Quij cuxtarex quireꞌ u Tajꞌor u Pixam Cꞌuj
8
Rajen a toꞌonexoꞌ,
mʌꞌ u bin tsꞌabir ic mucꞌyajex ten Cꞌuj,
a mac tu pꞌeriꞌquintob u bʌjob yejer Cristo.
Mʌꞌ ja wirej,
cu beticob a baꞌ u cꞌat u Tajꞌor u Pixam Cꞌujoꞌ.
Rajen mʌꞌ ju manob tu cꞌasir an ten bic cu pachticob tu yorob.
2 Mʌꞌ ja wirej,
u Tajꞌor u Pixam Cꞌuj,
a mac quic tsꞌurintiquex caj u tsꞌaj toꞌonex quir ij cuxtarex ricꞌben,
quireꞌ tij cacsex tij corex tiꞌ Jesucristo.
Rajen caj u tacoꞌonex tiꞌ ic siꞌpirex,
a raꞌ quic tsꞌurintex ucheꞌ.
Bajeꞌrer,
mʌꞌ ju bin tsꞌabir ic mucꞌyajex.
3 Mʌꞌ ja wirej,
ic bʌjiriꞌex,
mʌꞌ cꞌuchaꞌan ij corex ij quiꞌ betiquex a baꞌ u jach cꞌat toꞌonex ich u tꞌʌn Moisés.
Rajen u tꞌʌn Moisés,
mʌꞌ cꞌuchaꞌan yor u taquicoꞌonex.
Chen a Cꞌujoꞌ,
cꞌuchaꞌan yor u taquicoꞌonex,
quireꞌ rajiꞌ caj u tuchiꞌtaj u parar tuririꞌ ich yocꞌocab soc u chꞌic u winquirir an ten bicoꞌonex ic winquirirex,
quir u rucꞌsic ic siꞌpirex.
A toꞌonexoꞌ,
yʌn ic siꞌpirex,
chen a Jesúsoꞌ,
mʌnaꞌ u siꞌpir a tiꞌoꞌ.
4 Baxuc caj u betoꞌonex Cꞌuj soc cꞌuchaꞌan ij corex ic betiquex u tsoyir,
an ten bic cu yaꞌaric ich u tꞌʌn Moisés.
Mʌꞌ ja wirej,
jeꞌ u cꞌuchur ij corex ic betiquex aroꞌ,
quireꞌ mʌꞌ jic bin ic betex a baꞌ quic pachtiquex tij corex a cꞌasoꞌ.
Jeꞌ ic chen betiquex a baꞌ u cꞌat u Tajꞌor u Pixam Cꞌujoꞌ.
5 Quireꞌ ij querex a mac a cu betic a baꞌ cu pachtic tu yor,
a cꞌasoꞌ,
cu chen uꞌyic u cꞌasir a cu pachtic tu yoroꞌ.
Baxuc ij querex a mac a cu betic a baꞌ u cꞌat u Tajꞌor u Pixam Cꞌuj cu bin u chen cʌxtic bic tabar u quiꞌquintic u yor Cꞌuj.
6 Quireꞌ a mac a cu chen cʌxtic u quiꞌquintic u bʌjiriꞌ yor yejer a baꞌ yʌn ich yocꞌocab,
jeꞌ u quimineꞌ.
Chen a mac a cu cʌxtic a baꞌ cu quiꞌquintic u yor Cꞌujoꞌ,
jeꞌ u quiꞌtar yor tiꞌ Cꞌuj,
bayiriꞌ jeꞌ u cuxtar munt qꞌuineꞌ.
7 Mʌꞌ ja wirej,
a mac a cu yubic a baꞌ cu pachtic tu yor,
a cꞌasoꞌ,
rajiꞌ cu pꞌactic Cꞌuj,
quireꞌ u cꞌat u betic a baꞌ cu yaꞌaric ich u tꞌʌn Moisés.
Cax u cꞌat u betic a baꞌ cu yaꞌaric ich u tꞌʌn Moisés,
mʌꞌ ju cꞌuchur u yor u betic.
8 Mʌꞌ ja wirej,
a cu yubic a cu pachtic tu yor a cꞌasoꞌ,
mʌꞌ biqꞌuin cu bin u betic a baꞌ cu bin u quiꞌquintic u yor Cꞌuj.
9 Chen bajeꞌrer,
mʌꞌ ja betex a baꞌ uchben cuxtarex u cꞌat.
Ca bin a betex a baꞌ u cꞌat u Tajꞌor u Pixam Cꞌuj,
quireꞌ ricꞌben winiquechex wa jach acaꞌan ta worex u Tajꞌor u Pixam Cꞌuj.
A mac a mʌꞌ acaꞌan u Tajꞌor u Pixam Cꞌujiꞌ tiꞌ,
rajiꞌ mʌꞌ ju chan parar Cꞌuj.
10 Cax cu bin quimin a winquirirex quireꞌ yʌn a siꞌpirex,
chen wa jach acaꞌan Jesucristo ta pixamex ca bin cuxtarex munt qꞌuin ich caꞌanan,
quireꞌ Cꞌuj caj u rucꞌsaj ic siꞌpirex.
11 A Cꞌujoꞌ,
caj u ricꞌsaj Jesús ich u quimirir.
Wa jach acaꞌan ta worex u Tajꞌor u Pixam Cꞌuj,
jeroj an ten bic Cꞌuj caj u ricꞌsaj Jesús ich u quimirir,
baxuc techex,
bin u caꞌ u ricꞌsic a winquirirex a cu bin quimin.
Mʌꞌ ja wirej,
cu bin u ricꞌsic a winquirirex,
quireꞌ acaꞌan u Tajꞌor u Pixam Cꞌuj ta pixamex bajeꞌrer.
12 Quireꞌ a Cꞌujoꞌ,
baxuc cu bin u betic toꞌonex,
rajen in wet acsaꞌorirex,
caꞌ ic betex a baꞌ u cꞌat Cꞌuj.
Tsireꞌej,
a baꞌ u cꞌat ij cuxtarex a uchbenoꞌ,
a cꞌasoꞌ,
a quic pachtex tij corexoꞌ.
13 Quireꞌ wa quij cacsiquex ic siꞌpirex an ten bic quic pachtiquex tij corex tiꞌ a cꞌasoꞌ,
jeroj munt qꞌuin,
quic bin satʌrex quireꞌ yʌn ic siꞌpirex.
Chen tiꞌ yʌn u Tajꞌor u Pixam Cꞌuj quir u yamticoꞌonex,
soc ic pꞌʌtiquex a baꞌ quic pachtiquex tij corex tiꞌ a cꞌasoꞌ.
Wa quic pꞌʌtiquex a baꞌ quiriꞌ cꞌas a quic betiquex,
jeꞌ ij cuxtarex munt qꞌuin.
14 Tu cotor raꞌ u chan parar Cꞌuj a cu chaꞌbʌr u pʌyʌr u ber ten u Tajꞌor u Pixam Cꞌuj.
15 Barej,
caj ij cꞌʌmex u Tajꞌor u Pixam Cꞌuj,
rajen tu chꞌu chan pararintoꞌonex a Cꞌujoꞌ.
A bajeꞌrer,
a toꞌonexoꞌ,
mʌꞌ jic yʌn chꞌaꞌex sajquirex tiꞌ Cꞌuj an ten bic u cꞌurewob cu chꞌic sajquirob tiꞌ u tsꞌurirob.
Quireꞌ u Tajꞌor u Pixam Cꞌuj cu yamticoꞌonex soc ic tꞌʌniquex Cꞌuj baxuc:
“Ic Tetex”,
quij yaꞌaraꞌ tiꞌ.
16 Mʌꞌ ja wirej,
raꞌiriꞌ cu yaꞌaric toꞌonex u Tajꞌor u Pixam Cꞌuj wa ju pararoꞌonex Cꞌuj.
17 Mʌꞌ ja wirej,
an ten bic u parar mac bin u caj cꞌʌmob tu cotor a baꞌ cu bin tsꞌabir ten u tet tiꞌob.
Baxuc tiꞌ Cꞌuj xan,
jeꞌ ij cꞌʌmiquex tu cotor a baꞌ cu bin u tsꞌajej toꞌonex Cꞌuj.
Jach taj quet caꞌ bin ij cꞌʌmiquex yejer Jesucristo a baꞌ cu bin tsꞌajej ten toꞌonex Cꞌuj.
Chen bin ij caꞌex mucꞌyajex an ten bic mucꞌyajnʌjij Cristo Jesús uch,
soc quet ij cuxtarex ich u sasirir Cꞌuj ich caꞌanan.
18 Jach taj quic mucꞌyajex ich yocꞌocab an ten bic cu chuquicob ic pachex,
baxuc tu quic yajtarex,
baxuc tu cu chiꞌob ic pachex.
Chen pachir jeꞌ u jocꞌar tsoyoꞌonexeꞌ.
Mʌꞌ ja wirej,
u bʌjiriꞌ Cꞌuj cu bin u betic aroꞌ.
Rajen mʌꞌ ic yʌn tucrex ic bʌjex cax quic mucꞌyajex ich yocꞌocabaꞌ,
quireꞌ raꞌ tu quic binex jach manan tsoy aroꞌ.
19 Mʌꞌ ja wirej,
tu cotor a baꞌ betaꞌb ten Cꞌuj ich yocꞌocab uch,
raꞌ cu pachticob,
jach manan cu pachticob u yirob u qꞌuinin caꞌ bin cꞌuchuc soc Cꞌuj cu bin yaꞌaric toꞌonex:
“Jeroj in pararechex.”
Raꞌ quic bin ij cuꞌyiquex,
quireꞌ u pararoꞌonex Cꞌuj.
20 Mʌꞌ ja wirej,
tu cotor baꞌ a tiꞌ yʌn ich yocꞌocab,
mʌꞌ ju betaj baxuc caj u betaj Cꞌuj tu chꞌic chun.
Cꞌuj tu rorobtꞌʌntaj soc mʌꞌ ju jach jocꞌar tsoyir quireꞌ rajiꞌ u siꞌpir Adán.
Chen bajeꞌrer robob cu cꞌujinticob Cꞌuj quir u wʌcꞌʌs betic u ricꞌbenin.
21 Quireꞌ tu cotor a baꞌ teꞌ yʌnaꞌ,
rajraꞌ cu quiminob.
Chen barej caꞌ bin waysacoꞌonex u pararoꞌonex Cꞌuj,
quet baxuc cu bin waysaꞌbir soc jach manan tsoyir xan tu cotor a baꞌ betaꞌb ten Cꞌuj.
22 Mʌꞌ ja wirej,
ij querex tu cotor baꞌ a betaꞌb ten Cꞌuj,
a teꞌ yʌnaꞌ ich yocꞌocab,
cu mucꞌyajob bajeꞌrer,
quireꞌ mʌꞌ waysaꞌbiꞌ soc jach manan tsoyir tu caꞌ ten.
Cu mucꞌyaj irej xquic,
a cꞌuchij tu qꞌuinin u rochic chan och.
23 Quireꞌ toc acaꞌan tic pixamex u Tajꞌor u Pixam Cꞌuj,
rajen ij querex cu bin u waysicoꞌonex u pararoꞌonex Cꞌuj.
Rajen quetoꞌonex yejer a baꞌ caj u betaj Cꞌuj ich yocꞌocab,
quic xoptiquex tij corex caꞌ bin waysacoꞌonex u pararoꞌonex Cꞌuj,
quet yejer ic winquirirex.
Quic chꞌuctiquex a raꞌ u qꞌuininoꞌ.
24 Caj tij cacsajex tij corex tiꞌ Cristo,
caj araꞌb toꞌonex bin u caꞌ tsꞌabir ten Cꞌuj toꞌonex u jer ricꞌben ic winquirirex.
Rajiꞌ tiꞌ toy quic pajiquex bajeꞌrer.
Jeꞌ wa jin pajic a baꞌ caj u toc tsꞌaja ten?
Mʌꞌ jic pajex.
25 Chen a toꞌonexoꞌ,
quic pajiquex a baꞌ mʌꞌ ij quirmʌnexoꞌ,
quireꞌ ic toc erex jeꞌ u waysicoꞌonex.
Rajen caꞌ ic mucꞌtex cax a baꞌ a cu tar toꞌonex hasta caꞌ bin cꞌuchuc tu qꞌuinin.
26 Tiꞌ yʌn xan,
u Tajꞌor u Pixam Cꞌuj quir u yamticoꞌonex a mac mʌꞌ toy chichac u yor tiꞌ u tꞌʌn Cꞌuj.
A toꞌonexoꞌ,
mʌꞌ ij querex bic tabar ij cꞌatiquex baꞌ tiꞌ Cꞌuj.
Mʌꞌ bic tabar ic tsicbarex tiꞌ Cꞌuj.
Cax mʌꞌ cꞌuchaꞌan ij corex ic tsicbarex tiꞌ Cꞌuj,
quic xoptiquex.
Jeroj a raꞌ u qꞌuininoꞌ,
u Tajꞌor u Pixam Cꞌuj cu chich tꞌʌnic Cꞌuj toꞌonex.
Mʌꞌ ja wirej,
u Tajꞌor u Pixam Cꞌuj jach manan cu tꞌʌnic Cꞌuj toꞌonex.
27 Quireꞌ a Cꞌujoꞌ,
u quiꞌ er tu cotor baꞌ a tiꞌ yʌn tij corex,
bayiriꞌ Cꞌuj cu najtic a baꞌ cu yaꞌaric u Tajꞌor u Pixam Cꞌuj.
Mʌꞌ ja wirej,
u Tajꞌor u Pixam Cꞌuj cu tꞌʌnic Cꞌuj,
quireꞌ yer a baꞌ tsoy tu tꞌʌn Cꞌuj,
baxucoꞌ,
cu chich tꞌʌnic Cꞌuj tiꞌ tu cotor a yacsmʌnob tu yorob.
Jach manan cu yajquinticoꞌonex Cꞌuj
28 Bayiriꞌ xan,
ij querex a mac a cu yajquinticob Cꞌuj,
cax wa baꞌ u ber a tiꞌoboꞌ,
bin u caꞌ jocꞌar u tsoyirob.
Quireꞌ a Cꞌujoꞌ,
caj u quiꞌ tucrob,
rajen caj u tetaꞌbob soc u tarob,
soc pꞌeriꞌ yorob yejer Cꞌuj.
29 Mʌꞌ ja wirej,
a Cꞌujoꞌ,
yer tu toc chunin cax mʌꞌ toy betac yocꞌocab,
Cꞌuj u toc er mac cu bin yacsic tu yor tiꞌ.
Rajen pʌyber Cꞌuj caj u tucroꞌonex quir u waysicoꞌonex an ten bic u parar Jesucristo,
a baywoꞌ tu cotoroꞌonex ic sucuꞌunex,
Jesucristo a toꞌonexoꞌ yitsꞌinoꞌonex.
30 Rajen Cꞌuj caj u pʌyoꞌonex quir ic tarex quireꞌ Cꞌuj pʌyber caj u tucroꞌonex tu chꞌic chunin tu cotor baꞌ.
Rajen Cꞌuj caj u rucꞌs ic siꞌpirex,
quireꞌ Cꞌuj caj u toc araj caꞌ u tacoꞌonex tiꞌoꞌ.
Rajen xan cu bin u jocꞌar tsoyoꞌonex ich caꞌanan quireꞌ Cꞌuj caj u toc rucꞌs ic siꞌpirex.
31 Mʌꞌ ja wirej,
a Cꞌujoꞌ mʌꞌ ju pꞌʌticoꞌonex,
rajen tsireꞌej wa ju jer mac cu chen pꞌacticoꞌonex.
32 Cꞌaj techex a Cꞌujoꞌ,
caj u tsꞌaj u parar tuririꞌ quir u boꞌotic u boꞌorir ic siꞌpirex.
Mʌꞌ jariꞌoꞌ,
caj u tsꞌaj u parar quir u quimin toꞌonex,
quet caj u tsꞌajaj toꞌonex tu cotor a baꞌ ij cꞌatex.
33 Tiꞌ wa yʌn mac a cꞌuchaꞌan yor u taquic ic joꞌrex a toꞌonexoꞌ,
a tij cacsex tij corex tiꞌ Cristo?
Mʌnaꞌ mac cꞌuchaꞌan yor u taquic ic joꞌrex tiꞌ Cꞌuj,
quireꞌ u bʌjiriꞌ Cꞌuj caj u toc araj:
“Taj ij corex.”
34 Mʌnaꞌ mac cꞌuchaꞌan yor u taquic ic joꞌrex a toꞌonexoꞌ,
a tij cacsex tij corex soc u bin tsꞌabir ic mucꞌyajex,
quireꞌ Cristo caj u boꞌotaj u boꞌorir ic siꞌpirex caj quimij,
bayiriꞌ caj ricꞌsaꞌb ich u quimirir.
Bayiriꞌ tiꞌ curaꞌan ich u noj Cꞌuj tu cu tꞌʌnic Cꞌuj toꞌonex.
35 Mʌꞌ ja wirej,
a Cristojoꞌ,
cu yajquinticoꞌonex,
rajen mʌnaꞌ mac cu bin u rucꞌsicoꞌonex tiꞌ Cristo.
Jaj ix tʌcoj,
bin ij caꞌex ic mucꞌyajex.
Jaj ix tʌcoj bin u caꞌ u chiꞌob ic pachex.
Jaj ix tʌcoj bin u caꞌ u chuquicob ic pachex.
Jaj ix tʌcoj,
bin ij caꞌex ic wiꞌijchʌjʌrex.
Jaj ix tʌcoj,
wa mʌnaꞌ ic noqꞌuex quir ic buquintiquex.
Jaj ix tiꞌ,
yʌn mac cu bin pꞌactiquechex.
Jaj ix tʌcoj,
bin ij caꞌex quiminex,
quireꞌ chꞌʌcꞌbir ic joꞌrex yejer mascab.
Cax baxucoꞌ bin ij caꞌex mucꞌyajex,
mʌnaꞌ mac cu bin u rucꞌsicoꞌonex tiꞌ Cristo.
36 Baxuc caj tsecꞌtaꞌb toꞌonex bin ij caꞌex mucꞌyajex tiꞌ Cristo.
Uꞌyex baꞌ cu yaꞌaric ich u tꞌʌn Cꞌuj uch:
Quireꞌ tij cacsajex tij corex tech Cꞌuj,
rajen,
cu sayʌrob tic pachex soc ij quinsaꞌrex u buru qꞌuin an ten bic cu quinsicob u yʌrʌcꞌ tʌmʌn yuc ich tu cu naj quinsicob tʌmʌn yuc.
37 Jach taj rajraꞌ quic mucꞌyajex,
quireꞌ tij cacex tij corex,
chen mʌꞌ ju cꞌuchur u yorob u chiꞌoꞌonexob.
Mʌꞌ ja wirej,
rajraꞌ quic mucꞌtiquex tu cotor,
quireꞌ tsꞌaꞌb ic muqꞌuex ten Cristo quireꞌ u yajoꞌonex.
38 Rajen,
in wer jach taj mʌnaꞌ mac cꞌuchaꞌan yor u taquiquen tiꞌ Cꞌuj,
quireꞌ jach manan u yajen Cꞌuj,
cax wa quij quiminex u yajoꞌonex.
Cax wa cuxaꞌanoꞌonex cu yajoꞌonex.
Cax wa ju yʌjmasirob u tꞌʌn Cꞌuj u cꞌatob u taquicoꞌonex,
mʌꞌ cꞌuchaꞌan yorob tiꞌ.
Cax wa ju jach tsꞌurir quisin.
Cax wa baꞌ ic ber toꞌonex bajeꞌrer,
mʌꞌ ju tacoꞌonex.
Cax wa pachir a baꞌ ic ber toꞌonex tu qꞌuinin caꞌ bin tac,
mʌꞌ ju cꞌuchur yor u tacoꞌonex quireꞌ jach manan cu yajoꞌonex a Cꞌujoꞌ.
39 Cax wa baꞌ cu tar ich yaraꞌan ruꞌum.
Cax wa raꞌ cu tar ich caꞌanan,
cax wa tiꞌ yʌn u jer a baꞌ a betaꞌb ten Cꞌuj,
mʌꞌ ju cꞌuchur yor u tacoꞌonex,
quireꞌ jach manan u yajoꞌonex Cꞌuj quireꞌ tij cacsex tij corex tiꞌ Jesucristo ic Jaj Tsꞌurirex.