Cu chich araꞌ tiꞌ a neyʌn u taqꞌuineꞌ
5
Arex tiꞌ a mac neyʌn u taqꞌuineꞌ caꞌ u yʌxchun yaqꞌuic tu bʌj caꞌ awatꞌnʌc xan.
Quireꞌ bin u caꞌob mucꞌyaj xan.
2 Arex tiꞌob,
jot u taqꞌuinob quireꞌ a Cꞌujoꞌ cu yiric irej wa rab.
Bayiriꞌ xan jot u nocꞌ quireꞌ a Cꞌujoꞌ cu yiric irej wa ju jantmʌn chꞌoꞌ.
3 Arex tiꞌob xan,
jot u taqꞌuinob oro,
baxuc u sʌc taqꞌuinob quireꞌ a Cꞌujoꞌ cu yiric jacꞌaꞌan yitsꞌ quireꞌ mʌꞌ ju xupicob u taqꞌuinob quir u beyaj tiꞌ Cꞌuj.
Mʌꞌ ju beyajob yejer Cꞌuj xan.
Robob a neyʌn u taqꞌuinob,
mʌꞌ ju cꞌʌꞌotob wa cu yiric Cꞌuj jot yejer taqꞌuinob.
Mʌꞌ ja wirej,
cu chen tucricob u tꞌajʌr u taqꞌuinob tu yorob bajeꞌrer.
Cax bajeꞌrer tan u chen tꞌajʌr u mucꞌyajob.
Caꞌ bin cꞌuchuc tu qꞌuinin a tu pꞌisa Cꞌujoꞌ bin u caꞌob u jach mucꞌyaj.
Raꞌ qꞌuininoꞌ bin u caꞌob mucꞌyaj munt qꞌuin ich cꞌacꞌ.
4 Wa ju taqꞌuin a neyʌn u taqꞌuinoꞌ cꞌuchaꞌan yor u tsicbar raꞌ a neyʌn u taqꞌuin,
rajiꞌ jeꞌ yaꞌaric:
“A tenoꞌ u taqꞌuinen a mac a beyanʌjob uch tiꞌ in Jach Tsꞌurir.
Cax rʌc jocꞌ u nar in tsꞌurir mʌꞌ tu quiꞌ boꞌot yʌjjaqꞌuirob u nar in tsꞌurir.”
Baxuc u yaꞌaric u taqꞌuin a neyʌn u taquinob wa cꞌuchaꞌan yor tsicbar.
Chen ic Jaj Tsꞌurirex Cꞌuj rajiꞌ cu tsꞌurintic tu cotor mac.
Caj yubaj yaꞌaraꞌ tiꞌ ten yʌjjaqꞌuirob u nar:
“Mʌꞌ ja quiꞌ boꞌotaj tenobiꞌ.”
Baxuc caj yuba Cꞌuj yaꞌaric.
5 A techexoꞌ,
a neyʌnex a taqꞌuinex,
tan a manex a quiꞌquiꞌ janʌnex.
Tan a manex a quiꞌ mʌnex a nocꞌ bayiriꞌ tan a manex a mʌniquex a baꞌtaquex xan teꞌraꞌ ich yocꞌocab.
Mʌꞌ ja wirej,
tan a chen manex a pachtex baꞌ tiꞌ a winquirirex.
A techexoꞌ,
tan cʌniquex an ten bic a qꞌuecꞌʌnoꞌ quireꞌ suꞌsuꞌ cu janʌn a qꞌuecꞌʌnoꞌ.
Quireꞌ a qꞌuecꞌʌnoꞌ mʌꞌ ju tucr u quimin.
Caꞌ bin tsꞌocac u poroc,
jeroj,
cu bin quinsbir.
Baxuc techex xan wa neyʌn a taqꞌuinex.
Mʌꞌ ja wirej,
ca chen manex a pachtiquex baꞌ tiꞌ a winquirirex.
Mʌꞌ rajraꞌ,
ca bin cuxtarex quireꞌ jeꞌ a quiminexeꞌ.
Jeroj ca binex ich cꞌacꞌ.
6 A techexoꞌ,
a neyʌn a taqꞌuinex.
Mʌꞌ ja wirej,
a techexoꞌ ca taꞌquiquex u joꞌr a mac a mʌnaꞌ u siꞌpiroꞌ.
Jeroj ta quinsexoꞌ.
A ta quinsajexoꞌ mʌꞌ ju tac u bʌj techexiꞌ.
Tꞌʌnex Cꞌuj soc u chichquintiquex a wor
7 Rajen in bʌjobechex,
caꞌ ic mucꞌtex caꞌ ic quiꞌ paj u qꞌuinin caꞌ bin uruc ic Jaj Tsꞌurirex.
Caꞌ ic cʌnex yʌjpʌqꞌuir nar an ten bic cu pajic u tar yaꞌarir u pʌcꞌar nar.
Yer caꞌ bin tsꞌoc u tar yaꞌarir,
cu chꞌijir u pʌcꞌar nar.
Cu jobar yiꞌjir.
Cu tijireꞌ cu jaqꞌuic.
8 Baxuc toꞌonex caꞌ ij quiꞌ paje ic Jaj Tsꞌurirex rajen caꞌ ic chichquintex ij corex quireꞌ tabar yur ic Jaj Tsꞌurirex.
9 In bʌjobechex mʌꞌ tsoy ic pacran pʌquiquex ic pachex,
quireꞌ tan ic mucꞌyajex,
soc caꞌ bin cꞌuchuc tu qꞌuinin,
mʌꞌ ju taꞌquic ic joꞌrex Cꞌuj.
Mʌꞌ ja wirej,
tabar u cꞌuchur a mac cu bin u taꞌquic ic joꞌrexeꞌ.
10 In bʌjobechex caꞌ ij quiꞌ cʌnex yʌjtseqꞌuirob u tꞌʌn Cꞌuj uch.
Mʌꞌ wa cꞌaj techex caj u tsecꞌtob u tꞌʌn Cꞌuj uch.
Robob tuchiꞌtaꞌb ten ic Jaj Tsꞌurirex.
Mʌꞌ ja wirej,
tu jach mucꞌtob caj chucob u pachob ten u racꞌob uch.
Rajen tsoy caꞌ ij cʌnej yʌjtseqꞌuirob u tꞌʌn Cꞌuj uch soc baxuc toꞌonex xan.
11 Rajen baxuc quij cariquex a mac a tu mucꞌtaj u yajirir uch,
jach taj jach quiꞌ yor.
An ten bic Job uch,
mʌꞌ wa cꞌaj techex uch,
caj u mucꞌt u yajirir Job uch,
quireꞌ chichquintaꞌb yor ten ic Jaj Tsꞌurirex uch.
Cꞌaj techex caj tsꞌoc u mucꞌtic u yajirir Job rajen pachir a Cꞌujoꞌ caj quiꞌ cʌnantaꞌb.
Quireꞌ a Cꞌujoꞌ cu yajquinticoꞌonex bayiriꞌ cu quiꞌ tucricoꞌonex xan.
Rajen yajquintaꞌb u parar Job rajen yamtaꞌb ten Cꞌuj.
12 Rajen in bʌjobechex,
mʌꞌ a yʌn tus tꞌʌniquex Cꞌuj tu ca mucꞌyajex,
rajen caꞌ a quiꞌ cʌniquex aroꞌ.
Jach manan caꞌ a cʌnex aroꞌ.
Rajen toc pꞌʌtex a tus tꞌʌniquex Cꞌuj.
Mʌꞌ tsoy a waꞌariquex:
“Cꞌuj cu yiric”,
quireꞌ a Cꞌujoꞌ tiꞌ yʌn ich caꞌananiꞌ quireꞌ rajiꞌ tu betaj yocꞌocab.
Taj caꞌ tsicbanʌquechex.
Wa ca waꞌariquex jeꞌerereꞌ taj caꞌ a toc betex.
Mʌꞌ a chen ariquex Cꞌuj cu yiric.
Wa ca waꞌariquex mʌꞌ mʌꞌ a betiquex aroꞌ,
caꞌ a toc arex mʌꞌ a chen ariquex Cꞌuj cu yiric soc mʌꞌ a wacsiquex a siꞌpirex soc mʌꞌ u taꞌquiquex a joꞌr Cꞌuj.
13 Wa tiꞌ yʌn mac tu yʌnechex wa tan u mucꞌyaj,
arej tiꞌ caꞌ u tꞌʌnej Cꞌuj soc mʌꞌ u yacꞌtic u bʌj.
Wa quiꞌex a worex cꞌaynʌquechex tiꞌ Cꞌuj.
14 Wa tiꞌ yʌn tuririꞌ tu yʌnechex wa yaj.
Arej tiꞌ caꞌ u pʌy u jach tsꞌurirob tu cu cꞌayob,
a nuxiboꞌ,
soc u tꞌʌnicob Cꞌuj tiꞌ a yajeꞌ.
Soc u jicꞌtaꞌr u tsꞌac tsats tu joꞌr.
Quireꞌ quet bayiriꞌ tan u tꞌʌnicob u Jaj Tsꞌurirob.
15 Jeꞌ u jawʌr u yajir u racꞌobeꞌ tu cu tꞌʌnicoꞌ Cꞌuj,
quireꞌ tu yacsaj tu yor tiꞌ u tꞌʌn Cꞌuj.
Jeꞌ u jawsaꞌr ten Cꞌuj wa yʌn u siꞌpir a yajeꞌ jeꞌ u jawsaꞌr u siꞌpir xaneꞌ.
16 Rajen caꞌ a toc arex a siꞌpirex tiꞌ a racꞌobex.
Tꞌʌnex Cꞌuj tiꞌ a racꞌobex soc Cꞌuj cu yamtiquechex wa ber ca yajtarex.
Mʌꞌ ja wirej,
a mac jach taj yoroꞌ jach neyʌn u mucꞌ tu cu tꞌʌnicob Cꞌuj.
Aroꞌ rajiꞌ cꞌuchaꞌan yor tiꞌ tu cotor baꞌ.
17 Uꞌyex baꞌ cu camsicoꞌon ic nunquirex Elías.
Mʌꞌ ja wirej,
a Elías iroꞌonex caj u tꞌʌnaj Cꞌuj Elías soc mʌꞌ ju tar yaꞌarir,
rajen mʌꞌ tar yaꞌarir hasta man tres yaxqꞌuin u jer chumuc yaxqꞌuin mʌꞌ ju tar yaꞌarir.
18 Caj u wʌcꞌʌs tꞌʌnaj Cꞌuj Elías caꞌ tac yaꞌarir caj wʌcꞌʌs tar yaꞌarireꞌ,
caj chꞌij u pʌcꞌʌrob.
19 In bʌjobechex wa tiꞌ yʌn mac tu yʌnechex a tu pꞌʌtaj u tꞌʌn Cꞌuj quireꞌ tus paꞌay u ber ten u tus ʌjcamsʌyʌjir u tꞌʌn Cꞌuj.
Chen wʌcꞌʌs binij mac quir u yamtaꞌr a mac tus soc u jach cꞌaxic tu yor,
jeroj tu jach cꞌaxaj tu yor.
20 Arex tiꞌ a mac tu yamtaj a tus camsaꞌb caꞌ u cꞌaxic tu yor soc u pꞌʌtic u siꞌpir soc a tus camsaꞌbeꞌ soc mʌꞌ ju bin saꞌtʌr,
rajen toc rʌc jawsaꞌb u siꞌpir a mun yʌn tiꞌ.
Quireꞌ yamtaꞌb ten u yet acsʌꞌorir.