A JEꞌ JUꞌUNAꞌ, CAJ U YɅN BATꞌAN TSꞌIBTA JUAN
1 JUAN
A jeꞌraꞌ u tꞌʌn quir ij cuxtarex
1
A tenoꞌ Juanen quet yejerenob a mac a tuchiꞌtaꞌb ten Jesús ucheꞌ caꞌ in tsꞌibtob techex u juꞌunin u tꞌʌn Jesucristo,
a mac toc tiꞌ yʌn uch,
u toc chꞌic chunin tiꞌ yʌn uch.
A mac tiꞌ yʌn uch,
u toc chꞌic chunin tiꞌ yʌn,
rajiꞌ u tꞌʌn quir ij cuxtarex munt qꞌuin.
Rajiꞌ quin tsꞌibticob a wuꞌyex,
a tin wuꞌyob tin xiquin ucheꞌ.
Caj in tʌrob uch yejer in cꞌʌb.
Caj in jach irob tin wich uch xan.
2 Rajiꞌ caj jocꞌ yes u bʌj,
rajiꞌ quir ij cuxtarex caj ij quirex.
Rajen taj quin waꞌaricob caꞌ a wuꞌyex.
Rajen taj quin tsꞌibticob techex.
Quin tsicbʌticob a wuꞌyex a tiꞌ yʌn ich u Tet uch,
quireꞌ rajiꞌ quir ij cuxtarex munt qꞌuin.
Rajiꞌ caj u yes u bʌj toꞌonex uch.
3 Rajen quin tsicbʌticob a wuꞌyex a baꞌ caj in wirob.
Caj in wuꞌyob xan,
raꞌ quin tsicbʌticob a wuꞌyex xan.
Soc jach taj pꞌeriꞌoꞌonex ij quet manex Cꞌuj.
Soc pꞌeriꞌoꞌonex ij quet manex Jesucristo u parar Cꞌuj xan.
Soc pꞌeriꞌ ic manex yejer ij quet acsʌꞌorirex xan.
4 Rajiꞌ caj in yʌn batꞌan tsꞌibtob techex sam.
Caj in tsꞌibtob techex soc jach manan quiꞌ ij corex.
A Cꞌujoꞌ rajiꞌ sasir
5 A jeꞌraꞌ u tꞌʌn Jesucristo a tu camsenoboꞌ.
A tu yaꞌaraj tenob caꞌ in tsicbʌtob a wuꞌyex,
rajiꞌ a Cꞌujoꞌ sasir.
U beriꞌ,
rʌc sasir,
mʌnaꞌ u cꞌasir a tiꞌoꞌ.
Mʌnaꞌ u siꞌpir a Cꞌujoꞌ,
mʌꞌ acꞌbir a tiꞌoꞌ.
6 Wa quij cariquex in wet mʌnob Cꞌuj,
chen raꞌiriꞌ u qꞌuinin tan ic betiquex a cꞌasoꞌ.
Tan ic tusex xan.
Mʌꞌ tan ic manex tu tsoyir xaniꞌ.
7 Wa taj tij cꞌʌmex u tꞌʌn Cꞌuj,
ij quet manex Cꞌuj yejer u sasirir.
Pꞌeriꞌ ij corex,
a tij cacsex tij corex xan.
Mʌꞌ ja wirej,
caj u rʌc jaws ic siꞌpirex,
caj quimij Jesús u parar Cꞌuj.
Caj u jawsa ic siꞌpirex yejer u qꞌuiqꞌuer Jesús xan.
8 Wa quij cariquex:
“Mʌnaꞌ ic siꞌpirex”,
chen ic wʌcꞌʌs bʌjiriꞌex tan ic tusariquex quireꞌ quic tucriquex taj aroꞌ.
Rajen mʌnaꞌ u tꞌʌn Cꞌuj tij corex.
9 Wa quic toc ariquex tiꞌ Cꞌuj:
“Yʌn ic siꞌpirex”,
quibej a baꞌ cu yac Cꞌuj quireꞌ taj.
Jeꞌ u rʌc jawsic tu cotor ic siꞌpirexeꞌ.
Jeꞌ u rʌc jawsic a cꞌas tic betajexoꞌ.
Quireꞌ a Cꞌujoꞌ rajraꞌ cu betic a baꞌ jach tsoy tu tꞌʌnoꞌ.
10 Wa quij cariquex:
“Mʌnaꞌ ic siꞌpirex”,
aroꞌ iroꞌonex quij cariquex tiꞌ Cꞌuj:
“Tus a caꞌ.”
Mʌꞌ taj tij cꞌʌmex u tꞌʌn Cꞌujiꞌ.