Caꞌ a quiꞌ acsex tu cotor mac
2
Quireꞌ a toꞌonex a tij cacsex tij corex u tꞌʌn ic Jaj Tsꞌurirex.
Rajiꞌ jach manan tsoyir ic Jaj Tsꞌurirex rajen mʌꞌ tsoy ij coyen tetiquex ij cacsex mac.
2 Caꞌ ic quiꞌ tucrex a baꞌ quic bin ic betex tu quic cꞌayex.
Jeroj cu tar tuririꞌ a neyʌn u taqꞌuinoꞌ.
Jeroj cu tar a neꞌotsiroꞌ.
A neyʌn u taqꞌuinoꞌ jach tsoy u nocꞌ.
Bayiriꞌ yʌn u cꞌarabar u cꞌʌb oro.
A otsiroꞌ,
cu yocar rab u nocꞌ.
3 Tsoy wa quij quiꞌ acsiquex a neyʌn u taqꞌuinoꞌ.
Rajen quij cariquex tiꞌ tu junan:
“Teꞌ a cutar techaꞌ tu jach tsoyir a cutan.”
Baxuc quij cariquex tiꞌoꞌ.
Chen wa mʌꞌ ij quiꞌ acsic a otsiroꞌ.
Rajen quij cariquex tiꞌ:
“Tiꞌ tar a chꞌictaroꞌ wa mʌꞌ ju cꞌat u chꞌictar ca waꞌariquex tiꞌ “Tiꞌ tar a cutar ich ruꞌumoꞌ.”
Baxuc quij cariquex tiꞌoꞌ.”
4 Wa baxuc tan ic betiquex.
Tan ic tetiquex ij cacsex mac.
Mʌꞌ ja wirej,
tan ij coyen acsiquex mac.
Rajen cꞌas ic tucurex,
quireꞌ iroꞌonex juez,
quireꞌ mʌꞌ ij coyen acsej a otsiroꞌ.
5 Uꞌyex baꞌ quin wac in jach yajechex in bʌjobechex.
A Cꞌujoꞌ tan u tetic a mac otsiroꞌ teꞌ a yʌn ich yocꞌocab.
A tu yacsob tu yor raꞌ u netaqꞌuinob a tiꞌoboꞌ.
Mʌꞌ ja wirej,
a Cꞌujoꞌ caj u yaꞌaraj tiꞌ cu bin u quiꞌ acsʌbir a tiꞌoboꞌ tu cu bin u reyintic Cꞌuj.
Quireꞌ Cꞌuj tu yaꞌaraj tiꞌ cu bin ocar a mac a cu yajquinticob Cꞌujoꞌ.
6 Chen atechexoꞌ,
mʌꞌ ta coyen quiꞌ acsex a otsiroꞌ.
Ta coyen quiꞌ acsex a neyʌn u taqꞌuinoꞌ.
Raꞌ cu cꞌʌniquechex ta beyajex.
Mʌꞌ wa robob cu taꞌquicob a joꞌrex ich juez?
7 Quireꞌ a neyʌn u taqꞌuinoꞌ robob cu pꞌasticob Cristo,
baxuc xan tu pꞌastiquechexob xan quireꞌ caj a wacsajex ta worex u tꞌʌn Cristo.
8 Mʌꞌ ja wirej,
tiꞌ tsꞌibaꞌan ich u tꞌʌn Cꞌuj:
“Yajquintej a racꞌob an ten bic a bʌjiriꞌ ca wʌcꞌʌs yajquintiqueꞌ a bʌjiriꞌ.”
Baxuc cu yaꞌaric Cꞌuj.
Rajen caꞌ a quiꞌ quibiquex a jeꞌ tꞌʌnaꞌ,
quireꞌ jach manan tsoyir.
Bayiriꞌ jeꞌ a quiꞌ yajquintic xan a otsiroboꞌ quet bayiriꞌ a yajquintic a yʌn u taqꞌuinoꞌ.
9 Wa quij coyen tetiquex mac caꞌ ij cacsex.
Tic pʌyej ic siꞌpirex quireꞌ mʌꞌ jij quibexiꞌ a baꞌ cu yaꞌaric Cꞌuj toꞌonexeꞌ.
10 Cax wa chen cꞌuchaꞌan a worex a rʌc quibex a baꞌ cu yaꞌaric toꞌonex Cꞌujoꞌ.
Wa ta cꞌasquintex a tuririꞌoꞌ,
ta toc rʌc cꞌasquintex tu cotor a baꞌ tu yaꞌaraj Cꞌuj toꞌonexoꞌ.
11 Bayiriꞌ caj yaꞌaraj toꞌonex Cꞌuj:
“Mʌꞌ a yʌn manex.”
Bayiriꞌ caj yaꞌaraj xan:
“Mʌꞌ a yʌn quinsiquechex mac.”
Rajen wa mʌꞌ jic manex rajen wa tic chen quinsaj mac,
jeroꞌ tij cꞌasquintex a baꞌ tu yaꞌaraj toꞌonex Cꞌuj uch.
Tic pʌy ic siꞌpirex.
12 Rajen caꞌ ij carex baꞌ tsoy tu quic tsicbarex.
Rajen caꞌ ic manacoꞌonex tu tsoyir iroꞌonex mac a tabar ic binex ʌcʌtan Cꞌuj quir yiric wa tsoy ic beyajex.
Quireꞌ Cꞌuj tu rucꞌs ic siꞌpirex soc ic man tu tsoyirex.
13 Mʌꞌ ja wirej,
wa toꞌonex mʌꞌ jic yajquintex mac bajeꞌrereꞌ.
Bayiriꞌ xan caꞌ bin cꞌuchuc tu qꞌuinin ic binex ʌcʌtan ich Cꞌuj,
bayiriꞌ mʌꞌ u yajquintoꞌonex Cꞌuj xan.
Wa quic yajquintiquex ic racꞌobex bajeꞌrereꞌ.
Baxuc caꞌ bin xicoꞌonex ʌcʌtan ich Cꞌuj bin u caꞌ u yajquintoꞌonex xan.
Bayiriꞌ mʌꞌ ju jocꞌsicoꞌonex xan Cꞌuj.
A mac tu yacsaj tu yor u tꞌʌn Cꞌuj caꞌ yese taj u beyaj
14 Mʌꞌ tsoy ic tusariquexiꞌ in bʌjobechex tij cacsex tij corex,
chen tiꞌ toy quic manex tu cꞌasiriꞌ.
Wa baxuc tan ij cariquex mʌꞌ ju bin u tacoꞌonex Cꞌuj.
15 Aroꞌ irej wa quij cariquex ij quet acsʌꞌorirex wa mʌnaꞌ u nocꞌ wa mʌnaꞌ yoꞌoch quir u janʌnob.
16 Tsoy wa quij cariquex:
“Joqꞌuen xen,
caꞌ a cʌxt a nocꞌ,
caꞌ a cʌxt a woꞌoch quir a janʌn xan.
Mʌꞌ ja wacꞌtic a bʌj.”
Wa baxuc quij cariquex tiꞌob chen mʌꞌ jic tsꞌaj a tiꞌ u nocꞌ mʌꞌ jic tsꞌaja yoꞌoch.
Mʌꞌ tan ij cacsiquex tij corex tiꞌ Cristo.
17 Wa baxuc tic betex chacaꞌan yiricob mac,
wa tic jach acsex tij corex wa mʌꞌ tic jach acsex tij corex.
18 Wa tiꞌ yʌn mac tan u tus aric:
“A tenoꞌ jach manan tsoyiren caj in chen acsa tin wor u tꞌʌn Cꞌuj.”
U jer cu tus aric:
“A tenoꞌ jach manan tsoyiren quireꞌ quin man tu tsoyir.
Rajen mʌꞌ in wer baꞌ quin jach bin in quibej.”
Wa baxuc cu yaꞌaric:
A tenoꞌ,
quij Santiago,
quin bin in cꞌatej tiꞌ.
Rajiꞌ a cu yaꞌaric:
“Jach manan tsoyiren caj in chen acsa tin wor u tꞌʌn Cꞌuj.”
Arej ten bic tabar ca bin a wese ten ta wacsaj ta wor wa mʌꞌ ja man tu tsoyir?
Arej ten bic tabar ca bin man tu tsoyir wa mʌꞌ ta wacsaj ta wor?
Mʌꞌ cꞌuchaꞌan a wor a man tu tsoyiriꞌ.
19 Yʌn mac cu yaꞌaric:
“A tenoꞌ quin wacsic tin wor quireꞌ tuririꞌ Cꞌuj yʌniꞌ”,
jach tsoy wa baxucoꞌ.
Ca tusaric tiꞌtiꞌ quir a wacsic ta wor.
Mʌꞌ ja wirej,
quij Santiago.
Quet bayiriꞌ u nupꞌ a quisinoꞌ.
Cu yacsicob tu yorob quireꞌ tuririꞌ Cꞌuj yʌniꞌ.
Chen u nupꞌob,
a quisinoꞌ mʌꞌ quiꞌ yorobiꞌ quireꞌ cu chꞌic sajaquirob tiꞌ Cꞌuj quireꞌ tuririꞌ Cꞌuj yʌniꞌ.
20 A techexoꞌ,
jach chichex a joꞌrex quireꞌ mʌꞌ tiꞌbir a wacsiquex ta worex.
Rajen caꞌ manaquechex tu tsoyir xan.
Mʌꞌ ja wirej,
tan a tusaric taj ta wacsex ta worex.
Mʌꞌ taj ta wacsajex ta worex.
21 Uꞌyex baꞌ cu camsicoꞌonex ic nunquirex Abram.
Mʌꞌ ja wirej,
ic nunquirex caj u sijaj u parar tiꞌ Cꞌuj quir u quinsic.
Raꞌ u parar Isaac.
Caj u chaquint u parar tu cu quinsaꞌr yʌrʌcꞌ quir u sijic tiꞌ Cꞌuj.
A Cꞌujoꞌ tsꞌoc yiric a baꞌ tu betaj Abram,
ʌcʌtan tu wich Cꞌuj jach tsoy Abram.
22 Ta wirex bic tabar ic nunquir Abram caj bin u chaquint u parar soc u quinsic quireꞌ tu yacsaj tu yor,
rajen tu betaj aroꞌ,
a baꞌ araꞌb ten Cꞌuj uch.
A baxucoꞌ aroꞌ chʌcaꞌan ij quiriquex taj tu yacsaj tu yor Abram.
23 Baxuc chʌcaꞌan ij quiriquex taj a baꞌ tsꞌibtaꞌb tiꞌ Abram ten Cꞌuj uch.
Tu cu yaꞌaric:
“Quireꞌ tu quibaj u tꞌʌn Cꞌuj Abram rajen ʌcʌtan tu wich Cꞌuj yiric jach tsoy Abram.”
Baxuc tu tsꞌibaꞌan u jer jun xotꞌ u tꞌʌn Cꞌuj tiꞌ Abram.
Cu yaꞌaric:
“U yet man Cꞌuj Abram.”
24 Ta wirex in bʌjobechex.
Bic tabar a Cꞌujoꞌ mʌꞌ chen jariꞌ cu yiric wa tsoyoꞌon wa quic chen acsiquex tij corex chen caꞌ manacoꞌon tu tsoyir xan quireꞌ a baywoꞌ Cꞌuj cu yiric tsoyoꞌonex.
25 Baxuc,
a xquicoꞌ Rahab u cꞌabaꞌ uch.
Rajiꞌ cu naj man uch quir u jaric u taqꞌuin.
Jach tsoy irir ten Cꞌuj Rahab quireꞌ caj u quiꞌ acsa tu yatoch quir u wenʌn caꞌtur xib a tuchiꞌtaꞌb ten Josué quir u masicob u tꞌʌn uch.
Caj tsꞌoc u wenʌnob caj tuchiꞌtaꞌb ten Rahab ich u jer bej soc mʌꞌ u chucur ten soldado.
26 Mʌꞌ ja wirej,
a teꞌ ich yocꞌocab chen cuxaꞌanoꞌonex quireꞌ yʌn ij qꞌuiqꞌuerex bayiriꞌ yʌn ic pixamex.
Wa mʌnaꞌ toꞌonex aroꞌ quimenoꞌonex.
Bayiriꞌ xan quir ij cuxtarex munt qꞌuin caꞌ ij cacsex tij corex.
Bayiriꞌ xan caꞌ manacoꞌonex tu tsoyir soc ic cuxtarex.
Wa mʌꞌ baxucoꞌ,
mʌꞌ ij cuxtarex munt qꞌuin.