A baꞌ yʌn ich yocꞌocab a cu quiꞌ yajquintic
4
An tub u tar quic tucric ic tsꞌictarex?
An tub u tar quic tucric ic nunquex u tꞌʌn ic racꞌobeꞌ.
Tiꞌ cu tar ich cꞌas.
Quireꞌ quic pachtiquex tij corex cꞌas.
Rajen tan ic manex ic tsꞌiquint ic racꞌobex.
2 Mʌꞌ ja wirej,
quic tus pachtex u jer a baꞌ mʌnaꞌ toꞌonex.
Rajen quij quinsiquex mac.
Rajen cu qꞌuextar ij corex quireꞌ quij quiriquex mʌnaꞌ toꞌonex.
Rajen tan ic nunquiquex u tꞌʌn ic racꞌobex.
Rajen mʌꞌ ij quiriquex a baꞌquirir ij cꞌatex quireꞌ mʌꞌ jij cꞌatex tiꞌ Cꞌuj.
3 Cax wa quic chen tus cꞌatex tiꞌ Cꞌuj.
Mʌꞌ u tsꞌaja toꞌonex Cꞌuj,
quireꞌ ic nonoj bʌjiriꞌex ij cꞌatex.
4 An ten bic a xquicoꞌ mʌꞌ quet yor yejer u mam wa cu man.
Baxuc toꞌonex wa mʌꞌ quet ij corex yejer Cꞌuj.
Mʌꞌ ja wirej,
tan ic pꞌactex Cꞌuj wa quic pachtex cꞌas tij corex ir mac a mʌꞌ yer Cꞌuj.
Wa quij quibiquex a baꞌ quic pachtiquex tij corex an ten bic mac mʌꞌ yer Cꞌuj.
A Cꞌujoꞌ,
cu pꞌacticoꞌonex xan.
5 Rajen cu yaꞌaric toꞌonex tu tsꞌibaꞌan u tꞌʌn Cꞌuj uch.
Tan yaꞌaric:
“U Tajꞌor u Pixam Cꞌuj,
mʌꞌ u cꞌat ic tsꞌurintiquex u jer chen u bʌjiriꞌ u cꞌat ic tsꞌurintiquex.”
Baxuc cu yaꞌaric Cꞌuj.
6 Mʌꞌ ja wirej,
a Cꞌujoꞌ u cꞌat ic tsꞌurintiquex soc chen rajiꞌ ic Jaj Tsꞌurirex.
Rajen Cꞌuj tsoy tu tꞌʌn quir u yamtic toꞌonex soc rajiꞌ ic jach tsꞌurir.
Rajen cu yaꞌaric Cꞌuj:
“A tenoꞌ Cꞌujen quin pꞌactic a mac a cu yaꞌaric tu yor:
Jach caremen.
Chen a tenoꞌ,
quij Cꞌuj,
quireꞌ tsoy tin tꞌʌn caꞌ in yamte tiꞌ mac a cu yaꞌaric ten:
Mʌꞌ caremeniꞌ,
quij.”
7 Rajen caꞌ ic chaꞌex ic tsꞌurintiquex a Cꞌujoꞌ,
chen caꞌ ic pꞌisex ic bʌjex soc mʌꞌ ic tsꞌurintiquex a quisinoꞌ,
soc u pꞌʌticoꞌonex.
8 Caꞌ ic jutsꞌex ic bʌj ich Cꞌuj quireꞌ tij cacsa tij corex.
Bayiriꞌ jeꞌ u jutsꞌic u bʌj a Cꞌuj xanoꞌ tub yʌnoꞌon quir u cʌnanticoꞌonex.
A techexoꞌ,
a ca manex tu cꞌasir caꞌ a pꞌʌtex soc a manex tu tsoyir.
Arex tiꞌ Cꞌuj caꞌ u rucꞌs a siꞌpirex quireꞌ soc quet a worex yejer Cꞌuj.
9 Caꞌ a quiꞌ acꞌtex a bʌj,
quireꞌ ta pʌy a siꞌpirex,
a techexoꞌ a bʌjiriꞌ tan a cheꞌejexeꞌ.
Arex tiꞌ caꞌ yacꞌtex u bʌj quireꞌ ta wacsex u siꞌpirex.
A techoꞌ quireꞌ quiꞌ a worex bajeꞌrereꞌ.
Arex tiꞌ,
caꞌ neyacꞌtex u bʌj quireꞌ ta wacsex ta siꞌpirex.
10 Arex tiꞌ Cꞌuj:
“Jach cꞌasen a tenoꞌ Jaj Tsꞌur quireꞌ mʌꞌ jin quib a tꞌʌn uch.”
Baxuc caꞌ a warex,
tiꞌ,
soc u jawsic a siꞌpirex soc u quiꞌ acsicoꞌonex ic Jaj Tsꞌurirex caꞌ bin xuruc tꞌʌn.
11 Mʌꞌ a yʌn pʌqꞌuiquex u pach a wet acsʌꞌorirex in bʌjobechex.
Wa ca paqꞌuiquej u pach a wet acsʌꞌorirex mʌꞌ tan a jach cʌnantiquex u tꞌʌn Cꞌuj.
A tu yaꞌaraj uch:
“Caꞌ a yajquintiquex a wet cajarex,
irej a wʌsʌcꞌ bʌjiriꞌex ca yajquintiquex.”
Mʌꞌ ja wirej,
tan a pꞌastiquex a jeꞌ tꞌʌnaꞌ.
Mʌꞌ ja wirej,
tan a tus tetiquex u tꞌʌn Cꞌuj a tu yʌn tsoy a quibiquexeꞌ.
A tiꞌ yʌn,
a mʌꞌ tsoyoꞌ raꞌ ca tus quibiquex.
Wa baxuc caj a tetex mʌꞌ ta jach quibex u tꞌʌn Cꞌuj.
Mʌꞌ ja wirej,
tan a tus tucriquex irechex wa juesechex.
12 Chen tuririꞌ yʌn.
Rajiꞌ tu tsꞌaj u tꞌʌn toꞌonex.
Rajiꞌ tuririꞌ Jach Juéz yʌn.
Rajiꞌ Cꞌuj.
Rajiꞌ cꞌuchaꞌan yor u taquicoꞌonex.
Jaririꞌ,
rajiꞌ cꞌuchaꞌan yor u jocꞌsicoꞌonex caꞌ xicoꞌonex ich cꞌacꞌ.
Caꞌ bin cꞌuchuc tu qꞌuinin.
Rajen a toꞌonexoꞌ mʌꞌ tsoy ic tus tucriquex ic taꞌquiquex u joꞌr ij quet cajarex.
Mʌꞌ ij querex baꞌ cu bin tar samʌn
13 Uꞌyex a techexoꞌ,
a mac a tu yaꞌaraj:
“Caꞌ xicoꞌonex bajeꞌrer,
cax wa samʌn ic binex tu cajar a tic tsicbatex joꞌoraj.”
Caꞌ pꞌatʌcoꞌonex tuririꞌ yaxqꞌuin caꞌ ic cʌnjex baꞌ,
quir ic jariquex ic taqꞌuinex.
Bayiriꞌ caꞌ ic mʌnex baꞌtaquex soc ic jariquex ic taqꞌuinex xan.
Baxuc caj a waꞌarex a techexoꞌ.
14 Wa ber ca waꞌariquex a techexoꞌ aroꞌ,
quireꞌ mʌꞌ a werex wa tiꞌ toy cuxaꞌanechex samʌn.
Irechex u pꞌur,
sansameꞌ bin.
Baxuc toꞌonex xan mʌꞌ yaꞌab u qꞌuinin tiꞌ yʌnoꞌonex jeroj,
quij quiminoꞌonex xan.
15 Rajen caꞌ ij carex,
wa tsoy tu tꞌʌn ic Jaj Tsꞌur caꞌ cuxracoꞌonex jeꞌ ic betiquex baxucoꞌ.
Wa baxuc quij cariquex,
jach tsoy.
16 Chen a techexoꞌ mʌꞌ baxuc ca waꞌariquex.
A bʌjiriꞌex ca waꞌariquex:
“Cꞌuchaꞌan in wor in wʌcꞌʌs bʌjiriꞌ in tsꞌurinticoꞌ.”
A mac a cu yaꞌaric baxucoꞌ,
jeroj,
tu pʌyaj u siꞌpirob.
17 Wa jij querex baꞌ quireꞌ jach tsoy chen mʌꞌ jic betiꞌ jeroj tij cacsex ic siꞌpirex.