10
A werex,
in wet acsaꞌorirex,
a baꞌ in jach cꞌat?
Jach manan in cꞌat in wiric in wet winiquirob israel cu rʌc acsiquicob tu yorob tiꞌ Cristo soc u bin tacbirob.
Baxuc caj in cꞌataj tiꞌ Cꞌuj tu quin tꞌʌnic.
2 Mʌꞌ ja wirej,
robob cu jach pꞌisicob u bʌjob quir u beticob a baꞌ u cꞌat Cꞌuj,
chen mʌꞌ ju quiꞌ najtob a baꞌ u cꞌat Cꞌuj.
3 Robob u winiquirob israel,
mʌꞌ ju cꞌat u tsꞌic u yorob tiꞌ Cristo soc u bʌjiriꞌ Cꞌuj cu rucꞌsic u siꞌpirob.
Mʌꞌ ja wirej,
u winiquirob israel,
u bʌjiriꞌob u cꞌat u rucꞌsic u siꞌpirob,
rajen,
mʌꞌ cꞌuchaꞌan yor u beticob a baꞌ araꞌb tiꞌob ten Cꞌuj.
4 Quireꞌ tu cotor mac a yacsmʌnob tu yorob tiꞌ Cristo,
caj u yirob mʌꞌ cꞌuchaꞌan yorob u rucꞌsicob u siꞌpirob yejer a baꞌ tsꞌibtaꞌb ten Moisés uch,
cax cu quibicob.
Mʌꞌ ja wirej,
tu chen rucꞌsaꞌrob u siꞌpirob quireꞌ caj u yacsob tu yorob tiꞌ Cristo.
5 A uchoꞌ Moisés,
a raꞌ cu beyaj tiꞌ Cꞌuj caj u tsꞌibtaj,
caj tsicbanʌjij tiꞌ a mac a cu tucric,
jeꞌ u rucꞌsaꞌrob u siꞌpirob wa cu chen beticob a baꞌ caj u yaꞌaraj u tꞌʌn.
Uꞌyex baꞌ caj u yaꞌaraj Moisés uch:
“Wa jix tiꞌ mac jeꞌ u toc rʌc betic a cu yaꞌaric ich u tꞌʌn Cꞌuj,
jeroj jeꞌ u cuxtar munt qꞌuin.”
Baxuc caj yaꞌaraj Moisés uch.
6 Chen cu yaꞌaric ich u tꞌʌn Cꞌuj bic tabar cu bin u rucꞌsic u siꞌpir a mac a cu yacsic tu yor tiꞌ Cristo,
quireꞌ cu yaꞌaric ich a tsꞌibaꞌan u tꞌʌn Cꞌuj,
tan yaꞌaric:
“Mʌꞌ ju chen aꞌaric bic tabar mac cu bin ich caꞌanan quir u pʌyic Cristo caꞌ tac ich yocꞌocab quir u yamticoꞌonex.”
7 Baxuc xan,
mʌꞌ ja yʌn tucric:
“Mac cu yʌn bin u ricꞌsic Cristo tiꞌ u quimirir?”
8 A bajeꞌrer,
mʌꞌ baꞌwir a ca cʌxtiquex a jeꞌ tꞌʌnaꞌ bic tabar u rucꞌsaꞌr u siꞌpir mac,
quireꞌ tiꞌ tsꞌibaꞌan ich u tꞌʌn Cꞌuj tu cu yaꞌaric:
“A jeꞌ tꞌʌnaꞌ bajeꞌrer,
jach bʌytʌc tu yʌnech.
A bajeꞌrer,
ca tsicbar a jeꞌ tꞌʌnaꞌ,
a tiꞌ yʌn ta pixam xan.”
Mʌꞌ ja wirej,
a jeꞌ tꞌʌnaꞌ a quin tsicbar,
raꞌ u tꞌʌn caj in waꞌaraj techex,
caꞌ a yʌn acsex ta worex tiꞌ Cristo.
9 Mʌꞌ ja wirej,
soc u taquiquechex Cꞌuj caꞌ a wacsex ta worex ta pixamex wa Jesucristo ic Jaj Tsꞌurirex.
Caꞌ a wacsex ta worex ta pixamex wa ricꞌsaꞌb Jesús ich u quimirir.
Caꞌ a waꞌarex,
rajiꞌ a Jaj Tsurirex ca cꞌʌmiquex.
10 Quireꞌ a mac a caj u yacsaj tu yor tiꞌ,
jeꞌ u rucꞌsaꞌr u siꞌpir ten Cꞌuj.
Wa ber quij cariquex tiꞌ mac wa tij cacsex tij corex tiꞌ ic Jaj Tsꞌurirex Jesucristo,
jeroj,
caj u tacoꞌonex.
11 Mʌꞌ ja wirej,
tiꞌ tsꞌibaꞌan ich u tꞌʌn Cꞌuj,
tan yaꞌaric:
“A mac a cu yacsic tu yor tiꞌ Jaj Tsꞌur,
pachir jeꞌ u yiric wa tu cotor baꞌ a cu pajic uch,
bajeꞌrer jach taj.”
12 Ʌcʌtan tu wich Cꞌuj,
quet cu yiricoꞌonex,
cax u winiquirob israel,
cax mʌꞌ ju winiquirob israel.
Jariꞌ rajiꞌ quic tsꞌurintiquex,
rajiꞌ Cꞌuj.
Rajen,
jach manan cu yajquintic tu cotor mac a cu cꞌujinticob jach Cꞌuj,
a mac a cu cꞌatic u tocaꞌr ten Cꞌuj.
13 Quireꞌ tiꞌ tsꞌibaꞌan baxuc a jeraꞌ:
“Tu cotor a mac a cu cꞌatic tiꞌ Jaj Tsꞌur quir u tocaꞌr,
jeꞌ u tocaꞌr ten Jaj Tsꞌur.”
14 Chen wa yʌn mac a mʌꞌ toy yacsej tu yor tiꞌ Cristo.
Bic tabar u cꞌuchur yor u cꞌatej?
Bic tabar u cꞌuchur yor u yacsic tu yor wa mʌꞌ yubmʌn Cristo soc u yacsic tu yor tiꞌ?
Bic tabar cu bin yubic wa mʌnaꞌ mac tuchiꞌtaꞌb quir u tsicbar tiꞌ u tꞌʌn Cꞌuj?
15 Bayiriꞌ xan wa Cꞌuj mʌꞌ ju tuchiꞌtej mac quir u tsecꞌtic tiꞌ u tꞌʌn Cꞌuj,
jeroj mʌnaꞌ mac cu bin u tsecꞌtic tiꞌ u tꞌʌn Cꞌuj.
Uꞌyex baꞌ caj u yaꞌaraj a mac a tsꞌaꞌb u tucur ten Cꞌuj soc u tsicbar a baꞌ u cꞌat Cꞌuj uch.
Rajiꞌ caj u tsꞌibtaj:
“Jach manan tsoy wa cu cꞌuchur mac quir u tsecꞌtic toꞌonex u jach tsoyir u tꞌʌn Cꞌuj.”
Baxuc caj u tsꞌibtaj uch.
16 Chen cax caj u yubob u jach tsoyir u tꞌʌn Cꞌuj,
tu cotor mac mʌꞌ ju cꞌʌmobiꞌ.
Rajen a mac a tsꞌaꞌb u tucur ten Cꞌuj soc u tsicbar a baꞌ u cꞌat Cꞌuj uch,
rajiꞌ caj u tsꞌibtaj,
tan yaꞌaric:
“Biquinin Jaj Tsꞌur,
chen mʌꞌ yaꞌab caj u yacsob tu yorob?”
Baxuc caj u yaꞌaraj a tsꞌaꞌb u tucur ten Cꞌuj,
u cꞌabaꞌ Isaías.
17 Rajen caꞌ u yubob u tꞌʌn Cꞌuj mac soc cꞌuchaꞌan yorob u yacsicob tu yorob tiꞌ Cꞌuj.
Rajen caꞌ xic mac quir u tsicbʌtic tiꞌ u tꞌʌn Cꞌuj soc u yerob Cristo.
18 Chen u winiquirob israel mʌꞌ ju yacsob tu yorob.
Jaj ix tʌcoj,
wa mʌꞌ ju yubob a jeꞌ u tꞌʌn Cꞌuj.
A tenoꞌ,
quin waꞌaric u toc uwimʌnobiꞌ quireꞌ cu yaꞌaric ich u tꞌʌn Cꞌuj tu cu yaꞌaric:
A mac a tsꞌaꞌb u tucur ten Cꞌuj quir u tsicbarob a baꞌ u cꞌat Cꞌuj caj binob ich tu cotor mac quir u tsicbarob.
Rajen u tꞌʌnob caj jumbintaꞌb ten mac ich tu cotor mac ich yocꞌocab.
19 Wa ju yubmʌnob,
jaj ix tʌcoj mʌꞌ ju najtobiꞌ.
Chen caj u najtob,
quireꞌ a mac a mʌꞌ ju winiquirob israel caj u najtob quireꞌ an ten bic caj yaꞌaraj ich u tꞌʌn Cꞌuj:
A tenoꞌ,
quij Cꞌuj,
bin in caꞌ in taquic u jer mac,
a mʌꞌ ju winiquirob israel,
rajen a techexoꞌ,
u winiquirechex israel,
bin u caꞌ qꞌuextar a worex.
A tenoꞌ,
quij Cꞌuj,
bin in caꞌ taquej u jer mac,
a mʌꞌ ju winiquirob israel,
rajen bin a caꞌ tsꞌictarex.
Baxuc caj yaꞌaraj a tsꞌaꞌb u tucur ten Cꞌuj uch soc u tsicbar a baꞌ u cꞌat Cꞌuj.
Rajiꞌ u cꞌabaꞌ Moisés.
20 Baxuc caj u yaꞌaraj a tsꞌaꞌb u tucur ten Cꞌuj uch,
soc u tsicbar a baꞌ u cꞌat Cꞌuj.
Rajiꞌ u cꞌabaꞌ Isaías.
Mʌꞌ ju chꞌaj sajquir quir u yaꞌaric,
rajen caj u yaꞌaraj tiꞌ u yet winiquirob israel:
Uꞌyex baꞌ cu yaꞌaric Cꞌuj.
A mac a mʌꞌ ju cʌxtenob,
robob caj u yirenob uch.
Cax mʌꞌ yerenob,
robob caj in wesaj in bʌj tiꞌob.
Baxuc caj u tsꞌibtaj Isaías uch.
21 Caj yaꞌaraj Isaías uch tiꞌ u yet winiquirob israel uch,
caj u yaꞌaraj:
“Rajraꞌ quin pʌyic mac a mʌꞌ tan u quibicob in tꞌʌn quir u tar soc in cꞌʌmic.
Chen mʌꞌ ju tar u cꞌaxic yor quireꞌ chich u joꞌr.”
Baxuc caj araꞌb ten Cꞌuj tiꞌ u winiquirob israel.