Caꞌ sʌjtac a mac a tuchiꞌtaꞌb ten Cristo
9
Arex ten a baꞌ ca tucriquex.
Mʌꞌ wa caj u tuchiꞌten ic Jaj Tsꞌurirex quir in tsecꞌtic u tꞌʌn,
baꞌ ca tucriquex?
Mʌꞌ wa cꞌuchaꞌan in wor in bet a baꞌ u cꞌat ic Tetex Cꞌuj,
baꞌ ca tucriquex?
Mʌꞌ wa jin wiramʌn ic Jaj Tsꞌurirex?
Biquinin,
a techexoꞌ,
caj a wacsajex ta worex quireꞌ beyanʌjen tuꞌ yʌnechex.
2 Cax u jer mac cu yaꞌaric:
“Mʌꞌ tuchiꞌtaꞌb Pablo ten Cristo quir u tsecꞌtaꞌr u tꞌʌn.”
Chen a techexoꞌ,
a jach erex caj u tuchiꞌten Cristo quir in tsecꞌtic u tꞌʌn,
quireꞌ techex caj a wacsex ta worex tiꞌ ic Jaj Tsꞌurirex caj in waꞌaraj techex u tꞌʌn.
A baxucoꞌ,
caj esaꞌb ten Cꞌuj jach taj rajiꞌ caj u tuchiꞌten.
3 A baꞌ caj in chen araj techex,
jeꞌ in waꞌaric tiꞌ tu cotor mac a ju cꞌat u taꞌquic in joꞌr a tenoꞌ.
4 Arex ten,
biquinin mʌꞌ tsoy in janʌnob,
cax wa ucꞌurnʌjenob ich yatoch mac tu quin tsecꞌticob u tꞌʌn Cꞌuj?
5 Mʌꞌ wa tsoy a tenoꞌ caꞌ in raqꞌuintej xquic,
a yacsmʌn tu yor,
bayiriꞌ xan,
soc in wet bin wa ber caꞌ bin xiquenob tu quin tsecꞌticob u tꞌʌn an ten bic u jer yʌjtseqꞌuirob Cristo?
Baxuc caj u betob xan u yitsꞌinob ic Jaj Tsꞌurirex.
Baxuc caj u betaj xan Pedro.
6 Arex tenob yejer Bernabé,
a tenoboꞌ tsoy mʌꞌ wa jin pꞌʌticob in beyajob quir in jaricob in taqꞌuin soc in janʌnob?
7 Tu yʌn a soldadojoꞌ caꞌ xic u cʌxtaꞌbir tu cotor baꞌ u cꞌat?
Tu yʌn a mac a cu pʌqꞌuic u yaqꞌuir u wich uva cu mʌqꞌuic u wich uva wa ber cu tsꞌic u wich?
Tu yʌn mac a yʌn yʌrʌcꞌ wacax yaꞌab a cu yʌtsꞌic u yim yʌrʌcꞌ wacax soc u yuqꞌuic?
8 A techexoꞌ,
ca chen tucriquex wa quin soꞌsoꞌ aꞌaric aroꞌ quireꞌ in bʌjiriꞌ in tꞌʌn?
Mʌꞌ wa ja werex baxuc caj yaꞌaraj Moisés ich u tꞌʌn xan uch?
9 Quireꞌ tiꞌ tsꞌibaꞌan ich u tꞌʌn Moisés,
a tu cu yaꞌaric:
“Mʌꞌ tsoy a mʌquic u chiꞌ ton wacax yejer chan chim tu cu yarchꞌʌctic u wich trigo quir u rucꞌur u sor,
soc tsoy u jansan tu cu beyaj a ton wacaxoꞌ.”
Baxuc caj u yaꞌaraj Moisés uch.
Biquinin a Cꞌujoꞌ,
cu chen tucric a ton wacaxoꞌ,
rajen caj u yaꞌaraj toꞌonex aroꞌ?
10 Mʌꞌ wa raꞌ cu yaꞌaric tu cotoroꞌonex?
Jach taj caj u tsꞌibtoꞌonex aroꞌ,
soc caꞌ bin jansac a mac a cu beyaj tiꞌ Cꞌuj.
Mʌꞌ ja wirej,
a mac a cu muxic ruꞌum quir u pʌqꞌuic u pʌcꞌar trigo,
caꞌ u yʌn muxic u ruꞌum quir u mʌcantic a baꞌ cu bin u pʌqꞌuej.
Caꞌ boꞌotac u boꞌorir u cꞌʌb.
Bayiriꞌ xan tiꞌ a mac a cu chachtic u sor trigo rajiꞌ caꞌ boꞌotac u boꞌorir u cꞌʌb xan.
11 A tenoboꞌ caj in yʌn tsecꞌtob techex tiꞌ u tꞌʌn Cꞌuj,
jach coꞌoj wa caꞌ in pajicob techex a baꞌ quin chen cꞌaticob?
12 Raꞌ u quinin tiꞌ yʌn u jer mac a mʌꞌ ju jach tucricob u cꞌatejob baꞌ tiꞌ techex.
Mʌꞌ wa jach manan tsoy caꞌ in cꞌatejob baꞌ techex xan,
quireꞌ caj in yʌn tsecꞌtob techex u tꞌʌn Cꞌuj uch?
Chen a tenob,
mʌꞌ tin betajob aroꞌ,
soc mʌꞌ jin jocꞌsicob u yorob mac tu yʌnechex.
Rajen mʌꞌ jin mʌꞌquinticob u ber mac soc u yacsic tu yor tiꞌ Cristo.
13 Biquinin mʌꞌ wa ja werex a sacerdotejoꞌ a cu beyaj ich carem naj tu cu naj cꞌujinticob Cꞌuj u winiquirob judío caj boꞌotaꞌb u boꞌorir u cꞌʌb tu cu cꞌʌmicob a baꞌ tsꞌajaꞌan ten u winiquirob judío tiꞌ Cꞌuj,
a baywoꞌ,
cu jaricob u boꞌorir u beyajob.
Mʌꞌ wa ja werex a mac a cu cʌnanticob u baꞌyirinquiriꞌ tu cu tꞌʌquinticob yʌrʌcꞌ quir u tsꞌic tiꞌ Cꞌuj.
Jeꞌ u tsꞌaꞌbʌr tiꞌ jun xotꞌ a yʌrʌcꞌoꞌ,
a tꞌʌraꞌan ich u baꞌyirinquiriꞌ,
quireꞌ raꞌ u boꞌorir u cꞌʌb.
14 Bayiriꞌ xan,
caj u toc araj ic Jaj Tsꞌurirex:
“A mac a cu tsecꞌtic u tꞌʌn Cꞌuj caꞌ u boꞌotaꞌ ten mac a cu yubicob u jach tsoyir u tꞌʌn Cꞌuj.”
Baxuc caj u yaꞌaraj Jesús uch.
15 Chen a tenoꞌ mʌꞌ in cꞌatman baꞌ techex,
cax caj u yaraꞌaj toꞌonex Cristo wa tsoy ic jariquex ic taqꞌuinex tu quic tsecꞌtiquex u tꞌʌn Cꞌuj.
Bayiriꞌ xan,
wa ber caj in tsꞌibtaj techex a jeꞌ juꞌunaꞌ,
mʌꞌ quir in cꞌatic techex caꞌ a tsꞌajex ten a baꞌ in cꞌat.
A biquinin a tenoꞌ mʌꞌ jin man in cꞌatej baꞌ,
cax wa quimen tu quin man in tsecꞌ u tꞌʌn Cꞌuj soc mʌꞌ jin man in cꞌat u jansenob tu quin tsecꞌticob u tꞌʌn Cꞌuj.
16 A tenoꞌ,
quiꞌ in wor in wuꞌyic yaꞌaraꞌ,
quin quiꞌ beyaj tu quin tsecꞌtic u jach tsoyir u tꞌʌn Cꞌuj.
Mʌꞌ ja wirej,
caꞌ manaquen in tsecꞌt u tꞌʌn Cꞌuj,
quireꞌ caj u tuchiꞌten Cꞌuj.
Jach otsiren wa mʌꞌ jin bin in tsecꞌt u tꞌʌn Cꞌuj.
A Cꞌujoꞌ,
bin u caꞌ tsꞌa in mucꞌyaj.
17 Wa jin bʌjiriꞌ quin tsecꞌtic u tꞌʌn Cꞌuj,
jeꞌ in pajic in cꞌʌmic in taqꞌuin.
Chen raꞌ u qꞌuinin caj u teten Cꞌuj soc in beyaj tiꞌ,
rajen quin tsecꞌtic u tꞌʌn Cꞌuj,
mʌꞌ quir in jaric in taqꞌuin quin beyaj,
chen quir in quibic u tꞌʌn a tiꞌoꞌ.
18 Baꞌ u tsoyir cu bin tar ten wa ber quin tsecꞌtic u tꞌʌn Cꞌuj?
A werex wa baꞌ tsoyir cu bin tar ten?
U jach quiꞌir in wor tu quin tsecꞌtic u tꞌʌn Cꞌuj,
mʌꞌ boꞌotaꞌan quireꞌ tin tsecꞌtic u tꞌʌn.
Cax jach tsoy in jaric in taqꞌuin quir in janʌn tu quin tsecꞌtic u tꞌʌn Cꞌuj,
chen a tenoꞌ,
mʌꞌ jin cꞌat u boꞌorir in beyaj tiꞌ Cꞌuj.
19 Cax mʌꞌ baꞌwir ten tu cotor mac,
chen a tenoꞌ quin chaꞌic u cꞌurewquintiquen tu cotor mac.
Baxuc aroꞌ,
quin betic soc cꞌuchaꞌan in wor in waꞌaric tiꞌ yaꞌab mac,
caꞌ u yacsej tu yor tiꞌ Cristo.
20 Barej wa ber tiꞌ yʌnen ich u winiquirob judío,
a tenoꞌ quin wesic in bʌj irej wa ju winiquiren judío,
soc cꞌuchaꞌan in wor in wesic tiꞌob u tꞌʌn Cꞌuj soc u yacsicob tu yorob tiꞌ Cristo.
Wa ber tiꞌ yʌnen ich mac a cu yaꞌaric cu quibic a baꞌ cu yaꞌaric ich u tꞌʌn Moisés,
bayiriꞌ ten quin quibic xan,
soc cꞌuchaꞌan in wor in wesic tiꞌob u tꞌʌn Cꞌuj,
soc u yacsicob tu yorob tiꞌ Cristo,
cax mʌꞌ baꞌwir caꞌ in quibic baxucoꞌ.
21 Chen,
wa ber tiꞌ yʌnen ich a mac a mʌꞌ yubmʌnob u tꞌʌn Moisés,
baxuc quin betic an ten bic robob cu beticob,
soc cꞌuchaꞌan in wor in wesic tiꞌob u tꞌʌn Cꞌuj soc u yacsicob tu yorob tiꞌ Cristo.
Chen a tenoꞌ,
mʌꞌ jin pꞌuspacht u tꞌʌn Moisés,
quireꞌ quin quibic u tajir u tꞌʌn Cristo.
22 Barej wa ber tiꞌ yʌnen ich mac a mʌꞌ toy u quiꞌ najtob tu cotor baꞌ ich u tꞌʌn Cꞌuj.
A ten xanoꞌ,
quin betic an ten bic mʌꞌ jin najtej tu cotor baꞌ,
soc cꞌuchaꞌan in wor in yamtic tiꞌob.
A raꞌ u qꞌuinin in wer bic tabar jujuntur mac cu betic baꞌ,
a tenoꞌ quin pꞌisic in bʌj soc quet bayiriꞌ quin betic xan,
soc jun yarob cu yacsicob tu yorob tiꞌ Cristo,
soc robob cu toꞌcar ten Cꞌuj.
23 Rajen quin betic tu cotor aroꞌ soc cꞌuchaꞌan yor mac tu cotor caꞌ u yubob u tꞌʌn Cꞌuj ich tu cotor u ruꞌumin.
Bayiriꞌ xan,
soc pꞌeriꞌ quiꞌ in wor yejer a mac a caj u yubob u tꞌʌn Cꞌuj.
24 Biquinin mʌꞌ wa ja werex bic tabar a mac a cu cꞌʌnic u yacab tu cu baxar cu cꞌʌnic u yacab.
Tu cotor a mac cu jach pꞌisic u bʌj soc yiricob mac a pʌyber cu cꞌuchuroꞌ.
Chen a mac a cu bin tsꞌabir baꞌ quireꞌ pʌyber caj cꞌuchij,
rajiꞌeꞌ a mac a jach manan chich acabnʌjij.
Baxuc techex,
caꞌ a pꞌis a bʌjex soc a cꞌʌmiquex a baꞌ caj u ricꞌsaj Cꞌuj techex.
25 Tu cotor mac a cu bin u jach pꞌisic u bʌj u cꞌʌnic u yacab tu cu baxar cu cꞌʌnic yacab,
pʌyber caꞌ u tumt u bʌj u yirej wa cꞌuchaꞌan yor tiꞌ.
Robob jach taj cu jach pꞌisic u bʌj soc u cꞌʌmicob a baꞌ ricꞌsaꞌan quir u tsꞌabir tiꞌ,
a pʌyber cꞌuchij.
Chen a baꞌ tsꞌabir tiꞌ,
tiꞌ cu bin tsꞌocar,
chen a toꞌonexeꞌ,
a quic jach pꞌisic ic bʌj quir ij cꞌʌmiquex a baꞌ ricꞌsaꞌan ten Cꞌuj toꞌonex,
aroꞌ mʌꞌ ju tsꞌocar tiꞌ,
muntqꞌuin tiꞌ yʌniꞌ.
26 Rajen,
a tenoꞌ,
baxuc quin betic aroꞌ.
Quin jach pꞌisic in bʌj in bet aroꞌ.
Chen a tenoꞌ,
mʌꞌ jin cꞌʌnic in wacab an ten bic mac mʌꞌ yer acab.
Bayiriꞌ xan,
quin betic an ten bic mac jach yer u baxʌr cu tus raxic mac,
a jach tꞌoj baxʌr.
A tenoꞌ,
in chen er baxʌr an ten bic mac u tus raxic maqueꞌ.
A tenoꞌ,
mʌꞌ jin tus cʌnej mac a mʌꞌ yer u tus raxic mac.
27 A tenoꞌ,
in wʌcꞌʌs bʌjiriꞌ in winquirir quin tsꞌurintic soc in winquirir mʌꞌ ju bet a baꞌ u cꞌat.
Quireꞌ mʌꞌ jin cꞌat caꞌ bin tac u jer u qꞌuinin wa ber caꞌ tsꞌocac in tsecꞌtic u tꞌʌn Cꞌuj ich u jer winiquirob,
jeroj mʌnaꞌ baꞌ cu bin tar ten tiꞌ Cꞌuj caꞌ bin xuruc tꞌʌn.