Ic Jaj Tsꞌurirex Jesucristo toc yʌn u mucꞌ Melquisedec
7
A jeꞌ Melquisedecaꞌ,
rajiꞌ u rey u cajar Salem uch.
Raꞌiriꞌ u bʌjiriꞌ xan sacerdote a jach noꞌj tiꞌ Cꞌuj.
Rajiꞌ yʌn u mucꞌ Cꞌuj jach manan.
A uchoꞌ caj urij ic nunquirex Abraham tu tu baꞌtetaj cuatro a reyob,
quireꞌ robob caj u yaꞌcrajob u yum Abraham.
A Melquisedecoꞌ,
caj joqꞌuij tu cajar quir u nupꞌic ic nunquirex Abraham ich ber.
Rajiꞌ caj u tꞌʌnaj Cꞌuj tan u cꞌataꞌ tiꞌ caꞌ yamtac Abraham ten Cꞌuj tiꞌ.
2 Mʌꞌ ja wirej,
ic nunquirex Abraham caj u jʌsaj tiꞌ a sacerdote,
a noꞌjoꞌ,
raꞌ u cꞌabaꞌ Melquisedec.
Caj jasij ten Abraham a baꞌ tu chꞌaj caj u baꞌtetaj a cuatro reyob.
Tu tu chꞌaj diez u baꞌtʌc caj u tsꞌaja tuririꞌ tiꞌ Melquisedec.
Baxuc caj u betaj,
jas tiꞌ ten Abraham ich tu cotor baꞌ a tu chꞌaj tu tu baꞌtetaj a reyoꞌ.
A Melquisedec rajiꞌ u rey u cajar Salem.
U cꞌabaꞌ Melquisedec u cꞌat yaꞌarej:
“Jach tsoy rey.”
Bayiriꞌ ij querex tu cu reyinticob Melquisedec tu cajar Salem mʌꞌ tsꞌic mac,
quireꞌ baxuc u cꞌat yaꞌarej u cꞌabaꞌ u cajar:
“Mʌꞌ tsꞌic mac.”
3 A Melquisedecoꞌ irej wa mac tu junan caj tar quireꞌ mix yer mac u nʌꞌ,
mix yer mac u tet xan.
Mʌꞌ ij querex maquiꞌ.
Mix yer mac baꞌ yoꞌnen Melquisedec.
Mʌnaꞌ mac yer ber caj rochaꞌb ten u nʌꞌ,
mix mac yer ber caj quimij.
Rajen rajiꞌ irej ic Jaj Tsꞌurirex Jesucristo u parar Cꞌuj.
Mʌꞌ ja wirej,
rajiꞌ caj oc tu beyaj an ten bic sacerdote a jach manan noꞌjoꞌ,
quireꞌ rajiꞌ yʌn u mucꞌ,
a mʌꞌ u xupur u mucꞌ.
4 Mʌꞌ ja wirej,
chʌcaꞌan ij quiriquex wa Melquisedec toc yʌn u mucꞌ quir u beyaj tiꞌ Cꞌuj.
A Melquisedecoꞌ irej sacerdote,
a jach noꞌjoꞌ.
Quireꞌ cax ic nunquirex Abraham uch tu tu chꞌaj u baꞌtac tu tu baꞌteꞌtaj rey,
a cuatrojoꞌ,
caj u tsꞌaja tiꞌ Melquisedec.
Caj u tsꞌaja tiꞌ Melquisedec tuririꞌ u baꞌtacoꞌ ich a diezoꞌ.
5 Cꞌaj wa techex baꞌ tsꞌibtaꞌb ten ic nunquirex Moisés ich u tꞌʌn Cꞌuj uch,
quij.
Caj u chich araj toꞌonex u winiquirob judío:
“Caꞌ a jʌsex a baꞌtaquex a tiꞌ a sacerdotejoꞌ a raꞌ cu tar tiꞌ yoꞌnen Leví.
Caꞌ a jʌsex tiꞌob tuririꞌ a baꞌtaquex wa ber yʌnechex diez.”
Baxuc caꞌ ij quibex quireꞌ tu cotoroꞌonex raꞌ ic nunquirex Abraham.
6 Chen a Melquisedecoꞌ,
cax mʌꞌ raꞌ u yoꞌnen Leví caj u cꞌʌmaj a baꞌ tsꞌab tiꞌ ten ic nunquirex Abraham uch.
Mʌꞌ ja wirej,
a Cꞌujoꞌ caj u toc araj tiꞌ Abraham uch,
cu bin u quiꞌ yamtej Abraham caj tsꞌoc u cꞌubic u parar Isaac quir u quinsac uch.
Chen Melquisedec caj u cꞌʌmaj a baꞌ tsꞌaꞌb tiꞌ ten Abraham rajen Melquisedec caj u cꞌataj tiꞌ Cꞌuj caꞌ u yamt ic nunquirex Abraham uch.
7 A toꞌonexoꞌ,
ij querex wa mac cu tꞌʌnic Cꞌuj caꞌ u yamtej u racꞌob,
raꞌ jach manan yʌn u mucꞌ.
Chen a mac a cu bin yamtac ten Cꞌuj,
mʌꞌ ju cꞌuchur yor tiꞌ a mac a tu tꞌʌnaj Cꞌuj soc yamtaꞌbir ten Cꞌuj u racꞌob.
8 Mʌꞌ ja wirej,
a sacerdotejoꞌ,
a tiꞌ cu tar yoꞌnen Leví uch,
a tuririꞌ baꞌ tu cꞌʌmaj,
wa ber yʌn diez u baꞌtacob tiꞌ u yet winiquirob judío.
Robob a sacerdotejoꞌ,
a tiꞌ cu tar yoꞌnen Leví,
quimij xan,
chen a baꞌ tsꞌibaꞌan ich u tꞌʌn Cꞌuj tiꞌ Melquisedec irej wa tiꞌ toy cuxaꞌan.
9-10 A Levíjoꞌ yejer tu cotor sacerdote,
a rub tu pach Leví,
quireꞌ u beririꞌ bajeꞌrer cu cꞌʌmicob a tuririꞌ u baꞌtac ich a diezoꞌ.
A Levíjoꞌ raꞌ u nunquir tiꞌ tu cotor sacerdote irob wa pꞌeriꞌob yejer ic nunquirex Abraham ber caj sʌjtaꞌb Melquisedec ten Abraham,
cax mʌꞌ toy rochaꞌb ten u nʌꞌ Leví tu qꞌuinin Abraham,
quireꞌ rajiꞌ u chꞌic sucuꞌun.
11 Tiꞌ u tar a sacerdotejoꞌ,
tiꞌ u nunquir Leví,
bayiriꞌ xan,
a sacerdotejoꞌ,
a tiꞌ cu tar Aarón,
robob u beyajob quir u beticob tu cotor a baꞌ tiꞌ yʌn ich u tꞌʌn Moisés soc u yamticob u yet winiquirob israel.
Chen u winiquirob israel mʌꞌ cꞌuchaꞌan yor u bin tacbirob ten u beyaj sacerdote a cu tar tiꞌ u nunquir Leví.
Rajen a Cꞌujoꞌ yer yʌn u tuchiꞌtic Jesucristo soc yʌn u mucꞌ Melquisedec,
a sacerdote a jach noꞌjoꞌ.
Mʌꞌ ja wirej,
rajiꞌ mʌꞌ tarij tiꞌ yoꞌnen Leví.
12 Rajen a Cꞌujoꞌ caj cꞌox u mucꞌ a sacerdotejoꞌ,
bayiriꞌ xan,
caꞌ cꞌox u jer u tꞌʌn an ten bic tabar sacerdote caj cꞌox u mucꞌ.
13 Baxuc caj joqꞌuij,
quireꞌ ic Jaj Tsꞌurirex Jesucristo mʌꞌ rajiꞌ yoꞌnen Leví,
a tu cu tar a mac a cu yocar beyaj a sacerdotejoꞌ.
14 Mʌꞌ ja wirej,
chʌcaꞌan caꞌ ij quirex tub u tar u yoꞌnen ic Jaj Tsꞌurirex,
jach taj tiꞌ u tar yoꞌnen ich Judá.
Mʌꞌ ja wirej,
a Moisésoꞌ caj u toc araj tiꞌ u tar yoꞌnen ich Leví a sacerdotejoꞌ,
jaririꞌ ich yoꞌnenob u winiquirob israel.
Mʌꞌ ju yaꞌaraj u jer.
15 Mʌꞌ ja wirej,
jach chʌcaꞌan ij quiriquex caj cꞌox u jer u tꞌʌn an ten bic tabar a sacerdotejoꞌ,
quireꞌ ic Jaj Tsurirex quij,
yʌn jach chich u mucꞌ an ten bic jach chich u mucꞌ Melquisedec uch.
16 Mʌꞌ ja wirej,
tsꞌaꞌb u mucꞌ ten Cꞌuj Jesús,
cax mʌꞌ rajiꞌ yoꞌnen Leví a tiꞌ cu naj tar a sacerdotejoꞌ ich u winiquirob israel.
Chen Jesús yʌn u mucꞌ munt qꞌuin an ten bic tabar a sacerdotejoꞌ.
Mʌꞌ ja wirej,
mʌꞌ u quimin xan.
17 Mʌꞌ ja wirej,
baxuc caj tsicbanʌj Cꞌuj uch,
caj u tsicbʌtaj tiꞌ Cristo uch caj yaꞌaraj:
A techoꞌ,
quij Cꞌuj,
caj in tetatech soc a wocar beyaj sacerdotejech,
a jach noꞌjoꞌ,
soc yʌn tech a mucꞌ an ten bic u mucꞌ Melquisedec uch.
A mucꞌ a techoꞌ,
munt qꞌuin tech yʌn a mucꞌ.
Mʌꞌ u xupur a mucꞌ.
18 Baxucoꞌ,
a Cꞌujoꞌ caj u cꞌax u jer tꞌʌn an ten bic tabar u beyaj a sacerdote an ten bic caj u tsꞌibtaj Moisés a uchoꞌ,
quireꞌ aroꞌ mʌnaꞌ u mucꞌ a yʌn betaꞌb quir u tocar mac.
19 Quireꞌ mʌꞌ cꞌuchaꞌan yor mac tacbir tiꞌ u siꞌpir ten u tꞌʌn Moisés.
Barej caj tarij ic Jaj Tsꞌurirex,
a mac jach manan u mucꞌ,
rajiꞌ caj u rucꞌs u tꞌʌn Moisés quireꞌ mʌꞌ baꞌwir tiꞌ.
Rajen caꞌ ij cacsex tij corex caꞌ yacsoꞌonex Cꞌuj ich caꞌanan.
20 Mʌꞌ ja wirej,
wa ber caj tuchiꞌtaꞌb ic Jaj Tsꞌurirex ten Cꞌuj,
rajiꞌ jach toc araꞌb yocar beyaj an ten bic a sacardotejoꞌ.
21 Chen a Cꞌujoꞌ mʌꞌ jach toc araꞌb tiꞌ a sacerdotejoꞌ a tiꞌ u tar yoꞌnen Leví a baxucoꞌ.
Chen a Cꞌujoꞌ,
wa ber caj u tsꞌajaj u mucꞌ tiꞌ Jesús caj u jach toc araj tiꞌ an ten bic baxuc tsꞌibaꞌan xan uch.
Ic Jaj Tsꞌurirex Cꞌuj caj u jach toc araj tiꞌ rajen yʌn u nupꞌsic a baꞌ tu yaꞌaraj Cꞌuj tiꞌ u parar.
Caj araꞌb ten Cꞌuj tiꞌ u parar:
A tenoꞌ,
quij Cꞌuj,
tin toc tetech soc a wocar beyaj sacerdotejech,
a jach noꞌjoꞌ,
soc yʌn tech a mucꞌ an ten bic u mucꞌ Melquisedec uch.
A mucꞌ a techoꞌ,
munt qꞌuin yʌn a mucꞌ.
Baxuc caj araꞌb tiꞌ ten Cꞌuj.
22 Quireꞌ a Jesúsoꞌ,
toc yʌn u mucꞌ baxucoꞌ,
rajen a baꞌ jach toc araꞌb ten Cꞌuj Cꞌuj tiꞌ toꞌonex uch bin u caꞌ nupꞌsic u tꞌʌn.
Mʌꞌ ja wirej,
a baꞌ toc araꞌb ich yocꞌor Jesús jach manan tiꞌ a baꞌ toc araꞌb tiꞌ Moisés ten Cꞌuj uch.
23 Robob,
sacerdotejoꞌ,
quij,
a tiꞌ cu tar ich yoꞌnen Leví jach pim a uchoꞌ,
caj rʌc quimob.
Caj tsꞌoc u quiminob caj ocꞌob u jer tu beyajob.
Caj quimob an ten bic tu cotor mac ich yocꞌocab cu quiminob,
rajen caj ocaꞌb u jer tu beyajob.
24 Chen ic Jaj Tsꞌurirex Jesucristo toc yʌn u mucꞌ an ten bic sacerdote a jach noꞌjoꞌ,
munt qꞌuin quireꞌ rajiꞌ mʌꞌ u quimin.
Mʌꞌ u xupur u mucꞌ.
25 Chen a mac a cu bin acsaꞌbir ten Cꞌuj ich caꞌanan quireꞌ a baꞌ tu betaj Jesús uch,
cu bin tacbir ten Jesús quir u cuxtar munt qꞌuin.
Quireꞌ tiꞌ yʌn Jesús munt qꞌuin quir u tꞌʌnic Cꞌuj tiꞌob ich caꞌanan.
26 A baxucoꞌ,
ij cꞌatex tuririꞌ sacerdote,
a jach noꞌjoꞌ an ten bic Jesús.
Rajiꞌ jach tsoy yor quireꞌ rajraꞌ cu betic a baꞌ jach manan soy tu tꞌʌn Cꞌuj,
mʌnaꞌ u siꞌpir tiꞌ,
A Jesúsoꞌ mʌꞌ quet yejer a mac a yʌn u siꞌpir.
Caj u tsꞌajaj sʌjtaꞌbir Jesús ten Cꞌuj quireꞌ acsaꞌbir Jesús ich caꞌanan.
27 Cꞌaj wa techex,
robob a sacerdote uchoꞌ,
a jach noꞌjoꞌ a nanij u quinsic yʌrʌcꞌ mac quir u toꞌquic u sijic tiꞌ Cꞌuj soc u boꞌotic u boꞌorir u siꞌpir mac.
A sacerdotej a noꞌjoꞌ,
mʌꞌ u chen quinsicob yʌrʌcꞌ tiꞌ u yet winiquirob israel,
caj u quinsob u bʌjiriꞌ quir u boꞌoticob u boꞌorir u bʌjiriꞌ u siꞌpirob xan.
Chen ic Jaj Tsꞌurirex Jesucristo,
u bʌjiriꞌ tu cꞌubaj u bʌj soc u quinsaꞌ quir u rʌc boꞌotic u boꞌorir u siꞌpir tu cotor mac.
Chen teniꞌ caj u boꞌotaj,
quireꞌ mʌꞌ baꞌwir tiꞌ u jer.
28 Tu cotorob sacerdote a jach noꞌjoꞌ,
a tiꞌ u tar yoꞌnen Aarón nanij u beyajob quir u beticob a baꞌ caj araꞌbob tiꞌ ten Moisés ich u tꞌʌn.
Robob tʌcʌ yʌn u siꞌpirob.
Chen u tꞌʌn a baꞌ tu toc araj Cꞌuj uch,
cax mʌꞌ toy tsꞌibaꞌan u tꞌʌn Moisés,
quireꞌ raꞌ pachir caj tsꞌibtaꞌb.
A baꞌ tu toc araj Cꞌuj uch,
raꞌ tu tetaj u parar uch.
Rajiꞌ mʌnaꞌ u siꞌpir.
Rajiꞌ jach manan cꞌuchaꞌan yor an ten bic sacerdote.