10
Mʌꞌ ja wirej,
a mucꞌoꞌ,
a caj u wʌcꞌʌs pʌcaj pac u jer,
a quet u tꞌʌnoꞌ,
a tu jocꞌsaj caj quimij Cristo,
raꞌ jach manan tiꞌ a quet u tꞌʌnoꞌ,
a tsꞌab tiꞌ Moisés uch.
Chen a tsꞌaꞌb tiꞌ Moisésoꞌ,
mʌꞌ cꞌuchaꞌan yor tiꞌ a quet u tꞌʌnoꞌ,
a ricꞌbenoꞌ yejer a uchben tꞌʌnoꞌ.
Mʌꞌ ja wirej,
tu qꞌuinin a quet u tꞌʌnoꞌ a uchben tꞌʌnoꞌ u winiquirob israel mʌꞌ cꞌuchaꞌan yorob u natsꞌʌrob ich Cꞌuj,
quireꞌ tiꞌ toy yʌn u mucꞌ a quet tꞌʌnoꞌ a tsꞌibtaꞌb ten Moisés uch.
Mʌꞌ u tarob yor soc tiꞌ yʌn yorob.
Cax a baꞌ cu tarob u puricob quir u tsꞌicob tiꞌ Cꞌuj u boꞌorirob quir u rucꞌsic u siꞌpir.
Cax rajraꞌ u jer yaxqꞌuin cu quinsicob u tsꞌicob yʌrʌcꞌ quir u rucꞌsic u boꞌorir u siꞌpirob.
2 Mʌꞌ ja wirej,
wa ju winiquirob israel yerob toc teniꞌ caj rucꞌsaꞌb u siꞌpir,
rajen mʌꞌ baꞌwir quir u wʌcꞌʌs bin u purob yʌrʌcꞌ quir u tsꞌicob tiꞌ Cꞌuj u boꞌorir u siꞌpirob.
Chen robob mʌꞌ u yubmʌnob tu yorob wa tiꞌ yʌn u yorob quireꞌ u siꞌpirob,
cax wa toc jumpuriꞌ rucꞌsaꞌb u siꞌpirob caj u quinsob yʌrʌcꞌ quir u jawʌr u siꞌpirob.
3 Mʌꞌ ja wirej,
rajraꞌ u jer yaxqꞌuin cu puricob tiꞌ Cꞌuj u yʌrʌcꞌ quir u rucꞌsic u siꞌpirob u winiquirob israel an ten bic nanij cu tsꞌicob tiꞌ,
quireꞌ tan u cꞌaja tiꞌ u boꞌorir tiꞌ u siꞌpirob.
4 Quireꞌ u qꞌuiqꞌuer yʌrʌcꞌ ton wacax yejer u qꞌuiqꞌuer yʌrʌcꞌ chivo mʌꞌ cꞌuchaꞌan yor u yamtaꞌ u winiquirob israel yirej wa ju jawsaꞌ u siꞌpirob teniꞌ.
5 Rajen,
caj tarij ic Jaj Tsꞌurirex Jesucristo caj u yaꞌaraj tiꞌ Cꞌuj:
A techoꞌ Cꞌuj,
quen,
mʌꞌ ja cꞌat a wiric mac tan u quinsic yʌrʌcꞌ quir u tsꞌic tech soc u jawʌr u siꞌpirob.
Rajen jach tsoy ta tꞌʌn tech caj a tsꞌaja ten in winquirir soc raꞌ in wʌcꞌʌs cꞌub in bʌj soc in quinsaꞌ.
6 A techoꞌ Cꞌuj,
quij Cristo,
mʌꞌ a cꞌat a wirej u quinsic u yʌrʌcꞌob quir u rʌc toquic quir u tsꞌic tech quir a rucꞌsic u siꞌpirob.
7 A techoꞌ,
in cꞌujirech,
quireꞌ taren ich yocꞌocab soc in quibic a baꞌ ta waꞌaraj,
an ten bic caj araꞌb ten a mac tsꞌaꞌb u tucur uch quir u tsꞌibtic a baꞌ a cꞌat uch.
8 Ic Jaj Tsꞌurirex caj yaꞌaraj,
a Cꞌujoꞌ mʌꞌ u cꞌat a baꞌ tsꞌaꞌbir tiꞌob u winiquirob israel,
a yʌrʌcꞌ a cu quinsicob,
cax a yʌrʌcꞌ a tocac quir u rucꞌsicob u siꞌpirob,
cax a baꞌ cu quiꞌquintic yor Cꞌuj,
cax wa mun cu tsꞌic tiꞌob,
mʌꞌ u cꞌat Cꞌuj.
Cax toc araꞌb ich u tꞌʌn Moisés caꞌ u yʌn tsꞌic tiꞌ Cꞌuj mʌꞌ u cꞌat xan.
9 Caj u wʌcꞌʌs araj:
“A tenoꞌ,
quij Cristo,
taren a teraꞌ ich yocꞌocab,
Cꞌuj soc in quibic a baꞌ ta ricꞌsaj a tꞌʌn ten caꞌ in betej”,
quij.
Wa ber caj u yaꞌaraj Cristo aroꞌ,
caj tsꞌoc u wʌcꞌʌs pʌquic u pac u jer a baꞌ tsꞌibtaꞌan ten Moisés,
a quet u tꞌʌnoꞌ,
a uchben tꞌʌnoꞌ caꞌ quinsaꞌ ich cruz quij,
soc u winiquirob israel mʌꞌ u bin tsꞌic tiꞌ Cꞌuj yʌrʌcꞌ quir u rucꞌsicob u boꞌorir u siꞌpirob.
10 Quireꞌ baxuc Cristo caj u betaj a baꞌ u cꞌat Cꞌuj.
A baywoꞌ caj u wʌcꞌʌs pʌquic u pac u jer a quet u tꞌʌnoꞌ a ricꞌben tꞌʌnoꞌ.
Rajen caj u jawsaj ic siꞌpirex Cristo quireꞌ teniꞌ caj u cꞌub u bʌj soc u quinsaꞌ quir u pꞌobar ic siꞌpirex tan u ricꞌsic toꞌonex quir ic beyajex tiꞌ Cꞌuj.
11 Tu qꞌuinin a quet u tꞌʌnoꞌ,
a uchben tꞌʌnoꞌ,
a tsꞌab ten Cꞌuj tiꞌ Moisés uch,
robob a sacerdote a noꞌjoꞌ,
cu naj toquicob baꞌ tiꞌ Cꞌuj.
U jer,
u jer u qꞌuinin yʌn u tsꞌic u jer tiꞌ Cꞌuj.
Cax a baxucoꞌ caj tsꞌab ten sacerdote,
a noꞌjoꞌ,
tiꞌ Cꞌuj mʌꞌ ju chaꞌbʌr u tubur tiꞌ u winiquirob israel ten a quet u tꞌʌnoꞌ,
a uchben tꞌʌnoꞌ wa toc teniꞌ rucꞌsaꞌb u siꞌpirob,
rajraꞌ cu tsicob tiꞌ.
12 Chen ic Jaj Tsꞌurirex Jesucristo caj quimij toc jumpuriꞌ caj u boꞌotaj u boꞌorir ic siꞌpirex,
mʌꞌ baꞌwir tiꞌ u jer.
Pachir caj u wʌcꞌʌs binij ich caꞌanan caj curaj ich u noj Cꞌuj.
13 A tar yʌnoꞌ Jesús ich caꞌanan tan u pajic u qꞌuinin a Cꞌujoꞌ cu bin u tsꞌic tiꞌ Jesús u mucꞌ ich yocꞌor a mac a cu pꞌacticob Jesús soc u toc rʌc chꞌesicob tiꞌ.
14 Mʌꞌ ja wirej,
toc jumpuriꞌ quir u taquic mac a cu yacsic tu yor wa ber caj u cꞌub u bʌj quir u pꞌobar ic siꞌpirex soc u ricꞌsmʌnoꞌonex Cꞌuj quir ic beyajex tiꞌ Cꞌuj.
15 Aroꞌ jach taj quireꞌ tuririꞌ a mac a tsꞌab u tucur ten Cꞌuj caj u tsꞌibtaj a baꞌ u cꞌat Cꞌuj uch.
Mʌꞌ ja wirej,
rajiꞌ u Tajꞌor u Pixam Cꞌuj caj u yaꞌaraj tiꞌ uch.
16 Rajen caj u tsꞌibtaj:
Ic Jaj Tsꞌurirex Cꞌuj caj yaꞌaraj,
caꞌ bin tac tu qꞌuinin bin in wʌcꞌʌs pʌquic u pac u jer quet tꞌʌnoꞌ a baꞌ quin toc aric tiꞌ u winiquirob israel.
Jeꞌ in tsꞌic tiꞌ caꞌ ocac in tꞌʌn tu pixamob soc u najticob in mucꞌ soc mʌꞌ u bin tubur tiꞌob.
17 Pachir,
quij,
baxuc caj u yaꞌaraj xan:
A tenoꞌ,
quij Cꞌuj,
jeꞌ in rucꞌsic u siꞌpirob.
Mʌꞌ biqꞌuin quin bin in cꞌʌꞌotic tiꞌob,
cax a baꞌ cꞌasir caj u betob uch xan.
18 Wa ber u qꞌuinin a Cꞌujoꞌ caj u rucꞌsaj u siꞌpir mac mʌꞌ baꞌwir quir u wʌcꞌʌs tsꞌic tiꞌ Cꞌuj quir u rucꞌsicob u siꞌpirob.
Toc tsꞌoquij.
Caꞌ ij cacsex tij corex quir ij cocarex tu yʌn Cꞌuj
19 Rajen in wet acsʌꞌorirex,
tu qꞌuinin a quet u tꞌʌnoꞌ,
a uchben tꞌʌnoꞌ,
mʌnaꞌ mac cꞌuchaꞌan yor u yocar tu japnin naj tu yʌn u chan cuchir,
a cu jacꞌʌr yor macoꞌ.
Chen quireꞌ a quet u tꞌʌnoꞌ,
a ricꞌben tʌnoꞌ,
tu jocꞌ u qꞌuiqꞌuer Cristo,
jeroj cꞌuchaꞌan ij corex ij cocarex tiꞌ juncꞌas naj a cu jacꞌʌr yor macoꞌ,
tu yʌn Cꞌuj,
quireꞌ mʌꞌ u jacꞌʌr ij corex,
quij,
ij cocarex.
20 Bayiriꞌ xan,
rajiꞌ u bʌjiriꞌ Cristo tiꞌ yʌn ich caꞌanan ich Cꞌuj,
quireꞌ ricꞌben bej a tu jaraj tiꞌ toꞌonex,
jeroj cꞌuchaꞌan ij corex ij cocarex tu tajir ʌcʌtan tiꞌ Cꞌuj.
21 Mʌꞌ ja wirej,
ic Jaj Tsꞌurirex Jesucristo oquij tu beyaj an ten bic sacerdote a jach noꞌjoꞌ soc u tꞌʌnic Cꞌuj tiꞌ toꞌonex,
quireꞌ raꞌ yʌninoꞌonex Cꞌuj.
22 Caꞌ natsꞌʌcoꞌonex ich Cꞌuj yejer u tsoyir ic pixamex quireꞌ mʌꞌ baꞌwir caꞌ ic tucrex baꞌ,
quireꞌ tij cacsex tij corex tiꞌ Cristo.
Mʌꞌ ja wirej,
toc rucꞌsaꞌb ic siꞌpirex ten Cꞌuj quireꞌ toc pꞌob ic pixamex.
Mʌꞌ ja wirej,
caj jocꞌ u qꞌuiqꞌuer Jesús soc u pꞌobaroꞌonex irej a mac toc pꞌob ich jaꞌ soc u rucꞌur u yeqꞌuir.
23 Caꞌ ij cacsex tij corex wa Cꞌuj cu bin u yacsicoꞌonex,
quireꞌ tij quibajex a baꞌ tu toc araj toꞌonex Cꞌuj wa ber tu yaꞌaraj aroꞌ uch.
24 Caꞌ ic chichquintej yor ij quet acsʌꞌorirex soc ic pacran yajquintiquex ic bʌjex soc ic manex tu tsoyir.
25 Mʌꞌ ic yʌn pꞌʌtiquex ic muchꞌquintic ic bʌjex quir ij cuꞌyiquex u tꞌʌn Cꞌuj xan,
quireꞌ yʌn junyarob,
ij quet acsʌꞌorirex tan u pꞌʌticob u muchqꞌuinticob u bʌj quir yubicob u tꞌʌn Cꞌuj.
Mʌꞌ ja wirej,
rajraꞌ caꞌ ic chichquintej ij corex quireꞌ tabar u qꞌuinin caꞌ bin uruc ic Jaj Tsꞌurirex Jesucristo.
26 Wa tic najtajex u jach tsoyir u tꞌʌn Cꞌuj,
chen rajraꞌ quic pʌyiquex ic siꞌpirex quireꞌ baxuc ic cꞌatex,
jeroj mʌꞌ u jawsic ic siꞌpirex.
27 Jeroj tuneꞌ,
yʌn baꞌ caꞌ ic tucrex,
quireꞌ jeꞌ ic binex ʌcʌtan ich Cꞌuj quir u toꞌcar ic joꞌrex,
jeroj tuneꞌ,
caꞌ bin tsꞌocac aroꞌ,
jeꞌ ic binex ich cꞌacꞌ yejer a mac tu maꞌquintob Cꞌuj.
28 A uchoꞌ tu cotor mac a tu pꞌuspachtob a quet u tꞌʌnoꞌ,
a tu tsꞌibtaj Moisés uch,
wa yirir ten u yet winiquirob israel a caj manob tu cꞌasir cax wa dos wa tres u yirob.
A ray macoꞌ,
a man tu cꞌasir caj jocꞌsaꞌb quinsbir ten u yet winiquirob israel.
Mʌꞌ jawsaꞌb u siꞌpir ten u yet winiquirob israel toc quinsaꞌb.
29 A mac a tu pꞌuspacht u parar Cꞌuj,
jach manan cu bin mucꞌyaj,
quireꞌ tu maꞌquintaj a quet u tꞌʌnoꞌ,
a ricꞌben tꞌʌnoꞌ,
quireꞌ tuchiꞌtaꞌb u parar Cꞌuj ten Cꞌuj.
Mʌꞌ ja wirej,
pꞌastaꞌb u parar Cꞌuj quireꞌ cu pꞌastic u qꞌuiqꞌuer a jocꞌsaꞌb quinsbir Jesús tiꞌ a quet u tꞌʌnoꞌ,
irej wa mʌnaꞌ baꞌ,
a ray qꞌuiqꞌueroꞌ a tu cu pꞌoꞌic ic siꞌpirex.
Bayiriꞌ xan,
tu maꞌquintaj u Tajꞌor u Pixam Cꞌuj a mac a cu yajquintic mac,
rajen quiꞌ irej,
quij.
30 Quireꞌ tij quirex Cꞌuj caj u yaꞌaraj:
“Jeꞌ in tsꞌictar yejer a mac a yʌn u siꞌpir,
rajen jeꞌ u mucꞌyaj ten,
quij,
u boꞌorir u siꞌpirob.”
Caj u wʌcꞌʌs araj Cꞌuj:
“Jeꞌ in taquic u joꞌr a ten yʌnin quireꞌ a tenoꞌ,
juezen.”
31 Jach yaj cu bin yubej mac caꞌ bin tsꞌicac Cꞌuj,
a cuxaꞌan a Cꞌujoꞌ.
32 Mʌꞌ u yʌn tubur techex bic tabar Cristo caj u yacsaj techex ich u sasirir.
Nemʌꞌ biquechex tu caj a mucꞌyanʌjechex uch,
tub tu chuquex a pachex jach manan.
33 Yʌn u qꞌuinin uch,
caj u pꞌastob techex,
tan u chich jʌtsꞌicob a pachex ʌcʌtan tu wichob mac.
Jach yaj caj a wuꞌyaj ta worex caj a wirex u jatsꞌar a wet acsʌꞌorirex,
a mac a wet binac caj chich jatsꞌaꞌb u pachob ten a cu pꞌactiquechexob.
34 A techexoꞌ,
caj a wirex otsir a wet acsʌꞌorirex a tiꞌ yʌn cꞌʌraꞌan tu cu maꞌcʌr mac.
Jach nemʌꞌ bic techex tub caj u chucajob a baꞌtaquechex,
quireꞌ techex a werex caꞌ bin xiquechex ich caꞌanan jeꞌ u wʌcꞌʌs pʌquic pac u jer techex a jach manan tsoyir,
raꞌ yʌnex tex munt qꞌuin caꞌanan.
35 Rajen mʌꞌ a yʌn tupsic a worex soc a bin a cꞌʌmex a baꞌ jach coꞌoj tiꞌ Cꞌuj.
36 Mʌꞌ ja wirej,
caꞌ a quiꞌ cʌnex nemʌꞌ bic techex soc a quibiquex u tꞌʌn Cꞌuj soc u yacsiquechex an ten bic caj u toc araj uch.
37 Quireꞌ tiꞌ toc tsꞌibaꞌan ich u tꞌʌn Cꞌuj baxuc a jeꞌraꞌ:
Jach tabar u cꞌuchur a mac a cu tar an ten bic caj yaꞌaraj uch.
Mʌꞌ ju xʌntar u cꞌuchur.
38 Chen a mac a cu yacsic tu yor tiꞌ ten,
quij Cꞌuj,
jariꞌ cu bin rucꞌsaꞌbir u siꞌpir quir u cuxtar munt qꞌuin.
Chen wa cu pꞌuspachtiquen,
jeꞌ in wacꞌtic tiꞌeꞌ.
Baxuc caj araꞌb ten Cꞌuj uch.
39 A toꞌonexoꞌ caj ij cacsex tij corex tiꞌ Cꞌuj rajen rajiꞌ cu quiꞌ cʌnantic ic pixamex bajeꞌrer.
A toꞌonexoꞌ mʌꞌ tij cʌnex a mac a tu pꞌuspachtob Cꞌuj a cu bin satʌr munt qꞌuin.