A najir tu cu naj cꞌujinticob Cꞌuj u winiquirob judío ich u cajar Jerusalén. U najir a tajoꞌ a tiꞌ yʌn ich caꞌananoꞌ
9
Mʌꞌ ja wirej,
ich a quet u tꞌʌnoꞌ a uchbenoꞌ Moisés caj u yaꞌaraj tiꞌ ij quet winiquirob israel bic tabar caꞌ ij cꞌujintex Cꞌuj ich u najir teraꞌ ich yocꞌocabaꞌ.
2 Mʌꞌ ja wirej,
a ray naj sinaꞌanoꞌ.
Tiꞌ yʌn jun cꞌas ich a ray najoꞌ a caj u yaꞌaraj ic nunquirex uch:
“U cuchir tu cu jacꞌar u yor mac.”
Tu japnin arayoꞌ,
tiꞌ yʌn u cuchir a cu chꞌiquintic yaꞌab u quibir ras,
bayiriꞌ tiꞌ yʌn xan,
u pojcheꞌ tu tꞌʌraꞌan a panoꞌ,
a cu jacꞌar yor macoꞌ.
3 Caꞌ bin ocac mac tu japnin u najir tu cu naj cꞌujinticob Cꞌuj ic nunquirex uch.
Tiꞌ tꞌinaꞌan u jer nocꞌ chumuc,
jach pim a nocꞌoꞌ.
Tiꞌ sinaꞌan u noqꞌuir ich u coꞌchir u tan naj.
Jenen u yoquir u nocꞌ ich ruꞌum,
quij.
Tu pach a jach pim nocꞌoꞌ,
tu tꞌinaꞌan ich u najir tu cu cꞌujinticob Cꞌuj u winiquirob israel,
tiꞌ yʌn u cuchir tu cu tsꞌic tiꞌ Cꞌuj.
Aroꞌ jun cꞌas naj,
a jach manan u jacꞌar yor mac.
4 A ray u cuchiroꞌ tu cu tsꞌic tiꞌ Cꞌuj,
tʌcʌj oro betaꞌan u cuchir raꞌ quir u toꞌquic tiꞌ Cꞌuj a quiꞌ u boqueꞌ.
Bayiriꞌ,
xan,
tiꞌ yʌn u jer u cuchir tu japnin naj tu cu cꞌujinticob Cꞌuj u winiquirob israel.
A ray u cuchiroꞌ,
u cuchir oro xan.
Toc betaꞌan oro tu japnin u cuchir.
Toc betaꞌan oro tu pach u cuchir.
Toc betaꞌan oro tu tser u cuchir.
A jeꞌ cuchir a caj betaꞌb a ray u qꞌuinino caj u quetquintajob u tꞌʌn u winiquirob israel yejer Cꞌuj.
Raꞌ tu batꞌan quetquintob u tꞌʌnob uch yejer Cꞌuj.
Tu japnin a ray u cuchiroꞌ tiꞌ butaꞌan u chan pꞌurir a betaꞌb oro.
Tiꞌ butꞌaꞌan chichin och,
u cꞌabaꞌ mana tu jantajob u winiquirob israel uch caj manob ich tʌcay ruꞌum uch,
quij.
Bayiriꞌ,
xan,
tiꞌ butꞌaꞌan u xonteꞌ Aarón a jocꞌ u cꞌucꞌ uch a raꞌ yʌnin Aarón u sucuꞌun Moises uch.
Bayiriꞌ xan,
tiꞌ butꞌaꞌan u tunichir tu tsꞌibaꞌan u tꞌʌn Cꞌuj,
a diezoꞌ,
a tsꞌaꞌb ten Cꞌuj tiꞌ Moisés uch.
5 U mac u jor u chan cuchir a rʌc toc betaꞌb oro raꞌjiꞌ cu waꞌquic u qꞌuiqꞌuer a yʌrʌcꞌoꞌ ich u mac u jor quir u boꞌotic u siꞌpir u winiquirob israel.
Tiꞌ yʌn caꞌtur cu tus etsꞌtic yʌjmasirob u tꞌʌn Cꞌuj,
tan u pixicob u mac u jor u chan cuchir a betaꞌb oro,
chꞌiquicbarob u tus yʌjetsꞌirob yʌjmasirob u tꞌʌn Cꞌuj.
Robob caj u joꞌtꞌantob oro ten mac soc u tus etsꞌticob yʌjmasirob u tꞌʌn Cꞌuj.
Cu xitꞌob u cꞌʌbob ich yocꞌor u chan cuchir.
Aroꞌ cu jach jacꞌar u yor mac quireꞌ tiꞌ cu tar Cꞌuj quir u tꞌʌnic u winiquirob israel.
Chen bajeꞌrer tsꞌoc in tsicbar techex tiꞌ u chan cuchir a betaꞌb oro.
6 A baywoꞌ,
toc tiꞌ yʌn tu cotor baꞌ ich u japnin u najir tu tꞌinaꞌan quir u cꞌujinticob Cꞌuj u winiquirob israel.
Tiꞌ cu naj ocar a sacerdote quir u betic an ten bic nanij cu betic quir u cꞌujinticob Cꞌuj u winiquirob israel.
7 Chen tu jach japnin naj,
tu yʌn u chan cuchir a cu jacꞌʌr yor mac.
Jariꞌ cu cꞌuchur a sacerdotejoꞌ a jach noꞌjoꞌ,
teniꞌ yocar sacerdotej.
Tanjaꞌ caꞌ bin ocac tu japnin naj a jun cꞌasoꞌ tu cu jacꞌar yor mac.
A sacerdotejoꞌ,
a jach noꞌjoꞌ yet tar u qꞌuiqꞌuer yʌrʌcꞌ quir u rucꞌsic u boꞌorir u siꞌpir u yet winiquirob israel.
Bayiriꞌ xan,
u boꞌorir u wʌcꞌʌs bʌjiriꞌ u siꞌpir xan.
Tiꞌ cu waqꞌuic u qꞌuiqꞌuer u mac tu jor u chan cuchir a cu jacꞌar yor mac quir u rucꞌsic u siꞌpirob.
8 A baywoꞌ,
u Tajꞌor u Pixam Cꞌuj tan u camsicoꞌonex caꞌ ic najtejex tiꞌ toy yʌn u mucꞌ a quet u tꞌʌnoꞌ a tu tsꞌibtaj Moisés uch.
Tiꞌ toy cu beyaj quireꞌ tiꞌ toy tꞌinaꞌan u noqꞌuir a jach pimoꞌ tu chumuc u japnin naj,
a jun cꞌasoꞌ tu cu naj cꞌujinticob Cꞌuj u winiquirob israel.
Rajen tu cotor mac mʌꞌ cꞌuchaꞌan yor yocarob tu jach japnin naj tu yʌn a chan cuchir a cu jacꞌar yor macoꞌ.
9 Quireꞌ a nocꞌoꞌ,
a jach pim a tiꞌ tꞌinaꞌan tu japnin naj tu cu naj cꞌujinticob Cꞌuj u winiquirob israel.
Raꞌ cu camsicoꞌonex u winiquirob israel mʌꞌ cꞌuchaꞌan yor u natsꞌar ich Cꞌuj quireꞌ tiꞌ toy yʌn u mucꞌ a quet u tꞌʌnoꞌ a tsꞌibtaꞌb ten Moisés uch.
Mʌꞌ ja wirej,
quij,
cax a baꞌ cu tarob u purob quir u tsꞌic tiꞌ Cꞌuj u boꞌorir quir u rucꞌsicob u siꞌpirob.
Mʌꞌ ju tar yor soc jach tiꞌ yʌn yor u winiquirob israel.
10 Mʌꞌ ja wirej,
quij,
raꞌ u mucꞌ a uchbenoꞌ a quet u tꞌʌnoꞌ,
a tu tsꞌibtaj Moisés uch,
quij,
raꞌ soc yerob quir u yesic u winiquirob israel bic tabar u pꞌoꞌicob u cꞌʌb quir u tar u cꞌujinticob Cꞌuj,
bayiriꞌ xan,
a baꞌ tsoy u janticob bayiriꞌ a baꞌ tsoy u yuqꞌuicob.
Tu cotor aroꞌ tiꞌ yʌn hasta cꞌuchij tu qꞌuinin caj tuchiꞌtaꞌb ten Cꞌuj ic Jaj Tsꞌurirex Jesucristo quir u jocꞌsic a baꞌ jach manan tsoy.
11 Wa ber caj tarij Cristo uch,
caj tarij an ten bic sacerdote a jach noꞌjoꞌ,
quireꞌ yʌn u mucꞌ a ricꞌbenoꞌ,
aroꞌ jach manan a ricꞌbenoꞌ,
chen a uchbenoꞌ,
mʌꞌ jach mananiꞌ.
Pachir Jesús caj wʌcꞌʌs binij ich caꞌanan.
Chen robob,
sacerdote a jach noꞌjoꞌ,
a yʌn u mucꞌ a uchbenoꞌ,
robob cu naj beyajob tu cu naj cꞌujinticob Cꞌuj u winiquirob israel.
A raꞌ najoꞌ toc betaꞌb ten u winiquirob israel,
chen a Cristojoꞌ cu beyaj ich Cꞌuj.
12 Chen robob,
a sacerdotejoꞌ,
a noꞌjoꞌ,
cu naj binob tu yʌn u cuchir,
a cu jacꞌʌr u yor mac,
quir u waqꞌuicob u qꞌuiqꞌuer a yʌrʌcꞌ chivo,
cax yʌrʌcꞌ chan wacax.
Teniꞌ tanjaꞌ cu naj binob a sacerdotejoꞌ a noꞌjoꞌ quir u boꞌotic u boꞌorir u siꞌpirob.
Barej ic Jaj Tsꞌurirex Jesucristo caj u cꞌubaj u bʌj caꞌ quinsac toc jumpuriꞌ toc yejer u wʌcꞌʌs qꞌuiqꞌuer caj u rucꞌsaj ic siꞌpirex caj u tacoꞌonex munt qꞌuin,
caj wʌcꞌʌs binij ich Cꞌuj.
Rajen mʌꞌ baꞌwir u jer bajeꞌrer.
13 A uchoꞌ,
tu qꞌuinin u mucꞌ a uchbenoꞌ,
a tsꞌibtab ten Cꞌuj tiꞌ Moisés uch,
robob a sacerdotejoꞌ,
a noꞌjoꞌ,
caj u wacꞌob u qꞌuiqꞌuer yʌrʌcꞌ chivo,
cax u qꞌuiqꞌuer yʌrʌcꞌ ton wacax,
quir u rucꞌsic u boꞌorir u siꞌpirob u winiquirob israel.
Jeroj tuneꞌ caj tocaj yʌrʌcꞌ soc chen u taꞌanir yʌn.
Raꞌ u taꞌanir yʌrʌcꞌ caj poꞌstantaꞌb tu joꞌr u winiquirob israel soc yerob tan u pꞌobarob tiꞌ u siꞌpirob,
bayiriꞌ soc yer pꞌoꞌb tiꞌ a baꞌ cꞌasir caj u betob an ten bic caj u cꞌujintajob Cꞌuj.
14 Chen u qꞌuiqꞌuer ic Jaj Tsꞌurirex Jesucristo jach manan noꞌj,
quireꞌ mʌnaꞌ u siꞌpir,
mix tuririꞌ tiꞌ.
A Jesusoꞌ u bʌjiriꞌ tu tsꞌaj u bʌj quireꞌ yamtaꞌb ten u Tajꞌor u Pixam Cꞌuj,
araꞌ munt qꞌuin tiꞌ yʌn u Tajꞌor u Pixam Cꞌuj.
Jesús caj u tsꞌaj u bʌjiriꞌ soc u quinsaꞌ quir u jawsic ic siꞌpirex soc u taquicoꞌonex.
Rajen toc tiꞌ yʌn ij corex quireꞌ tan ij quibiquex a baꞌ cu yaꞌaric Cꞌuj,
a mac jach cuxaꞌan.
15 Caj quimij Jesús,
caj jocꞌ u qꞌuiqꞌuer quir u rucꞌsic u boꞌorir ic siꞌpirex,
raꞌ u mucꞌ a quet u tꞌʌnoꞌ a ricꞌben tꞌʌnoꞌ.
A rajiꞌ tiꞌ yʌn ich caꞌananoꞌ quir u tꞌʌnic toꞌonex Cꞌuj.
Rajen,
a mac a tetaꞌb ten Cꞌuj tiꞌ cu bin cʌjtar ich Cꞌuj an ten bic tu toc araj uch.
Mʌꞌ ja wirej,
caj u tacajoꞌonex Cꞌuj,
quireꞌ caj jocꞌ u qꞌuiqꞌuer u parar Cꞌuj a Jesucristojoꞌ,
rajen caj u jawsaj ic siꞌpirex Cꞌuj,
cax mʌꞌ tij quibex u mucꞌ,
a quet u tꞌʌnoꞌ,
a uchben tʌnoꞌ.
16 Mʌꞌ ja wirej,
a mac a caj u tsꞌibtaj u juꞌunin quir u pꞌʌtic u baꞌtac tiꞌ u bʌjob,
mʌꞌ u bin tsꞌabir u baꞌtac tiꞌ,
hasta cu quimineꞌ a mac tu tsꞌib tu juꞌunin tiꞌ u baꞌtac.
Hasta cu quimin,
jeroj,
cu tsꞌabar u baꞌtac,
quireꞌ quimij.
17 Wa tiꞌ toy cuxaꞌan,
mʌꞌ ju bin tsꞌabir u baꞌtac.
18 Rajen,
u mucꞌ a quet u tꞌʌnoꞌ,
a tsꞌaꞌb ten Cꞌuj uch,
caꞌ u yʌn jocꞌsic u qꞌuiqꞌuer yʌrʌcꞌ soc u nupꞌsic a baꞌ araꞌb ten Cꞌuj uch,
quij.
19 Rajen a Moisésoꞌ,
caj tsꞌoc u toc araꞌaꞌ tiꞌ tu cotor u winiquirob israel a baꞌ araꞌb tiꞌ ten Cꞌuj.
Raꞌ u mucꞌ a quet u tꞌʌnoꞌ a Moisésoꞌ,
caj u chꞌaj junoc u tsotser yʌrʌcꞌ tʌmʌn yuc,
aroꞌ banaꞌan chʌc.
Bayiriꞌ xan,
caj u chucaj u cꞌʌbir u chan cheꞌer yejer u reꞌ,
a pʌchaꞌan u cꞌabaꞌ hisopo.
A Moisésoꞌ,
caj u chucaj tiꞌob caj u tsꞌʌmaj yejer u cꞌʌbir yejer u reꞌ ich u qꞌuiqꞌuer yʌrʌcꞌ chivo yejer u qꞌuiqꞌuer yʌrʌcꞌ chan ton wacax.
Robob tu chꞌajob u tsotser tʌmʌn yuc yejer u cꞌʌbir u chan cheꞌ yejer u reꞌ xan,
Moisés caj u tsꞌʌmaj ich jaꞌ.
Jum puriꞌ caj u rʌc tsꞌʌmob Moisés ich jaꞌ.
Jeroj Moisés caj u witsꞌcꞌʌbtaj u qꞌuiqꞌuer ich u juꞌunin a quet u tꞌʌnoꞌ a tu tsꞌbitaj Moisés a tsꞌab ten Cꞌuj tiꞌ Moisés.
Bayiriꞌ xan,
caj u chan witsꞌcꞌʌbtaj u qꞌuiqꞌuer ich yocꞌor u winiquirob israel.
20 A Moisésoꞌ,
caj tsꞌoc u witsꞌcꞌʌbtic a qꞌuiqꞌueroꞌ ich yocꞌor u winiquirob israel caj u yaꞌaraj:
“U mucꞌ a quet u tꞌʌnob a cu tsꞌab tiꞌ techex ten Cꞌuj bajeꞌrer cu yʌnxchun.”
Baxuc caj araꞌb ten Moisés uch.
21 Bayiriꞌ xan,
Moisés,
caj oc tu japnin naj tu cu naj cꞌujinticob Cꞌuj u winiquirob israel,
a tiꞌ yʌn ich tʌcay ruꞌum uch.
Tiꞌ taroꞌ caj u witsꞌcꞌʌbtaj u qꞌuiqꞌuer ich yocꞌor tu cotor baꞌ a tiꞌ yʌn tu japnin.
Bayirir xan,
tu witsꞌcꞌʌbtaj ich yocꞌor u jach najir,
a tꞌinaꞌan quir u cꞌujinticob Cꞌuj u winiquirob israel uch.
22 Mʌꞌ ja wirej,
u mucꞌ a quet u tꞌʌnob a tu tsꞌibtaj Moisés cu yaꞌaric,
tu cotor baꞌ a cu cꞌʌnic u winiquirob israel tu cu cꞌujinticob Cꞌuj,
a ray u qꞌuininoꞌ uch,
caj pꞌob ten a witsꞌcꞌʌbtaꞌboꞌ a qꞌuiqꞌueroꞌ.
Bayiriꞌ xan,
yʌn u yʌn quinsic yʌrʌcꞌ u winiquirob israel soc u jocꞌar u qꞌuiqꞌuer soc Cꞌuj cu rucꞌsic u siꞌpir mac,
quireꞌ jocꞌ u qꞌuiqꞌuer yʌrʌcꞌob.
Mʌꞌ ja wirej,
mʌꞌ jawsaꞌb u siꞌpir ten Cꞌuj wa mʌꞌ jocꞌac u qꞌuiqꞌuer yʌrʌcꞌob.
Caj quimij Jesús ich u cruz, caj u rucꞌsaj ic siꞌpirex
23 Caj u yʌnxchun u chan najir a sinaꞌan quir u naj cꞌujinticob Cꞌuj u winiquirob israel uch,
rajiꞌ tu yʌnx chun a baꞌ tsꞌibtaꞌb ten Moisés uch,
rajiꞌ u mucꞌ a quet u tꞌʌnob,
a uchben tꞌʌnoꞌ.
Rajen caj tarob u cꞌujinticob Cꞌuj u winiquirob israel yerob mʌꞌ u rucꞌsaꞌr u siꞌpirob wa mʌꞌ witsꞌcꞌʌbtaꞌb u qꞌuiqꞌuer yʌrʌcꞌob.
Mʌꞌ ja wirej,
tu cotor a baꞌ a tiꞌ yʌn tu japnin naj tu cu naj cꞌujinticob Cꞌuj a cu cꞌʌnicob u winiquirob israel quir u cꞌujinticob Cꞌuj yʌn u yʌn pꞌob ten u qꞌuiqꞌuer yʌrʌcꞌob.
Chen quir u bin yacsicoꞌonex Cꞌuj ich caꞌanan tu yʌn Cꞌuj,
mʌꞌ baꞌwir u qꞌuiqꞌuer yʌrʌcꞌ,
quireꞌ u cꞌat u jer jach manan u mucꞌ.
24 Robob a sacerdote a noꞌjoꞌ,
chen tsꞌaꞌbob u mucꞌ quir u beyajob tu cu naj cꞌujinticob Cꞌuj u winiquirob israel,
a ray najoꞌ betaꞌb ten xib.
Chen u mucꞌ a tsꞌaꞌb ten Cꞌuj tiꞌ Jesús,
jach manan u mucꞌ Jesús,
quireꞌ tiꞌ yʌn Jesús ich caꞌanan tan u tꞌʌnic Cꞌuj tiꞌ toꞌonex.
A tiꞌ taroꞌ,
yʌn u tajir a baꞌ tu etsꞌ catajob u winiquirob israel quir u beticob uch,
a baꞌ tiꞌ yʌn quir u yamtaꞌob u cꞌujinticob Cꞌuj u winiquirob israel uch.
25 Robob a sacerdote,
a noꞌjoꞌ,
nanij caj ocob tu japnin naj quir u witsꞌcꞌʌbtic u qꞌuiqꞌuer yʌrʌcꞌ ich yocꞌor u chan cuchir a cu jacꞌʌr yor mac.
U jer yaxqꞌuin u jer u jer u cꞌat,
quireꞌ baxuc tiꞌ yʌn ich a quet u tꞌʌnob,
a uchben tꞌʌnoꞌ.
Chen teniꞌ quimij Jesús quir u rucꞌsic ic siꞌpirex,
jeroj caj toc tsꞌoquij.
26 Mʌꞌ ja wirej,
raꞌ u qꞌuininoꞌ caj yʌn betaꞌb ten Cꞌuj ich yocꞌocab,
ic nunquirex,
quij,
caj u quinsob yʌrʌcꞌ soc u tsꞌic tiꞌ Cꞌuj quir u rucꞌsic u boꞌorir u siꞌpirob.
Chen a Cꞌujoꞌ caj u wʌcꞌʌs pʌcaj u pac u jer quet u tꞌʌnob a ricꞌben tꞌʌnoꞌ,
rajen tarij Cristo quir u quimin toc teniꞌ quir u rucꞌsic u boꞌorir ic siꞌpirex,
quij.
27 Mʌꞌ ja wirej,
tu cotor mac teniꞌ cu chen quimin quireꞌ baxuc caj yaꞌaraj Cꞌuj.
Bayiriꞌ chen teniꞌ cu bin ʌcʌtan Cꞌuj quir yiric baꞌ tu betaj uch.
28 Bayiriꞌ xan,
ic Jaj Tsꞌurirex teniꞌ caj quimij quir u rucꞌsic u boꞌorir u siꞌpirex tiꞌ tu cotor mac.
Wa ber caꞌ bin uruc Jesús,
mʌꞌ quir u wʌcꞌʌs quimin quir u rucꞌsic ic siꞌpirex chen quir u taquic a mac a tan u quiꞌ pajic tiꞌ.