Ij caqꞌuex
3
Uꞌyex in bʌjobechex.
Arex tiꞌ a racꞌobex soc mʌꞌ yaꞌab cu yocarob u camsic tiꞌ u tꞌʌn Cꞌuj.
Mʌꞌ ja wirej,
caꞌ bin cꞌuchuc tu qꞌuinin caꞌ bin xiquenob ʌcʌtan Cꞌuj.
Jach manan cu bin u qꞌueyiquenob Cꞌuj wa mʌꞌ taj tin camsajob tiꞌoꞌ.
2 Tu cotoroꞌonex quic jen masiquex a baꞌ quij cariquex ich ic racꞌobex.
Barej wa tiꞌ yʌn tuririꞌ mac mʌꞌ u jen masic tiꞌ u racꞌob,
aroꞌ jach manan tsoyir.
Quireꞌ cꞌuchaꞌan yor u tsꞌurintic u winquirir soc bayiriꞌ mʌꞌ u man tu cꞌasir.
3 Caꞌ ij cʌnex u mascabir a cꞌapar tu chiꞌ tsimin.
Cax chichin u mascabir a cu cꞌapar tu chiꞌ tsimin.
Raꞌ quir u tsꞌurintic u winquirir tsimin.
Baxuc toꞌonex ij caqꞌuex cax chichin ij caqꞌuex caꞌ ij cʌnantex soc cꞌuchaꞌan ij corex,
ic tsꞌurintex ic winquirirex.
4 Baxuc xan caꞌ ij cʌnex a jeꞌ chem.
Cax carem cu cuchur ten icꞌ.
Yʌn u chan cꞌʌb u chemin quir u tajquintic soc taj u bin.
Cax tub u cꞌat bin u winquirir u chem tiꞌ cu biniꞌ.
5 Baxuc xan ij caqꞌuex cax chichin ij caqꞌuex jach manan yaꞌab quij cariquex tiꞌ mac,
soc u tus tucric jach carem.
A werex a cꞌacꞌoꞌ,
cax chichin mʌꞌ u xur u bin u yerar.
Seb cu rʌc erar.
Wa mʌꞌ seb u tupur,
cu rʌc erar cꞌax.
6 An ten bic ij caqꞌuex irej cꞌacꞌ.
Cu tsicbʌtic tu cotor cꞌas.
Ij caqꞌuex cu cꞌasquintic tu cotor ic winquirirex cax chichin ij caqꞌuex ich ic winquirirex quireꞌ ij caqꞌuex irej wa cu rʌc tꞌʌbic ij cuxtarex caꞌ erac.
Tiꞌ u tar a cꞌacꞌoꞌ ich quisin a cu tar ich ij caqꞌuex.
7 Mʌꞌ ja wirej,
a bʌcꞌoꞌ a cu man ich cꞌax.
Bayiriꞌ can xan cu tsꞌurinticoꞌonex.
Bayiriꞌ chꞌichꞌ xan baxuc cʌy cu rʌc tsꞌurinticoꞌonex.
Tu cotoroꞌonex cu rʌc tsꞌurinticoꞌonex.
8 Chen mʌnaꞌ mac cꞌuchaꞌan yor u tsꞌurintic ij caqꞌuex uch.
Mʌnaꞌ mac cꞌuchaꞌan yor u suꞌsic u cꞌasir ij caqꞌuex.
Mʌꞌ ja wirej,
a canoꞌ yʌc u coj,
wa cu chiꞌic mac cu quimin.
Baxuc ij caqꞌuex xan irej yʌquir u coj can a cu quinsic mac.
9 Yejer ij caqꞌuex quic tꞌʌniquex Cꞌuj.
Quij cariquex tiꞌ Tetex Cꞌuj:
“Bayoꞌ Cꞌuj jach caremech.”
Bayiriꞌ yejer ij caqꞌuex quij qꞌueyiquex mac cax chen rajiꞌ betoꞌonex a Cꞌujoꞌ,
chen bajoꞌonex a Cꞌujoꞌ,
quic qꞌueyiquex mac.
10 Raꞌiriꞌ tiꞌ ic chiꞌex xan,
cu jocꞌar ic tꞌʌnex quij cariquex:
“Bayoꞌ Cꞌuj,
jach caremech Cꞌuj.”
Sʌsameꞌ cu jocꞌar ic tꞌʌnex quij qꞌueyiquex mac.
A baxucoꞌ in bʌjobechex mʌꞌ tsoy ij cariquex baxucoꞌ.
11 Caꞌ a tucrex wa cu jocꞌar yicꞌ jaꞌ caꞌtur.
Wa chꞌaja cu jocꞌar wa juntur cꞌaj cu jocꞌar yicꞌ jaꞌ.
Mʌnaꞌ yicꞌ jaꞌ chꞌaja cu jocꞌar yejer cꞌaj.
Bayiriꞌ tiꞌ ij caqꞌuex xanoꞌ.
12 Caꞌ tucrex xan in bʌjobechex.
Jeꞌ wa ju wichʌncʌr on tu cheꞌer ʌrʌxaj.
Mʌꞌ biqꞌuin cu wichʌncʌr on ich u cheꞌer ʌrʌxaj.
Jeꞌ wa ju wichʌncʌr siquiteꞌ ich u cheꞌer on.
Mʌꞌ biqꞌuin cu wichʌncʌr ich u cheꞌer on.
Baxuc xan mʌꞌ u jocꞌar yicꞌ jaꞌ caꞌtur,
mʌꞌ biqꞌuin cu jocꞌar yicꞌ jaꞌ caꞌtur.
Mʌnaꞌ cꞌaj,
mʌnaꞌ chꞌaj,
chen tuririꞌ yicꞌ jaꞌ.
A mac a jach er u camsic mac
13 A mac a ju jach quiꞌ cʌmʌn quir u camsic u racꞌob,
a tiꞌ yʌn tu yʌnechex.
Arej yese taj u man tu tsoyir quireꞌ rajiꞌ cu bin u yese u jach eroꞌ u camsaꞌ quireꞌ cu yirir ten u racꞌob mʌꞌ u tucrej wa jach carem.
14 Wa techex ca chen tus pꞌisex a bʌjex tu ca tus camsiquex mac soc yiricob jach cꞌuchaꞌan a worex a camsiquex a tiꞌoboꞌ.
Rajen mʌꞌ tsoy a tucriquexoꞌ a waꞌarex:
“Ic jach erex ij camsex.”
A techexoꞌ tus a caꞌex quireꞌ a techexoꞌ mʌꞌ tan a quibex u tꞌʌn Cꞌuj,
a jach tajoꞌ.
15 Aroꞌ mʌꞌ ju tar ich Cꞌuj.
Quireꞌ ca chen betiquex an ten bic a mac a mʌꞌ yerob Cꞌuj cu beticob.
Ca chen quibiquex a baꞌ ca pachtiquex ta worex rajen cꞌas.
Ca chen quibiquex a baꞌ u cꞌat a quisinoꞌ.
16 Quireꞌ wa quic chen pꞌis ic bʌjex tu quic camsiquex mac soc yiricob jach cꞌuchaꞌan ij cor ij camsiquex tiꞌob,
quic chen pꞌus yorob mac,
a baywoꞌ mʌꞌ ij querex baꞌ tsoyir caꞌ ic betiquex.
Quic chen manex tu cꞌasir.
17 Chen a mac u neꞌer u camsic u racꞌob quireꞌ tsꞌab u tꞌʌnin ten Cꞌuj soc yer u camsic u racꞌob.
Rajiꞌ jach tsoy yor quir u cuxtar.
Rajen mʌꞌ u pꞌusej yor u racꞌob.
Mʌꞌ ju choquintic yor u racꞌob.
Cu quibir u tꞌʌn ten u racꞌob.
Cu betic a tsoyoꞌ.
Bayiriꞌ cu yajquintic u racꞌob xan.
Mʌꞌ coyen u yajquintic u racꞌobiꞌ.
18 A mac a ju neꞌer u camsic u racꞌob quireꞌ tsꞌaꞌb u tꞌʌnin ten Cꞌuj.
Rajen a baywoꞌ,
tan u man u sisquint u yor u racꞌob.
Rajen a baywoꞌ jeꞌ u cʌnicob u manob tu tsoyir u racꞌob.
A baywoꞌ u wʌcꞌʌs u bʌjiriꞌ cu bin u quiꞌquintic yor.