌn Cꞌuj,
chen mʌꞌ tu cꞌʌmobiꞌ rajen mʌꞌ acsaꞌb ten Cꞌuj quir u jeꞌsic u bʌj yejer Cꞌuj.
7 Rajen caj manij chꞌic yaꞌab yaxqꞌuin a Cꞌujoꞌ caj u wʌcꞌʌs aꞌaraj tiꞌ u winiquirob Israel.
Chen aroꞌ tin toc tsꞌibtaj techex sam.
Mʌꞌ ja wirej,
rajiꞌ u yaꞌaraj tiꞌ David caꞌ u tsꞌibtej uch:
Uꞌyex baꞌ quin wac.
Ta wuꞌyex u tꞌʌn Cꞌuj,
bajeꞌrer mʌꞌ a chichquintic a joꞌrex.
8 Mʌꞌ ja wirej,
a Cꞌujoꞌ tu cu bin acsaꞌbir a raꞌ yʌninob Cꞌuj soc pꞌeriꞌob yorob.
Raꞌ mʌꞌ baxuc u ruꞌumin tu caj acsaꞌb u winiquirob israel ten Josué uch.
Mʌꞌ ja wirej,
wa raꞌ u ruꞌumin tu cu bin acsaꞌbir ten Cꞌuj uch mʌꞌ baꞌwir cu bin wʌcꞌʌs acsaꞌbir mac quir u jeꞌsic u bʌj yejer Cꞌuj.
9 Chen,
a toꞌonexoꞌ a raꞌ yʌninoꞌonex Cꞌuj cꞌuchaꞌan ij corex ij cocarex ic jeꞌsiquex ic bʌjex yejer Cꞌuj toc bajeꞌrer.
10 Quireꞌ a raꞌ yʌninob Cꞌuj,
a cu bin acsaꞌbirob ten Cꞌuj,
cu bin u jeꞌsicob u bʌj an ten bic Cꞌuj caj u jeꞌsaj u bʌj caj tsꞌoc u betic yocꞌocab.
11 Rajen caꞌ ic jach pꞌisex ic bʌjex soc u yacsicoꞌonex Cꞌuj.
A tenoꞌ,
mʌꞌ in cꞌat caꞌ ij cʌnex ic nunquirex,
quireꞌ mʌꞌ tu yacsob tu yorob tiꞌ Cꞌuj.
Mʌꞌ in cꞌat tuririꞌ toꞌonex caꞌ ij cʌnex ic nunquirex quireꞌ mʌꞌ tu yacsob tu yorob tiꞌ Cꞌuj ic nunquirex uch.
12 Quireꞌ a baxucoꞌ,
u tꞌʌn Cꞌuj yʌn jach manan chichir u mucꞌ tiꞌ.
Jach cuxaꞌan u mucꞌ xan.
Mʌꞌ ja wirej,
cu cꞌuchur u tꞌʌn Cꞌuj tu tamin u pixam mac.
Jach seb cu cꞌuchur u tꞌʌn Cꞌuj tu pixam mac.
Raꞌ irej u mascabir a caꞌ wʌrʌcꞌ yʌn yej tiꞌ.
Mʌꞌ wa seb cu cꞌuchur u tꞌʌn Cꞌuj tu pixam mac?
U tꞌʌn Cꞌuj cu yesic a baꞌ cu tucric tu yor xan.
13 Mʌnaꞌ baꞌ betꞌab ten Cꞌuj mʌꞌ wa chʌcaꞌan yirir u wich ten Cꞌuj.
Rajen mʌnaꞌ mac cꞌuchaꞌan yor u taꞌquic u bʌjob soc mʌꞌ cu yirir ten Cꞌuj quireꞌ sasir u wich a Cꞌujoꞌ.
Yʌn ic toc nunquiquex tiꞌ Cꞌuj a baꞌ tic betajexiꞌ.
A Jesúsoꞌ jach manan ic nonoꞌj sacerdotex
14 Ic Jaj Tsꞌurirex Jesucristo,
rajiꞌ u parar Cꞌuj,
rajiꞌ xan ic nonoꞌj sacerdotex ʌcʌtan tiꞌ Cꞌuj.
Mʌꞌ ja wirej,
rajiꞌ wʌcꞌʌs bin ich Cꞌuj caꞌ u chich cꞌatej tiꞌ Cꞌuj tiꞌ toꞌonex caꞌ u yamtej tiꞌ toꞌonex.
Rajen yʌn ij quiꞌ toc acsiquex tij corex quireꞌ mʌꞌ jic pꞌʌtex u tꞌʌn.
15 A quisinoꞌ,
caj u rʌc quiꞌ tumtaj u yor ic Jaj Tsꞌurirex Jesucristo,
chen mʌꞌ tu pʌy u siꞌpir mʌꞌ tuririꞌ.
Rajen yer Jesús bic tabar u chꞌic otsir toꞌonex tu mʌꞌ cꞌuchaꞌan ij corex tu cu tumtic ij corex,
quireꞌ u bʌjiriꞌ tumtaꞌb yor tiꞌ tu cotor baꞌ an ten bic a toꞌonexoꞌ,
chen rajiꞌ mʌꞌ tu pʌyaj u siꞌpir a Jesúsoꞌ.
16 Cojenex,
quij,
caꞌ ic nʌtsꞌex ic bʌjex ich Cꞌuj.
Caꞌ ic chichquint ij corex wa ber quic natsꞌʌrex ich Cꞌuj soc rajiꞌ caꞌ u yirej otsiroꞌonex a toꞌonexoꞌ Cꞌuj.
Bayiriꞌ quir ij cꞌʌmiquex a baꞌ tsoy tu tꞌʌn Cꞌuj wa ber quij cuꞌyiquex mʌꞌ cꞌuchaꞌan ij corex tiꞌ a baꞌ cu tumtic ij corex.