Caꞌ ij quiꞌ asex tij corex tiꞌ ic Jaj Tsꞌurirex Jesucristo
12
Quireꞌ ic toc erex tiꞌ yʌn yaꞌab mac a cuxaꞌanob uchoꞌ,
a tu yesob bic tabar tu yacsob tu yorob tiꞌ Cꞌuj uch.
Rajen caꞌ ij quiꞌ tucrex caꞌ ic pꞌʌtex a baꞌ cꞌasir quic pachtex tij corex,
an ten bic a mac tan u jach pꞌisic u bʌj tub u cꞌʌnic yacab soc u cꞌuchur pʌyber tu yʌn u pꞌis.
Bayiriꞌ xan,
a toꞌonexoꞌ,
caꞌ ic sayirex tu pach Cꞌuj tan ij quibiquex a baꞌ u cꞌat Cꞌuj.
2 Rajen caꞌ ij quibex ic Jaj Tsurirex Jesucristo quireꞌ raꞌ caj u tsꞌajaj tiꞌ toꞌonex ic muqꞌuex quir ij acsiquex tij corex tiꞌ Cꞌuj soc u yacsicoꞌonex ich caꞌanan.
Mʌꞌ ja wirej,
u wʌcꞌʌs bʌjiriꞌ caj u cꞌub u bʌj soc u quinsaꞌ ich cruz,
tu jach mucꞌyajnʌjij.
Nemʌꞌ bic caj u mucꞌtaj quireꞌ yer caꞌ bin tsꞌocaquiꞌ jach nequiꞌ yor.
A bajeꞌreroꞌ,
tiꞌ cuxaꞌan ic Jaj Tsꞌurirex ich caꞌanan ich u noj Cꞌuj.
3 Quiꞌ tucrex,
quij,
ic Jaj Tsꞌurirex Jesucristo bic tabar caj u quiꞌ mucꞌtaj a tu chucajob u pach uch ten mac,
a yʌn u siꞌpirob,
soc mʌꞌ u tupsic a worex soc mʌꞌ a pꞌʌtiquex u tꞌʌn Cꞌuj.
4 Cax tan a mucꞌyajex bajeꞌrer tu cu chuquicob a pachex,
mʌꞌ a yʌn acꞌtiquex a bʌj quireꞌ mix tuririꞌ ich techex caꞌ quinsaquechex an ten bic caj quinsaꞌb Jesús uch,
quireꞌ tan a baꞌtetiquex a siꞌpiroꞌ tu yʌnechex.
5 Cꞌaj wa techex a baꞌ tsꞌibtaꞌb ten a mac a tsꞌaꞌb u tucur ten Cꞌuj quir u tsꞌibtej a baꞌ u cꞌat Cꞌuj uch?
Rajiꞌ caj u yaꞌaraj:
A tenoꞌ,
quij a Jaj Tsꞌuriren Cꞌuj,
quin chen camsic tech in pararech caꞌ a cʌnej tech quir a man tu tsoyir.
Cꞌʌmej a baꞌ quin qꞌueyiquech.
Mʌꞌ a yʌn choctar a wor tu quin qꞌuyiquech.
6 A Cꞌujoꞌ tan yaꞌaric:
a werex ten yʌninobechex,
in jach yajechex chen a techexoꞌ quin camsiquechex caꞌ a cʌnex soc a manex tu tsoyir.
Baxuc caj araꞌb ten Jaj Tsꞌur Cꞌuj uch.
7 Rajen quiꞌ mucꞌtex a baꞌ yajirir a cu tar tiꞌ techex,
quireꞌ Cꞌuj tan u camsic techex baꞌ quir a cʌniquex.
Mʌꞌ ja wirej,
rajiꞌ Cꞌuj cu yiric techex an ten bic u parar rajen,
rajiꞌ quir u yamtic techex.
Ij querex tu cotor mac a cu qꞌueyic u parar cu qꞌueyic soc u yamtic tiꞌob.
8 A mac a mʌꞌ camsaꞌ ten Cꞌuj quir u cʌnej baꞌ,
an ten bic Cꞌuj cu camsic tu cotor u parar caꞌ u cʌnej quir u yamtic tiꞌob.
Robob mʌꞌ u jach pararob.
Robob irob u pararob a xquicoꞌ,
a yʌn u parar tu cu man.
Mʌꞌ ja wirej,
raꞌ pararoꞌ mʌnaꞌ u jach tet,
quij.
9 Wa ber caj u tsemtoꞌonex ic nʌꞌex yejer ic tetex uch robob caj u qꞌueyaj toꞌonex uch quir u yamticob tiꞌ toꞌonex,
rajen caj ic sʌjtex ic tetex yejer ic nʌꞌex.
Jach manan tsoy xan caꞌ ic sʌjtex ic Tetex Cꞌuj a cʌjaꞌan ich caꞌanan.
Quireꞌ rajiꞌ cu qꞌueyic toꞌonex soc ij cuxtarex an ten bic Cꞌuj u cꞌat caꞌ cuxracoꞌonex.
Jach noꞌj caꞌ ij cꞌʌmex u qꞌueyic toꞌonex ic Tetex Cꞌuj.
10 Caj u tsemtoꞌonex ic nʌꞌex yejer ic tetex uch,
caj u qꞌueyajoꞌonexob quir u yamtic toꞌonex an ten bic caj u najtobiꞌ.
Chen jach manan tsoy tiꞌ toꞌonex wa Cꞌuj cu qꞌueyiquoꞌonex quireꞌ rajiꞌ cu pachtic caꞌ ij cʌnex Cꞌuj soc ij cuxtarex an ten bic Cꞌuj cu pachtic caꞌ cuxrʌcoꞌonex ich yocꞌocab.
11 Wa ber cu qꞌueyicoꞌonex Cꞌuj,
mʌꞌ ic jach pachtiquexiꞌ u qꞌueyicoꞌonex,
quireꞌ jach yaj quij cuꞌyiquexiꞌ u qꞌueyicoꞌonex Cꞌuj.
Chen wa ber caj tsꞌoc ic natiquex biquin caj u qꞌueyoꞌonex aroꞌ jach tsoy.
Mʌꞌ ja wirej,
jach manan tsoy caꞌ ic najtex soc caꞌ cuxrʌcoꞌonex an ten bic Cꞌuj u pachtej ij cuxtarex soc tiꞌ yʌn ij corex.
Biquinin jach cꞌas a mac a cu pꞌuspachtic tiꞌ u tꞌʌn Cꞌuj.
12 Toc cꞌub a bʌjex tiꞌ Cꞌuj soc rajiꞌ cu bin u chichquintic a cꞌʌbex tu caꞌan a cꞌʌbex,
baxuc a woquex tu caꞌan a woquex.
13 Rajraꞌ caꞌ ximbarex ich u berir a tajoꞌ,
soc mʌꞌ u yajtar yoc a mac yaj yoc chen caꞌ tsoyaquiꞌ.
14 Quiꞌ tucrex a manex tu tsoyir,
mʌꞌ a tsꞌiquintex mac,
toc quibex aroꞌ,
quireꞌ a cʌniquex Cꞌuj soc a binex ich caꞌanan.
15 Quiꞌ irex techex,
quij,
soc mʌnaꞌ mac cu pꞌuspachtic u jach tsoyir u pixam Cꞌuj quir u pꞌʌtej u jach tsoyir u pixam Cꞌuj.
Quiꞌ cʌnantex a bʌj soc mʌnaꞌ mac ich techex caꞌ u cʌnej chan pʌcꞌaroꞌ,
a jach cꞌajoꞌ,
a caꞌ bin tsꞌocac u chꞌijir,
jeꞌ u cꞌajquintic yaꞌab mac yejer u cꞌajir.
16 Mʌꞌ a yʌn cʌjtarex yejer a mac a mʌꞌ chꞌa raqꞌuintej,
a mʌꞌ ta chꞌa mʌmintej xan.
Bayiriꞌ xan,
mʌꞌ a yʌn pꞌʌtiquex a baꞌ jach tsoy tiꞌ techex an ten bic Esaú caj u pꞌʌtaj.
Mʌꞌ ja wirej,
rajiꞌ quireꞌ a chʌc janʌnoꞌ,
a tsꞌaꞌb tiꞌ,
caj u cꞌaxaj u jach tsoyir u tꞌʌn u tet Isaac,
a mac cu bin u pꞌʌtic tiꞌ,
quireꞌ sucuꞌunbir a Esaújoꞌ,
soc rajiꞌ yʌnin a baꞌ toc araꞌa ten Cꞌuj tiꞌ u tet uch.
17 Cꞌaj techex,
caj cꞌuchij tu qꞌuinin u tet caj tsꞌab tiꞌ yitsꞌin ten u tet?
Mʌꞌ tsꞌabac tiꞌ Esaú ten u tet,
cax caj u quiꞌ acꞌtaj u bʌj tiꞌ,
quireꞌ toc con tiꞌ yitsꞌin Jacob ten Esaú uch.
Mʌꞌ bic tabar u caꞌ cꞌaxic quireꞌ toc tsꞌaꞌb tiꞌ yitsꞌin uch.
18 Mʌꞌ ja wirej,
ic nunquirex uch,
caj mucꞌyajnʌjob uch,
chen mʌꞌ baꞌwir tiꞌob caꞌ mucꞌyajnʌcob.
Mʌꞌ ja wirej,
caj binob ich u joꞌr pꞌuc wits caj u chen jacꞌ yorob quireꞌ tiꞌ taroꞌ tan yerar u chꞌic yum cꞌacꞌ,
caj jach acꞌbirchʌjij,
caj tarij u chꞌic yum icꞌ xan.
19 Quireꞌ ic nunquirex caj yubaj utstaꞌbir bajen u bac wacax.
Caj yubaj Cꞌuj tan u tꞌʌnic tiꞌob.
Rajen cu jach jacꞌar yorob tiꞌ u tꞌʌn Cꞌuj,
caj u yaꞌarajob caꞌ u chan suꞌsej u tꞌʌnob tiꞌ.
20 Caj u chꞌajob chꞌic yum sajaquirob ic nunquirex uch,
quireꞌ a Cꞌujoꞌ caj u betaj u joꞌr pꞌuc witsꞌ a cu jacꞌʌr yor mac.
Mʌꞌ ja wirej,
Cꞌuj caj u toc araj u chꞌinin u joꞌr mac cax rʌmbir yejer ransa,
cax yʌrʌcꞌ xan,
caꞌ quinsac wa cu natsꞌʌrob ich wits.
Rajen tu sʌjtajob u winiquirob israel.
Yerob bin u caꞌ quinsbirob.
21 Raꞌ u joꞌr a pꞌuc witsoꞌ a cu jacꞌʌr yor mac,
a caj yirob.
Rajen sʌjtaꞌb ten u winiquirob israel,
bayiriꞌ xan,
caj jac yor Moisés xan,
quireꞌ caj quiꞌquirʌnʌjij Moisés uch.
Quireꞌ u bʌjiriꞌ araj Moisés:
“Tan in quiꞌquirʌncʌr a tenoꞌ”,
quij Moisés uch.
22 Chen a toꞌonexoꞌ,
jach manan tsoy tiꞌ toꞌonex,
quireꞌ,
mʌꞌ ic binex ich a ray u joꞌr pꞌuc witsoꞌ,
quireꞌ tsꞌoc ij cꞌuchurex u joꞌr u witsir Sión,
raꞌ u cajar Cꞌuj,
a cuxaꞌanoꞌ,
a mac a yʌn u mucꞌ a cu jacꞌʌr yor mac.
A ray cajaroꞌ tiꞌ yʌn jach pim yʌjmasirob u tꞌʌn Cꞌuj a tan u rʌc quiꞌ tꞌʌnicob Cꞌuj.
23 Tiꞌ taroꞌ ich caꞌanan,
jeꞌ u pꞌeriꞌ muchꞌquinticoꞌonex Cꞌuj yejer a raꞌ yʌninoꞌonex Cꞌuj quireꞌ rucꞌsaꞌb ic siꞌpirex ten Cꞌuj.
A tiꞌ taroꞌ xanoꞌ,
yʌn u juꞌunin ich caꞌanan a toc rʌc tsꞌibtaꞌb u cꞌabaꞌ a yacsmʌnob tu yorob.
A Cꞌujoꞌ rajiꞌ juez tiꞌ tu cotor mac cax a yʌn u siꞌpirob.
Raꞌ Cꞌuj xan,
a mac a tu waysaj u bʌj tu cotor baꞌ,
a Cꞌujoꞌ caj u pacht u waysicob u bʌj.
24 Mʌꞌ ja wirej,
tij cacsex tij corex tiꞌ ic Jaj Tsꞌurirex Jesucristo xan,
a mac a yʌn u mucꞌ a quet u tꞌʌnoꞌ a ricꞌbenoꞌ.
Rajiꞌ tan u tꞌʌnic Cꞌuj tiꞌ toꞌonex.
Raꞌ tu cꞌubaj u bʌj soc u quinsaꞌ caꞌ jocꞌac u qꞌuiqꞌuer soc Cꞌuj cu jawsic ic siꞌpirex.
Ij querex,
a Abeloꞌ uch,
caj quinsaꞌb ten u yitsꞌin Cain.
Caj joqꞌuij u qꞌuiqꞌuer Abel,
raꞌ mʌꞌ tu yamtaj mac quireꞌ mʌꞌ cojiꞌ,
quireꞌ a Cristojoꞌ jach coꞌoj u qꞌuiqꞌuer.
25 Quireꞌ Cꞌuj raꞌ yʌninoꞌonex,
rajen,
quiꞌ cʌnantex a bʌjex.
Quireꞌ mʌꞌ tan a pꞌuspachtiquex a baꞌ tu chich araj techex caꞌ a quibexiꞌ.
Cꞌaj techex ic nunquirex uch,
caj u pꞌuspachtajob a baꞌ chich araꞌb ten Cꞌuj caꞌ u quibob ich u joꞌr pꞌuc wits.
Chen robob mʌꞌ toc ten Cꞌuj.
Baxuc a toꞌonex xan,
chʌcaꞌan mʌꞌ u taquicoꞌonex Cꞌuj wa quic pꞌuspachtiquex a baꞌ tu chich araj toꞌonex caꞌ ij quibex xan,
quireꞌ raꞌ cu tar tiꞌ caꞌananoꞌ.
26 Raꞌ u qꞌuininoꞌ ich u joꞌr pꞌuc wits uch ber caj chich araꞌb tiꞌob Cꞌuj,
jeroj,
pecnʌjij u ruꞌumin.
27 Bayiriꞌ xan,
jach noꞌj caꞌ ij cuꞌyiquex caꞌ ij quibex a baꞌ tu toc araj bajeꞌrer,
quireꞌ tu toc araj:
“Jeꞌ in wʌcꞌʌs chich aric tiꞌ mac.
Mʌꞌ u chen pec u ruꞌumin,
quin bin in jubsic tu cotor a baꞌ a tiꞌ yʌn ich caꞌanan a mʌꞌ u pꞌatʌr.
Jariꞌ cu bin pꞌatʌr a baꞌ tin toc araj caꞌ pꞌatac.”
28 Rajen,
caꞌ ij carex tiꞌ Cꞌuj:
“Bayoꞌ Cꞌuj,
quireꞌ quic bin ij cʌjtarex yejerech Cꞌuj quireꞌ tech Cꞌuj reyech,
yʌn a mucꞌ.
A mucꞌoj,
caj a tsꞌajoꞌonex,
mʌꞌ u bin xupur ic mucꞌ tu quic reyintiquech Cꞌuj.”
Caꞌ ij cꞌujintiquex Cꞌuj yejer tu cotor ic pixamex tu quic sʌjtiquex Cꞌuj.
29 Baxucoꞌ,
caꞌ ij cꞌujintiquex Cꞌuj,
quireꞌ u mucꞌ Cꞌuj jach manan jacꞌʌr yor mac,
quireꞌ cu bin u jocꞌsic a mac a yʌn u siꞌpirob ich cꞌacꞌ tu cu binob.