Tetaꞌb u winiquirob israel ten Cꞌuj
9
A tenoꞌ,
caj in wacsaj tin wor tiꞌ Cristo,
rajen taj quin waꞌaric techex.
Mʌꞌ tus in caꞌ.
Bayiriꞌ xan,
acaꞌan u Tajꞌor u Pixam Cꞌuj tin pixam,
rajen in wer taj a baꞌ quin waꞌariqueꞌ.
2 Jach manan quin tucric in wet winiquirob israel.
3 Quireꞌ jach manan quin tucric in wet winiquirob israel,
a mac in bʌjob,
quij Pablo.
Rajen a tenoꞌ,
jeꞌ in chaꞌic Jesús u puriquen ich cꞌacꞌ,
soc mʌꞌ ju binob in wet winiquirob israel ich cꞌacꞌ,
wa cu chen bin quiꞌ acsaꞌbir ten Cꞌuj ich caꞌanan,
chen mʌꞌ cꞌuchaꞌan in wor tiꞌ.
4 Mʌꞌ ja wirej,
a Cꞌujoꞌ,
caj u tetaj a tenob u winiquirenob israel quireꞌ u pararenob Cꞌuj.
Robob caj yirob u jach sasirir Cꞌuj.
Rajiꞌ xan,
caj u tsꞌaja tiꞌob u tꞌʌn soc yerob baꞌ cu bin u betic Cꞌuj.
Caj tsꞌaꞌb tiꞌob ten Cꞌuj u tꞌʌn Moisés.
Caj esaꞌb tiꞌob bic tabar u cꞌujinticob Cꞌuj.
Bayiriꞌ xan,
Cꞌuj caj u yaꞌaraj tiꞌob a baꞌ cu bin tsꞌaꞌbir ten Cꞌuj tiꞌob.
5 Bayiriꞌ xan,
robob u winiquirob israel,
u pararob u chꞌic nunquirob uch.
Mʌꞌ ja wirej,
ich u winiquirob israel tarij Cristo caj cꞌuchij tu qꞌuinin u chꞌic u winquirir.
Rajiꞌ u cꞌujir tu cotor mac,
caꞌ sʌjtaꞌc ten tu cotor mac muntqꞌuin.
Jeroj.
6 Cax quin jach tucric in wet winiquirob israel,
mʌꞌ jin waꞌarej techex wa Cꞌuj mʌꞌ toy u nupꞌsej a baꞌ caj u toc araj tiꞌ in wet winiquirob israel uch.
A baꞌ quin jach aric techex,
yʌn mac ich u winiquirob israel,
robob mʌꞌ ju pararob Cꞌuj.
7 Mʌꞌ ja wirej,
tu cotor u pararob ic nunquir Abraham mʌꞌ ju xaca Cꞌujiꞌ,
an ten bic u jach pararob u nunquir Abraham.
Cꞌaj techex wa ja baꞌ araꞌb ten Cꞌuj tiꞌ ic nunquir Abraham uch?
“Chen raꞌ u caꞌ parar a parar Isaac,
raꞌ quin bin in xaquic an ten bic a jach parar a techoꞌ.”
Baxuc araꞌb ten Cꞌuj.
8 A baꞌ tsꞌibaꞌan ich u tꞌʌn Cꞌuj cu yaꞌaric wa Isaac caj tetaꞌb ten Cꞌuj mʌꞌ ju jeriꞌ.
Rajen rajiꞌ Isaac jach taj u parar Abraham,
rajiꞌ cu bin cꞌʌmbir a baꞌ toc araꞌb ten Cꞌuj tiꞌ u tet Abraham.
Raꞌ cu camsicoꞌonex,
tu cotor mac mʌꞌ raꞌ u parar Cꞌuj,
cax robob u pararob ic nunquir Abraham.
Jariꞌ a mac araꞌb ten Cꞌuj ich u tꞌʌn,
robob jach taj u pararob Abraham.
9 Quireꞌ,
uꞌyex baꞌ araꞌb tiꞌ Abraham ten Cꞌuj a ray u qꞌuinin uchoꞌ:
“Bajeꞌrer a ray yaxqꞌuinoꞌ Abraham,
a racꞌ u cꞌabaꞌ Sara,
jeꞌ u pararʌncʌr.”
Baxuc caj araꞌb ten Cꞌuj tiꞌ Abraham.
10 Mʌꞌ chen jeraꞌ.
Caj cꞌuchij tu qꞌuinin caj chꞌijij Isaac,
caj u chꞌaj u racꞌ Rebeca.
Caj pararnʌjij Rebeca,
yʌn caꞌtur u chan ochir tu nʌcꞌ,
pꞌeriꞌob u tet,
rajiꞌ ic nunquir u winiquirob israel.
11-12 Cax u pararob Isaac mʌꞌ toy rochaꞌc ten u nʌꞌ Rebeca uch,
cax u chan ochir Isaac mʌꞌ tu betaj a tsoyoꞌ mʌꞌ ju betaj a cꞌasoꞌ,
tiꞌ toy yʌn ich u nʌcꞌ u nʌꞌ,
Cꞌuj caj u tetaj tuririꞌ u parar Isaac.
Raꞌ quir u yesic toꞌonex wa Cꞌuj tsoy tu tꞌʌn,
u tetic mac,
cax mʌꞌ baꞌ caj u betaj caj u tetaj Cꞌuj.
Quireꞌ a Cꞌujoꞌ cu tetic a mac u cꞌat.
Rajen caj u yubaj Rebeca u chan ochir tu nʌcꞌ caj yubaj yaꞌaraꞌ ten Cꞌuj Rebeca:
“Raꞌ sucuꞌunbir cu bin beyaj tiꞌ yitsꞌin.”
Baxuc caj yaꞌaraj Cꞌuj tiꞌ Rebeca.
13 Baxuc caj araꞌb ten Cꞌuj xan.
Tan u tsicbar Cꞌuj tiꞌ u pararob Rebeca:
“Jach manan in yajquintic a Jacoboꞌ,
quij Cꞌuj,
chen Esaú,
mʌꞌ jin neyajquintic.”
Baxuc caj araꞌb ten Cꞌuj xan.
14-15 Yʌn mac cu bin yaꞌaric a baꞌ cu betic Cꞌuj mʌꞌ tsoyiꞌ,
quireꞌ caj u tetaj Jacob,
chen mʌꞌ ju tetaj Esaú.
Chen raꞌ mʌꞌ tajiꞌ.
Quireꞌ a Cꞌujoꞌ,
cu betic a baꞌ tsoy tu tꞌʌn.
Rajen caj araꞌb ten Cꞌuj Moisés:
“A tenoꞌ,
quin yajquintic a mac in cꞌat in yajquintic.”
Baxuc caj yaꞌaraj Cꞌuj.
16 Uꞌyex baꞌ cu camsicoꞌonex aroꞌ.
A Cꞌujoꞌ mʌꞌ ju yajquintic mac,
quireꞌ u bʌjiriꞌ u cꞌat,
cax cu jach pꞌis u bʌj quir u yajquintaꞌr ten Cꞌuj.
Aroꞌ mʌꞌ biquin cu yajquintaꞌr ten Cꞌuj.
Cu chen bin yajquinbir ten Cꞌuj a mac wa ju cꞌat Cꞌujoꞌ.
17 Bayiriꞌ xan,
tiꞌ tsꞌibaꞌan ich u tꞌʌn Cꞌuj caj u yaꞌaraj tiꞌ u rey u winiquirob egipto:
“A tenoꞌ,
quij Cꞌuj,
caj in wacsech soc tech ca bin u reyintiquechob u winiquirob egipto soc yiricob mac a carem beyajoꞌ wa quin betic quireꞌ tech.
A baywoꞌ tu cotor mac jeꞌ u yiricob cꞌuchaꞌan in wor in betic tu cotor baꞌ.”
Baxuc tsꞌibaꞌan ich u tꞌʌn Cꞌuj.
18 Raꞌ cu camsicoꞌonex,
a Cꞌujoꞌ cu yajquintic mac u cꞌat u yajquintic.
Baxuc xan,
a Cꞌujoꞌ cu bin u chichquintic u joꞌr mac soc mʌꞌ cꞌuchaꞌan yor u quibic Cꞌuj.
19 Yʌn ix tiꞌ mac,
a cu bin yaꞌaric wa baxucoꞌ,
Cꞌuj biquinin cu taquic ic joꞌrex soc ic bin mucꞌyajex ich cꞌacꞌ,
quireꞌ mʌꞌ cꞌuchaꞌan yor mac tiꞌ Cꞌuj.
20 Chen a tenoꞌ quin bin in nunquic tiꞌ:
“Maquech tech,
quireꞌ chen winiquech,
bic tabar a nunquic tiꞌ Cꞌuj?”
Jeꞌ wa yac u rac,
a pʌtbir ten mac:
“Biquinin caj a chen pʌten a baxucoꞌ?”
21 Mʌꞌ ja wirej,
a mac a cu pʌtic cꞌʌt cꞌuchaꞌan yor u pʌtic a baꞌ u cꞌat.
Wa ju cꞌat u pʌtic tuririꞌ soc tsoy yirir ten mac,
jeꞌ u pʌtiqueꞌ.
Wa ju cꞌat u pʌtic tuririꞌ soc u tꞌachquintic ich cꞌacꞌ,
jeꞌ u pʌtic xaneꞌ,
quir u tꞌachquintic ich cꞌacꞌ.
Cax wa tiꞌ cu tarob tu yachꞌabirir cꞌʌt tuririꞌ.
22 Mʌꞌ wa baxuc Cꞌuj yejer xan?
A Cꞌujoꞌ,
u cꞌat yer mac wa rajiꞌ cu tsꞌabʌr u mucꞌyaj ten Cꞌuj a mac a yʌn u siꞌpir,
bayiriꞌ soc yer mac,
a Cꞌujoꞌ,
yʌn u mucꞌ jach manan.
Rajen mʌꞌ ju rucꞌsaj a ray winicoꞌ cax robob bin u caꞌ tsꞌabir u mucꞌyajob uch.
A Cꞌujoꞌ,
caj u mucꞌtaj tiꞌob.
Mʌꞌ ja wirej,
nemʌꞌ bic a Cꞌujoꞌ.
23 Cꞌuj u cꞌat yesic tiꞌ a mac a chꞌaꞌb yajquinbir ten Cꞌuj quireꞌ jach manan yajbirob ten Cꞌuj,
soc yerob jach carem Cꞌuj.
Mʌꞌ ja wirej,
tu chꞌic chun,
toc tetaꞌb ten Cꞌuj quir u yacsaꞌrob ich caꞌanan.
24 Mʌꞌ ja wirej,
baxuc Cꞌuj caj u betaj toꞌonex quireꞌ caj u tetoꞌonex xan,
cax u winiquirob israel,
cax mʌꞌ ju winiquirob israel.
Cꞌuj caj u tetaj tu cotor mac a cu yacsicob tu yorob.
25 Baxuc xan,
Cꞌuj caj yaꞌaraj tiꞌ mac a caj u tsꞌaj u tucurob soc u tsicbarob a baꞌ u cꞌat Cꞌuj.
Rajiꞌ u cꞌabaꞌ Oseas,
rajiꞌ caj u tsꞌibtaj a jeꞌ:
Tiꞌ yʌn mac uch,
a mʌꞌ tu cꞌujinten ucheꞌ,
chen bajeꞌrer cu cꞌujintiquenob.
A uchoꞌ,
mʌꞌ jin yajquintob,
chen bajeꞌrer quin yajquinticob.
26 Caj yaꞌaraj Cꞌuj tiꞌ Oseas caj u tsꞌibtaj:
“Tu caj in waꞌaraj tiꞌob:
A techexoꞌ mʌꞌ ta yʌn cꞌujintenexiꞌ.
Jeroj raꞌiriꞌ caj u quibob ten,
rajen robob in pararob xan.”
Baxuc caj araꞌb ten Cꞌuj Oseas.
27 Baxuc caj u yaꞌaraj a mac a tsꞌab u tucur ten Cꞌuj soc u tsicbar a baꞌ u cꞌat Cꞌuj.
U cꞌabaꞌ Isaías.
Rajiꞌ caj u yaꞌaraj tiꞌ u winiquirob israel uch:
“A techexoꞌ,
u winiquirechex israel,
ca jach pimtarex irechex u saꞌamin a tiꞌ yʌn ich u chiꞌ cꞌacꞌnab.
Chen mʌꞌ pimechex cu bin tacbirechex ten Cꞌuj.
28 A Cꞌujoꞌ,
cu bin u tsꞌabir u mucꞌyaj tiꞌ a yaꞌab macoꞌ,
an ten bic caj u yaꞌaraj.
Jach seb cu bin u tsꞌabir u mucꞌyaj tiꞌob.
Taj cu bin tsꞌabir u mucꞌyajob.”
Baxuc caj u tsꞌibtaj Isaías uch.
29 Raꞌiriꞌ Isaías caj u tsecꞌtaj xan,
tan yaꞌaric uch:
Wa jic Jaj Tsꞌurirex,
rajiꞌ u jach tsꞌurir tu cotor baꞌ,
cax a tiꞌ yʌn ich caꞌanan,
cax a tiꞌ yʌn ich yocꞌocab.
Wa rajiꞌ mʌꞌ ju yajquin toꞌonex,
a baꞌ u ber tiꞌ a mac a cʌjaꞌanob ich u cajar Sodoma yejer Gomora uch,
caj rʌc chꞌesaꞌb ten Cꞌuj quireꞌ u yʌn siꞌpirob baxuc toꞌonex xan,
jeꞌ ic chʌc pꞌatʌrex xan mʌꞌ yaꞌab mac.
U winiquirob israel yejer u jach tsoyir u tꞌʌn Cꞌuj
30 Rajen,
quiꞌ uꞌyex baꞌ quin waꞌaric tu cotorechex bajeꞌrer.
Mʌꞌ ja wirej,
a mac a mʌꞌ ju winiquirob israel,
caj yiraj bic tabar u rucꞌsaꞌrob u siꞌpirob ten Cꞌuj,
quireꞌ caj u yacsob tu yorob tiꞌ Cristo.
31 Mʌꞌ ja wirej,
u winiquirob israel yerob wa cu quibicob a baꞌ araꞌb ten Moisés,
jeroj,
cu bin rucꞌsaꞌbir u siꞌpirob ten Cꞌuj.
Chen mʌꞌ rucꞌsaꞌb u siꞌpirob ten u tꞌʌn Moisés,
quireꞌ mʌꞌ cꞌuchaꞌan yorob u quibicob a baꞌ u chen cꞌatob.
32 Biquinin mʌꞌ cꞌuchaꞌan yorob u quibicob a baꞌ tiꞌ tsꞌibaꞌan ich u tꞌʌn Moisés?
Mʌꞌ ja wirej,
u winiquirob israel cu cʌxticob bic u rucꞌsicob u siꞌpirob chen ich u tꞌʌn Moisés.
Mʌꞌ ju yacsob tu yorob tiꞌ Cristo.
Quireꞌ mʌꞌ ju cꞌʌmobiꞌ,
rajen robob irob a mac orac rubuc tiꞌ tunich,
a tunichoꞌ,
raꞌ cu rubsic mac.
33 Baxuc caj u tsꞌibtaj ich u tꞌʌn Cꞌuj uch xan.
Uꞌyex baꞌ caj yaꞌaraj a tsꞌaꞌb u tucur ten Cꞌuj uch,
soc u tsicbar a baꞌ u cꞌat Cꞌuj:
Tar ich u cajar u cꞌabaꞌ Sión,
tij pꞌatiꞌ a mac a tuchiꞌbir ten Cꞌuj.
Rajiꞌ irej tunich a cu rubur yocꞌor.
A mac a cu rubur yocꞌor rajiꞌ cu bin satʌr ich cꞌacꞌ.
Rajen,
raꞌ irej a mac a cu jach rubur ich ruꞌum.
Baxuc a mac a cu yacsic tu yor tiꞌ Jaj Tsꞌur pachir.
Jeꞌ u yiric wa tu cotor taj baꞌ a cu pajic uch,
bajeꞌrer jach taj.
Baxuc caj u yaꞌaraj a tsꞌaꞌb u tucur ten Cꞌuj quir u tsꞌibtic a baꞌ u cꞌat Cꞌuj.