A yacsmʌnob tu yorobeꞌ cꞌuchaꞌan yorob u pꞌʌticob cꞌas
5
A mac cu yacsic tu yor tiꞌ Jesús yer Cristo tuchiꞌtaꞌb ten Cꞌuj.
Rajen a caj u yacsob tu yorob tiꞌ Jesús.
Robob u parar Cꞌuj mʌꞌ ja wirej,
a cu yajquintic u Tet,
baxuc cu yajquintic u pararob u Tet xan.
2 Wa ber caꞌ bin ic yajquintex Cꞌuj baxuc xan,
a baꞌ u cꞌat Cꞌuj quic betiquex tiꞌ.
Ij querex,
tun,
ic yajquintex ij quet acsʌꞌorirex.
3 A mac cu yajquintic Cꞌujoꞌ caꞌ u quibej a baꞌ cu yaꞌaraꞌ tiꞌ u tꞌʌn.
U tꞌʌn a cu quibicoꞌ,
cꞌuchaꞌan yor tiꞌob.
4 Mʌꞌ ja wirej,
tu cotoroꞌonex u pararoꞌonex Cꞌuj cꞌuchaꞌan ij corex ic pꞌʌtiquex a cꞌasoꞌ ich yocꞌocab.
Tij cacsex tij corex rajen cꞌuchaꞌan ij corex tiꞌ.
5 Jariꞌ a mac a cu yacsic tu yor tiꞌ Jesús,
quireꞌ yer rajiꞌ u parar Cꞌuj.
Arayoꞌ cꞌuchaꞌan yorob u pꞌʌticob u cꞌasir ich yocꞌocab.
Rajiꞌ u parar Cꞌuj cu tsicbʌtic u Tajꞌor u Pixam Cꞌuj
6 Caj tarij caꞌanan Jesús,
caj acsaꞌb jaꞌ tu joꞌr ten Juan.
Baxuc caj quimij ich cruz xan.
Mʌꞌ chen tarij quir u yacsaꞌ jaꞌ tu joꞌr.
Tarij quir u quimin xan.
Quireꞌ taj caj yaꞌaraj toꞌonex u Tajꞌor u Pixam Cꞌuj.
Quireꞌ u bʌjiriꞌ caj u yaꞌaraj,
rajen taj.
7 Tiꞌ yʌn mʌnaꞌ u nupꞌob ich caꞌanan,
a cu yaꞌaric taj tiꞌ Jesucristo,
raꞌ u parar Cꞌuj.
A jeꞌraꞌ,
tiꞌ yʌn ic Tetex Cꞌuj.
A jeꞌraꞌ tiꞌ yʌn,
Jesucristo.
A jeꞌraꞌ tiꞌ yʌn,
u Tajꞌor u Pixam Cꞌuj.
Cax mʌnaꞌ u nupꞌ chen tuririꞌ a cu tsicbar toꞌonexoꞌ tiꞌ Jesucristo,
raꞌ u parar Cꞌuj quij.
8 Tiꞌ yʌn mʌnaꞌ u nupꞌob teraꞌ ich yocꞌocab.
A jeꞌraꞌ a cu tsicbʌtic taj tiꞌ Jesusoꞌ,
u Tajꞌor u Pixam Cꞌuj.
A jeꞌraꞌ,
tu acsaꞌb jaꞌ tu joꞌr.
A jeꞌraꞌ,
tu quimij ich cruz.
A mʌnaꞌ u nupꞌob pꞌeriꞌob cu camsicoꞌonex,
rajiꞌ u parar Cꞌuj Jesucristo.
9 Caj ij cꞌʌm u tꞌʌn a macoꞌ,
chen jach manan u tꞌʌn a Cꞌujoꞌ.
Rajen caꞌ a cꞌamex a baꞌ cu yaꞌaric Cꞌuj tiꞌ u parar Jesucristo.
Quireꞌ taj cu yaꞌaric u tꞌʌn.
10 A mac a caj u yacsa tu yor tiꞌ u parar Cꞌuj u bʌjiriꞌ yer yʌn u tꞌʌn Cꞌuj tu yor.
A mac mʌꞌ ju yacsa tu yor tiꞌ Cꞌuj,
tan yac tiꞌ Cꞌuj:
“Tus a caꞌ.”
Quireꞌ mʌꞌ ju yacsa tu yor u tꞌʌn a baꞌ caj u yaꞌaraj Cꞌuj tiꞌ u Parar.
11 A jeꞌraꞌ caj u tsꞌa toꞌonex ij cuxtarex munt qꞌuin.
Tiꞌ yʌn ich u parar Cꞌuj quir ij cuxtarex munt qꞌuin.
Baxuc caj u yaꞌara toꞌonex Cꞌuj,
a werex rajiꞌ taj.
12 Wa mac mʌꞌ ju cꞌʌm u parar Cꞌuj mʌnaꞌ tiꞌ u cuxtar.
Chen a mac caj u cꞌʌm u parar Cꞌuj yʌn u cuxtar munt qꞌuin.
Tabar u tsꞌocar u tsꞌib Juan
13 Rajen quin tsꞌibtic techex soc a werex toc yʌn techex quir a cuxtarex munt qꞌuin,
quireꞌ ta wacsex ta worex tiꞌ u parar Cꞌuj.
14 Rajen chich ij corex ic tꞌʌniquex Cꞌuj,
quireꞌ ij querex cu yubicoꞌonex Cꞌuj.
Cu yubicoꞌonex wa tsoy tu tꞌʌn Cꞌuj,
rajen chich ij corex ic tꞌʌniquex Cꞌuj.
15 Ij querex cu yubic wa ber ic tꞌʌniquex.
Mʌꞌ ja wirej,
ij querex taj cu yubicoꞌonex.
Rajen jeꞌ u tsꞌic toꞌonex a baꞌ quij cꞌatiquex tiꞌ Cꞌuj cax a baꞌ quij cꞌatiquex tiꞌ Cꞌuj.
16 Wa yʌn mac caj u yira u yacsic u siꞌpir u yet acsʌꞌorir,
wa raꞌ u siꞌpir a mʌꞌ u chabʌr u jach quimin ten Cꞌuj.
Tsoy a tꞌʌniquex Cꞌuj tiꞌ,
jeꞌ u jawsaꞌr u siꞌpir ten Cꞌuj a tiꞌoꞌ.
Yʌn u siꞌpir mac a cu chabʌr u jach quimin ten Cꞌuj,
mʌꞌ tsoy a tꞌʌniquex Cꞌuj tiꞌiꞌ.
17 Tu cotor a cꞌasoꞌ raꞌ u siꞌpir.
Chen tiꞌ yʌn a cꞌasoꞌ raꞌ mʌꞌ ju chabʌr u jach quimin ten Cꞌuj.
18 A mac a caj u yacsaj tu yor mʌꞌ nani yacsic u siꞌpiriꞌ quireꞌ u parar Cꞌuj.
Cu cʌnantaꞌr ten Cꞌuj.
Mʌꞌ ja wirej,
u parar.
Mʌꞌ ju tarʌr ten quisin,
a mac a caj u yacsaj tu yor tiꞌ Cꞌuj.
19 A mac mʌꞌ ju yacsaj tu yor tiꞌ Cꞌuj u tsꞌurir quisin.
Chen a toꞌonexoꞌ ij querex u pararoꞌonex Cꞌuj.
20 Rajen ij querex tar u parar Cꞌuj uch.
Caj tar u yamtoꞌonex caꞌ ic najtex Cꞌuj.
Tarij caꞌ ij quirex a jach Cꞌujoꞌ.
Mʌꞌ ja wirej,
pꞌeriꞌ ij corex yejer jach Cꞌuj.
Pꞌeriꞌ ij corex yejer u parar Jesucristo xan.
A jeꞌraꞌ jach Cꞌuj Jesucristo quir a cuxtarex munt qꞌuin.
21 Quiꞌ cʌnant a bʌjex in chan pararechex,
soc mʌꞌ a cꞌujintiquex tus cꞌuj.
Jeroj tsꞌoquij,
quij Juan.