Bic tabar mac cu chꞌic u mam wa ju racꞌ
7
Bajeꞌrer,
jeꞌ in waꞌaric techex a baꞌ caj a cꞌatex ten ich u juꞌunin a ta tsꞌibtex ten.
A tenoꞌ,
tin tꞌʌn,
tsoy wa xib mʌꞌ ju chꞌa u racꞌ.
2 Chen quireꞌ yaꞌab mac cu manob ta cajarex,
rajen jach manan tsoy wa jujuntur xib cu chꞌic u racꞌ,
baxuc xan,
wa jujuntur xquic u chꞌic u mam xan.
3 Arex tiꞌ,
a mac a tu chꞌaj u racꞌ,
caꞌ u bet a baꞌ u cꞌat tiꞌ u racꞌ,
baxuc xan,
arex xan tiꞌ a xquicoꞌ,
a tu chꞌaj u mamoꞌ caꞌ u bet a baꞌ u cꞌat tiꞌ u mam xanoꞌ.
4 A xquicoꞌ,
mʌꞌ ju yʌn maꞌquintic u bʌjiriꞌ u winquirir,
quireꞌ raꞌ u tsꞌurir u winquirir u mam.
Baxuc xan,
a mamoꞌ,
mʌꞌ ju yan maꞌquintic u winquirir quireꞌ raꞌ u tsꞌurir u winquirir u racꞌ.
5 Rajen mʌꞌ ja pacran maꞌquintic a winquirirex tiꞌ a bʌjiriꞌex.
Jariꞌ wa ta quetquint a worex soc tenten a pacran maꞌquintic a winquirirex quir a tꞌʌniquex Cꞌuj.
Tsoy wa baxucoꞌ,
chen barej caꞌ bin tsꞌocac a tꞌʌniquex Cꞌuj,
Caꞌ a pꞌʌtiquex a pacran maꞌquint a winquirirex.
Jaj ix tʌcoj,
jeꞌ u tumtaꞌr a worex ten quisin quireꞌ ca pacran maꞌquint a winquirirex.
6 A tenoꞌ,
caj in waꞌaraj techex tsoy wa mac cu chabʌr u chꞌic u racꞌ,
wa ju mam tsoy cu chabʌr u chꞌic u mam chen mʌꞌ jin waꞌaraj tiꞌ tu cotor mac u chꞌa u racꞌ wa ju mam.
7 An bic in jach cꞌat tu cotor xib caꞌ u cʌnen a tenoꞌ,
mʌꞌ jin raqꞌuintic xquic.
Chen a tenoꞌ,
in wer jujuntur caꞌ u betej a baꞌ tsꞌabij ten Cꞌuj tiꞌ,
caꞌ u betej.
Jujuntur u tirir tiꞌ.
U jer u tirir tiꞌ xan.
8 Bajeꞌrer,
quin waꞌaric tiꞌ a mac a mʌnaꞌ u racꞌ,
bayiriꞌ tiꞌ a mac a yʌn u mam uch,
chen quimij.
Arex tiꞌob tsoy wa cu pꞌatʌrob an bic ten.
9 Chen wa mʌꞌ u cꞌuchur u yor u mucꞌtej,
arex tiꞌob caꞌ u chꞌa u racꞌ wa ju mam.
Quireꞌ jach tsoy u chꞌic u racꞌ,
wa ju mam quireꞌ cu jach pachtej u chꞌa u racꞌ wa ju mam.
10 Bajeꞌrer,
quin waꞌaric tiꞌ a mac a ju chꞌajmʌnob u racꞌ wa ju mam.
A tenoꞌ,
quin waꞌaric wa ja xquicoꞌ a ju chꞌamʌnob u mamoꞌ.
Mʌꞌ ju yʌn pꞌʌtob u mam.
A tenoꞌ,
mʌꞌ jin waꞌarej,
u bʌjiriꞌ ic Jaj Tsꞌurirex caj u yaꞌaraj.
11 Wa jaj ix tʌcoj,
a xquicoꞌ caj u toc pꞌʌt u mam,
arex tiꞌ soc mʌꞌ ju yʌn mʌmintic u jer.
Jaj ix tʌcoj jeꞌ u wʌcꞌʌs bin ich u mam a tu pꞌʌtaj soc pꞌeriꞌ u yorob yejer u mam xan.
A ju mam xan,
mʌꞌ ju yʌn pꞌʌt u racꞌ.
12 Tiꞌ a mac a tꞌirij,
uꞌyex baꞌ quin waꞌaric techex.
A baꞌ quin bin in waꞌarej techex chen in bʌjiriꞌ in tꞌʌn,
a rayoꞌ mʌꞌ u camsmʌnen ic Jaj Tsꞌurirex aroꞌ toꞌonex.
Wa ja wet acsaꞌorirex u toc chꞌamʌn u racꞌ,
a mʌꞌ yacsmʌn tu yor tiꞌ Cristojoꞌ.
Wa quet yor u cʌjtar ich yicnʌn u mam.
Arex tiꞌ mʌꞌ ju yʌn pꞌʌtic u racꞌ.
13 Bayiriꞌ xan,
tiꞌ a xquicoꞌ,
a yacsmʌn tu yoroꞌ,
chen yʌn u mam a mʌꞌ yacsmʌn tu yor tiꞌ Cristojoꞌ.
Wa quet yor u mam u cʌjtar ich yicnʌn u racꞌ.
Arex tiꞌ a ray xquicoꞌ mʌꞌ ju yʌn pꞌʌtic u mam.
14 Quireꞌ a ju mamoꞌ,
a mʌꞌ yacsmʌn tu yor cu bin cꞌʌmbir ten Cꞌuj irej wa tsoy quireꞌ caj u raqꞌuintaj xquic a yacsmʌn tu yor tiꞌ Cristojoꞌ.
Bayiriꞌ xan,
a ju racꞌoꞌ,
a mʌꞌ yacsmʌn tu yor cu bin cꞌʌmbir ten Cꞌuj irej wa tsoy,
quireꞌ caj u mamintaj xib a yacsmʌn tu yor tiꞌ Cristojoꞌ.
Wa mʌꞌ baxucoꞌ,
robob u pararob,
irob u pararob a mʌꞌ yacsmʌnob tu yorob tiꞌ Cristo.
Chen bajeꞌrer,
jeꞌ u chꞌijirob quir u beticob tsoy u tꞌʌn tiꞌ Cꞌuj.
15 Jaj ix tʌcoj wa yʌn mac,
a mʌꞌ yacsmʌn tu yoroꞌ u cꞌat u pꞌʌtic u racꞌ,
wa ju mam a caj u yacsaj tu yoroꞌ,
tsireꞌej u pꞌʌtiqueꞌ.
Quireꞌ a baꞌ cu yubic tu yor a mac a mʌꞌ yacsmʌn tu yoroꞌ.
Arex tiꞌ a mac a yacsmʌn tu yoroꞌ,
cax xib,
cax xquic,
mʌꞌ ju yʌn suꞌsej u mam wa ju racꞌ,
quireꞌ Cꞌuj mʌꞌ ju cꞌat yiric mac cu jocꞌar yor.
16 Arex ten,
a techoꞌ xquic,
a caj a wacsaj ta wor bic tabar a wertic wa jeꞌ u yacsic tu yor a mam,
a mʌꞌ toy u yacsaj tu yor?
Mʌꞌ a wertic.
Baxuc tech,
a xiboꞌ a caj a wacsaj ta wor.
Bic tabar a wertic wa jeꞌ u yacsic tu yor a racꞌ,
a mʌꞌ toy u yacsaj tu yor?
Mʌꞌ a wertic xan.
Rajen chaꞌ u binob.
17 Chen jujunturechex,
caꞌ a betex a baꞌ u cꞌat Cꞌuj u betej.
An ten bic Cꞌuj u cꞌat jujuntur u betej caꞌ u betej,
rajen caꞌ ic toc betex.
Raꞌ quin chich aric tiꞌ tu cotor in wet acsaꞌorirob tu cu muchꞌquinticob u bʌj quir u yubicob u tꞌʌn Cꞌuj,
caꞌ u betob.
18 Jaj ix tʌcoj,
wa yʌn mac ber caj u yacsaj tu yor toc tsꞌiraꞌan u yotꞌer an ten bic nanij u tsꞌiricob u winiquirob judío,
arex tiꞌ mʌꞌ ju yʌn chꞌic suraquir tiꞌ,
quireꞌ toc tsꞌiraꞌan yotꞌer.
Jaj ix tʌcoj wa yʌn mac ber caj u yacsaj tu yor mʌꞌ tsꞌiraꞌan yotꞌer an ten bic nanij u tsꞌiraꞌan yotꞌer u winiquirob judío,
arex tiꞌ,
mʌꞌ ju yʌn chꞌic suraquir quireꞌ mʌꞌ u tsꞌirmʌnob u yotꞌer an ten bic nanij cu tsꞌiricob yotꞌer u winiquirob judío.
19 Cax tsꞌiraꞌan u yotꞌer an ten bic nanij u tsꞌiricob u yotꞌer u winiquirob judío,
mʌꞌ baꞌwir tiꞌ.
Cax mʌꞌ toy tsꞌiraꞌan u yotꞌer mac an ten bic nanij cu tsꞌiricob u yotꞌer u winiquirob judío,
mʌꞌ baꞌwir xan.
A baꞌ caꞌ ic betex quireꞌ jach manan tsoy,
caꞌ ic betex tu cotor a baꞌ u cꞌat Cꞌuj caꞌ ic betex.
20 Cax a baꞌ a beyajex uch,
ber mʌꞌ toy a wacsex ta worex tiꞌ Cristo,
tiriꞌ ca pꞌatʌrex.
21 Jaj ix tʌcoj wa ju cꞌurew mac caj u yacsaj tu yor,
rajen mʌꞌ ju cꞌuchur yor u bin tub u cꞌat,
mʌꞌ ju chen tucrej tiꞌ.
Chen wa cu cꞌuchur tu qꞌuinin u rucꞌur tu cꞌʌnaꞌan ten u tsꞌurir,
caꞌ u pꞌis u bʌj u rucꞌur caꞌ xic a tiꞌoꞌ.
22 Mʌꞌ ja wirej,
a mac a yacsmʌn tu yoroꞌ tiꞌ Cristo ic Jaj Tsꞌurirex,
cax wa rajiꞌ u cꞌurew mac,
rajen mʌꞌ cꞌuchaꞌan yor u bin tub u cꞌat,
jariꞌ a baꞌ u cꞌat u tsꞌurir.
Arex tiꞌ ʌcʌtan tu wich Cꞌuj,
toc chꞌabir.
Arex tiꞌ a mac a toc chꞌabir uch ber caj u yacsaj tu yor tiꞌ ic Jaj Tsꞌurirex.
A bajeꞌreraꞌ,
rajiꞌ u cꞌurew Cꞌuj.
23 Rajen,
ic Jaj Tsꞌurirex rajiꞌ cu yaꞌaric ic beyajex,
quireꞌ jach coꞌoj caj u boꞌotechex,
rajen mʌnaꞌ u jer mac cu yaꞌaric a beyajex.
24 Rajen in wet acsaꞌorirex,
cax a baꞌ u betic mac,
ber caj u yacsaj tu yor tiꞌ Cristo,
arex u pꞌatʌr tiꞌ taroꞌ.
Quireꞌ bajeꞌrer,
ic Jaj Tsꞌurirex tiꞌ yʌn quir u yamtaꞌrob a tiꞌoboꞌ.
Ajeraꞌ cu tsicbar tiꞌ a xquicoꞌ a mʌꞌ chꞌabir ten xib, bayiriꞌ tiꞌ xquic a mʌnaꞌ u mamoꞌ quireꞌ quimij
25 Bajeꞌrer,
bin in caꞌ in waꞌarej techex tiꞌ a xquicoꞌ,
a mʌꞌ chꞌajaꞌan ten xiboꞌ.
Quin waꞌaric tiꞌob baꞌ quin chen tucric.
A tenoꞌ,
tin tꞌʌn,
cax mʌꞌ yarman ten ic Jaj Tsꞌurirex a tenoꞌ.
Chen a tenoꞌ,
quin waꞌaric a baꞌ in wer,
quireꞌ in Jaj Tsꞌurir tu yajquinten quireꞌ yira otsirten.
Rajiꞌ yer raꞌ quin waꞌaric an ten bic u cꞌat.
26 Rajen,
quin waꞌaric,
jach tsoy mac cax cu pꞌatʌr an ten bic rajiꞌ bajeꞌrer,
cax wa yʌn u racꞌ,
cax wa mʌnaꞌ u racꞌ.
Quireꞌ jach tabar u tar ic mucꞌyajex a toꞌonexoꞌ,
a mac a yacsmʌnob tu yorob tiꞌ Cristo.
27 Rajen a mac a yʌn u racꞌ,
arex tiꞌ mʌꞌ ju yʌn pꞌʌtic.
Bayiriꞌ,
a mac a mʌnaꞌ u racꞌ,
arex tiꞌ,
mʌꞌ ju yʌn cʌxtic a racꞌ.
28 Chen wa xib cu chꞌic u racꞌ,
mʌꞌ ju pʌy u siꞌpir quireꞌ caj u chꞌaj.
Bayiriꞌ,
a xquicoꞌ,
wa mʌꞌ chꞌamaꞌan ten mac wa cu mamintic xib,
a rayoꞌ,
mʌꞌ ju pʌy u siꞌpir xan.
Quireꞌ quic mucꞌyajex a caꞌ bin tac toꞌonex,
a mac yʌn u racꞌ,
yejer a mac a yʌn u mam,
jach yaꞌab cu bin mucꞌyaj.
A raꞌ quin waꞌaric techexoꞌ,
soc in yamtic techex.
29 Rajen,
in wet acsaꞌorirex,
a tenoꞌ,
quin waꞌaric techex jeꞌ u tar tu qꞌuinin cu tar ic mucꞌyajex a toꞌonexoꞌ.
A mac a toc yʌn u racꞌ,
arex tiꞌ,
mʌꞌ ju chen tucric u racꞌ.
30 Quin waꞌaric tiꞌ a mac a tucur u caꞌ,
arex tiꞌ,
mʌꞌ ju chen tucric a baꞌ cu tucric.
Quin waꞌaric xan,
tiꞌ mac a quiꞌ yoroꞌ,
arex tiꞌ,
mʌꞌ ju chen tucric a baꞌ cu quiꞌquintic u yor.
Quin waꞌaric tiꞌ a mac a cu mʌnic baꞌ,
arex tiꞌ,
mʌꞌ ju chen tucric tiꞌ a baꞌ cu mʌnic.
31 Bayiriꞌ xan,
quin waꞌaric tiꞌ a mac a cu pachtic u ne tꞌajʌr u baꞌtac teꞌ ich yococab,
arex tiꞌ mʌꞌ ju chen tucric u baꞌtac.
Quireꞌ tu cotor a baꞌ quij quiriquex jeꞌ u rʌc chꞌejar biqꞌuiniꞌ.
32 Rajen,
a tenoꞌ,
in cꞌat techex wa mʌꞌ ja chaꞌbʌrex a bʌjiriꞌex a ca tucriquex tiꞌ a baꞌ tiꞌ yʌn ich yococab.
Mʌꞌ ja wirej,
a mac a mʌnaꞌ u racꞌ,
cu tucric Cꞌuj,
quireꞌ u cꞌat u quiꞌquintic yor Cꞌuj tu cu beyaj a tiꞌoꞌ.
33 Chen a mac a yʌn u racꞌ,
rajiꞌ cu tucric u racꞌ.
Bayiriꞌ xan,
bic tabar cu bin u quiꞌquintic u yor u racꞌ.
34 Baxuc a xquic xanoꞌ,
u tiriꞌ tiꞌ a xquic xanoꞌ u tiriꞌ u beyaj a xquicoꞌ,
a toc chaꞌan yejer a mʌꞌ chaꞌan a xquicoꞌ u beyaj a xquicoꞌ,
a toc chꞌaꞌan,
yejer a xquicoꞌ a mʌꞌ chꞌajaꞌaniꞌ.
Mʌꞌ ja wirej,
a xquicoꞌ a mʌꞌ chꞌaꞌan ten xib cu chen tucric bic tabar u quiꞌquintic yor Cꞌuj yejer tu cotor u pixam.
Chen a xquicoꞌ a chꞌaꞌan ten u mam,
cu chen tucric bic tabar a baꞌ caꞌ u betej baꞌ teꞌ ich yococab,
yejer an ten bic tabar u quiꞌquintic u yor u mam.
35 Aroꞌ quin waꞌaric techex,
quireꞌ in cꞌat in yamtiquechex.
A tenoꞌ,
mʌꞌ jin cꞌat in maꞌquic a berex.
Chen in cꞌat caꞌ a betex a baꞌ jach tsoyoꞌ.
Bayiriꞌ xan,
in cꞌat a quiꞌ sayʌrex tu pach Cꞌuj quir a cʌniquex u tꞌʌn,
mʌꞌ in cꞌat a chaꞌiquex u maꞌquintej a berex mac.
36 Chen u tetoꞌ,
cu chen tucric wa jach tsoy u parar xquic cu chꞌijir cax mʌꞌ ju mamintej xib,
arex tiꞌ caꞌ u betej a baꞌ u cꞌat u tet.
Bayiriꞌ xan,
wa ju chen cꞌat u yir u parar u mʌmintej xib,
arex u chaꞌbʌr u chꞌic u mam,
aroꞌ mʌꞌ u pʌy u siꞌpir.
37 Jaj ix tʌcoj wa ju tetoꞌ,
u bʌjiriꞌ aric,
mʌnaꞌ u jer arej tiꞌ,
chen jach taj ich u pixam caj u yaꞌaraj:
“Tsoy in parar xquic cu chꞌijir,
cax mʌꞌ u mamintic xib.”
Raꞌ jach tsoy xan,
mʌꞌ ju pʌy u siꞌpiriꞌ.
38 Rajen a mac a cu tsꞌic u parar xquic quir u mamintic xib,
tsoy caj u betaj.
Chen a mac a mʌꞌ ju cꞌat u tsꞌic u parar xquic quir u mamintic xib,
jach manan tsoy caj u betaj xan.
39 A xquicoꞌ,
a yʌn u mam,
caꞌ u pꞌatʌc ich yicnʌn u mam,
a mun qꞌuinin cuxaꞌan.
Wa ber caꞌ bin quimic u mam,
a ray u qꞌuininoꞌ,
cꞌuchaꞌan yor u mamintic u jer wa ju cꞌat.
Chen caꞌ u mʌmintej a mac a yacsmʌnob tu yorob tiꞌ Cristo.
40 Chen a tenoꞌ,
tin tꞌʌn,
jach manan quiꞌ yor a xquicoꞌ,
wa mʌꞌ ju chꞌa u jer u mam caj tsꞌoc u quimin u mam.
Wa ca waꞌariquex yʌn techex u Tajꞌor u Pixam Cꞌuj.
Baxuc a tenoꞌ yʌn ten u Tajꞌor u Pixam Cꞌuj a mac cu pʌyic in beroꞌ.