A JEꞌ JUꞌUNAꞌ, CAJ U YɅN BATꞌAN TSꞌIBTA PEDRO
1 PEDRO
Pedro caj u tsꞌibtaj a jeꞌ juꞌunaꞌ tiꞌ u yet acsʌꞌorirob a tantanxer yʌn u cajarob
1
A tenoꞌ Pedrojen,
a jin wʌjtuchiꞌyʌjiroꞌ Jesucristo.
U cꞌat yaꞌaric a mac tuchiꞌtaꞌb ten Jesús quir u tsecꞌtic u tꞌʌn.
Caj in tsꞌibta techex a jeꞌ juꞌunaꞌ,
a tantanxer cʌjaꞌanechex quireꞌ caj a wacsex ta worex u tꞌʌn Cꞌuj.
Rajen caj in tsꞌibta techex.
Caj in tsꞌibta techex,
a tantanxer cʌjaꞌanechex ich u ruꞌumin Ponto.
A tiꞌ yʌnechex ich u ruꞌumin Galacia.
A tiꞌ yʌnechex ich u ruꞌumin Capadocia.
A tiꞌ yʌnechex ich u ruꞌumin Asia.
A tiꞌ yʌnechex ich u ruꞌumin Bitinia.
2 Caj u yʌn batꞌan tetechex Cꞌuj ic Tetex Cꞌuj quireꞌ yʌn baꞌwir techex.
Mʌꞌ ja wirej,
u cꞌat u quiꞌquintic a worex.
Caj u tetechex ic Tetex Cꞌuj soc u yamtiquechex u Tajꞌor u Pixam Cꞌuj quir a quibiquex u tꞌʌn Jesucristo.
Caj u tetechex ic Tetex Cꞌuj quir u jawsic a siꞌpirex Jesucristo wa ber caj quimij ich cruz.
A tenoꞌ,
quij Pedro,
quin cꞌatic tiꞌ Cꞌuj caꞌ u quiꞌquiꞌ cʌnan techex Cꞌuj,
baxuc,
caꞌ quiꞌac a worex ten Cꞌuj soc mʌnaꞌ baꞌ ca tucriquex.
Tan ic pajiquex u taꞌquicoꞌonex Cꞌuj
3 Caꞌ ij carex tiꞌ Cꞌuj,
raꞌ u Tet ic Jaj Tsꞌurirex Jesucristo:
“Jach caremech Cꞌuj,
caj ij caꞌarex tiꞌ.
A techoꞌ caj a yajquin toꞌonex soc mʌꞌ ic saꞌtʌrex.
A techoꞌ Cꞌujech,
caj ij caꞌarex tiꞌ.
Ta tsꞌaja toꞌonex ij cuxtarex a ricꞌbenoꞌ caj a ricꞌsaj Jesucristo ich u quimirir.
Rajen quiꞌ ij corex ic pajiquex u tar Jesucristo quir u tsꞌic ij cuxtarex munt qꞌuin.”
Baxuc caꞌ ij caꞌarex tiꞌ Cꞌuj.
4 Tan ic chꞌuctiquex u tsꞌic toꞌonex ij cuxtarex munt qꞌuin quireꞌ rajiꞌ tan u quiꞌ cʌnantic ich caꞌanan tu mʌꞌ ju pocꞌar.
Tu mʌꞌ ju tsꞌutsꞌur irej u top cheꞌ teraꞌ.
5 A rayoꞌ yʌn techex ich caꞌananoꞌ quireꞌ ta wacsex ta worex tiꞌ Cꞌuj.
Rajen yʌn u mucꞌ Cꞌuj cu cʌnantiquechex quir u tsꞌic techex a cuxtarex munt qꞌuin,
a ca pajiquexeꞌ.
6 Rajen quiꞌquint a worex bajeꞌrer.
Cax ca jamach mucꞌyajex tu cu tumticob a worex a racꞌob.
7 Mʌꞌ ja wirej,
irej oro cu tumtic yirej.
Baxuc techex,
irej oro cu tumtic yirej wa cu toꞌquic,
cu yerar a orojoꞌ.
A cu tar u tumtic ij corex soc yiric wa taj quij cacsiquex tij corex.
A taj caj u yacsaj tu yor,
cu mucꞌtic tu cu tumtaꞌr yor ten u racꞌob.
A mac a cu mucꞌticoꞌ,
jach tsoy yirir ten Cꞌuj.
A orojoꞌ mʌꞌ munt qꞌuiniꞌ.
Mʌꞌ ja wirej,
cu toꞌcaꞌr caꞌ erac quir u rucꞌsic yeqꞌuir.
Caꞌ bin tsꞌocac u tumtaꞌr a worex Cꞌuj cu bin yaꞌaric:
Jach tsoyechex.
Caꞌ bin tac Jesucristo,
jeꞌ a bin cʌjtarex yejer Cꞌuj.
Jeꞌ a wuꞌyiquex yaꞌaraꞌ ten Cꞌujoꞌ:
“Tsoyechex,
quij,
tu ta mucꞌtex.”
8 Cax mʌꞌ a wirmʌnex Jesúsiꞌ,
caj a yajquintex caj a wacsex ta worex tiꞌ.
Rajen jach manan quiꞌir a worex,
cax mʌꞌ a wirmʌnexiꞌ.
9 Rajen quiꞌ a worex quireꞌ caj a wacsex ta worex soc a taquiquex a pixamex.
10-11 A uchoꞌ caj araꞌb ten u Tajꞌor u Pixam Cꞌuj tiꞌ yʌjtseqꞌuirob u tꞌʌn Cꞌuj,
a baꞌ caꞌ u tsꞌibtob.
Caj araꞌb tiꞌob caj u tsꞌibtob:
“Bin u caj tar mac quir u mucꞌyaj soc u taquicoꞌonex quireꞌ u yajoꞌonex Cꞌuj.”
Robob u yʌjtseqꞌuirob u tꞌʌn Cꞌuj mʌꞌ ju najtob a baꞌ cu tsicbarob tiꞌ Cristo.
Rajen caj u cʌxtob u juꞌunin u tꞌʌn Cꞌuj quireꞌ u cꞌat yerob mac cu tsicbarob caꞌ bin tac.
Baxuc wa ber caꞌ bin tac.
A uchoꞌ,
yʌjtseqꞌuirob u tꞌʌn Cꞌuj caj u cʌxtob ich u tꞌʌn Cꞌuj caꞌ u najtob bic tabar u taquiquex a pixamex.
A baꞌ cu tsecꞌticob mʌꞌ ju najtob u bʌjiriꞌ yʌjtseqꞌuirob u tꞌʌn Cꞌuj.
Robob caj u tsecꞌatob soc jeꞌ u tar yʌjtaquir ic pixamex.
12 Yʌjtseqꞌuirob u tꞌʌn Cꞌuj cu tsꞌabʌr u tucurob ten u Tajꞌor u Pixam Cꞌuj soc caꞌ ic najtex bic tabar u tar Cristo.
Mʌꞌ rajiꞌ tiꞌ u bʌjiriꞌ yajtseqꞌuirob rajiꞌ u tꞌʌn Cꞌuj,
rajiꞌ tiꞌ u jer winic caꞌ bin tac,
toꞌonex bajeꞌreroꞌ.
Mʌꞌ ja wirej,
raꞌiriꞌ tiꞌeꞌ u tꞌʌn Cꞌuj cu tsecꞌtic techexeꞌ.
Caj a wuꞌy.
Raꞌiriꞌ tiꞌeꞌ,
quireꞌ tuchiꞌbir ten Cꞌuj yʌjtseqꞌuirob u tꞌʌn Cꞌuj soc u tsecꞌtic techex a wuꞌyex quir a taquiquex a pixamex.
Yejer u mucꞌ u Tajꞌor u Pixam Cꞌuj caj u tsecꞌtob techex.
A rayoꞌ yʌjmasirob u tꞌʌn Cꞌuj caꞌanan xan u cꞌat u najticob bic tabar ic taquiquex ic pixamex.
Chen mʌꞌ ju najtob.
Cꞌujoꞌ u cꞌat yiric mac u man tu tsoyir
13 Quiꞌquiꞌ tucrex a baꞌ ca bin a betexeꞌ soc mʌꞌ a wacsiquex a siꞌpirex.
Rajen quiꞌ cʌnant a bʌjex.
Quiꞌquiꞌ pajex Jesucristo caꞌ bin uruc.
Jeꞌ u tsꞌic techex a cuxtarex caꞌ bin uruc quireꞌ cu yajquintiquechex Jesucristo.
14 Yʌn quiꞌquiꞌ uꞌyex u tꞌʌn a Tetex.
Mʌꞌ ja wirej,
a Tetex Cꞌuj.
Mʌꞌ a manex tu cꞌasir an bic caj manechex uch.
Mʌꞌ ja wirej,
a ray u qꞌuininoꞌ mʌꞌ a werex u tꞌʌn Cꞌuj uchiꞌ.
15 Rajen caꞌ a cʌnex Cꞌuj,
quireꞌ rajiꞌ mʌnaꞌ u siꞌpir.
Quireꞌ rajiꞌ caj u pʌyechex soc rajiꞌ yʌninechex.
Rajen caj manaquechex tu tsoyir.
Baxuc caj araꞌb ten Cꞌuj.
16 Cꞌʌꞌotex tu tsꞌibaꞌan u tꞌʌn Cꞌuj tu ju yaꞌaraj toꞌonex:
“Mʌꞌ a yʌn acsiquex a siꞌpirex.
Baxuquenoꞌ,
in cꞌat caꞌ a cʌnenex,
quij Cꞌuj.”
17 Wa ber caꞌ bin tsicbanʌcoꞌonex yejer Cꞌuj.
Caꞌ ij carex tiꞌ Cꞌuj:
“Ic Tetex.”
Mʌꞌ ja wirej,
rajiꞌ ic Tetex.
Cꞌʌꞌotex,
a Cꞌujeꞌ ic Tetex bin u caꞌ yirej a mac a tu yacsaj tu yoroꞌ.
Caꞌ bin tac,
taj cu bin yirej wa quiꞌ beyanʌjoꞌon wa tij quiꞌ quibex u tꞌʌn tiꞌ Cꞌuj.
Rajen caꞌ ic sʌjtex Cꞌuj a munt qꞌuin tiꞌ yʌnoꞌonex ich yocꞌocab.
18 A werex bic tabar caj u taquechex Jesús.
Jach coꞌoj caj u boꞌotaj,
quireꞌ yejer u qꞌuiqꞌuer caj u toc boꞌotaj.
Mʌꞌ yejer taqꞌuiniꞌ caj u boꞌotaj,
quireꞌ a taqꞌuinoꞌ cu rabʌr.
Rajen a taqꞌuinoꞌ mʌꞌ cꞌuchaꞌan yor u boꞌotic u boꞌorir a siꞌpirexiꞌ.
Tu boꞌotaj u boꞌorir a siꞌpirex yejer u qꞌuiqꞌuer soc u jawsic a siꞌpirex.
Rajen a baꞌ caj a wuꞌyex yaꞌaric a nunquirex uch.
Jot,
a baꞌ caj u camsechex a nunquirex uch.
19 Caj quinsaꞌb Jesús ich cruz.
Quinsaꞌb irej tʌmʌn yuc a jach tsoyoꞌ a cu quinsaꞌr uch,
u boꞌorir u siꞌpir mac.
Caj quimij Jesús ich cruz mʌnaꞌ cꞌʌs siꞌpir chichin.
20 Cꞌaj techex.
Toc araꞌb tiꞌ Cristo u tar ten Cꞌuj tu chꞌic chunin uch.
Cax mʌꞌ toy betaꞌc ruꞌum uchiꞌ.
Toc tetaꞌb Cristo quir u quimin toꞌonex.
Caj cꞌuchij tu qꞌuinin a tu pꞌis u qꞌuinin Cꞌuj caj tar Cristo caj ij quirex,
quij.
Mʌꞌ ja wirej,
tarij quir u quimin toꞌonex.
Quir u boꞌotic ic siꞌpirex.
21 Caj a wacsex ta worex tiꞌ Jesucristo baxuc caj a wacsex ta worex tiꞌ Cꞌuj.
Mʌꞌ ja wirej,
ricꞌsaꞌb Jesús ten Cꞌuj tu quimirir.
Rajen ta wacsex ta worex tiꞌ.
Ricꞌsaꞌb Jesús ten Cꞌuj soc yer mac jach noꞌj Jesús.
Rajen ta wacsex ta worex tiꞌ Cꞌuj quir a cuxtarex munt qꞌuin quireꞌ rajiꞌ ca pajiquex Cꞌuj caꞌ u tsꞌa techex a cuxtarex.
22 Bajeꞌrer a techexoꞌ,
ta wuꞌyex u tꞌʌn Cꞌuj,
rajen u yajechex u Tajꞌor u Pixam Cꞌuj.
A baywoꞌ tu jaws a siꞌpirex,
rajen ca quiꞌquiꞌ yajquintiquechex a wet acsʌꞌorirex.
Caꞌ a pacran yajquint a bʌjex.
Taj ca quiꞌ yajquint a bʌjex.
23 A techexoꞌ ricꞌbenechex quireꞌ ta quibex u tꞌʌn Cꞌuj,
rajiꞌ cuxriquechex u tꞌʌn Cꞌuj.
Ricꞌbenechex ire caꞌ rochaꞌbechex ten a nʌꞌex.
Mʌꞌ ja wirej,
u tꞌʌn Cꞌuj mʌꞌ ju tsꞌocar,
rajen quic bin cuxtarex munt qꞌuin.
Mʌꞌ ja wirej,
ic tetex,
mʌꞌ ju jach tsꞌaj ij cuxtarex ich yocꞌocabiꞌ jeꞌ ij quiminexeꞌ.
24 Mʌꞌ ja wirej,
tiꞌ tsꞌibaꞌan ich u tꞌʌn Cꞌuj a cu yaꞌaric:
Tu cotor mac irej suꞌuc.
Mʌꞌ ja wirej,
tu cotor ju tsoyoꞌ ich yocꞌocab,
cu manob irej suꞌuc u topꞌ.
Cu tijir a suꞌucoꞌ,
cu jutur u topꞌ.
Baxucoꞌonex,
xan,
caꞌ bin quimicoꞌonex mʌꞌ ju cꞌajʌrtoꞌonex ic racꞌobex.
25 Barej u tꞌʌn Cꞌuj,
mʌꞌ ju tsꞌocar munt qꞌuin yʌn.
Raꞌiriꞌ tiꞌ u tꞌʌn Cꞌuj,
caj tsecꞌtaꞌb techex quir a wacsiquex ta worex.