2
Rajen caꞌ a rʌc pꞌʌtex tu cotor cꞌasoꞌ.
Caꞌ a rʌc pꞌʌtex a tusariquex.
Caꞌ a rʌc pꞌʌtex u qꞌuextar a worex.
Caꞌ a rʌc pꞌʌtex a cꞌacꞌas tꞌʌnex.
2 Yʌn cʌnex tun,
baxuc a chichanoꞌ a tan tu rochaꞌr ten u nʌꞌeꞌ.
Mʌꞌ ja wirej,
rajraꞌ cu chuꞌch.
Baxuc toꞌonex,
soc rajraꞌ ic pachtiquex u tꞌʌn Cꞌuj.
Quireꞌ u tꞌʌn Cꞌuj mʌꞌ xacaꞌaniꞌ quireꞌ taj.
Mʌꞌ ja wirej,
rajiꞌ cu chꞌisicoꞌonex quir ij cuxtarex ricꞌben soc u chichtar ic muqꞌuex.
3 Mʌꞌ ja wirej,
a toc erex bic tabar u yajquintiquechex ic Jaj Tsꞌurirex.
A Cristojoꞌ etsꞌ bajen tunich
4 Cꞌʌmex ic Jaj Tsꞌurirex Jesucristo quireꞌ raꞌ cu tsꞌic techex a cuxtarex munt qꞌuin.
Rajiꞌ bajen tunich quir u tsꞌʌpquintic quir u pʌqꞌuic yatoch.
Chen caj pichꞌintaꞌb ten winic quireꞌ mʌꞌ u cꞌatobiꞌ.
Chen a Cꞌujoꞌ,
caj u tetaj quireꞌ jach noꞌj,
a tunichoꞌ.
5 An ten bic mac,
cu maric tunich quir u cꞌʌxic yatoch tu cu bin u cꞌujinticob Cꞌuj.
Chaꞌex u mariquechex Cꞌuj an bic mac cu maric tunich quir u cꞌʌxic yatoch.
Caꞌ u marechex soc caꞌ cʌjrac ta wicnanex u Tajꞌor u Pixam Cꞌuj.
A baywoꞌ,
jeꞌ a tsꞌiquex tiꞌ Cꞌuj,
a baꞌ u cꞌat,
an ten bic u sacerdote tu cu naj cꞌujinticob Cꞌuj u winiquirob judío cu tsꞌicob tiꞌ Cꞌuj a baꞌ u cꞌat Cꞌuj.
Mʌꞌ ja wirej,
jach manan tsoyirechex sacerdotejechex quireꞌ caꞌ bin beyanʌquechex tiꞌ Cꞌuj quireꞌ caj u tsꞌaja techex a beyajex Jesucristo.
6 Rajen,
tiꞌ tsꞌibaꞌan ich u tꞌʌn Cꞌuj uch caj yaꞌaraj:
A tenoꞌ,
quij yaꞌaric Cꞌuj,
tin tetaj yoc naj tuririꞌ.
Jach coꞌoj caj in tetaj.
Etsꞌ bajen Cristo.
Caj tsꞌoc in tetic,
caj in jupaj yoc naj ich u cajar Sión.
Soc rajiꞌ cu chichquintic u mucꞌ naj.
A jeꞌ yoc najaꞌ,
jach chich.
Rajen a mac a cu yacsic tu yor tiꞌ,
mʌꞌ ju bin u chꞌic suraquir tiꞌ Cristo.
Quireꞌ caj u yacsaj tu yor tiꞌ Cristo.
7 A techexoꞌ a mac a ju yacsmʌnob tu yorob tiꞌ Cristo.
Caj a quiꞌ yajquintex Cristo.
Chen a mac a mʌꞌ yacsmʌnob tu yorob tiꞌ Cristo.
Mʌꞌ ju yajquintob Cristo.
Robob irob u tsꞌurirob u winiquirob judío quireꞌ caj u cʌnob mac a tu cꞌʌxob naj uch tu cu cꞌujinticob u winiquirob judío an ten bic caj u yaꞌarar ich u tꞌʌn Cꞌuj uch.
Robob caj u pichꞌintob yoc naj quireꞌ caj u tucrob cꞌas.
Pachir,
caj u chucob u jupob u yoc naj quireꞌ nechich u mucꞌ yoc naj quir u jach chichquintic u mucꞌ naj.
8 Baxuc tsꞌibaꞌan ich u tꞌʌn Cꞌuj xan a uchoꞌ:
Irej tiꞌ yʌn tuririꞌ tunich cu coja yocob,
or u ruburob tiꞌ a ray tunichoꞌ.
A ray Jesúsoꞌ,
irej tunich cu coja yocob,
wa ber u jach tsꞌurirob u winiquirob judío mʌꞌ u cꞌat yubob u tꞌʌn Cꞌuj robob irob mac a cu coja yoc ten tunichoꞌ.
Baxuc tu yaꞌaraj Cꞌuj uch.
A mac a caj u yacsa tu yoroꞌ, u parar Cꞌuj
9 Chen a techexoꞌ mʌꞌ ja cʌnex a mac a caj u pꞌuspachtob ij cʌj taquirex quireꞌ caj u tetechex Cꞌuj,
soc rajiꞌ yʌninechex,
mʌnaꞌ u jer.
Soc rajiꞌ ca reyintiqutechex Cꞌuj quireꞌ a techexoꞌ,
sacerdotejechex.
Mʌꞌ ja wirej,
caj a tsꞌiquex tiꞌ Cꞌuj a baꞌ u cꞌat Cꞌuj techex.
Quireꞌ ricꞌsaꞌbechex ten Cꞌuj soc caꞌ beyanʌquechex tiꞌ Cꞌuj irechex u winiquirob israel uch.
Caj u tetechex Cꞌuj soc a wesiquechex tiꞌ a racꞌob a baꞌ cu bin u tsꞌʌr u pachob.
Soc a racꞌob cu bin yaꞌarob tiꞌ Cꞌuj:
“Jach caremech Cꞌuj quireꞌ jach tsoyech Cꞌuj.
Quireꞌ robob a macob uchoꞌ cu manob tu cꞌasir uch.
Chen bajeꞌrer cu manob tu tsoyir quireꞌ caj u yacsob tu yorob tiꞌ tech.”
10 A bajeꞌrereꞌ,
a tsꞌurirex Cꞌuj.
A uchoꞌ,
mʌꞌ toy a wacsex ta worex tiꞌ Cꞌuj,
a tsꞌurirex quisin a uchoꞌ.
A uchoꞌ mʌꞌ ju yamtechex Cꞌuj,
chen bajeꞌrer tu yamtechex Cꞌuj.
A bajeꞌrereꞌ,
yʌn yʌjyaminechex quireꞌ cu yajquintiquechex Cꞌuj.
Taj a wacsiquechex ta worex
11 Mʌꞌ a yʌn pachtiquex baꞌ cu cꞌasquintic a pixamex.
Mʌꞌ ic ruꞌumin a teraꞌ.
Tar yʌn ic jach ruꞌumex ich caꞌanan.
Rajen in bʌjobechex a mac in jach yajeꞌ.
Rajiꞌ quin chich aric techex:
“Mʌꞌ tsoy a pachtiquex a cꞌasoꞌ.”
12 Caꞌ quiꞌ manʌquechex tu tsoyir soc wa cu yiricob a racꞌobex a mʌꞌ yacsmʌnob tu yorobeꞌ.
Cu bin yiricob tsoyechex,
cax caj u pacꞌob a pachex.
Cax bajeꞌrer caj yaꞌarajob:
“Cꞌasechex.”
Jeꞌ u yaꞌaraꞌ tiꞌ Cꞌuj caꞌ bin xuruc tꞌʌn:
“Jach tsoy a tiꞌeꞌ,
quireꞌ caj u quiꞌ quib a tꞌʌn.”
Baxuc cu bin yaꞌaricob a cu pʌqꞌuicob a pachexeꞌ.
13 A techexeꞌ quireꞌ caj a wacsex ta worex u tꞌʌn Jaj Tsꞌur Jesús.
Caꞌ a quibex u tꞌʌn u jach tsꞌurirob a ruꞌumex.
Cax rey,
quireꞌ rajiꞌ u jach tsꞌurir tu cotor u ruꞌumin tu yʌnechex ich yocꞌocab.
14 Caꞌ a wuꞌyex u tꞌʌn u jach tsꞌurirob a cu yamticob a reyoꞌ.
Baxuc a mac a tuchiꞌtaꞌb ten u jach tsꞌurirob quir u chuquicob a mac jach cꞌasoꞌ.
Mʌꞌ ja wirej,
jeꞌ u cʌnanticob a mac jach tsoyoꞌ.
15 A Cꞌujoꞌ jach tsoy yiriquechex wa quic manex tu tsoyir.
Soc mʌꞌ ju nuncaꞌr ten a mʌꞌ yacsmʌnob tu yorob yejer a mac cu netusoꞌ.
16 Quireꞌ caj a wacsex ta worex tiꞌ Cristo,
rajen mʌꞌ a tsꞌurintiquex a siꞌpirex.
Rajen manenex tu tsoyir.
Mʌꞌ a tus tucriquex quireꞌ toc jawsaꞌb a siꞌpirex ten Cꞌuj cax mʌꞌ a caꞌ manex tu cꞌasir.
Caꞌ manaquechex tu tsoyir quireꞌ caj u yaꞌaraj Cꞌuj:
“Manenex tu tsoyir.”
17 Sʌjtex tu cotor mac.
Sʌjtex Cꞌuj.
Yajquintex a wet acsʌꞌorirex.
Sʌjtex a rey xanoꞌ.
Cʌnex Cristo soc baxuc a mucꞌtiquexoꞌ
18 A mac a cu beyaj tiꞌ u jer,
ar u quib a baꞌ cu yaꞌaric u tsꞌurir,
quireꞌ rajiꞌ cu beyaj tiꞌ.
Quiꞌ beyanen tiꞌ a tsꞌurir,
cax mʌꞌ ju quiꞌ yajquintiquech.
Quiꞌ beyanen tiꞌ a tsꞌurir,
cax cu quiꞌ yajquintiquech.
19 Cax ca mucꞌyaj quireꞌ a tsꞌurir cu tiquin qꞌueyiquech.
Chen wa ca mucꞌtic a techoꞌ,
quireꞌ ca sʌjtic Cꞌuj.
Jach tsoy cu bin jocꞌar tech.
20 Mʌꞌ ja wirej,
cax wa ca wuꞌyic u qꞌueyiquech.
Mʌꞌ a chen tucric wa tsoy caj a betaj caj a wuꞌy u qꞌueyiquech chen mʌꞌ quiꞌ beyanʌjechiꞌ.
Wa tsoy beyanʌjech tu ca beyaj ich a tsꞌurir.
Wa ber cu chen tiquin qꞌueyiquech aroꞌ ca mucꞌtic u tiquin qꞌueyiquech mʌꞌ a nunquic,
a baxucoꞌ ca jocꞌar tsoyir a techoꞌ.
21 A baxucoꞌ soc a cʌniquex chen paquechbirechex.
Quireꞌ tu tetech Cꞌuj.
Quireꞌ baxuc Jesús caj mucꞌyajnʌjij toꞌonex soc ij cʌniquex ic mucꞌyajex irej Jesús caj mucꞌyajnʌjij uch.
22 Mʌꞌ ja wirej,
a Jesúseꞌ mʌnaꞌ u siꞌpir mʌꞌ ju tusaj maquiꞌ.
23 Wa ber caj pꞌastaꞌb Jesús ten u racꞌob yejer soldado.
Mʌꞌ quet u pꞌastaꞌr soldado yejer u racꞌob ten Jesús.
Yaꞌab tsꞌaꞌb u mucꞌyaj ten soldado.
Mʌꞌ ju pʌc u bʌjiꞌ,
quireꞌ yer bin u caꞌ u jasej caꞌ bin xuruc tꞌʌn.
Quireꞌ a Cꞌujoꞌ,
jeꞌ u jʌsiqueꞌ.
Taj cu bin jʌse mac,
quireꞌ taj yor a Cꞌujoꞌ.
24 Cꞌaj techex u bʌjiriꞌ Cristo caj cuch ic siꞌpirex tu bʌqꞌuer caj baj ich cruz.
Caj baj toꞌonex Cristo soc quir ij quibiquex u tꞌʌn.
Soc mʌꞌ ij cacsiquex ic siꞌpirex.
25 A uchoꞌ satʌrechex irechex tʌmʌn yuquechex,
ca rʌc waccheꞌchʌꞌechex.
Bajeꞌrereꞌ caj a cꞌaxex a worex caj wʌcꞌʌs tarechex ich Cristo,
a mac a cu cʌnantiquechex irej tʌmʌn yuc cu cʌnantaꞌr.
Rajiꞌ jach yʌjcʌnanyʌjir a pixamex.