Jeꞌ u caꞌ tar ij cʌjtaquirexeꞌ
3
A jeꞌ juꞌunaꞌ,
quin tsꞌibtic techex,
in jach yajechex,
yejer a tin yʌn batꞌan tsꞌibtaj techex.
Caj in cꞌasa techex bic tabar a wacsman ta worex quireꞌ tsoyjij a worex,
rajen quin wʌcꞌʌs cꞌasic techex.
2 Bajeꞌrer in cꞌat in cꞌasic techex,
soc a cꞌʌꞌotiquex a baꞌ caj u yaꞌarob u yʌjtseqꞌuirob u tꞌʌn Cꞌuj uch.
Baxuc quin cꞌasic techex soc a cꞌʌꞌotiquex a baꞌ araꞌb ten ij cʌjtaquirex Jesús,
a tin camsob techex ten yejer in wet camsʌwinicob uch.
3 Jach manan soc a werex a baꞌ u ber caꞌ bin tac tu qꞌuinin tabar u xur tꞌʌn.
Jun yarob a raꞌ winicoꞌ bin u caꞌob u pꞌastob a baꞌ cu yaꞌaric Cꞌujoꞌ bin u caj u manob a baꞌ cu pachticob tu yorob,
a cꞌasoꞌ.
4 A ray u qꞌuininoꞌ bin u caꞌob u cꞌatob tiꞌ a mac a yacsmʌnob tu yorob:
“Biquinin mʌꞌ ju tar Jesús an ten bic caj u toc yaꞌaraj uch?
A raꞌ qꞌuin caj quim ic nunquir mʌnaꞌ baꞌ u ber ich yocꞌocab,
u beriꞌ tiꞌ yʌn tu cotor baꞌ.”
Baxuc cu bin yaꞌaricob.
5 Cax baxuc bin u caꞌob yaꞌaricob a ray u qꞌuininoꞌ,
quireꞌ mʌꞌ u cꞌat u cꞌʌꞌoticob u beyaj Cꞌuj uch.
Mʌꞌ ja wirej,
caj araꞌb ten Cꞌuj caꞌ jocꞌac caꞌanan yejer yocꞌocab caj betaꞌb.
U ruꞌumin tar u tar ich jaꞌ,
a ruꞌumoꞌ,
cu cuxtar tiꞌ jaꞌ.
Baxuc caj betaꞌb ten Cꞌuj uchoꞌ.
6 Pachir,
caj burij ich yocꞌocab an ten bic caj araꞌb ten Cꞌuj uch,
rajen caj quimij mac quireꞌ rʌc bint jaꞌ.
Raꞌ cu rʌc tubur tiꞌob a baꞌ u ber chꞌic uchoꞌ.
7 Mʌꞌ ja wirej,
caj araꞌb ten Cꞌuj xan,
bin u caj cꞌuchur tu qꞌuinin wa ber cu bin tocbir a caꞌananoꞌ quet yejer a yocꞌocaboꞌ,
a ca wiriquex bajeꞌreroꞌ.
Raꞌ u qꞌuininoꞌ xan,
a mac a mʌꞌ yerob Cꞌuj,
bin u caꞌob tacbir u joꞌrob quireꞌ u siꞌpir.
A ray u qꞌuininoꞌ robob bin u caj chꞌejarob.
8 Uꞌyex baꞌ quin wac in wet acsʌꞌorirechex,
a mac in jach yaj.
Mʌꞌ u yʌn tubur techex,
a Cꞌujoꞌ,
mʌꞌ u xac u qꞌuinin an ten bic a toꞌonexoꞌ quic xaquiquex u qꞌuinin.
A Cꞌujoꞌ cu yiric tuririꞌ u qꞌuinin irej wa mil yaxqꞌuin.
Baxuc xan cu yiric mil yaxqꞌuin an ten bic tuririꞌ u qꞌuinin.
Raꞌiriꞌ yiric a Cꞌujoꞌ.
9 Tiꞌ yʌn mac a cu tucricob baj yaꞌaraj ic Jaj Tsꞌurirex mʌꞌ ju tar tiꞌob.
Jeꞌ u tareꞌ an ten bic caj yaꞌaraj Jesús uch.
Mʌꞌ ja wirej,
nemʌꞌ bic cu pajic mac,
soc mʌꞌ u satʌr quireꞌ u cꞌat yiric u rʌc cꞌaxicob u yorob caꞌ u pꞌʌt u cꞌasirob.
10 Mʌꞌ ja wirej,
a mac a cu yaꞌcric baꞌ,
cu cꞌuchur ich yacꞌbirir soc mʌꞌ yer mac ber cu cꞌuchur.
Baxuc xan,
u qꞌuinin caꞌ bin tac ic Jaj Tsꞌurirex.
Mʌnaꞌ mac yer ber cu bin tar.
Wa ber caꞌ bin tac,
a ray u qꞌuinin tunoꞌ jach manan cꞌam cu bin tar u jum a caꞌananoꞌ,
u bʌjiriꞌ cu bin rucꞌur caꞌ bin xuruc tꞌʌnoꞌ.
A baꞌ quij quiriquex ich caꞌananoꞌ a cu yercꞌacꞌticoꞌonex acꞌbiroꞌ,
bin u caꞌ rʌc erar.
U ruꞌumin yejer tu cotor a baꞌ betaꞌb bin u caꞌ rʌc erar xan.
11 Rajen wa tu cotor a jeꞌ cu bin chꞌesaꞌbir biqꞌuinaꞌ caꞌ ij cʌnantex ic bʌj soc mʌꞌ ic pʌyic ic siꞌpirex.
Caꞌ ic sʌjtex Cꞌuj.
12 Rajen caꞌ ic pajex u qꞌuinin soc quiꞌ ij corex quireꞌ a Cꞌujoꞌ bin u caꞌ u jʌse tu cotor mac.
Toc quiꞌ pʌyex u jer u qꞌuininaꞌ,
soc caꞌ tac seb.
Mʌꞌ ja wirej,
a ray qꞌuininoꞌ u ruꞌumin bin u caj rʌc erar,
ti cotor a baꞌ tiꞌ yʌn bin u caj rʌc chꞌejar.
Tu cotor a baꞌ cu yercꞌacꞌticoꞌonex caꞌanan,
bin u caj rʌc yiqꞌuir xan.
13 Chen a toꞌonexoꞌ tan ic pajiquex u qꞌuinin caꞌ tac u jer ricꞌben caꞌanan yejer u jer ricꞌben ruꞌumin an ten bic caj araꞌb ten Cꞌuj.
A ti taroꞌ bin ij caj manex ich u tsoyir Cꞌuj.
14 Quireꞌ tu cotor aroꞌ in wet acsʌꞌorirechex a mac in jach yaj quireꞌ tan a pajiquex caꞌ tac Cristo.
Rajen caꞌ a pꞌisex a bʌjex soc a baywoꞌ mʌꞌ jic pʌyex ic siꞌpirex.
Soc mʌnaꞌ chichin ic siꞌpirex caꞌ bin iric ten Cꞌuj wa ber ca binex ʌcʌtan tiꞌ Cꞌuj.
Mʌꞌ ja wirej,
a baywoꞌ tsoy bin u caꞌ yiricoꞌonex a Cꞌujoꞌ.
15 Cꞌʌꞌotej techex,
ajeraꞌ ic Jaj Tsꞌurirex u cꞌat caꞌ u tacoꞌonex.
Rajen uch tan u pajicoꞌonex caꞌ tacoꞌonex.
Mʌꞌ ja wirej,
baxuc caj u tsꞌibtaj Pablo techex ij quet acsʌꞌorirex,
ic bʌjex Pablo,
ic jach yajex xan.
Raꞌ tsꞌaꞌb u tucur ten Cꞌuj quir u tsꞌib.
16 Baxucoꞌ,
a Pablojoꞌ,
cu tsꞌibtic tu cotor u juꞌunin a cu tsꞌibtic tiꞌ u yet acsʌꞌorirob.
Chen quireꞌ yʌn baꞌ a cu tsꞌibtic Pablo tu juꞌunin jach yaj ic najtiquex rajen a mac a mʌꞌ quiꞌ camsaꞌb tiꞌ u tꞌʌn Cꞌuj,
yejer a mac a mʌꞌ chichac yor tiꞌ u tꞌʌn Cꞌuj.
Robob cu cꞌaxic a baꞌ u jach aꞌaric an ten bic caj u cꞌaxob a baꞌ cu jach aꞌaric ich u jer jun xotꞌ u tꞌʌn Cꞌuj.
Rajen bin u caj satʌrob quireꞌ baxuc cu beticoboꞌ.
17 A techexoꞌ,
a mac a caj in tsꞌibtaj quireꞌ in yajechex.
Caj a toc uꞌyex,
rajen quiꞌ cʌnant a bʌjex soc mʌꞌ u pʌyicob a berex quir u sʌtiquechex.
Mʌꞌ a wacsiquex ta worex tiꞌ u tꞌʌn,
a mac a mʌꞌ u najtob a baꞌ cu jach aꞌaric tiꞌ u tꞌʌn Cꞌuj.
Mʌꞌ ja wirej,
robob mʌꞌ ju yacsob tu yorob.
18 Chen caꞌ ic pꞌis ic bʌjex soc jach manan ij querex u yajoꞌonex ic Jaj Tsꞌurirex Jesucristo,
caj u yiraj otsiroꞌonex,
rajen tu tacoꞌonex.
Caꞌ ic sʌjtex bajeꞌrer bayiriꞌ munt qꞌuin.
Jeroj,
tsꞌoc u tsicbar Pedro.