A JEꞌ JUꞌUNAꞌ, PACHIR CAJ U CAꞌ TSꞌIBTA JUAN
2 JUAN
Jach taj a Cꞌujoꞌ u yajoꞌonex
1
A jeꞌ juꞌunaꞌ,
rajiꞌ cu tsꞌibtic Juan,
a mac tuchiꞌtaꞌb ten Jesús uch.
Tan in tsꞌibtic u juꞌunin tiꞌ tech xquic,
a mac in jach yajiꞌ.
Baxuc a techoꞌ tetaꞌanech ten Cꞌuj.
Baxuc xan,
quin tsꞌibtic tiꞌ a pararob.
Mʌꞌ chen ten in yajechiꞌ.
Tu cotor mac a yer Cꞌujoꞌ,
cu yajquintiquechex.
2 Rajen quin yajquintiquech,
quireꞌ yʌn toꞌonex u tꞌʌn Cꞌuj tij corex.
Tiꞌ yʌn u tꞌʌn Cꞌuj tij corex munt qꞌuin.
3 A tenoꞌ in cꞌat ic Tetex Cꞌuj yejer ic Jaj Tsꞌurirex Jesucristo caꞌ u yirob otsiroꞌonex.
In cꞌat ic Tetex Cꞌuj yejer ic Jaj Tsꞌurirex Jesucristo caꞌ u yamtoꞌonexob an ten bic jach manan tsoy tu tꞌʌnob Cꞌuj.
In cꞌat ic Tetex Cꞌuj yejer ic Jaj Tsꞌurirex caꞌ quiꞌac ij corex ten tiꞌoboꞌ soc mʌnaꞌ baꞌ quic tucriquex.
A raꞌ yʌn toꞌonexoꞌ a mac a taj tu yacsaj tu yor a tan u pacran yajquinticob u bʌjob.
4 Jach nequiꞌ in wor caj in wuꞌyaj jun yarob a pararob cu quibicob u tꞌʌn Cꞌuj.
Mʌꞌ ja wirej,
baxuc caj u toc araj toꞌonex Cꞌuj ic Tetex uch,
caꞌ ij quibex u tꞌʌn.
5 A tenoꞌ,
quin chich cꞌatic tech chan xquic,
in wet acsʌꞌorirech.
Bajeꞌreraꞌ,
quin chich cꞌatic tech caꞌ ic pacran yajquintex ij quet acsʌꞌorirex.
A jeꞌ tꞌʌnaꞌ,
a quin tsꞌibtic techex,
caꞌ ic pacran yajquintex ij quet acsʌꞌorirex.
Mʌꞌ ricꞌben tꞌʌniꞌ,
quireꞌ ta toc uꞌyex caj a wacsex ta worex uch.
6 Caꞌ ij quiꞌ uꞌyex a baꞌ araꞌb ten Cꞌuj.
Raꞌ u cꞌat yaꞌaric toꞌonex,
caꞌ ic pacran yajquintex ij quet acsʌꞌorirex.
Raꞌ ta wuꞌyex caj a yʌn acsex ta worex uch caꞌ manacoꞌonex an ten bic winic a cu yajquinticob Cꞌuj,
baxuc xan,
a cu yajquinticob u yet acsʌꞌorirob.
Yʌjtusirob mac
7 Quin cꞌasic techex caꞌ a wuꞌyex a baꞌ caj u yaꞌaraj toꞌonex Cꞌuj uch.
Tiꞌ cu man tu yʌnechex a cu tus aricob techex,
yʌjtusirob.
Cu man u tus aꞌarej tu cotor mac.
Cu tus manob yaꞌarej:
“Mʌꞌ jach tar u bʌqꞌuer Cꞌuj caj tar Jesucristo.”
Aroꞌ yʌjtusir mac,
bayiriꞌ cu pꞌacticob Cristo.
Yʌn yaꞌab baxucoꞌ.
8 Quiꞌ cʌnant a bʌjex soc mʌꞌ a sʌtiquex u boꞌorir a beyajex tiꞌ Cꞌuj.
Quiꞌ cʌnant a bʌjex soc a cꞌʌmiquex u quiꞌ nupꞌur u boꞌorir a beyajex caꞌ bin xiquechex ʌcʌtan ich Cꞌuj.
9 A mac a caj u jenmastaj u tꞌʌn Cꞌuj a mʌꞌ cu pꞌatʌr tiꞌ u tꞌʌn Cꞌuj a baꞌ camsaꞌb ten Cristo uch.
Rajiꞌ mʌꞌ yer Cꞌujiꞌ.
Barej a mac cu pꞌatʌr tiꞌ a baꞌ camsaꞌb ten Cristo uch.
Rajiꞌ yer Cꞌuj,
ic Tetex.
Rajiꞌ yer xan u parar Cꞌuj.
10 Wa cu tar mac tu yʌnechex quir u tus camsiquechex u tꞌʌn Cꞌuj.
Chen mʌꞌ ju camsechex a baꞌ camsaꞌb ten Jesús.
Mʌꞌ tsoy a wacsiquex tu yʌnechexiꞌ mʌꞌ tsoy a tꞌʌniquex xaniꞌ.
11 Mʌꞌ ja wirej,
wa ca tꞌʌniquex ca yamtiquex tiꞌ u cꞌasir a baꞌ cu camsicoꞌonex.
Tabar u tsꞌocar u tꞌʌn Juan
12 Cax yʌn yaꞌab in tꞌʌn quir in tsꞌibtic techex ich juꞌun.
Chen mʌꞌ in cꞌat in tsꞌibtiquechexiꞌ.
In cꞌat soc caꞌ tsicbanʌcoꞌonex soc jach quiꞌ ij corex.
13 U pararexob a bʌj a xquic a tetaꞌb ten Cꞌujoꞌ caj u yaꞌaraj:
“In quiꞌ tꞌʌniquechex.”
Jeroj tsꞌoquij,
quij Juan.