Bic tabar ic beyajex tiꞌ Cꞌuj
12
Rajen,
in wet acsaꞌorirex,
quireꞌ Cꞌuj caj u chꞌaj u yajquintechex,
rajen quin chich aric techex caꞌ a cꞌubex a wʌcꞌʌs bʌjiriꞌex tiꞌ Cꞌuj.
Mʌꞌ ja wirej,
wa baxuc a bʌjiriꞌex ca tsꞌiquex tiꞌ Cꞌuj,
a Cꞌuj yʌninoꞌ,
caꞌ a sijex tiꞌ Cꞌuj,
a baꞌ jach cuxaꞌan.
A baywoꞌ,
ca quiꞌquintiquex u yor Cꞌuj,
baxuc xan,
caj a cꞌujintex Cꞌuj yejer a pixamex.
2 Mʌꞌ a yʌn cʌniquex a bʌjex bayiriꞌ xan a mac a tiꞌ yʌn ich yocꞌocaboꞌ a cu manob tu siꞌpiroboꞌ.
Caꞌ tucrex Cꞌuj soc caꞌ manaquex ich a cuxtarex,
a ricꞌbenoꞌ,
soc Cꞌuj cu cꞌaxic a tucurex soc cꞌuchaꞌan a worex a werex a baꞌ u jach cꞌat Cꞌuj tiꞌ techex.
A baywoꞌ cꞌuchaꞌan a worex a quiꞌquintiquex u yor Cꞌuj.
3 Quireꞌ tsoy tu tꞌʌn Cꞌuj,
rajen tsꞌaꞌb in beyaj caꞌ in waꞌarej techex a baꞌ caꞌ a betex.
Rajen quin waꞌaric techex mʌꞌ tsoy a manex,
caꞌ a tucrex jach caremechex,
quireꞌ mʌꞌ jach caremechexiꞌ.
Chen tsoy wa ja bʌjiriꞌex ca tucriquechex an ten bic taj tiꞌ wʌcꞌʌs a bʌjiriꞌexeꞌ.
Wa yʌn baꞌ cꞌuchaꞌan a worex a betej a tsoyoꞌ,
quireꞌ a wacsmʌnex ta worex toc betej.
4-5 Mʌꞌ ja wirej,
a jic winquirirex chen tuririꞌ.
Yʌn toꞌonex ij cꞌʌbex,
yʌn toꞌonex ij coquex.
Jujunturob aroꞌ u tirir tiꞌ u beyaj ich ic winquirirex.
Baxuc yejeroꞌonex,
a tij cacsex tij corex.
Cax yʌn pimoꞌonex,
yejer a yacsmʌnob tu yorob tiꞌ Jesucristo,
chen pꞌeriꞌoꞌonex yejer Cristo,
an ten bic tuririꞌ ic winquirirex.
Bayiriꞌ xan,
jujunturoꞌonex yʌn ic beyajex quir ic betiquex.
6 Quireꞌ tsoy tu tꞌʌn Cꞌuj,
rajiꞌ caj u tsꞌaja jujunturoꞌonex ic beyajex soc cꞌuchaꞌan ij corex ic yamtiquex mac.
A mac tsꞌaꞌb u beyaj quir u tsecꞌtic u tꞌʌn Cꞌuj,
arej caꞌ u tsecꞌtej tiꞌ,
caꞌ u tsecꞌtej a baꞌ quij cacsiquex tij corex a tiꞌoꞌ.
7 Wa Cꞌuj caj u yaꞌaraj toꞌonex ic yamtex mac,
caꞌ manʌcoꞌonex ic yamtex mac.
Wa Cꞌuj caj u yaꞌaraj toꞌonex caꞌ ij camsex mac,
caꞌ ij camsex mac.
8 Wa Cꞌuj caj u yaꞌaraj toꞌonex caꞌ ic chich arex tiꞌ mac,
jeroj,
caꞌ manʌcoꞌonex ic chich arex mac.
Wa Cꞌuj caj u yaꞌaraj toꞌonex ic jʌsiquex a baꞌ yʌn toꞌonex,
caꞌ manʌcoꞌonex ic jʌsex soc mʌꞌ ju chen tucriquex tsoyex.
Chen jach tsꞌaj tiꞌob.
Wa Cꞌuj caj a yaꞌaraj toꞌonex ij cocarex caꞌ u jach tsꞌurir toꞌonex ij quet acsaꞌorirex,
caꞌ beyanʌcoꞌon tiꞌob.
Tsꞌajaꞌan ij corex ic beyajex tiꞌ ij quet acsaꞌorirex.
Wa Cꞌuj caj u yaꞌaraj toꞌonex ic yamtex mac a jach otsichʌjoꞌ.
Caꞌ ic yamtex tiꞌob,
quireꞌ quiꞌ ij corex ic yamtiquex tiꞌob.
Baꞌ caꞌ ic betex quireꞌ tij cacsex tij corex
9 Tsꞌajaꞌan a worex a yajquintiquex mac.
Pꞌactex a cꞌasoꞌ.
Pꞌʌtex a baꞌ cꞌasoꞌ,
chen manenex tu tsoyir.
10 Pacran yajquintiquex a bʌjex,
irej wa jach a bʌjex.
Wa mac caj u betaj a tsoyoꞌ.
Arex tiꞌ:
“Jach tsoy caj a betaj a techoꞌ.”
11 Chich beyanenex tiꞌ Cꞌuj,
cax a baꞌ cu tsꞌic techex a betiquex.
Tsꞌajaꞌan a worex a beyajex tiꞌ Cꞌuj.
12 Caꞌ quiꞌac a worex tiꞌ a baꞌ ca pajiquex.
Mʌꞌ ja suꞌsiquex a tꞌʌniquex Cꞌuj.
Mucꞌtex tu cu chuquicob a pachex.
13 Wa ber ca wiriquex a wet acsaꞌorirex,
yʌn baꞌ u cꞌat,
yamtex.
Quiꞌ acsex a mac a cu tar yirechex.
14 Tꞌʌnex Cꞌuj wa cu chuquic a pachex,
caꞌ yamtac ten Cꞌuj.
Mʌꞌ ja cꞌatiquex tiꞌ Cꞌuj caꞌ roꞌroꞌb tꞌʌntac a mac a caj u chuquic a pachex.
15 Quet quiꞌex a worex yejer a mac a quiꞌ yoroꞌ.
Bayiriꞌ xan,
quet a wocꞌarex yejer a mac ocar u caꞌ.
16 Periꞌquintex a tucurex yejer a wet acsaꞌorirex,
mʌꞌ ja tucrex wa jach caremechex,
mʌꞌ ja pꞌastiquex a wet acsaꞌorirex.
Periꞌquint a bʌjex yejer a mac otsichʌjij.
17 Cax mac cu cꞌasquintiquechex,
mʌꞌ ja pʌqꞌuiquex a bʌjex yejer.
Taj ca betiquex tu cotor baꞌ soc mʌnaꞌ mac cu bin u pʌqꞌuic a pachex.
18 Jach pꞌis a bʌjex a quetquintic a worex yejer tu cotor mac.
19 In wet acsaꞌorirex,
mʌꞌ ja yʌn pʌqꞌuic a bʌjex yejer mac.
Yʌn cꞌaj techex,
a Cꞌujoꞌ cu chen bin u tsꞌic u mucꞌyaj mac.
Quireꞌ tiꞌ tsꞌibaꞌan ich u tꞌʌn Cꞌuj tu cu yaꞌaric:
“A tenoꞌ,
quij Cꞌuj,
quin tsꞌic u mucꞌyaj mac.”
Baxuc caj yaꞌaraj Cꞌuj uch.
20 Yʌn cꞌaj techex xan,
tiꞌ tsꞌibaꞌan ich u tꞌʌn Cꞌuj tu cu yaꞌaric:
“Wa tiꞌ yʌn mac a cu pꞌactiquechex,
chen cu quimin yejer wiꞌij,
jansex a tiꞌoꞌ.
Wa ucꞌchʌjij,
tsꞌajex yucꞌur.
Wa baxuc ca betiquex,
pachir a mac a cu pꞌactiquechex cu bin u chꞌic suraquir.”
21 Mʌꞌ ja chaꞌiquex yacsic a siꞌpirex,
a mac a cu manob tu cꞌasir.
Toc betex tiꞌob a tsoyoꞌ,
a baywoꞌ cꞌuchaꞌan a worex tiꞌ a quisinoꞌ.