A toꞌonexoꞌ u pararoꞌonex Cꞌuj
3
Irex mun u caꞌ cu yajquinticoꞌonex ic Tetex Cꞌuj.
Mʌꞌ ja wirej,
mun u caꞌ cu yajquinticoꞌonex quireꞌ cu tꞌʌnicoꞌonex u pararoꞌonex Cꞌuj.
Rajiꞌoꞌonex,
rajen jach taj u pararoꞌonex Cꞌuj.
Rajen a mac a mʌꞌ yerob Cꞌujiꞌ mʌꞌ u cꞌʌꞌomʌnoꞌonexiꞌ quireꞌ mʌꞌ yerob Cꞌuj xaniꞌ.
2 In bʌjobechex,
in jach yajechex a bajeꞌrereꞌ u pararechex Cꞌuj.
Chen mʌꞌ ju yesaj toꞌonexiꞌ bic quic bin ic betexiꞌ caꞌ bin cꞌuchuc tu qꞌuinin.
Chen ij querex caꞌ bin cꞌuchuc tu qꞌuinin u tar Jesucristo bajenoꞌonex Jesús,
quij.
Quireꞌ jeꞌ ij quiriquexeꞌ jach taj Cristo baxuc Cꞌujoꞌ.
3 Rajen tu cotor a yacsmʌnob tu yorobeꞌ a cu pajicob Cristojeꞌ.
Cu quiꞌ cʌnantic u bʌj soc mʌꞌ u yocar u siꞌpir,
soc mʌnaꞌ u siꞌpir bajen Cristojeꞌ.
4 Mʌꞌ ja wirej,
tu cotor mac cu yacsic u siꞌpir cu cꞌasquintic u tꞌʌn Cꞌuj.
A ju siꞌpiroꞌ,
rajiꞌ cꞌasquintic u tꞌʌn Cꞌuj.
5 A toc erex tarij Cristo quir u rucꞌsic ic siꞌpirex.
Mʌꞌ ja wirej,
a werex mʌnaꞌ u siꞌpir a Cristojeꞌ.
6 Rajen,
tuneꞌ,
tu cotor a yacsmʌnob tu yorobeꞌ yet manob Cristoj.
Mʌꞌ ju naj acs u siꞌpir.
A najij u yacsic u siꞌpiroꞌ,
mʌꞌ yer Cꞌujiꞌ,
mʌnaꞌ chichin yerob Cꞌujiꞌ.
Mʌꞌ ju najta Cꞌuj.
7 In chan pararechex,
mʌꞌ a chaꞌic u tus aric techex a ju cꞌat yiric a wacsiquechex a siꞌpirexeꞌ.
Cꞌʌꞌotex a mac a rajraꞌ cu betic a baꞌ tsoy tu tꞌʌn Cꞌuj,
rajiꞌ toc tsoy,
an ten bic Cristo rajiꞌ toc tsoy.
8 A mac naniꞌ u yacsic u siꞌpir,
rajiꞌ u parar quisin.
Mʌꞌ ja wirej,
u toc chunin yʌn u siꞌpir a quisinoꞌ.
Rajen tarij Cristo quir u rucꞌsic toꞌonex quisin,
soc mʌꞌ rajiꞌ ic tsꞌurirex quisiniꞌ.
9 A mac u parar Cꞌujoꞌ mʌꞌ nani yacsic u siꞌpiriꞌ,
quireꞌ tsꞌaꞌb u cuxtar ten Cꞌuj.
Rajen mʌꞌ ju cꞌʌs acs u siꞌpir,
chichin.
Mʌꞌ ja wirej,
u parar Cꞌuj.
10 Bic tabar a werex wa ju parar Cꞌuj?
Bic tabar a werex wa ju parar quisin?
Mʌꞌ ja wirej,
tu cotor mac,
a mʌꞌ u yajquint u yet acsʌꞌorirob,
mʌꞌ taj a baꞌ cu yiricoꞌ.
Mʌꞌ u parar Cꞌujiꞌ.
Caꞌ ic rʌc yajquintex ic bʌjex
11 Cꞌʌꞌotex a baꞌ tij cuꞌyex caj u yʌnxchun u tsecꞌtic ucheꞌ.
Caj u yaꞌaraj Jesús:
“Caꞌ ic rʌc pacran yajquintex ic bʌjex.”
12 Mʌꞌ a yʌn cʌniquex Caín a tu quinsaj yitsꞌinoꞌ quireꞌ rajiꞌ bajen quisineꞌ.
Biquinin caj u quinsaj yitsꞌin?
Mʌꞌ ja wirej,
a Cainoꞌ,
cꞌas caj u toc betaj uch,
chen a yitsꞌinoꞌ,
toc tsoy caj u betaj uch.
13 Rajen in bʌjobechex mʌꞌ u yʌn jacꞌʌr a worex tiꞌ a mʌꞌ yacsmʌnob tu yorobeꞌ wa cu pꞌactiquechex.
14 Ic jach erex tu masoꞌonex Cꞌuj soc mʌꞌ jij quiminex.
Caj masoꞌonex Cꞌuj quir ij cuxtarex uch.
Rajen a werex quireꞌ ca yajquintiquex a wet acsʌꞌorirex.
A mac a mʌꞌ ju yajquint u yet acsʌꞌorireꞌ mʌꞌ masaꞌb tiꞌ quiminiꞌ aroꞌ.
15 Rajiꞌ yʌjquinsir mac a cu pꞌactic u yet acsʌꞌorirob.
A werex,
a mac u cꞌat u quinsic u yet acsʌꞌorirob,
mʌꞌ ju quiꞌ acsa tu yoriꞌ quir u cuxtar munt qꞌuiniꞌ.
16 Rajen ij querex cu quiꞌ yajquintic toꞌonex a Cꞌujoꞌ,
quireꞌ quimij toꞌonex Cristo.
Bayiriꞌ toꞌonex,
jaj ix tʌco wa tsoy tu tꞌʌn Cꞌuj,
caj quimicoꞌonex tiꞌ ij quet acsʌꞌorirex xan quireꞌ quic yajquintiquex a tiꞌoboꞌ.
17 A mac a yʌn tiꞌ yaꞌab u baꞌtaqueꞌ,
yiric mʌnaꞌ tiꞌ u baꞌtac u yet acsʌꞌorirob.
Mʌꞌ ju yajquintej wa mʌꞌ ju tsꞌaja tiꞌ.
Ca wiric,
mʌꞌ taj cu yajquintic Cꞌujiꞌ.
Mʌꞌ patar yaꞌariquiꞌ:
“In yaj Cꞌuj”,
quij.
18 In chan pararechex,
caꞌ ij quesex taj caj ic yajquintaj Cꞌuj.
Mʌꞌ chen jariꞌ ij cariquex.
Caꞌ ij quesex taj quireꞌ an ten bic tabar quic betex baꞌ.
Chichquinte a worex tiꞌ Cꞌuj
19 Quireꞌ a jeꞌraꞌ,
jeroj,
quic yajquintiquex mac taj.
Bayiriꞌ mʌꞌ jic tus arej ic yajquintiquex mac.
Jeroj,
rajiꞌ Cꞌuj yʌninoꞌonex,
a mac tajoꞌ.
Rajen quij cuꞌyiquex quiꞌ yor ic pixamex wa ber caꞌ bin xicoꞌonex ʌcʌtan Cꞌuj.
20 Cax a wʌcꞌʌs pixamex cu pʌqꞌuic a pachex:
“Mʌꞌ u jawsic a siꞌpirex”,
a Cꞌujoꞌ jeꞌ u jawsic a siꞌpirexeꞌ quireꞌ jach carem a Cꞌujoꞌ.
A toꞌonexoꞌ,
mʌꞌ jach caremex ic pixamexiꞌ a toꞌonexoꞌ.
A Cꞌujoꞌ yer baꞌ tu cotor.
21 Rajen in bʌjobechex in jach yajechex wa mʌꞌ u pʌqꞌuic ic pachex,
ic wʌcꞌʌs pixamex caꞌ bin tsicbanʌcoꞌonex yejer Cꞌuj,
toc tsoy ij corex ij cuꞌyiquex ʌcʌtan ich Cꞌuj.
22 Rajen rajiꞌ cu tsꞌic toꞌonex tu cotor a baꞌ quij cꞌatiquex tiꞌ,
quireꞌ wa bej quij quibex u tꞌʌn,
quireꞌ quic betiquex caꞌ quiꞌac yor Cꞌuj.
23 A jeꞌraꞌ u tꞌʌn caꞌ ij quibex,
caꞌ ij quibex u tꞌʌn u parar Jesucristo.
Caꞌ ic pacran yajquintex ij quet acsʌꞌorirex quireꞌ rajiꞌ arej caꞌ ic yajquintex.
24 A mac a cu quibic u tꞌʌn Cꞌuj,
yet man Cꞌuj.
Bayiriꞌ xan,
u yet manob Cꞌuj.
Ij cꞌʌꞌotex ij quet manex a Cꞌujoꞌ quireꞌ caj u tsꞌa toꞌonex u Tajꞌor u Pixam Cꞌuj caj ij cacsex tij corex tiꞌ Cꞌuj.