Chichquint a worex soc mʌꞌ a tsꞌurintex u tꞌʌn Moisés
5
A Cristojoꞌ mʌꞌ ju siptoꞌonex soc mʌꞌ ic tsꞌurintiquex u tꞌʌn Moisés.
Rajen chichquintex a worex ich u tꞌʌn Cꞌuj soc mʌꞌ a wʌcꞌʌs tsꞌurintex u tꞌʌn Moisés tu caꞌten.
Mʌꞌ ja wirej,
Jesús tu toc chaꞌ ic binex soc tsoy ic binex.
2 Uꞌyex baꞌ quin wac techex,
a tenoꞌ Pablojen quin wac techex.
Wa cu chabʌr techex a tsꞌiriquex u bʌqꞌuer tu ca wixex,
baxuc an ten bic nanij cu beticob u winiquirob judío,
rajen quin wac techex mʌꞌ bʌꞌwir Cristo techex.
3 A tenoꞌ quin wʌcꞌʌs aric techex.
Mac tu cotor a cu chabʌr u tsꞌiric u bʌqꞌuer tu cu wixob,
irej u winiquirob judío soc u yacsaꞌr ten Cꞌuj.
Rajiꞌob caꞌ u quibej tu cotor a baꞌ tsꞌibaꞌan ich u tꞌʌn Moisés.
4 Wa tiꞌ yʌn winic tu yʌnechex a cu tus tucric u yacsaꞌr u ten Cꞌuj quireꞌ caj u quib u tꞌʌn Moisés,
mʌꞌ taj baꞌ cu tucriquiꞌ.
Tu pꞌʌtaj baꞌ tsoy tu tꞌʌn Cꞌuj.
5 Chen a tenoboꞌ a mac a caj tin wacsob tin worob,
jach jaj bin u caꞌ u yamtenob u Tajꞌor u Pixam Cꞌuj soc tsoy yiriquenob Cꞌuj.
Jeꞌ u betic aroꞌ quireꞌ caj in wacsob in worob tiꞌ u parar Cꞌuj.
6 Tiꞌ a mac a caj u yacs tu yor tiꞌ Cristo,
mʌꞌ noꞌoj wa tsꞌiraꞌan u bʌqꞌuer tu cu wix wa mʌꞌ tsꞌiraꞌan u bʌqꞌuer tu cu wix.
A baꞌ jach noꞌojoꞌ caꞌ ij cacsex tij corex bayiriꞌ caꞌ ic yajquintex ij quet acsʌꞌorirex.
7 Caj a yʌn batꞌan acsex ta worex tiꞌ Cristo uch,
biquinin jach taj caj a wacsex ta worex tiꞌ Cristo.
Chen bajeꞌrer biquinin ca wuꞌyex a mac a cu susiquechex soc mʌꞌ ja wuꞌyex,
soc mʌꞌ ja quibex u tajir u tꞌʌn Cꞌuj?
8 A yʌjtuscamsʌyʌjirob u tꞌʌn Cꞌuj a cu camsiquechex soc a pꞌʌtiquex u tajir u tꞌʌn Cꞌuj.
Robob mʌꞌ tiꞌ u tar ich Cꞌuj quir u camsiquechex,
a techexoꞌ tu tet techex Cꞌuj.
9 Mʌꞌ u yʌn tubur techex.
Cax tuririꞌ a mac a cu yʌnxchun u camsiquechex.
Aroꞌ cax chichin cu sip cu yacsiquechex ta cꞌaxirex,
an ten bic chichin u tsꞌac pan cu sip tu cotor yoꞌoch pan.
10 A tenoꞌ mʌꞌ jin tucrej quireꞌ Cꞌuj cu bin u yamtiquechex soc mʌꞌ ja quibex u tꞌʌn.
Barej rajiꞌ cu bin tsꞌabir u mucꞌyaj ten Cꞌuj a mac u cꞌat u tusaric techex.
11 In bʌjobechex.
A mac a cu pꞌactiquenoboꞌ cu man u tsicbʌtob caj tus aꞌarob ten quin man in camsej bic tabar u tsꞌirej u bʌqꞌuer tu cu wixob,
an ten bic nani cu beticob u winiquirob judío.
Caj u tus aꞌarob xan quin man in camsob bic u quibicob u tꞌʌn Moisés quir u tocar ten Cꞌuj.
Baxuc cu tus aꞌaricob tenoboꞌ.
Wa baxuc quin quiꞌ camsicob,
mʌꞌ ju chucob in pach u winiquirob judío,
u quiꞌ yajenob.
Quiꞌ yorob u yubiquenob in camsic.
Mʌꞌ ja wirej,
tiꞌ toy cu chuquicob in pach.
Jaj ix tʌcoj,
mʌꞌ u pꞌuj yorob quireꞌ caj in tsicbʌticob tu cu baj ich cruz soc u jawsic ic siꞌpirex Cristo.
12 Am biquinin jach manan in cꞌat in wiric caꞌ a jocꞌsex a mac a cu tus camsiquechex caꞌ a tsꞌirex a bʌqꞌuerex soc u tus taquiquex Cꞌuj.
In cꞌat in wiriquex a jocꞌsiquex soc mʌꞌ u yacsic a siꞌpirex.
13 Barej a techexoꞌ in wet acsʌꞌorirex,
mʌꞌ ju toc sip techex Cꞌuj soc mʌꞌ a tsꞌurintiquex a baꞌ tsꞌibaꞌan ich u tꞌʌn Moisés.
Cax mʌꞌ siptaꞌbechex ten Cꞌuj barej mʌꞌ tsoy a mʌnex a pach ta worex a cꞌasoꞌ.
Caj u sip techex Cꞌuj soc a yajquintiquex a wet acsʌꞌorirex soc a yamtiquex a tiꞌoboꞌ.
14 Wa quij quibiquex a tu cu yaꞌaric:
“Caꞌ a yajquintex a wet cajarex an ten bic a wʌcꞌʌs bʌjiriꞌex ca yajquintiquex”,
jeroj,
ca quibiquex tu cotor a baꞌ araꞌb ten Cꞌuj jach taj.
15 Mʌꞌ a yʌn pacran tsꞌictarex,
quireꞌ a jeꞌraꞌ u tꞌʌn Cꞌuj tu yʌnechex bin u caj chꞌejar.
A baꞌ cu pachtic tu yor winic yejer a baꞌ cu pachtic u Tajꞌor u Pixam Cꞌuj
16 Uꞌyex baꞌ quin chich aric techex soc caꞌ a cʌnex.
Chaꞌex u pʌyic a berex u Tajꞌor u Pixam Cꞌuj soc mʌꞌ a pachtiquex ta worex a cꞌasoꞌ.
17 Mʌꞌ ja wirej,
a baꞌ quic pachtiquex tij corex cu pʌyic ic berex tu cꞌasir.
Rajen cu pꞌactic u pʌyic ic berex u Tajꞌor u Pixam Cꞌuj.
Mʌꞌ ja wirej,
mʌꞌ quet yor u Tajꞌor u Pixam Cꞌuj yejer a cꞌasoꞌ a quic pachtiquexoꞌ tij corex xanoꞌ.
Rajen mʌꞌ ic mʌnex ic baꞌ a cꞌatex quireꞌ cu pacran pꞌaticob u bʌj u Tajꞌor u Pixam Cꞌuj yejer a cꞌasoꞌ.
18 Wa ca chaꞌiquex caꞌ u camsechex u Tajꞌor u Pixam Cꞌuj tu cu pʌyic a berex,
jeroj,
mʌꞌ ju bin u taꞌquic a joꞌrex tiꞌ u tꞌʌn Moisés.
19 Wa quij quibiquex a baꞌ quic pachtquex tij corex,
a cꞌasoꞌ,
baxuc a jeꞌ quic bin ic betex:
Quic manex soc ij quiriquex xquic.
Cu man xquic xan quir u yiric xib.
Quic bin ic chuquiquex xquic.
Quic bin ic betex tu cotor a cꞌasoꞌ.
20 Wa quij quibiquex a baꞌ quic pachtiquex tij corex a cꞌasoꞌ,
quic bin ij cꞌujintex tus Cꞌuj.
Quic bin ij cꞌʌyex mac.
Quic bin ic pacran pꞌequintiquex ic bʌjex,
mʌꞌ baꞌwir tiꞌ u jer mac.
Cu bin qꞌuextar ij corex.
Quic bin ic tsꞌictarex.
Quic bin ic tucrex ic nojnoj bʌjiriꞌex.
Quic bin ic pꞌusex yor ic racꞌob soc mʌꞌ quet yorob.
Quic bin ic pꞌactex ic racꞌob soc u tiriꞌ a tiꞌoꞌ.
21 Quic bin ij cꞌatex a baꞌ yʌn tiꞌ mac.
Quic bin ij carchʌjarex.
Quic bin ic nejenjanrex.
Quic bin ij quinsiquex mac.
Quic bin ic betex tu cotor a cꞌasoꞌ baxucoꞌ.
A mac a cu betic baxucoꞌ mʌꞌ cꞌuchaꞌan yor u yocar tu cu reyinticob Cꞌuj ich caꞌanan.
Tsꞌoc in waꞌaric techex aroꞌ chen quin wʌcꞌʌs caꞌ aric techex aroꞌ.
22 Chen tu cu pʌyic a berex u Tajꞌor u Pixam Cꞌuj quic bin ic betex baxuc jeraꞌ:
Quic bin ic yajquintex mac.
Cu bin u quiꞌtar ij corex.
Mʌꞌ jic tucriquex baꞌ.
Nemʌꞌ jach bicoꞌonex.
Jach tsoy ij corex yejer mac.
Quin bin ic manex tu tsoyir.
Taj baꞌ quic bin ij carex.
23 Chen a mac caj pay u ber ten u Tajꞌor u Pixam Cꞌuj,
cax pꞌastaꞌc ten mac mʌꞌ ju pꞌujur tiꞌ.
Cꞌuchaꞌan yor tiꞌ a baꞌ cu tar u tumtaꞌbir yor quireꞌ yamtaꞌ ten u Tajꞌor u Pixam Cꞌuj.
Mʌꞌ ja wirej,
wa baxuc quij quibiquex a jeroj,
mʌꞌ ju bin u taꞌc ic joꞌrex tiꞌ u tꞌʌn Moisés.
24 Rajen a mac a cu yacsic tu yor ti Cristo,
mʌꞌ ju chaꞌ u pʌy u siꞌpir a baꞌ cu pachtic tu yor cax wa jach tsoy.
Bayiriꞌ xan a cꞌasoꞌ cu toc rucꞌsic a mac yacsmʌn tu yor,
bajen Jesús caj u rucꞌsaj caj bajij ich cruz uch.
25 Wa ja cꞌat a wet manex u Tajꞌor u Pixam Cꞌuj chaꞌ u pʌyic a berex u Tajꞌor u Pixam Cꞌuj.
26 Mʌꞌ jic yʌn tucriquex wa jach manan caremoꞌonex quireꞌ a baywoꞌ quic choquintiquex yor ic racꞌob.
Mʌꞌ tsoy u pacran qꞌuextar ij corexiꞌ.