6
Quireꞌ a baxucoꞌ,
caꞌ ij cʌnex a baꞌ tsꞌibaꞌan ich u tꞌʌn Cꞌuj soc ij quiꞌ najtiquex tiꞌ.
A baꞌ tic yʌn cʌnajex uch caj ic yʌn acsex tij corex tiꞌ u tꞌʌn Cristo,
cax yaꞌab,
mʌꞌ rajraꞌ caꞌ ij cʌnex quireꞌ tiꞌ toy yʌn yaꞌab tsꞌibaꞌan ich u tꞌʌn Cꞌuj.
Caꞌ ic yʌn cʌnex a baꞌ tsoy.
Mʌꞌ tsoy caꞌ ic chen cʌnex bic tabar caꞌ ij cꞌaxex tij corex soc ic pꞌʌtiquex ic siꞌpirex,
tan ic toc ariquex tiꞌ Cꞌuj a baꞌ siꞌpir tij cacsex uch.
An ten bic caj ij cacsex tij corex tiꞌ Cꞌuj uch.
2 Mʌꞌ rajraꞌ caꞌ ij cʌnex a cu yaꞌaric,
rajraꞌ cu yacsic jaꞌ tu jor mac,
mʌꞌ rajraꞌ quij cʌnex a baꞌ a cu yaꞌaric,
cu tsꞌancꞌʌbtej mac.
Mʌꞌ rajraꞌ caꞌ ij cʌnex bic tabar a cu ricꞌsic mac u quimirir,
mʌꞌ rajraꞌ quij cʌniquex bic tabar a Cꞌujoꞌ bin u caꞌ taꞌquic u joꞌr mac a yʌn u siꞌpir soc u bin erar ich cꞌacꞌ munt qꞌuin.
Mʌꞌ ja wirej,
mʌꞌ chen jariꞌ caj cʌnexiꞌ aroꞌ.
3 Quireꞌ tiꞌ yʌn jach yaꞌab ich u tꞌʌn Cꞌuj caꞌ ij cʌnex soc jach manan caꞌ ij quiꞌ najtex u tꞌʌn Cꞌuj.
A baxucoꞌ jeꞌ ic betiquex an ten bic tsoy tu tꞌʌn Cꞌuj.
4 Yʌn mac a tu cꞌʌmajob u sasirir a cu tar tiꞌ Cꞌuj.
Robob caj u cꞌʌs tumtaj u tsoyir a tsꞌaꞌbob tiꞌ ten u Tajꞌor u Pixam Cꞌuj.
5 Robob caj u cꞌʌmajob a baꞌ jach tsoy tiꞌ u tꞌʌn Cꞌuj.
Robob caj esaꞌb tiꞌob ten Cꞌuj jun yar u chichir u mucꞌ Cꞌuj,
chen a ray mucꞌoꞌ jach manan cu bin irbir caꞌ bin cꞌuchuc tu qꞌuinin ich caꞌanan.
6 Wa baxucoꞌ caj cꞌuchob tiꞌ Cꞌuj chen pachir caj u pꞌuspachtob tiꞌ Cꞌuj aroꞌ irej wa wʌcꞌʌs sinij u parar Cꞌuj ich cruz quireꞌ tan u pachꞌicob tiꞌ.
7 A Cꞌujoꞌ cu betic tiꞌ tsoy a ruꞌumoꞌ,
a tenten u tar a yaꞌariroꞌ cu yuqꞌuic a ruꞌumoꞌ soc u yamtic a mac a yʌn u cor soc u tsꞌic yoꞌoch tiꞌ a mac a cu jaric u cor.
8 Wa ja ruꞌumoꞌ cu chen jocꞌar u qꞌuiꞌixer yejer u roꞌobir,
a raꞌ cu bin tocar ten a mac a cu jaric u cor.
A baxucoꞌ cu betic Cꞌuj tiꞌ mac xan.
Caꞌ ij quiꞌ acsex tij corex tiꞌ Cristo
9 A tenoꞌ caj in tsꞌib techex in wet acsʌꞌorirex a mac in jach yaj soc a werex baꞌ u ber tiꞌ mac a cu pꞌuspachticob tiꞌ Cꞌuj.
Quireꞌ quin tsꞌibtic tiꞌ techex quireꞌ in wer jach taj jeꞌ u taquiquechex Cꞌujeꞌ.
Quireꞌ rajiꞌ tan u yamtiquechex quir a manex tu tsoyir.
10 A Cꞌujoꞌ,
jach tsoy quireꞌ rajraꞌ cu betic a baꞌ jach manan tsoy.
Rajiꞌ cu bin boꞌotbir mac a cu yajquintic mac,
quireꞌ cu yamtic tiꞌ mac.
U berer bajeꞌrer cu yamtic a tiꞌoboꞌ.
Mʌꞌ ja wirej,
a Cꞌujoꞌ mʌꞌ u tubur tiꞌ,
jeꞌ u bin boꞌotbirob ten Cꞌuj.
11 Chen caꞌ a quiꞌ pꞌisex a bʌjex an ten bic caj a yamtex tiꞌ mac uch hasta caꞌ bin cꞌuchuc tu qꞌuinin a Cꞌujoꞌ cu bin u quiꞌ acsiquechex ich caꞌanan.
12 Mʌꞌ a yʌn mʌꞌ cꞌortarex tu ca muchꞌquintiquex a bʌjex quir a wuꞌyiquex u tꞌʌn Cꞌuj,
chen quiꞌ cʌnex a mac a tu quiꞌ cʌnaj u yacsic tu yor tiꞌ u tꞌʌn Cꞌuj,
a robob a cu pajicob,
jeꞌ u bin cꞌʌmbir a baꞌ toc araꞌb tiꞌ ten Cꞌujeꞌ.
13 Wa ber a Cꞌujoꞌ caj u toc araj tiꞌ Abraham uch,
bin u caꞌ pararinquintic u parar,
caj u jach toc araj Cꞌuj yejer u mucꞌ,
quireꞌ mʌnaꞌ u jer mac yʌn u mucꞌ an ten bic Cꞌuj yʌnin,
quireꞌ jach manan u mucꞌ a Cꞌujoꞌ.
14 Caj araꞌb ten Cꞌuj tiꞌ ic nunquirex Abraham uch:
“Jeꞌ in quiꞌ yamtiquech Abraham.
A tenoꞌ,
quij Cꞌuj,
quin bin in pimquintic u parar a caꞌ parar”,
quij.
15 Ic nunquirex Abraham caj pararnʌjij u parar an ten bic toc araꞌb tiꞌ ten Cꞌuj Abraham.
Nemʌꞌ biquiꞌ Abraham hasta cꞌuchij tu qꞌuinin caj u toc nupꞌsaj a Cꞌujoꞌ,
a baꞌ tu toc araj tiꞌ uch.
Mʌꞌ ja wirej,
Sara,
rajiꞌ u racꞌ,
caj u rochaj u chan ochir.
16 Mʌꞌ ja wirej,
a mac a tiꞌ yʌn ich yocꞌocabaꞌ cu yaꞌaric ich u racꞌob:
“Cꞌuj cu yiric”,
wa mac cu jach toc aric a baꞌ tiꞌ mac.
Baxuc cu yaꞌaricob,
quireꞌ mʌnaꞌ u jer yʌn u mucꞌ an ten bic Cꞌuj.
Rajen cu yaꞌaricob:
“Cꞌuj cu yiric”,
tu cu jach toc aric baꞌ,
quireꞌ mʌꞌ baꞌwir quir u yaꞌaric u jer,
toc tsꞌoquij.
17 Baxucoꞌ xan,
a Cꞌujoꞌ caj u toc araj tiꞌ ic nunquirex Abraham,
cu bin u pararʌncʌr caj u toc aꞌaraj Cꞌuj yejer u mucꞌ,
soc yer taj mac wa rajiꞌ jeꞌ u nupꞌsic a baꞌ tu toc araj tiꞌ ic nunquirex Abraham.
A mʌꞌ ju cꞌax u tucur a Cꞌujoꞌ.
18 Mʌꞌ ja wirej,
baxuc caj u toc araj Cꞌuj yejer tu cotor u mucꞌ,
rajen cꞌuchaꞌan ij corex caꞌ ij cacsex tij corex tiꞌ wa ber cu toc aric baꞌ tiꞌ toꞌonex.
Mʌꞌ ja wirej,
tu cotoroꞌonex a tij cꞌubex ic pixamex tiꞌ Cꞌuj quir u taquicoꞌonex,
mʌꞌ baꞌwir caꞌ ic jacꞌsex ij corex.
Jeꞌ u taquicoꞌonex an ten bic caj u toc araj tiꞌ toꞌonex.
19 Quireꞌ cu taquicoꞌonex an ten bic tu toc araj toꞌonex uch.
Rajen mʌꞌ u pec ic pixamex,
quireꞌ jach manan u cʌnantaꞌ ic pixamex quireꞌ pꞌeriꞌ ic pixamex yejer Cꞌuj ich caꞌanan.
20 Mʌꞌ ja wirej,
Cristo tu betaj u berir tiꞌ toꞌonex quir ij cꞌuchurex ich Cꞌuj.
A baywoꞌ,
quij,
tiꞌ yʌn Jesús ich caꞌanan tiꞌ toꞌonex an ten bic sacerdote a jach noꞌjoꞌ,
chen yʌn u mucꞌ Jesús an ten bic u mucꞌ sacerdote Melquisedec,
a mʌꞌ u bin xupur u mucꞌ mʌꞌ biqꞌuin cu xupur u mucꞌ.