A JEꞌ JUꞌUNAꞌ, MɅNAꞌ U NUPꞌ U JUꞌUNIN CAJ U TSꞌIBTA JUAN
3 JUAN
Cu quiꞌ araꞌ tiꞌ Gayoꞌ ten Juan
1
Quin tsꞌibtic tech in jach yajech Gayo.
A tenoꞌ,
quij Juan,
nuxiben.
Quin jach yajquintiquech.
2 A tenoꞌ netsoy in wiriquech in jach yajech Gayo.
Netsoy in wiriquech a quiꞌ cʌnantic a bʌj tu ca bin.
Tsoy in wiriquech mʌnaꞌ a yajir a techoꞌ soc a winquirir baxuc a pixam,
tsoyir xanoꞌ.
3 Caj quiꞌjij in wor caj in wuꞌyaj yaꞌaraꞌ,
ca quiꞌ cʌnantic u bej Cꞌuj.
Caj in wuꞌyaj yaꞌaric in bʌjob caj tarob tin wicnʌn uch.
Quiꞌ in wor quireꞌ a baꞌ ca wiriqueꞌ quireꞌ quet yejer u tꞌʌn Cꞌuj.
4 Rajen jach quiꞌ in wor caj in wuꞌyaj yaꞌaraj,
quij Juan,
cu quiꞌ cʌnanticob u ber Cꞌuj in chan pararob.
Jach manan quiꞌir in wor caj in wuꞌyaj yaꞌaraꞌ aroꞌ,
quij Juan.
5 Taj caj a betaj,
Gayo,
tiꞌ Cꞌuj uch quireꞌ ta wacsaj a wet acsʌꞌorirex ich a watoch,
cax mʌꞌ a wirmʌn uch.
6 Caj tarob u muchꞌquintob u bʌj cꞌay caj u toc arob baꞌ ta betaj,
a wet acsʌꞌorirex Gayo.
Ta quiꞌ yajquintaj,
quij yaꞌara tiꞌ Gayo.
Chan quiꞌquintej yorob tu cu wʌcꞌʌs binob.
Chan yamtej tiꞌoboꞌ a baꞌ u cꞌatob.
Yamtej a tiꞌoboꞌ,
mʌꞌ ja wirej,
raꞌ cu beyajob Cꞌuj.
7 Caj binob u tsecꞌ tu tꞌʌn Cꞌuj,
mʌꞌ ja wirej,
raꞌ u beyajob tiꞌ Jesús.
Mʌꞌ tu cꞌʌmanob a baꞌ tsꞌaꞌb tiꞌ ten a mʌꞌ yacsmʌnob tu yoroꞌ.
8 Rajen caꞌ ic yamtex mac a cu manob u tsecꞌt u tꞌʌn Cꞌujoꞌ irej tech caj a yamtaj tiꞌob uch.
A baywoꞌ pꞌeriꞌ ic yamtiquex u beyaj Jaj Tsꞌur.
Mʌꞌ ju yub u racꞌob, Diótrefes
9 Quin tsꞌibtic techex tu ca muchꞌquintiquex a bʌjex,
in wet acsʌꞌorirechex,
chen mʌꞌ ju quib in tꞌʌniꞌ Diótrefes cax caj in tsꞌibtaj tiꞌ.
Quireꞌ u cꞌat u yocar caꞌ tsꞌurintac ten a yacsmʌnob tu yorobeꞌ.
10 Rajen wa quin tar tu yʌnechex,
jeꞌ in cꞌasic tiꞌ a baꞌ cꞌasir caj u betajeꞌ,
a tu juminta toꞌonexeꞌ quireꞌ u pʌqꞌuic in pach.
Mʌꞌ quiꞌ yoriꞌ u chen pʌqꞌueniꞌ,
mʌꞌ ju yacsej u yet acsʌꞌorir.
Mʌꞌ ju cꞌat yiric u jer yacsiquiꞌ.
Cu jocꞌsic yet acsʌꞌorir Diótrefes tu cu yubicob u tꞌʌn Cꞌuj,
cax a mac u cꞌat u yacsic u jer yet acsʌꞌorir.
11 A mac cꞌas cu beticoꞌ,
mʌꞌ a yʌn cʌniquex in jach yajechex.
A mac tsoy cu betiqueꞌ,
rajiꞌ a cʌnex.
A mac cꞌas cu beticoꞌ,
mʌꞌ yer Cꞌujiꞌ.
A mac tsoy cu beyajoꞌ,
rajiꞌ yer Cꞌuj.
Jach tsoy cu betic Demetrio
12 Tu cotor cu toc rʌc aric:
“Jach tsoy yor Demetrio.”
Baxuc xan,
rajiꞌ caj yaꞌaraj toꞌonex u Tajꞌor u Pixam Cꞌuj:
“Jach jaj,
quij,
netsoy yor Demetrio.”
Quireꞌ ij querex aroꞌ,
rajen quij cariquex.
Mʌꞌ ja wirej,
a werex taj ij cariquex.
Quir u tsꞌocar u tꞌʌn Juan
13 In cꞌat in waꞌaric yaꞌab in tꞌʌn tech,
Gayo,
caꞌch barej bajeꞌreraꞌ mʌꞌ in cꞌat in tsꞌibtic tech ich juꞌuniꞌ.
14 Quireꞌ in pajmʌn in wirech ta wich caꞌ tsicbanʌcoꞌon yejerech.
15 Caꞌ quiꞌac a wor ten Cꞌuj.
Wa ca wiric ij quet acsʌꞌorirex,
tꞌʌnej jujuntur tiꞌ ten ca tꞌʌnic,
quij.
Cu quiꞌ tꞌʌniquech a wet acsʌꞌorirex tin wicnʌn.
Jeroj tsꞌoquij,
quij Juan.