A mac a yacsmʌnob tu yorob cu nunquicob u tꞌʌnob ich ʌcʌtan juez
6
Wa jix tʌcoj,
tiꞌ yʌn mac tuꞌ yʌnechex,
a yʌn baꞌ choquintaꞌb yor ten yet acsaꞌorirob.
Yʌn arex tiꞌ,
mʌꞌ ju yʌn yʌn bin ich ʌcʌtan u tsꞌurir u cajar quir u taꞌquic u joꞌr yet acsaꞌorir.
Arex tiꞌ,
caꞌ xicob ʌcʌtan ich u tsꞌurirob u yet acsaꞌorirob.
2 Biquinin mʌꞌ wa ja werex caꞌ bin cꞌuchuc tu qꞌuinin u xur tꞌʌn,
a techexoꞌ,
ca bin ocarex reyir yejer Cꞌuj ich yocꞌocab.
Wa ca bin ocarex reyir yejer Cꞌuj ich yocꞌocab,
jeroj,
cꞌuchaꞌan a worex a cʌxtiquex a wirex baꞌ cꞌasir yʌn tiꞌ mac tuꞌ yʌnechex cax chichin.
3 Biquinin mʌꞌ wa ja werex quet reyoꞌonex yejer Cristo,
rajen rajiꞌ quic bin ic tsꞌurintex a yʌjmasirob u tꞌʌn Cꞌuj.
Rajen cꞌuchaꞌan a worex a sisquintiquex u yor a mac a choquintaꞌb yor yet acsaꞌorirob tuꞌ yʌnechex quireꞌ mʌꞌ jar a sisquintic yor aroꞌ.
4 Wa jix tʌcoj cꞌuchur tu qꞌuinin bin a caꞌ a sisquintej yor mac a choquij yor ich yococab tuꞌ yʌnechex.
A tenoꞌ,
tin tꞌʌn,
mʌꞌ ja bin a yacsiquex a wet acsaꞌorirex ich ʌcʌtan a mac a mʌꞌ yerob Cꞌuj,
quireꞌ mʌꞌ pꞌeriꞌ yorob yejeroꞌonexeꞌ.
5 Caj in waꞌaraj techex aroꞌ soc a pʌyiquex a suꞌtarex,
a techexoꞌ,
a ca wuꞌyiquex ta worex jach tsoyechex.
Arex ten wa mʌnaꞌ mac tiꞌ yʌn tuꞌ yʌnechex tu ca muchꞌquintiquex soc a wuꞌyiquex u tꞌʌn Cꞌuj,
a cꞌuchaꞌan yor u najtej bic tabar u sisquintic u yor u yet acsaꞌorir?
6 Chen biquinin cu chen bin mac a yacsmʌnob tu yor tiꞌ Cristo ich ʌcʌtan u jach tsꞌurir u cajar quir u taꞌquic u joꞌrob u yet acsaꞌorirob?
Mʌꞌ ja wirej,
mʌꞌ tsoy tiꞌ a mac a mʌꞌ yacsmʌnob tu yorob tiꞌ Cristo u sisquintic yorob a pacran yet acsaꞌorirob.
7 Rajen,
toc ocar yajaw siꞌpirex tuꞌ yʌnechexex raꞌ u qꞌuinin a bʌjiriꞌex caj a pacran tac a joꞌrex ich ʌcʌtan u jach tsꞌurir a cajarex,
a mʌꞌ yerob Cꞌujoꞌ.
Mʌꞌ wa jach tsoy,
caꞌ a mucꞌtex a baꞌ a ber techex?
Mʌꞌ wa jach manan tsoy caꞌ a mucꞌtex wa ber cu tsꞌʌricob a pachex quir u chꞌicob a baꞌ yʌn techex?
8 Chen a techexoꞌ,
caj a waꞌarex:
“In wacsmʌnob tin worob”,
a bʌjiriꞌex,
ca betiquex a ray cꞌasoꞌ.
Bayiriꞌ irej wa ca tus aꞌcriquex u baꞌtac a wet acsaꞌorirex quireꞌ mʌꞌ ja sutexiꞌ.
9 A tenoꞌ,
mʌꞌ cꞌuchaꞌan in wor in najtic biquin mʌꞌ ja mucꞌtiquex a baꞌ a ber techex,
cax cu chꞌicob a baꞌtaquex a cu tus aꞌcricob cax mʌꞌ u wʌcꞌʌs suticob a baꞌtaquex.
Mʌꞌ wa ja werex a mac a cu betic a cꞌasoꞌ a tu yʌnechex,
rajiꞌ mʌꞌ ju bin acsaꞌbir ten Cꞌuj tu cu bin u reyinticob Cꞌuj.
Rajen,
mʌꞌ tsoy yaꞌaric mac wa tsoy u man yejer xquic,
cax yʌn u racꞌ,
wa cu yaꞌaric,
wa tsoy u man xquic yejer xib,
cax yʌn u man.
Rajen mʌꞌ tsoy yaꞌaric mac wa tsoy u tus cꞌujintic tus cꞌuj.
Rajen mʌꞌ tsoy yaꞌaric,
wa xquic u man yejer u yet xquiquir,
wa xib cu man yejer u yet xibir.
10 Baxuc xan,
a mac a cu yaꞌcric baꞌ,
mʌꞌ ju bin acsaꞌbir ten Cꞌuj,
cax a mac a cu pachtic u baꞌtac u racꞌob,
a mac a cu carchʌjʌr,
a mac a cu tsicbar cꞌas tiꞌ u jer mac,
a mac a cu yaꞌcric baꞌ tiꞌ mac a cu raxic.
11 A uchoꞌ,
baxuc yʌn jun yarechex,
a mʌꞌ toy a wacsajex ta worex tiꞌ Cristo.
Chen Cꞌuj caj u rucꞌs a siꞌpirex.
Bajeꞌrer,
caj a cꞌʌmajex u mucꞌ Cꞌuj quir a manex tu tsoyir.
Bayiriꞌ xan,
caj a cꞌʌmajex u mucꞌ soc cꞌuchaꞌan a worex tiꞌ a tsoyoꞌ.
Mʌꞌ ja wirej,
caj a cꞌʌmajex u mucꞌ,
quireꞌ caj a wacsex ta worex tiꞌ ic Jaj Tsꞌurirex Jesucristo,
quireꞌ caj u yamtechex u Tajꞌor u Pixam Cꞌuj.
A winquirirex quir u jach beyaj tiꞌ Cꞌuj soc yiric mac jach manan jach carem Cꞌuj
12 Tiꞌ yʌn mac tu yʌnechex a cu yaꞌaricob:
“Cꞌuchaꞌan in wor in betic tu cotor baꞌ a mʌꞌ araꞌan ten Cꞌuj wa tsoy in betej.”
A tenoꞌ,
quin nunquic,
yʌn baꞌ cꞌuchaꞌan in wor in betic,
chen yʌn tenten mʌꞌ tsoy caꞌ in betej.
Cax cꞌuchaꞌan in wor in betic tu cotor baꞌ,
chen mʌꞌ jin chaꞌ in tsꞌurintejen baꞌ.
13 Tiꞌ yʌn u jer mac tu yʌnechex a cu yaꞌaric:
“Ij coꞌochex rajiꞌ yoꞌoch ic nʌqꞌuex,
bayiriꞌ xan,
a ij nʌqꞌuexoꞌ rajiꞌ quir u bin ij coꞌoch,
quet bayiriꞌ.”
A tenoꞌ,
quin bin in nunquic:
“Jin,
chen a Cꞌujoꞌ jeꞌ u rʌc chꞌesiqueꞌ a caꞌturoꞌ.”
Mʌꞌ ja wirej,
u winquirir mac,
mʌꞌ quir u man yejer xquic,
mʌꞌ yer xib xan.
Raꞌ u winquirir mac quir u cꞌujintic Cꞌuj soc rajiꞌ u tsꞌurintic Cꞌuj.
14 Quireꞌ ic Tetex Cꞌuj caj u ricꞌsaj ic Jaj Tsꞌurirex ich u quimirir.
Rajiꞌ cu bin u ricꞌsicoꞌonex ich u quimirir,
quireꞌ yʌn u jach chichir u mucꞌ quir u ricꞌsicoꞌonex.
15 Biquinin mʌꞌ ja werex wa rajiꞌ ic winquirirex tu tajir u winquirir ic Jaj Tsꞌurirex Jesucristo.
Arex ten wa jach tsoy in jocꞌsic in winquirir a raꞌ yʌnin in winquirir Cristo,
caꞌ in tsꞌaj tiꞌ xquic in winquirir,
a nanij u man?
A tenoꞌ quin nunquic,
mʌꞌ biqꞌuin quen.
16 Biquinin mʌꞌ ja werexiꞌ wa mac caj u pꞌerꞌquintaj u bʌj yejer xquic a nanij u manoꞌ,
caj u pꞌerꞌiquint u winquirir,
rajen tuririꞌ yejer.
Mʌꞌ wa cꞌaj techex tu tsꞌibaꞌan ich u tꞌʌn Cꞌuj,
taj cu yaꞌaric toꞌonex:
“Cax robob caꞌtur u winquirirob,
robob tuririꞌchʌj u winquirirob.”
17 Chen a mac a yacsmʌnob tu yorob tiꞌ ic Jaj Tsꞌurirex Jesucristo toc tuririꞌchʌj u pixam yejer.
18 Rajen mʌꞌ ja manex yejer xquic,
mʌꞌ a manex yejer xib xan,
quireꞌ tu cotor u siꞌpir cu yacsic mac,
mʌꞌ ju cꞌasquintic u bʌjiriꞌ u winquirir.
Chen a mac a cu man yejer xquic,
cax wa yejer xib,
cu yacsic u siꞌpir tu winquirir caj u rucꞌsaj u winquirir,
a raꞌ yʌnin u winquirir Cristo caj u tsꞌaj tiꞌ xquic u winquirir a nanij u man.
19 Biquinin mʌꞌ ja werex a winquirirex raꞌ u yatoch u Tajꞌor u Pixam Cꞌuj quir u cʌjtar toꞌonex.
Raꞌ tsꞌajaꞌan ten Cꞌuj toꞌonex,
rajen a techexoꞌ mʌꞌ ja yʌn tsꞌurintiquex a winquirirex,
quireꞌ mʌꞌ techex yʌnin a winquirirexiꞌ.
20 Yʌn cꞌaj techex Cꞌuj caj u boꞌot u boꞌorir ic siꞌpirex yejer a baꞌ jach coꞌoj.
Rajen cꞌujintex Cꞌuj ich a winquirirex,
bayiriꞌ yejer a pixamex xan.