A mac toc ten Cꞌuj ich u winiquirob israel
11
Soc mʌꞌ ja yʌn tucriquex wa Cꞌuj caj u toc rʌc pꞌʌtaj u winiquirob israel irechexen.
A tenoꞌ,
u winiquiren israel.
A tenoꞌ,
u pararen in nunquir Abraham xan.
A tenoꞌ in woꞌnen Benjamín.
Rajen quin waꞌaric mʌꞌ pꞌʌtaꞌan ten Cꞌuj u winiquirob israel.
2 Mʌꞌ ja wirej,
a Cꞌujoꞌ,
caj u tetaj u winiquirob israel tu chꞌic chunin soc Cꞌuj yʌninob u winiquirob israel.
Rajen mʌꞌ rʌc pꞌat ten Cꞌuj u winiquirob israel.
Mʌꞌ wa cꞌaj techex a baꞌ caj u yaꞌaraj ich u tꞌʌn Cꞌuj uch,
a tsꞌaꞌb u tucur ten Cꞌuj soc u tsicbar a baꞌ u cꞌat Cꞌuj.
Rajiꞌ Elías,
caj yaꞌaraj tiꞌ Cꞌuj tu cu taꞌquic u joꞌr u yet winiquirob israel.
Caj yaꞌaraj:
3 “In Jaj Tsꞌurirech,
quij Elías,
a mac a nanij u tsecꞌticob a tꞌʌn a techoꞌ,
toc quinsaꞌb ten in wet winiquirob israel.
Robob xan,
caj u rʌc jubsob tu nanij u chaquinticob yʌrʌcꞌ quir u quinsaꞌrob quir u tsꞌic tech.
Jariꞌ ten pꞌat,
mʌnaꞌ u jer.
Baxuc xan,
cu cʌxtiquenob u quinsenob xan.”
Baxuc caj u yaꞌaraj Elías uch.
4 Chen Cꞌuj caj u yaꞌaraj tiꞌ Elías soc yubic:
“Mʌꞌ ju jacꞌʌr a wor Elías,
quireꞌ tiꞌ yʌn siete mil xib ich a wet winiquirob israel a caj in tetajoꞌ mʌꞌ ju xonrajob ʌcʌtan tus cꞌujiꞌ,
a pʌchaꞌan u cꞌabaꞌ Baal.”
Baxuc caj araꞌb ten Cꞌuj tiꞌ Elías uch.
5 Baxuc bajeꞌrer xan,
tiꞌ toy yʌn mac ich u winiquirob israel a tetaꞌb ten Cꞌuj,
quireꞌ tsoy tu tꞌʌn Cꞌuj.
Chen tiꞌ yʌn yaꞌab a tetaꞌb ten Cꞌuj.
6 Rajen caj tocob u winiquirob israel.
Chen mʌꞌ tocob u winiquirob israel,
quireꞌ u bʌjiriꞌob u beyajob.
Quireꞌ mʌꞌ tetaꞌb ten Cꞌuj,
quireꞌ u bʌjiriꞌob u beyajob.
Wa baxucoꞌ,
mʌꞌ ju tocar ten Cꞌuj quireꞌ tsoy tu tꞌʌn Cꞌuj.
7 Rajen,
quiꞌ uꞌyex baꞌ quin waꞌaric techex.
Ir a wirex u winiquirob israel,
mʌꞌ ju yirob bic tabar u rucꞌsicob u siꞌpirob ʌcʌtan u wich Cꞌuj.
Cax caj u quiꞌ cʌxtobiꞌ.
Chen mʌꞌ yaꞌabiꞌ,
caj u yirob bic tabar u rucꞌsicob u siꞌpirob ʌcʌtan u wich Cꞌuj,
chen robob a mac a tetaꞌb ten Cꞌuj caj u yirobiꞌ.
Barej u jerob,
a mun pꞌat ich u winiquirob israel caj chichij u joꞌrob ten Cꞌuj soc mʌꞌ cꞌuchaꞌan yorob u yacsicob tu yorob.
8 Mʌꞌ ja wirej,
chichij u joꞌrob u winiquirob israel,
soc u nupꞌur u tꞌʌn Cꞌuj tu cu yaꞌaric a mac tsꞌaꞌb u tucur ten Cꞌuj uch,
soc u tsicbar a baꞌ u cꞌat Cꞌuj.
Rajiꞌ caj u yaꞌaraj:
“Cꞌuj chichquintej u joꞌrob,
soc cax cu bin u xacob a baꞌ tsꞌibaꞌan ich u tꞌʌn Cꞌuj,
mʌꞌ ju bin u najtob.
Cꞌuj chichquintej u joꞌrob soc cax yubob u tsecꞌticob u tꞌʌn Cꞌuj,
mʌꞌ ju bin u yacsob yorob.”
U beriꞌ bajeꞌrer.
9 Quet bayiriꞌ caj u tsecꞌtaj David,
a uchoꞌ,
caj u yaꞌaraj:
Tu cotor u qꞌuinin tu cu quiꞌquiꞌ janʌnob u winiquirob israel quir u cꞌujinticob Cꞌuj,
ʌcʌtan u wich Cꞌuj,
jot,
quij.
Mʌꞌ tu cu bin putsꞌurob tu cu bin tsꞌabʌr u mucꞌyaj ten Cꞌuj tiꞌob.
Jeꞌ u tar tu qꞌuinin a mʌꞌ ju tucrob u taroꞌ.
10 Tu yorob u winiquirob israel,
mʌꞌ ju bin u najtob a baꞌ u berob tiꞌ.
Mʌꞌ ja wirej,
jeꞌ u tsꞌabʌr u mucꞌyaj munt qꞌuin,
aroꞌ irej wa mac jach pꞌux u pach,
quireꞌ yʌn u cuch,
quireꞌ jach ar u cuch.
Baxuc caj u yaꞌaraj David uch.
Caj yiraj bic tabarob u tocar ten Cꞌuj a mʌꞌ ju winiquirob israel
11 Tin tꞌʌn,
yʌn mac cu bin u tus tucrej tu yor tiꞌ u winiquirob israel:
“Robob chichquintaꞌb u joꞌrob ten Cꞌuj soc munt qꞌuin cu bin satʌrob.”
A mac a ju bʌjiriꞌ,
cu tus tucric tu yor,
a baxucoꞌ mʌꞌ tajiꞌ,
quij.
Mʌꞌ ja wirej,
u winiquirob israel tu cu manob tu cꞌasir,
caj u pꞌuspachob Cꞌuj.
Rajen cꞌuchij tu qꞌuinin soc u jer winiquirob,
a mʌꞌ ju winiquirob israel quir u tocar ten Cꞌuj.
Rajen cu bin qꞌuextar u yorob u winiquirob israel caꞌ bin yirob u jer tan u tocꞌar ten Cꞌuj.
Jeroj,
cu bin u pachtob u yacsicob tu yorob tiꞌ Cristo xan.
12 Mʌꞌ ja wirej,
u winiquirob israel caj u yacsob u siꞌpirob quireꞌ tu pꞌuspachtob Cꞌuj,
rajen tu cotor mac a cuxaꞌanob ich yocꞌocab bajeꞌrer cꞌuchaꞌan yor u tocarob ten Cꞌuj.
Rajen cꞌuchaꞌan yor a mʌꞌ ju winiquirob israel u tocarob ten Cꞌuj quireꞌ u winiquirob israel mʌꞌ ju yacsmʌnob tu yorob.
Caꞌ bin cꞌuchuc tu qꞌuinin u winiquirob israel bin u caꞌ yacsob tu yorob,
a raꞌ u qꞌuininoꞌ,
jach manan quic bin yamtaꞌbirex ten Cꞌuj.
Mun caj u yajquintoꞌonex Cꞌuj,
cax u winiquirob israel mʌꞌ toy u yacsob tu yorob tiꞌ Cristo.
13 A tenoꞌ Pablojen,
quin tsicbar techex a mʌꞌ ju winiquirob israel.
Mʌꞌ ja wirej,
caj u teten Cꞌuj quir in beyaj techex.
Rajen in wer jach carem in beyaj caj u tsꞌaj ten Cꞌuj.
14 Mʌꞌ ja wirej,
wa jin wer jach carem in beyaj caj u tsꞌaj ten Cꞌuj.
Tin tꞌʌn,
in wet winiquirob israel bin u caꞌ u pachtob tu yorob caꞌ beyanʌc Cꞌuj tu yorob an ten bic caj beyanʌjij ta worex techex uch,
wa jix tʌcoj bin u caꞌ yacsob tu yorob tiꞌ Cristo,
cax mʌꞌ yaꞌab.
15 A tenoꞌ,
quin jach pachtic in wirej in wet winiquirob israel caꞌ yacsob tu yorob tiꞌ Cristo.
Mʌꞌ ja wirej,
a Cꞌujoꞌ,
caj u masaj u winiquirob israel,
rajen bajeꞌrer cꞌuchaꞌan a worex a wacsiquex ta worex tiꞌ Cristo,
soc u taquiquechex cax mʌꞌ ju winiquirex israel.
A wer baꞌ u ber caꞌ bin cꞌuchuc tu qꞌuinin,
u winiquirob israel bin u caꞌ yacsob tu yorob?
Tin tꞌʌn,
a raꞌ u qꞌuininoꞌ,
irob u winiquirob israel an ten bic mac caj wʌcꞌʌs ricꞌsaꞌb ich u quimirir quir u caꞌ cuxtarob.
16 Mʌꞌ ja wirej,
a mac caj u yʌn acsob tu yorob,
tʌcʌ robob u winiquirob israel.
Rajen,
ij querex a Cꞌujoꞌ mʌꞌ ju masob u winiquirob israel munt qꞌuiniꞌ.
Uꞌyex baꞌ cu camsicoꞌonex a cheꞌoꞌ.
Wa ju mos cheꞌ rajiꞌ yʌnin Cꞌuj,
baxuc xan u cꞌʌbir cheꞌ,
Cꞌuj yʌnin xan.
17 Mʌꞌ ja wirej,
robob u winiquirob israel,
irob u cꞌʌbir cheꞌ,
a tiꞌ yʌn u cheꞌer olivo.
Tiꞌ yʌn mʌꞌ yaꞌabiꞌ ich u winiquirob israel caj rucꞌsaꞌb tiꞌ u jach cheꞌer,
quireꞌ mʌꞌ ju yacsob tu yorob.
Rajen,
a techexoꞌ,
a mʌꞌ ju winiquirechex israel,
cax u jer u cꞌʌbirechex cheꞌ.
A uchoꞌ,
ich cꞌax yʌnechex uch.
Jeroj,
caj u tʌqꞌuechex ich u jach cheꞌer olivo soc a wuqꞌuiquex u yits ich u cheꞌer olivo.
Mʌꞌ ja wirej,
a techexoꞌ,
u cꞌʌbirechex cheꞌ taqꞌuechex yejer u jer u cꞌʌbir ich u jach cheꞌer olivo.
Rajen ca wuqꞌuiquex u yits u mos u cheꞌer olivo.
18 Cax robob u winiquirob israel rucꞌsaꞌb soc caꞌ tacꞌʌquechex ich u jach cheꞌer olivo.
Mʌꞌ ja yʌn tucriquex wa jach caremechex.
Chen cꞌaj techex u cꞌʌbir a cheꞌoꞌ,
mʌꞌ raꞌ cuxriqꞌuij u cheꞌer.
Chen u mos a cheꞌoꞌ rajiꞌ quir u jach cuxtar.
19 A tenoꞌ,
in wer cꞌuchaꞌan a worex a waꞌarex:
“Cax u winiquirob israel irob u jach cꞌʌbir u cheꞌer olivo.”
Tin tꞌʌn,
ca bin a waꞌariquex ten:
“Jach tsoyenob,”
quireꞌ robob u winiquirob israel caj curchꞌacob ten Cꞌuj soc in tacꞌʌrob ich u cheꞌer olivo.
20 Jach taj,
robob cuchꞌacob,
quireꞌ mʌꞌ ju yacsob tu yorob,
rajen tʌcꞌbirechex ich u cheꞌer olivo,
quireꞌ caj a wacsex ta worex.
Chen quin chich aric techex,
mʌꞌ ja waꞌariquex wa jach caremechex,
chen jach sʌjtex Cꞌuj.
21 Mʌꞌ ja wirej,
wa Cꞌuj caj u cuchꞌʌtaj u cꞌʌbir ich u jach cheꞌer olivo,
quireꞌ robob mʌꞌ ju yacsob tu yorob,
jeꞌ u curchꞌʌtiquechex xan,
wa mʌꞌ ja wacsex ta worex xan,
quij.
22 Ir a wirex,
bic tabar a mʌꞌ ju yajoꞌonex Cꞌuj.
Baxuc xan,
ir a wirex,
bic tabar u jach tsꞌaꞌbʌr u mucꞌyaj ten Cꞌuj mac.
Jach taj tsꞌaꞌb u mucꞌyaj ten Cꞌuj tiꞌ u winiquirob israel,
quireꞌ caj u yacsob u siꞌpirob uch.
Chen Cꞌuj,
jeꞌ u quiꞌ yajquintic techex wa ca pꞌatarex ich yicnʌn Cꞌuj.
Chen wa ca pꞌʌtiquex a wacsiquex ta worex,
jeꞌ u curchꞌʌtiquechex irechex u cꞌʌbir cheꞌ quir u purur ich cꞌacꞌ.
23 Mʌꞌ ja wirej,
wa ju winiquirob israel cu rʌc cꞌaxicob tu yorob quir u yacsicob tu yorob tiꞌ Cristo,
cꞌuchaꞌan yor Cꞌuj u wʌcꞌʌs tʌqꞌuej ich u cheꞌer tu curchꞌacob uch.
24 A techexoꞌ,
a mʌꞌ ju winiquirechex israel irechex u cꞌʌbir u cheꞌer olivo,
a cꞌax yʌnoꞌ.
Caj curchꞌac u cꞌʌbir soc u tacꞌʌrechex ich u jach cheꞌer olivo.
Cax a baywoꞌ,
mʌꞌ nanij u tacꞌʌr u cꞌʌbir u cheꞌer ich cꞌaxir olivo.
Rajen quin waꞌaric techex,
a Cꞌujoꞌ,
jach manan cꞌuchaꞌan yor u wʌcꞌʌs tacꞌʌr u winiquirob israel tu yʌnob uch,
quireꞌ robob u jach cꞌʌbir u cheꞌer olivo.
Mʌꞌ ja wirej,
jeꞌ u cꞌuchur tu qꞌuinin cu bin u wʌcꞌʌs tacꞌʌrob ten Cꞌuj ich u jach cheꞌer olivo.
A Cꞌujoꞌ bin u caꞌ u yajquintej tu cotor mac
25 A techexoꞌ,
in wet acsaꞌorex,
in cꞌat a werex a baꞌ mʌꞌ yer mac uch,
chen Cꞌuj yer.
Quin waꞌaric techex aroꞌ soc mʌꞌ ja tucriquex jach noꞌjechex.
Yʌn ich u winiquirob israel jach chichij u joꞌrob,
quireꞌ mʌꞌ ju najtob a baꞌ u jach cꞌat Cꞌuj tiꞌob.
Mʌꞌ ju bin u najtob a baꞌ u cꞌat Cꞌuj tiꞌob hasta yaꞌab winic,
a mʌꞌ ju winiquirob israel,
caj tsꞌoc u yacsicob tu yorob tiꞌ Cristo.
26 Caꞌ bin tsꞌocac u yacsicob tu yorob,
a mac a mʌꞌ ju winiquirob israel,
jeroj tu cotor u winiquirob israel jeꞌ u tocar ten Cꞌuj,
quireꞌ baxuc caj u yaꞌaraj a mac a tsꞌaꞌb u tucur ten Cꞌuj soc u tsicbar a baꞌ u cꞌat Cꞌuj uch.
Uꞌyex baꞌ caj u yaꞌaraj:
Jeꞌ u tar mac ich u cajar Sión,
a cu bin u taquic u winiquirob.
Rajiꞌ bin u caꞌ rucꞌsaꞌbir u siꞌpirob u winiquirob israel,
quireꞌ robob u pararob Jacob.
27 Jeꞌ in rʌc jawsic u siꞌpirob u winiquirob israel.
A raꞌ u qꞌuininoꞌ xan,
jeꞌ in nupꞌsic a baꞌ caj in toc araj tiꞌ a nunquirex.
Baxuc caj u tsꞌibtaj a mac tsꞌaꞌb u tucur ten Cꞌuj quir u tsicbar a baꞌ u cꞌat Cꞌuj uch.
28 Yʌn ich u winiquirob israel caj u choquintob u yor Cꞌuj,
quireꞌ robob mʌꞌ yacsmʌnob tu yorob tiꞌ Cristo.
Rajen,
cꞌuchaꞌan a worex a techexoꞌ,
a mʌꞌ ju winiquirechex israel quir a wacsiquex ta worex tiꞌ Cristo.
Chen yʌn cꞌʌꞌotex Cꞌuj caj u batꞌan tetaj u winiquirob israel soc robob yʌninob Cꞌuj uch.
Mʌꞌ ja wirej,
Cꞌuj u jach yaj u winiquirob israel,
quireꞌ a baꞌ caj u toc araj u nunquirob uch.
29 Mʌꞌ ja wirej,
Cꞌuj mʌꞌ u cꞌax u tucur.
A baꞌ cu tsꞌic Cꞌuj tiꞌ mac,
mʌꞌ ju caꞌ tocar tiꞌ,
mʌꞌ ju pꞌʌtʌr a mac a toc tetaꞌb xan.
30-31 Baxuc a techexoꞌ,
a mʌꞌ ju winiquirechex israel a uchoꞌ,
mʌꞌ ta quibex Cristo.
Chen bajeꞌrer Cꞌuj,
caj u yajquintechex,
quireꞌ u winiquirob israel mʌꞌ ju quibob Cristo.
Baxuc xan,
yejer u winiquirob israel,
bajeꞌrer mʌꞌ ju yacsob tu yorob tiꞌ Cristo,
rajen an ten bic Cꞌuj caj u yajquintechex baxuc xan,
yejer u winiquirob israel,
pachir cu bin yajquinbir a tiꞌoboꞌ.
32 Mʌꞌ ja wirej,
Cꞌuj caj u tac u joꞌr tu cotor mac,
quireꞌ yʌn u siꞌpirob,
rajen cꞌuchaꞌan yor u chaꞌbʌr yajquinbir tu cotor mac cax maquiꞌ.
33 Jach manan noꞌj a Cꞌujoꞌ,
baxuc xan,
Cꞌuj yer tu cotor baꞌ,
jach manan yer a baꞌ tu cotor.
A toꞌonexoꞌ,
mʌꞌ jij querex bic tabar Cꞌuj caj u tucraj baꞌ a cu bin tar soc u jach tar.
Mʌꞌ cꞌuchaꞌan ij corex ic najtex baꞌ u cꞌat Cꞌuj.
34 Baxuc tiꞌ tsꞌibaꞌan ich u tꞌʌn Cꞌuj uch:
Mʌꞌ ja wirej,
mʌnaꞌ mac yer baꞌ cu tucric Cꞌuj,
bayiriꞌ xan,
mʌnaꞌ mac camsʌmʌnin,
a Cꞌujoꞌ,
u toc er tu cotor baꞌ.
35 Mʌnaꞌ mac pʌyber cu yʌn tsꞌic baꞌ tiꞌ Cꞌuj.
Rajen pachir caj u yaꞌaraj quireꞌ caj u tsꞌaja baꞌ tiꞌ Cꞌuj,
jeroj Cꞌuj caꞌ bin u sut u boꞌorir xan.
36 A Cꞌujoꞌ,
caj u betaj tu cotor baꞌ.
Tu cotor a baꞌ tiꞌ yʌn quireꞌ rajiꞌ u mucꞌ Cꞌuj.
U bʌjiriꞌ Cꞌuj cu tsꞌurintaꞌr ten tu cotor baꞌ.
U bʌjiriꞌ Cꞌuj yʌnin tu cotor baꞌ,
rajen caꞌ ij quiꞌ tꞌʌnex Cꞌuj:
“Jach caremech Cꞌuj,
munt qꞌuin jach caremech.”
Jeroj.