Cu chich aric tiꞌob soc mʌꞌ ju cꞌujinticob u tus cꞌuj
10
Rajen in wet acsaꞌorirex,
in cꞌat a werex baꞌ u ber in nunquirob u winiquirob judío uch.
Barej caj pay u berob ten u muyarir ich tʌcay ruꞌum.
A ray u qꞌuininoꞌ,
caj u rʌc manob u winiquirob judío ich a cꞌacꞌnaboꞌ u cꞌabaꞌ chʌc.
Tiꞌ manob u chꞌʌcticob ich chumuc cꞌacꞌnab.
2 A baxucoꞌ,
caj yaꞌarob tu cotor u winiquirob judío cu chen sayob tu pach Moisés,
barej caj pay u berob ten u muyarir caj u chꞌʌctob a cꞌacꞌnab a chʌcoꞌ.
3 Bayiriꞌ xan,
tu cotor u winiquirob judío caj u jantajob a baꞌ ochir a tsꞌaꞌb ten Cꞌuj tiꞌob.
4 Bayiriꞌ xan,
tu cotor u winiquirob judío caj u yucꞌob a jaꞌoꞌ a tsꞌaꞌb ten Cꞌuj tiꞌob a caj tar tiꞌob ich yajaw actun.
A ray actunoꞌ,
irej bajen cu yuqꞌuicob Cristo,
quireꞌ rajiꞌ yamticob,
rajraꞌ tan u tsꞌabʌr tiꞌob yoꞌoch jaꞌ.
5 Chen jach yaꞌab a ray winicoꞌ mʌꞌ ju betob a baꞌ u cꞌat Cꞌuj,
rajen rʌc quimob ich tʌcay ruꞌum.
6 A baꞌ u ber u winiquirob judío uch ich tʌcay ruꞌum,
caj tar tiꞌob soc u camsic toꞌonex bajeꞌrer wa mʌꞌ ic pachtiquex a baꞌ mʌꞌ tsoyiꞌ,
an ten bic robob caj u betob uch.
7 Rajen mʌꞌ ja cꞌujintiquex u tus rʌquir cꞌuj an ten bic yaꞌab u winiquirob judío caj u betob ich tʌcay ruꞌum .
Quireꞌ tiꞌ tsꞌibaꞌan ich u tꞌʌn Cꞌuj tu cu yaꞌaric:
“Robob caj curajob tu janʌnob,
bayiriꞌ xan,
quir u yucꞌurob a baꞌ tꞌʌrquintaꞌb ich ʌcʌtan u tus cꞌujob.
Jeroj,
caj ricꞌob baxʌr soc quiꞌ yorob.”
8 Bayiriꞌ xan,
mʌꞌ ic yʌn manex yejer xquic wa yejer xib,
an ten bic yaꞌab u winiquirob judío caj u betaj ich tʌcay ruꞌum uch.
Jeroj toc jumpuriꞌ,
caj quimij veinte tres mil u winiquirob judío tuririꞌ u qꞌuinin uch.
9 Bayiriꞌ xan,
mʌꞌ ja yʌn tsꞌiquintiquex Cꞌuj an ten bic yaꞌab u winiquirob judío caj u betob ich tʌcay ruꞌum uch.
Quireꞌ caj u tsꞌiquintaj Cꞌuj u winiquirob judío,
jeroj,
caj u yʌnxchun u quiminob quireꞌ chiꞌbir ten can.
10 Bayiriꞌ xan,
mʌꞌ ja pʌqꞌuiquex u pach Cꞌuj an ten bic yaꞌab u winiquirob judío caj u betajob ich tʌcay ruꞌum uch,
jeroj,
caj tar u yʌjmasirob u tꞌʌn Cꞌuj caj quinsaꞌbob a tiꞌoboꞌ.
11 A werex wa baꞌ u berob tiꞌob,
u winiquirob judío ich tʌcay ruꞌum uch,
tar tiꞌob quir ij cʌniquex a baꞌ u cꞌat Cꞌuj toꞌonex,
soc ij querex xan,
mʌꞌ ic yʌn betex a baxucoꞌ.
A toꞌonexoꞌ,
a mac cuxaꞌan tu qꞌuinin bajeꞌrer,
cꞌuchaꞌan ij corex ic pʌctic u pachob u winiquirob israel caꞌ ij quirex tu cotor a baꞌ u ber uch tiꞌ u winiquirob judío.
12 Rajen,
arex tiꞌ mac a cu tucric cu betic tsoy,
caꞌ u quiꞌ cʌnant u bʌj soc mʌꞌ ju betic a baꞌ cꞌasoꞌ.
13 Tu cotor a baꞌ mʌꞌ tsoyiꞌ,
a baꞌ cu tumtic a worex.
Raꞌiriꞌ xan,
cu tumtic u yor tu cotor a macoꞌ.
Chen a Cꞌujoꞌ,
cu betic an ten bic rajiꞌ rajraꞌ cu betic,
a Cꞌujoꞌ jeꞌ u yamtic toꞌonexeꞌ wa ber caꞌ bin tumtac ij corex soc mʌꞌ ic pʌyej ic siꞌpirex.
Quireꞌ a ray u quininoꞌ,
cu bin u chichquintic ij corex Cꞌuj,
soc ic mucꞌtiquex,
soc mʌꞌ ic betex a baꞌ mʌꞌ tsoyiꞌ.
14 Rajen in wet acsaꞌorirex in jach yaj,
mʌꞌ ja cꞌujintiquex u tus rʌquir cꞌuj.
15 A tenoꞌ,
quin tꞌʌniquex quireꞌ ca najtiquex baꞌ.
Rajen caꞌ a tucrex baꞌ tabar in waꞌaric techex,
wa taj wa mʌꞌ tajiꞌ.
16 Jeroj,
a ray ruchoꞌ wa quic chuquiquex wa jij cuqꞌuiquex wa ber quij cꞌʌꞌotiquex caj u jantaj Cristo u yoꞌoch oqꞌuin,
a tabar u quinsaꞌ uch.
Bayiriꞌ xan,
quij cariquex bayoꞌ tiꞌ Cꞌuj.
A ray u qꞌuininoꞌ quij cuqꞌuex biquin,
mʌꞌ pꞌeriꞌoꞌnex wa ber quic betiquex aroꞌ?
Mʌꞌ ja wirej,
rajiꞌ cu cꞌasic toꞌonex tiꞌ u qꞌuiqꞌuer Cristo.
A ray u qꞌuininoꞌ xan,
wa ber quic chuquiquex ic xatex ic jantex a panoꞌ,
pꞌeriꞌoꞌonex wa ber quic betiquex aroꞌ xan.
Mʌꞌ ja wirej,
rajiꞌ cu cꞌasic toꞌonex tiꞌ u winquirir Cristo xan.
17 A ray panoꞌ,
tuririꞌ yʌn,
rajen a ray panoꞌ cu cꞌasic toꞌonex tiꞌ u winquirir Jesucristo.
Baxuc a toꞌonex xanoꞌ,
cax pimoꞌonex a toꞌonexoꞌ,
chen toꞌonex iroꞌonex tuririꞌ ic winquirirex quireꞌ pꞌeriꞌ caj ic jantex a ray panoꞌ.
18 Bajeꞌrer iriquex bic tabar u winiquirob israel cu beticob.
Wa ber cu chiꞌicob u bʌqꞌuer u yʌrʌcꞌ a cu quinsicob quir u chaquinticob ich yocꞌor u baꞌyirinquirir soc u rʌc toꞌquicob,
quir u quiꞌtar yor Cꞌuj.
Mʌꞌ wa pꞌeriꞌob yejer Cꞌuj,
quireꞌ caj u betajob aroꞌ?
Pꞌeriꞌob.
19 Baꞌ quin jach aric wa ber quin waꞌaric aroꞌ,
a tenoꞌ mʌꞌ jin cꞌat in waꞌaric wa ju tus rʌquir cꞌuj yʌn baꞌwir tiꞌ.
Mʌꞌ in cꞌat in waꞌaric wa ja bʌcꞌoꞌ a tiꞌ tus tꞌʌraꞌan ʌcʌtan tiꞌ u tus rʌquir cꞌuj wa jach manan tsoy,
quireꞌ tiꞌ tus tꞌʌraꞌan ich u rʌquir u tus cꞌuj,
rajen u jer bʌcꞌ mʌꞌ jach tsoy.
Jot aroꞌ.
20 Chen soc a yʌn najtiquex a baꞌ quin waꞌaric techex,
a tenoꞌ,
quin waꞌaric techex wa mac,
a mʌꞌ ju winiquirob judío,
cu tꞌʌquinticob a baꞌ u cꞌatob ich ʌcʌtan u tus rʌquir cꞌuj.
Chen a baꞌ cu tꞌʌquinticob ich ʌcʌtan u tus rʌquir cꞌuj cu jach tꞌʌquinticob ich ʌcʌtan quisin,
mʌꞌ ju tꞌʌquinticob ich ʌcʌtan Cꞌuj.
Rajen,
mʌꞌ jin cꞌat in wiriquechex a pꞌeriquintic a worex yejer a raꞌ yʌnin quisinoꞌ.
21 Rajen mʌꞌ cꞌuchaꞌan a worex a pꞌeriquintic a worex,
caj a wuqꞌuex u ruchir a quij cꞌʌniquex tu quij cꞌʌꞌotiquex u janʌn oqꞌuin a tabar u quimin Jesús uch.
Jeroj,
pachir ca bin a sʌjtex u tus rʌquir cꞌuj.
Bayiriꞌ xan,
mʌꞌ cꞌuchaꞌan a worex a janʌnex tu pojcheꞌ a raꞌ yʌnin ic Jaj Tsꞌurirex,
jeroj pachir ca bin a janʌnex tu pojcheꞌ a raꞌ yʌnin quisiniꞌ.
22 Arex ten a jeraꞌ.
A jach cꞌatex wa ja tsꞌiquintiquex Cꞌuj?
Jeꞌ wa ja cꞌuchur a muqꞌuex tiꞌ Cꞌuj?
A werex mʌꞌ cꞌuchaꞌan a muqꞌuex tiꞌ.
Caꞌ ic betex tu cotor baꞌ soc mac tu cotor cu yiric jach carem Cꞌuj
23 Rajen cu chen chaꞌbʌren in betic tu cotor baꞌ,
chen mʌꞌ tsoy ten,
cax cu chen chaꞌbʌr in betic tu cotor baꞌ.
Wa quin betic tu cotor a baꞌ,
jeroj,
mʌꞌ cꞌuchaꞌan in wor in yamtic mac u man tu tsoyir.
24 Arex tiꞌ mac,
mʌꞌ ju chen cʌxtic a baꞌ tsoy tiꞌ u nonoj bʌjiriꞌ,
chen ar u cʌxt a baꞌ tsoy tiꞌ tu cotor mac.
25 Bayiriꞌ xan,
tu cotor bʌcꞌ a cu canicob ich tu cu naj canic baꞌ,
toc chiꞌex.
Mʌꞌ ja yʌn cꞌatiquex wa tꞌʌquintaꞌb uch ʌcʌtan tiꞌ u tus rʌquirex u cꞌuj.
Mʌꞌ ja chꞌiquex sajquirex quir a chiꞌiquex.
26 Mʌꞌ ja wirej,
a jeꞌ ruꞌumaꞌ,
yejer tu cotor baꞌ a tiꞌ yʌn teraꞌ,
ic Jaj Tsꞌurirex yʌnin.
27 Wa mac,
a mʌꞌ yacsmʌn tu yor cu pʌyiquechex ta janʌnex tu yatoch,
toc xen,
wa uts ta tꞌʌn caꞌ xiquechex.
Tu cotor baꞌ cu tsꞌic techex a janʌnex,
toc jantex.
Mʌꞌ ja yʌn cꞌatiquex wa tꞌʌquintaꞌb uch ʌcʌtan tiꞌ u tus rʌquir cꞌuj.
28 Chen wa mac cu yaꞌaric tiꞌ taroꞌ,
tan yaꞌaric tech:
“Aroꞌ tꞌʌquintaꞌb ʌcʌtan ich u tus rʌquir cꞌuj.”
Baxuc cu yaꞌaric tech.
Jeroj,
mʌꞌ ja yʌn chiꞌic.
Caꞌ a bet a baxuc caj in waꞌaraj tech,
quireꞌ a baꞌ caj u yaꞌaraj tech mac,
quireꞌ caj u yaꞌaraj mʌꞌ tsoy a jantic,
rajen mʌꞌ ja jantic.
29 A baꞌ quiriꞌ jach noj a raꞌ baꞌ cu yubic mac tu yor,
a mac araꞌb tech mʌꞌ tsoy a jantic mʌꞌ raꞌ a wʌcꞌʌs bʌjiriꞌex ca wuꞌyiquex ta worex.
A tenoꞌ,
tin tꞌʌn,
yʌn mac bajeꞌrer jeꞌ u yaꞌaric:
“Baꞌwir caꞌ in tucrej a baꞌ quin jantic quireꞌ u jer mac yubic tu yor,
mʌꞌ tsoy in jantic,
cax a tenoꞌ,
tsoy in wuꞌyic tin wor in jantic.
30 Bajeꞌrer,
wa ber caj tsꞌoc in waꞌaric tiꞌ Cꞌuj:
Bayoꞌ Cꞌuj,
caj a tsꞌaj ten in woꞌoch.
Arej ten biquinin u jer mac cu taꞌquic in joꞌr,
tan u yaꞌaric wa mʌꞌ tsoy in jantic aroꞌ.
Quireꞌ a tenoꞌ,
caj in toc arej:
Bayoꞌ Cꞌujꞌ,
quireꞌ raꞌ jin woꞌoch.”
31 Jeroj,
wa ber ca janʌnex,
cax wa ber ca wucꞌurex,
cax a baꞌ ca betiquex,
caꞌ a yʌn betex tu cotor baꞌ soc a sʌjtiquex Cꞌuj,
quireꞌ a baꞌ caj a betajex.
32 Caꞌ cʌjraquex ich tu cotor mac,
soc mʌꞌ ja wacsiquex u siꞌpir,
cax u winiquirob judío,
cax mʌꞌ ju winiquirob judío,
cax a mac a wet acsaꞌorir xan.
An ten bic in betic a tenoꞌ,
pꞌis a bʌjex a betex xan.
Mʌꞌ ja tsꞌiquintiquex mac yejer a baꞌ ca betiquex.
33 A tenoꞌ,
mʌꞌ jin betej baꞌ soc u chen quiꞌquintic in wor.
Quin yʌn betic a baꞌ cu quiꞌquintic u yor u jer mac xan.
Quireꞌ a baxucoꞌ,
cꞌuchaꞌan in wor in yamtic mac soc u yacsic tu yor soc u toꞌcar ten Cꞌuj.