A Cristojoꞌ yʌjyaminoꞌonex
2
A tin yʌn tsꞌib techex sam,
in chan pararechex,
soc mʌꞌ a wacsiquex a siꞌpirex.
Cax wa ca cꞌʌs acsiquex a siꞌpirex,
yʌn toꞌonex yʌjyaminoꞌonex ʌcatan ich ic Tetex Cꞌuj,
Jesucristo u cꞌabaꞌ.
Rajiꞌ rajraꞌ cu betic a baꞌ tsoy tu tꞌʌn Cꞌuj.
Jeꞌ u tꞌʌnic Cꞌuj toꞌonexeꞌ.
2 Rajiꞌ Cristo an ten bic tʌmʌn yuc caj quinsaꞌb tiꞌ Cꞌuj quir u boꞌotic ic siꞌpirex.
Mʌꞌ chen toꞌonex caj u boꞌot ic siꞌpirexiꞌ,
caj u boꞌot u siꞌpirob tu cotor mac yocꞌocab.
3 Rajen wa quij quiꞌ quibiquex a baꞌ cu yaꞌaric toꞌonex Cꞌujoꞌ,
jach taj,
tun,
quic jach manex yejer Cꞌuj.
Tan ic jach cʌnantiquex u tꞌʌn Cꞌuj.
4 A mac cu yaꞌaric:
“In wer Cꞌuj.”
Chen mʌꞌ ju quib a baꞌ cu tsicbʌtic Cꞌuj,
mʌnaꞌ tiꞌ u tꞌʌn Cꞌuj.
Tus u caꞌ xan.
5 Barej,
a mac a cu quibic u tꞌʌn Cꞌujeꞌ,
rajiꞌ cu yajquintic Cꞌuj.
Jeroj tun,
cꞌuchaꞌan yor,
taj cu yajquintic Cꞌuj.
Baxucoꞌ,
ij querex quic manex yejer Cꞌuj.
6 A mac cu yaꞌaric:
“Rajraꞌ cu man yejer Cꞌuj.”
Ar u man tu tsoyir irej Jesucristo caj man tu tsoyir uch.
Ricꞌben tꞌʌn chen yubmʌn uch
7 In bʌjobechex,
mʌꞌ in tsꞌibte techex tiꞌ u jer ricꞌben tꞌʌn.
Raꞌiriꞌ tꞌʌneꞌ,
a tu toc araj Cristo ucheꞌ.
Raꞌiriꞌ tꞌʌn ucheꞌ a yʌnxchun a wacsiquex ta worex ucheꞌ.
A ta toc uꞌyex ucheꞌ,
raꞌ u tꞌʌn uch xan.
8 Cax uchben,
raꞌ quin tsꞌibtic techex ricꞌben weꞌ.
Mʌꞌ ja wirej,
iraꞌan uch,
quireꞌ a baꞌ cu yiric Cristo uch,
baxuc xan iraꞌan tu yʌnechex quireꞌ a mac mʌꞌ yerob jach Cꞌuj tan u pꞌʌticob u tus cꞌuj tu cu cꞌujinticob uch.
Jach taj u tꞌʌn tan u cꞌuchur bajeꞌrer,
rajiꞌ cu yubicob.
9 Rajen a mac a cu tusaric caj u yacsaj tu yor,
chen wa cu pꞌactic a tu yacsaj tu yor,
u beriꞌ bajeꞌrer mʌꞌ ju jach acsaj tu yoriꞌ.
10 A mac a tu quiꞌ acsaj tu yor u tꞌʌn Cꞌuj,
a mac a cu quiꞌ yajquintic u yet acsʌꞌorirob,
rajen mʌnaꞌ baꞌ yʌn quir u yacsic u siꞌpir u racꞌob.
11 Barej a mac u pꞌactic u yet acsʌꞌorirob cu man tu cꞌasiroꞌ.
Mʌꞌ yer baꞌ u siꞌpir yʌniꞌ quireꞌ mʌnaꞌ u xiquin,
mʌꞌ ju yube tꞌʌn.
12 Rajen tan in tsꞌibtic techex in chan pararechex quireꞌ Cꞌuj caj u jawsaj toꞌonex ic siꞌpirex quireꞌ quimij Jesucristo.
13 A xiboꞌ caj u yʌn acsaj tu yor ucheꞌ,
caj in tsꞌibta techex.
Rajen caj in tsꞌibta techex quireꞌ a werex Cꞌuj,
a mac a tiꞌ yʌn tu yʌnxchun tu cotor baꞌ ucheꞌ.
Caj in tsꞌibte techex a tan tu yacsic tu yor,
a chichanoꞌ quireꞌ mʌꞌ ja sip tu wensaquechex quisinoꞌ.
Caj in tsꞌibta techex in chan pararechex,
quireꞌ a werex Cꞌuj a Tetex.
14 A xiboꞌ caj u yʌn acsaj tu yor ucheꞌ,
caj in tsꞌibta techex quireꞌ a werex Cꞌuj,
a mac tiꞌ yʌn tu yʌnxchun tu cotor baꞌ ucheꞌ.
Caj in tsꞌibta techex tiꞌ a chichanoꞌ,
a tan tu yacsic tu yoreꞌ quireꞌ jach chich a muqꞌuex.
Mʌꞌ ja wirej,
rajraꞌ ca tucriquex u tꞌʌn Cꞌuj,
rajen jach chich a muqꞌuex.
Rajen mʌꞌ ja chaꞌ u wensiquex quisiniꞌ.
15 Mʌꞌ a yʌn pachtiquechex a betiquex a baꞌ cu beticob,
a mac a cu manob tu cꞌasiroꞌ.
Mʌꞌ a yʌn pachtiquechex a baꞌ yʌn yocꞌocab a baꞌ jach cꞌas xanoꞌ.
Wa tiꞌ yʌn mac cu pachtic baꞌ yocꞌocab,
mʌꞌ ju yajquinte u Tet Cꞌuj.
16 A baꞌ cu pachtic tu yoroꞌ,
mʌꞌ tiꞌ u tar ich Cꞌuj.
Tar u tar ich yocꞌocab.
A baꞌ yʌn tu cotor yocꞌocab,
wa baꞌ cꞌasir yʌn tu yorob.
A cu pachticobeꞌ,
a cu yiric winic tu wich,
mʌꞌ tiꞌ cu tar ich Cꞌuj.
A baꞌ yʌn tu yoririꞌeꞌ.
A ju cꞌat irbir ten u racꞌob quireꞌ u baꞌtac,
mʌꞌ tiꞌ u tar ich Cꞌuj,
tar u tar ich yocꞌocab.
17 Yet bin u xur tu cotor ich yocꞌocab.
A baꞌ cꞌasir cu pachticob yocꞌocab.
Cax bajeꞌrer tabar u xur.
Barej a mac cu betic a baꞌ tsoy tu wich Cꞌuj,
munt qꞌuin bin u caꞌ cuxtarob.
A baꞌ quiriꞌ taj
18 Tabar u xur tꞌʌn in chan pararechex.
A uchoꞌ,
a wuꞌyamʌnechex bin u caꞌ tar a cu pꞌacticob Cristojeꞌ.
A bajeꞌrer,
toc tiꞌ yʌn yaꞌab a cu jach pꞌacticob Cristojeꞌ.
Rajen ij querex tabar u xur tꞌʌn.
19 Mʌꞌ ja wirej,
a cu pꞌacticob Cristojeꞌ,
mʌꞌ jach taj caj u cꞌʌmob u tꞌʌn Cꞌuj yejeroꞌonexiꞌ.
Rajen caj u pꞌʌtajoꞌonex.
Wa jach taj caj u cꞌʌmob u tꞌʌn Cꞌuj ucheꞌ,
mʌꞌ ju pꞌʌtajoꞌonexiꞌ.
Tu pꞌʌtajoꞌonex soc chʌcaꞌan yiric tu cotor mac.
Soc chʌcaꞌan yiric jach taj mʌꞌ u cꞌʌmob u tꞌʌn Cꞌuj yejeroꞌonex.
20 Quireꞌ tsꞌaꞌb techex ten Cristo u Tajꞌor u Pixam Cꞌuj rajen a werex a tajoꞌ.
Mʌꞌ ja wirej,
taj caj a cꞌʌmex u tꞌʌn Cꞌuj.
21 A werex a baꞌ jach taj,
rajen caj in tsꞌibtaj techex.
Wa mʌꞌ a werex a baꞌ mʌꞌ taj caꞌcheꞌ,
mʌꞌ jin tsꞌibta techexiꞌ.
Mʌꞌ ja wirej,
a baꞌ cu tus,
mʌꞌ ju yʌnxchun u tar tiꞌ a baꞌ jach taj.
22 Cꞌʌꞌotex a maqueꞌ tus u caꞌ,
rajiꞌ cu yaꞌaric:
“A Jesúsoꞌ,
mʌꞌ rajiꞌ Cristojiꞌ,
a mac tuchiꞌtaꞌb ten Cꞌuj quir u cʌjtar yejeroꞌonex.”
Rajiꞌ a cu pꞌacticob Cristojoꞌ,
bayiriꞌ cu pꞌactic u Tet Cꞌuj,
xan.
23 Tu cotor mac a mʌꞌ ju cꞌʌꞌot u parar Cꞌuj wa Cristo,
baxuc xan mʌꞌ ju cꞌʌꞌot Cꞌuj.
Chen a mac cu cꞌʌmic Jesús,
u parar Cꞌuj xan,
baxuc xan u cꞌʌmʌn u Tet Cꞌuj.
24 Quiꞌ cʌnantex u jach tsoyir u tꞌʌn Cꞌuj ta pixamex.
A ta yʌn uꞌyexoꞌ caj u tsecꞌtob u tꞌʌnob techex uch.
A baꞌ caj a wuꞌyex caj u yʌnxchun u tsecꞌticob a wuꞌyex uch,
quiꞌ cʌnantex ta pixamex.
Soc pꞌeriꞌ a worex yejer Cꞌuj yejer u parar Cꞌuj xan.
25 Quireꞌ caj u toc araj toꞌonex Jesucristo jeꞌ u tsꞌic toꞌonex caꞌ cuxracoꞌonex munt qꞌuineꞌ.
26 Caj in tsꞌibta techex quireꞌ tabar u tus aric techex mac.
27 Mʌꞌ ja wirej,
caj a cꞌʌmex u Tajꞌor u Pixam Cꞌuj,
quireꞌ caj u tsꞌaja techex u Tajꞌor u Pixam Cꞌuj Jesucristo.
Rajen mʌꞌ baꞌwir u jer quir u camsiquechex,
quireꞌ u bʌjiriꞌ u Tajꞌor u Pixam Cꞌuj caj u camsechex u tꞌʌn.
A baꞌ cu camsic techexoꞌ taj.
Mʌꞌ tus,
taj u caꞌiꞌ,
quij.
Rajen quibex u tꞌʌn u Tajꞌor u Pixam Cꞌuj soc pꞌeriꞌ a worex yejer Cristo.
28 Soc chichex a worex tiꞌ Cꞌuj,
in chan pararechex.
Pꞌeriꞌquint a worex yejer Cꞌuj bajeꞌreraꞌ,
soc mʌꞌ a chꞌic suraquirex tiꞌ Cristo caꞌ bin tac quir a wiriquex ta wichex.
29 Quireꞌ a jach erex a Cristojoꞌ,
rajiꞌ rajraꞌ cu betic a baꞌ tsoy tu tꞌʌn Cꞌuj.
Rajen a werex a mac a rajraꞌ cu betic a baꞌ tsoy tu tꞌʌn Cꞌuj,
bayiriꞌ rajiꞌ u parar Cꞌuj xan.