A quet u tꞌʌnoꞌ, a ricꞌbenoꞌ
8
Ic Jaj Tsꞌurirex caj oquij ich caꞌanan an ten bic sacerdote a jach noꞌjoꞌ.
Caj cuquintaꞌb ten Cꞌuj a Jesúsoꞌ ich u noj ich caꞌanan quir u caremquintic u cꞌabaꞌ.
Aroꞌ jach noꞌj,
mʌnaꞌ u jer jach manan noꞌj tiꞌ a baꞌ quin tsꞌibtic tiꞌ techex.
2 Quireꞌ a sacerdote,
a jach noꞌjoꞌ,
a mac cʌjaꞌan teꞌ ich yocꞌocab,
nanij u beyaj tu japnin carem naj tu cu naj cꞌujinticob Cꞌuj u winiquirob judío.
A ray najoꞌ toc tsꞌʌpquintaꞌb ten mac ich yocꞌocab.
Chen tu cu yocar Jesús ich caꞌanan mʌꞌ tsꞌʌpquintaꞌb ten mac.
3 Robob a sacerdote,
a jach noꞌjoꞌ,
cu naj tsꞌic tiꞌ Cꞌuj a baꞌ cu tar purbir ten u yet winiquirob judíojoꞌ tu cu toꞌquicob tiꞌ Cꞌuj.
Cax a sijbarob ten u yet winiquirob judío tiꞌ Cꞌuj,
cax quir u boꞌotic u boꞌorir u siꞌpirob.
Rajen ic Jaj Tsꞌurirex caj tarij tu cꞌub u wʌcꞌʌs bʌjiriꞌ quir u boꞌotic u boꞌorir ic siꞌpirex ich u cruz.
4 Jaj ix tʌcoj wa jic Jaj Tsꞌirirex wa toc yʌn teꞌ ich yocꞌocab bajeꞌrer,
rajiꞌ mʌꞌ cꞌuchaꞌan yor ocar beyaj sacerdote an ten bic sacerdote a cu bin purbir tu cu naj toꞌquic quir u tsꞌic baꞌ tiꞌ Cꞌuj,
quir u quibic a baꞌ tsꞌibaꞌan ten Moisés ich u tꞌʌn.
Mʌꞌ ja wirej,
robob u sacerdote raꞌ u toc beyajob tiꞌ Cꞌuj.
5 Mʌꞌ ja wirej,
a sacerdotejoꞌ,
a cu yocarob tu beyajob ich u japnin naj tu cu naj cꞌujinticob Cꞌuj u winiquirob judío.
A ray najoꞌ,
cꞌʌxbir ten u winiquirob judío ich yocꞌocab tus etsꞌbir quet yejer a baꞌ yʌn ich caꞌananoꞌ,
quireꞌ tu caꞌtajob u winiquirob judío tiꞌ a baꞌ esbir tiꞌob ten Moisés uch.
Mʌꞌ ja wirej,
caj araꞌb ten Cꞌuj tiꞌ Moisés uch:
“Quiꞌ irex bic tabar a cꞌʌxiquex u najir tu ca bin a cꞌujintiquenex yejer a wet winiquirob judíojoꞌ.
Quet bayiriꞌ caꞌ a cꞌʌxex an ten bic caj in wesaj techex ich u joꞌr pꞌuc wits.”
Baxuc caj araꞌb ten Cꞌuj.
6 Robob a sacerdotejoꞌ,
a tiꞌ cu tar ich yoꞌnen Leví,
caj beyanʌjob teraꞌ ich yocꞌocab.
Chen ic Jaj Tsꞌurirex caj oc beyaj caꞌanan an ten bic sacerdote a jach noꞌjoꞌ ʌcʌtan tiꞌ Cꞌuj quir u tꞌʌnic Cꞌuj tiꞌ toꞌonex.
Rajen u mucꞌ a Jesúsoꞌ jach manan tiꞌ a sacerdotejoꞌ,
a tiꞌ cu tar ich yoꞌnen Leví.
Robob mʌꞌ ju cꞌuchur u mucꞌob tiꞌ Jesús.
Mʌꞌ ja wirej,
u mucꞌ a utsquintaꞌb ten Cꞌuj,
jach manan tiꞌ u mucꞌ a tsꞌaꞌb ten Cꞌuj tiꞌ Moisés uch.
A quet u tꞌʌnoꞌ a caj tsꞌaꞌb ten Cꞌuj tiꞌ toꞌonex bajeꞌrer jach manan tiꞌ a quet u tꞌʌnoꞌ,
a tsꞌaꞌb ten Cꞌuj tiꞌ ic nunquirex uch.
7 A ray quet u tꞌʌnoꞌ,
a uchbenoꞌ mʌꞌ nequiꞌ joqꞌuij rajen a Cꞌujoꞌ caj u wʌcꞌʌs paꞌaj u jer,
quij.
8 Quireꞌ ic Jaj Tsꞌurirex Cꞌuj caj u yiraj u winiquirob judío mʌꞌ quet yorob u tꞌʌn,
a uchbenoꞌ rajen caj yaꞌaraj:
Caꞌ bin cꞌuchuc tu qꞌuinin,
quij Cꞌuj,
jeꞌ in wʌcꞌʌs pajic u jer a quet u tꞌʌnoꞌ yejer u winiquirob israel,
bayiriꞌ yejer a mac a tiꞌ cu tar yoꞌnen Judá.
9 Jeꞌ in wʌcꞌʌs pajic u jer a quet u tꞌʌnoꞌ chen aroꞌ mʌꞌ quet yejer a tin betaj yejer a nunquirex wa ber caj in yamtob,
caj in jocꞌsaj a tiꞌoboꞌ tu ruꞌumin Egipto uch.
Robob mʌꞌ tu quibajob in tꞌʌn a tin tsꞌaja tiꞌob rajen caj in pꞌuspachtaj tiꞌob,
baxuc cu yaꞌaric ic Jaj Tsꞌurirex Cꞌuj.
10 Wa ber caꞌ bin cꞌuchuc tu qꞌuinin,
quij Cꞌuj,
caꞌ bin in tsꞌic tiꞌ u winiquirob israel u jerob a quet u tꞌʌnoꞌ,
jeꞌ in tsꞌic tiꞌ caꞌ toc ocac in tꞌʌn tu pixamob u winiquirob israel soc u najticob in mucꞌ,
quij soc mʌꞌ u bin tubur tiꞌ.
A ray u quininoꞌ,
quij Cꞌuj,
a rajiꞌob a ten yʌninob,
jach quiꞌ bin u yajquintiquenob.
11 Wa ber caꞌ bin cꞌuchuc a ray u qꞌuininoꞌ,
quij Cꞌuj,
mʌꞌ baꞌwir mac quir ij camsic.
A mac tan yaꞌaric tiꞌ u bʌjob,
cax wa ja mac cʌjaꞌan tu cajar:
“Cʌnex Cꞌuj”,
quireꞌ cu bin u rʌc najtob in tꞌʌn,
cax a mac carem,
cax a mac a mʌꞌ caremiꞌ,
tu toc rʌc najtob.
12 A tenoꞌ,
quij Cꞌuj,
quin bin in jawsic u siꞌpirob,
mix quin bin in cꞌʌꞌotic u siꞌpirob,
mʌꞌ biqꞌuin.
A baxuc araꞌb ten Cꞌuj uch.
13 Quireꞌ a baxuc caj yaꞌaraj Cꞌuj caj u wʌcꞌʌs paꞌaj u jer quet u tꞌʌn yejer ricꞌben tꞌʌn.
Rajen ij querex toc xup u mucꞌ a quet u tꞌʌn a uchbenoꞌ quireꞌ tabar u xupur u mucꞌ.