4
Uꞌyex baꞌ quin wac techex bajeꞌrer.
U parar u tsꞌurir a cu bin ocar u tsꞌurintic u baꞌtac u tet u qꞌuinin caꞌ bin quimic u tet.
Chen mʌꞌ toy u ocac u tsꞌurintej quireꞌ chichan.
Rajiꞌ quet yejer u cꞌurew u tet cax bin u caꞌ ocar u tsꞌurintej yatoch u tet.
2 Mʌꞌ ja wirej,
tiꞌ toy chichaniꞌ,
yʌn u yʌjtanrir soc u quiꞌ cʌnantic hasta cꞌuchij tu qꞌuinin cu yocar u tsꞌurintej u baꞌtac u tet.
Quireꞌ mʌꞌ cꞌuchij tu qꞌuinin caj u pꞌis u tet.
3 Baxuc,
xan,
a toꞌonex uchoꞌ,
mʌꞌ toy tac Cristo,
mʌꞌ ij querex biquinin caj ic tsꞌurintex a baꞌ caj u camsoꞌonex ic nunquirex quir ij cꞌujintiquex Cꞌuj.
4 Barej caj jach cꞌuchij tu qꞌuinin caj u pꞌisa Cꞌuj caj u tuchiꞌt u parar.
Chen turiꞌ u parar,
caj rochaꞌb ten u nʌꞌ,
baxuc xan irenob u winiquirenob judío,
a Jesúsoꞌ.
5 Mʌꞌ ja wirej,
tarij Cristo quir mʌꞌ u sipticoꞌonex tiꞌ u tꞌʌn Moisés quireꞌ mʌꞌ cꞌuchaꞌan ij corex tiꞌ u tꞌʌn Moisés.
Tarij Cristo soc u pararinticoꞌonex Cꞌuj,
soc mʌꞌ ic tsꞌurintiquex u tꞌʌn Moisés.
6 Quireꞌ bajeꞌrer u toc pararoꞌonex Cꞌuj,
rajen Cꞌuj caj u tuchiꞌt u Tajꞌor u Pixam Cꞌuj quir u cʌjtar tic pixamex.
Rajen u Tajꞌor u Pixam Cꞌuj a tiꞌ yʌn tic pixamex,
rajiꞌ cu tꞌʌn tic pixamex.
Rajen quij caꞌariquex:
“Tet”,
quij,
tiꞌ Cꞌuj.
7 Rajen a techexoꞌ,
mʌꞌ u winquirechex u jer maquiꞌ,
bajeꞌrer u pararechex Cꞌuj.
Rajen u pararechex Cꞌuj a baꞌ tiꞌ yʌn Cꞌuj,
jeꞌ u tsꞌabʌr techex.
A Pablojoꞌ cu quiꞌ tucric a mac a tu yacsaj tu yor u tꞌʌn Cꞌuj
8 A uchoꞌ,
quireꞌ mʌꞌ a werex jach Cꞌuj rajen caj a cꞌujintex a baꞌ mʌꞌ jach cꞌujoꞌ,
caj a quibex a tiꞌoboꞌ.
9 Chen bajeꞌrer a werex tu yʌn Cꞌuj,
bajeꞌrer a Cꞌujoꞌ yerechex.
Chen mʌꞌ jin najtej biquinin a cꞌatex a wʌcꞌʌs quibiquex a baꞌ a mʌꞌ ju yamtechex,
a mʌꞌ baꞌwir techex.
Arex ten wa ja cꞌatex raꞌ ca tsꞌurintiquex?
10 Quireꞌ caj in wuꞌyaj caj a quiꞌ ricꞌsex tu cotor u qꞌuinin u quiꞌquiꞌ janʌnob u winiquirob judío.
11 Rajen caj in tucraj wa jin rʌc sʌtic in beyaj tu jin rʌc tsecꞌta techex tiꞌ u tꞌʌn Cꞌuj.
12 A tenoꞌ quin chich aric techex in wet acsʌꞌorirechex caꞌ a cʌnen bajeꞌrer quireꞌ a tenoꞌ tin cʌnechex quireꞌ ta wacsex ta worex.
Mʌꞌ ja wirej,
a tenoꞌ caj in pꞌʌtaj a baꞌ nanij caj u betob u winiquirob judío.
Rajen chʌc irenechexex.
Quireꞌ mʌꞌ ja cꞌasquintenexiꞌ,
rajen quin tsicbar techex baxucoꞌ.
13 Quireꞌ a werex yajen a uchoꞌ,
rajen yʌn pꞌaten ta ruꞌumex.
Rajen ta batꞌan uꞌyajex u jach tsoyir u tꞌʌn Cꞌuj a tin tsecꞌtaj techex.
14 A techexoꞌ mʌꞌ ja pꞌastenexiꞌ mʌꞌ ja xumpꞌʌtenexiꞌ cax ta wirex baꞌ yajij in cʌnmʌn ten,
cax tu pʌy a xejex.
Chen a techexoꞌ ta quiꞌ acsenex,
iren a mac a cu jach tar ich Cꞌuj.
A techexoꞌ,
caj a wacsenex irenoꞌ u wʌcꞌʌs u bʌjiriꞌ Jesucristo.
15 Jach manan quiꞌ a worex uch quireꞌ a baꞌ caj in camsechex.
Chen am baꞌ a berex a techex bajeꞌreroꞌ quireꞌ mʌꞌ quiꞌ a worex?
Jach taj quin wac techex,
a uchoꞌ wa cꞌuchaꞌan a worex tiꞌ caꞌ a chuque tenex a baꞌ jach manan cojij techex,
cax a wichex quir a tsꞌiquex ten,
caꞌ sasichʌjʌc in wich.
16 Jaj ix tʌco,
bin a caꞌ pꞌactenex bajeꞌrer quireꞌ taj caj in waꞌaraj techex a jeꞌ tꞌʌnaꞌ.
17 A mac a cu camsiquechexob quir a quiꞌ cʌnantiquex u tꞌʌn Moisés yʌn baꞌwir techex,
u cꞌat u cꞌʌniquechexob.
Mʌꞌ ja wirej,
u jach cꞌatob caꞌ a xumpꞌʌtenex yejer in racꞌob,
a mac taj caj u camsajechex u tꞌʌn Cꞌuj uch.
Soc a sayirex tu pachob irex ta sayirex tin pachob uch.
Soc a chen yajquintiquex a tiꞌoboꞌ.
18 Jach tsoy wa tiꞌ yʌn mac rajraꞌ u yamtiquechex quireꞌ mʌꞌ rajraꞌ tiꞌ yʌnen tu yʌnechex.
Mʌꞌ jin waꞌare mʌꞌ in cꞌat u jer mac caꞌ u yam techex.
Wa ca jocꞌarex tu tsoyirechex mʌnaꞌ baꞌ quin bin in wac techex.
19 A tenoꞌ quin chen tꞌʌniquechex an bic u yʌjcamsʌyʌjirob cu tꞌʌnic u chan camsʌwinicob.
A werex baꞌ quin wuꞌyic a tenoꞌ?
Jach mucꞌyaj in caꞌ quireꞌ techex iren a nʌꞌ a tenoꞌ a tabar u rochic u chan ochir.
Jach yaj quin bin in wuꞌye hasta quin wiric tin wich bic jach taj caj a wacsex ta worex u tꞌʌn Cristo.
20 Am biquinin in jach cꞌat in bin in wirej a wichex bajeꞌrer,
chen mʌꞌ ju cꞌuchur in wor in wirex a wichexiꞌ.
A tenoꞌ,
quin pachtic in bin in tsicbar techex.
Mʌꞌ in cꞌat in chen tsꞌibtic techex quireꞌ quin tucriquechex tin wor quireꞌ ca cꞌʌmiquex a baꞌ cu camsicob techex u tꞌʌn Moisés.
A baꞌ cu camsicoꞌonex ixbar Agar yejer ixbar Sara
21 Arex ten a mac u cꞌat u quibic a baꞌ tsꞌibaꞌan ich u tꞌʌn Moisés quir u taquicob u bʌj.
Mʌꞌ wa ta najtex a baꞌ cu yaꞌaric u tꞌʌn Moisés?
22 Tiꞌ quic xaquic ich u tꞌʌn Cꞌuj tiꞌ a Abraham ic nunquir a uchoꞌ yʌn caꞌtur u parar Abraham.
Turiꞌ rochaꞌb u parar ten u cꞌurew,
u jer caj rochaꞌb u jer u parar ten u jach raqꞌuirireꞌ a mʌꞌ u cꞌureweꞌ.
23 Chen u racꞌ Abraham Agar pararnʌjij quireꞌ caj u chen pacht u winquirir.
Sara caj pararnʌjij quireꞌ caj u toc araj Cꞌuj bin u caꞌ pararʌncʌr an ten bic caj u toc aꞌaraj uch.
24 A jeꞌ tꞌʌnaꞌ tiꞌ a xquicoꞌ,
a caꞌturoꞌ,
yʌn baꞌ quir u camsicoꞌonex.
Uꞌyex baꞌ u cꞌat yaꞌaric:
A caꞌtur xquicoꞌ,
yʌn caꞌtur u tꞌʌn Cꞌuj toꞌonex.
Tuririꞌ tiꞌ Agar,
rajiꞌ irej a cu tar tiꞌ u tꞌʌn Cꞌuj a tsꞌaꞌb tiꞌ Moisés caj bin ich u joꞌr u witsir Sinaí.
Mʌꞌ ja wirej,
u parar Agar rajiꞌob u cꞌurewob quireꞌ cꞌurewintaꞌb ten u tꞌʌn Moisés.
25 Ca wiric,
a xquicoꞌ,
Agar u cꞌabaꞌ,
rajiꞌ irej u tꞌʌn Cꞌuj a tsꞌaꞌb tiꞌ Moisés ten Cꞌuj.
Tsꞌaꞌb tiꞌ ich u joꞌr u witsir Sinaí,
a tiꞌ yʌn tu ruꞌumin Arabia.
Chen bajeꞌrer Agar irej tu cotor u winiquirob judío a mac yʌnin u cajar Jerusalén.
Robob toc tsꞌurintaꞌb ten tu cotor a baꞌ tsꞌibaꞌan ich u tꞌʌn Moisés,
a mʌꞌ ju bin u taquic mac.
26 Barej a mac a caj u yacsajob tu yorob u tꞌʌn Jesucristo tar yʌn u cajar ich caꞌanan.
Rajiꞌ u cajar Jerusalén tar yʌn ich caꞌanan.
Robob a tu yacsob tu yorob tiꞌ Jesús bajeꞌrer mʌꞌ ju chabʌr u cꞌurewinticob u tꞌʌn Moisés.
Rajen a toꞌonexoꞌ quij cariquex tiꞌ quic binex cʌjtarex tar ich caꞌanan.
27 Cꞌaj techex wa baꞌ tsꞌibaꞌan ich u tꞌʌn Cꞌuj tu cu yaꞌaric:
A techoꞌ,
a xiquic a mʌꞌ pararnʌjij,
caꞌ quiꞌac yor.
Jach manan u quiꞌtar a wor a techoꞌ a mac mʌꞌ ju yuba bic jach yaj caꞌ a rochaꞌb a parar,
quireꞌ mʌꞌ pararnʌjech.
Caj awʌtnʌquech quireꞌ quiꞌ a wor,
cax tu pꞌʌtech a mam caꞌ bin tsꞌabac tech neyaꞌab a parar.
A mac a yʌn u mameꞌ,
mʌꞌ ju nepararʌncar.
28 Baxuc tun a techexoꞌ,
in wet acsʌꞌorirechex.
A toꞌonexoꞌ iroꞌonex Isaac u parar Abraham.
Mʌꞌ ja wirej,
Sara,
a mʌꞌ u pararʌncar cuch,
caj u rochaj u parar Isaac quireꞌ toc araꞌb ten Cꞌuj:
“Bin u caꞌ u roch u tiꞌar.”
An ten bic techex caj a wacsex ta worex u tꞌʌn Cꞌuj,
caj a quibex a baꞌ cu yaꞌaric techex.
Rajen u pararechex Abraham xan.
29 Barej baxuc a uchoꞌ,
caj rochaꞌb ten Agar Ismael,
u cꞌabaꞌ u parar Agar quireꞌ Abraham caj u pacht u pararʌncʌr yejer mʌꞌ u jach raqꞌueꞌ.
A Ismaeloꞌ caj u chucaj u pach yitsꞌin Isaac.
A Isaacoꞌ caj rochaꞌb ten u nʌꞌ quir u nupꞌsic a baꞌ caj toc araꞌb ten u Tajꞌor u Pixam Cꞌuj uch.
U beriꞌ bajeꞌrer cu chuquic ic pachob a cu tus tucricob u tocar ten Cꞌuj quireꞌ a baꞌ cu yiricob ic betiquex.
30 Chen cu yaꞌaric ich u tꞌʌn Cꞌuj:
“A Agaroꞌ u cꞌurew Sara pararnʌjij yejer u mam Sara,
quireꞌ u parar u cꞌurew Sara,
u cꞌabaꞌ Ismael mʌꞌ ju bin ocar u tsꞌurintej yatoch a ju sucuꞌun Isaacoꞌ.
Quireꞌ Isaac u jach parar Sara.”
31 Rajen a toꞌonex bajeꞌreroꞌ a tij cacsex tij corex u tꞌʌn Cꞌuj mʌꞌ u pararoꞌonex cꞌurew a mac a cu beyaj tiꞌ u jer,
irej Agar.
A toꞌonexoꞌ u pararoꞌonex a xquicoꞌ a mʌꞌ cꞌurew,
irej Sara.