5
Mʌꞌ ja wirej,
jujuntur sacerdote,
a jach noꞌjoꞌ,
toc tetaꞌan tiꞌ tu cotor mac ich u winiquirob israel soc u tꞌʌnicob Cꞌuj tiꞌ u racꞌob.
Rajen tetaꞌb soc quinsic u yʌrʌcꞌob mac quir u toquic quir u sijic tiꞌ Cꞌuj quir u rucꞌsic u siꞌpir u racꞌob.
2 Rajen,
rajiꞌ cꞌuchaꞌan yor u yirej otsir u racꞌob quireꞌ u bʌjiriꞌ yer mʌꞌ cꞌuchaꞌan yor tiꞌ tu cotor a baꞌ a cu tar tiꞌ.
Rajen nemʌꞌ biquiꞌ ich u racꞌob a sacerdote quir u yamtic a mac a jach amaꞌan u cʌnic baꞌ,
cax yejer mac a tu pʌy u siꞌpir.
3 Mʌꞌ ja wirej,
u bʌjirirob a sacerdotejoꞌ yʌn u quinsic yʌrʌcꞌ quir u toquic quir u sijic tiꞌ Cꞌuj u boꞌorir u wʌcꞌʌs siꞌpir u bʌjiriꞌ an ten bic u racꞌob xan.
4 Mʌnaꞌ mac cꞌuchaꞌan yor u tetic quir u beyaj a sacerdotejoꞌ soc u bʌjiriꞌ cu yocar beyaj sacerdote a noꞌjoꞌ.
Chen u bʌjiriꞌ Cꞌuj cꞌuchaꞌan yor u tetic soc yocar beyaj sacerdote an ten bic tsꞌaꞌb u beyaj Aarón ten Cꞌuj uch.
5 Bayiriꞌ xan,
Cristo.
U bʌjiriꞌ,
quij,
mʌꞌ tu tetaj u bʌjiriꞌ quir u beyaj quir u yocar sacerdote,
a noꞌjoꞌ.
Mʌꞌ ja wirej,
u bʌjiriꞌ Cꞌuj caj u tsꞌajaj u beyaj quireꞌ.
Cꞌuj caj u yaꞌaraj tiꞌ:
A techoꞌ,
quij Cꞌuj,
in pararech.
Tin pararinquintajech bajeꞌrer,
quij.
6 Baxuc xan tiꞌ wʌcꞌʌs araꞌb tiꞌ ten Cꞌuj an ten bic tsꞌibaꞌan ich u tꞌʌn Cꞌuj uch:
A tenoꞌ,
quij Cꞌuj,
tin tetajech soc a wocar sacerdotejech a jach noꞌjoꞌ soc yʌn tech u mucꞌ a Melquisedecoꞌ.
Munt qꞌuin yʌn tech u mucꞌ Melquisedec.
7 Wa ber cuxaꞌan Jesús teꞌraꞌ ich yocꞌocab uch.
Jach chich caj u tꞌʌnaj Cꞌuj tu cu cꞌatic a baꞌ u cꞌat,
tan u yocꞌar yaꞌarir u wich.
Cax yʌn u mucꞌ a Cꞌujoꞌ quir u toꞌcar Jesús chen quinsaꞌb uch,
quireꞌ baxuc u cꞌat Cꞌuj.
Cax Cꞌuj caj u yubaj u tꞌʌn Jesús quireꞌ Jesús rajraꞌ cu quibic u tꞌʌn.
8 Cax a Jesúsoꞌ u parar Cꞌuj,
cu naj quibic u tꞌʌn Cꞌuj Jesús,
cax tu cu naj mucꞌyaj.
9 Caj tsꞌoc u quibic tu cotor baꞌ,
Jesús caj u cꞌub u bʌj soc caꞌ quimic.
Caj quimij soc tu cotor mac a cu bin yacsej tu yor,
cu bin tacbir ten Jesús quir u cuxtar munt qꞌuin.
10 Quireꞌ a baxucoꞌ,
quij,
rajen a Cꞌujoꞌ caj u tetaj u parar soc u yocar sacerdote,
a jach noꞌjoꞌ soc yʌn u mucꞌ Melquisedec.
Quiꞌ irex, quij soc mʌꞌ a pꞌʌtiquex a wacsiquex ta worex tiꞌ Jesucristo
11 Tiꞌ yʌn yaꞌab baꞌ tiꞌ Cristo,
a sacerdotejoꞌ a noꞌjoꞌ,
quir in camsiquechex chen jach yaj quir a cʌniquex.
Mʌꞌ ja wirej,
mʌꞌ a cꞌatex a najtexiꞌ.
12-13 Jeroj uch,
a techexoꞌ,
caj a wacsex ta worex tiꞌ Jesús.
Chen a bʌjiriꞌex,
mʌꞌ tan a camsiquex mac u tꞌʌn Cꞌuj.
Ca chen cʌxtex mac caꞌ u camsequechex tiꞌ u tꞌʌn Cꞌuj,
a baꞌ ta yʌn cʌnajex uch caj a yʌn acsajex ta worex uch.
Ta chen cʌnex a chichanoꞌ,
a mʌꞌ cꞌuchaꞌan yor u jantic yoꞌoch,
cu chen chuch.
Baxuc ta cʌnex,
quireꞌ mʌꞌ tan a quiꞌ najtiquex a baꞌ cu yaꞌaric u tꞌʌn Cꞌuj,
mʌꞌ tan a manex tu tsoyir xan.
14 A mac a cu quiꞌ najtic a baꞌ tsꞌibaꞌan ich u tꞌʌn Cꞌuj yer bic tabar u tetic a baꞌ jach tsoy.
Cu najtic xan a baꞌ mʌꞌ tsoyiꞌ.