Yʌn baꞌ caꞌ ij cʌnex tu cu chꞌic u racꞌ mac
7
A techexoꞌ,
in wet acsaꞌorirex,
a werex bic tabar a juezoꞌ yʌn u mucꞌ,
rajen caꞌ ij quibex u tꞌʌn,
a mun qꞌuin cuxaꞌanoꞌ.
Chen wa ber cu quimin mac,
a tsꞌoc u tsꞌurintaꞌr juezoꞌ.
2 Uꞌyex baꞌ quin camsiquechex.
A xquicoꞌ,
a tu chꞌaj u mameꞌ,
cu yaꞌaric a juezoꞌ:
“Mʌꞌ ja yʌn pꞌʌtic a mam a mun yaxqꞌuin cuxaꞌan ich a wicnʌn tech.”
Chen a ray u qꞌuininoꞌ,
cu quimin u mam,
a juezoꞌ cu yiric a xquicoꞌ,
irej wa mʌꞌ u chꞌamʌn u mam.
3 Wa raꞌ xquicoꞌ cu pꞌʌtic u mam quir u mamintic u jer,
cax tiꞌ toy cuxꞌaꞌan u jach mam.
Jach cꞌas cu betic.
Chen wa quimij u mam,
a ray xquicoꞌ,
bajeꞌrer siptaꞌb quir u bin u chꞌic u jer u mam.
Mʌꞌ ja wirej,
ʌcʌtan a juezoꞌ,
siptaꞌb a ray xquicoꞌ.
4 Baxuc techex in wet acsaꞌorirex,
caj quimij Jesús ich u cruz,
quet caj quimoꞌonex xan,
rajen mʌꞌ baꞌwir toꞌonex u tꞌʌn Moisés,
quireꞌ siptaꞌboꞌonex ten Cꞌuj.
Mʌꞌ ja wirej,
siptaꞌboꞌonex soc pꞌeriꞌoꞌonex yejer u jer,
a ricꞌsaꞌb ten Cꞌuj caꞌ ic betex an ten bic Cꞌuj u cꞌat.
5 A uchoꞌ,
mʌꞌ toy ij cacsex tij corex caj manoꞌonex ich a baꞌ quic pachtiquex tij corex,
a jach cꞌasoꞌ.
A ray u qꞌuininoꞌ a baꞌ araꞌb ich u tꞌʌn Moisés tu chen pꞌus ij corex soc ic chen pachtiquex a cꞌasoꞌ,
soc ic tsꞌurintiquex a cꞌasoꞌ,
rajen oric u tsꞌic mucꞌyajex.
6 Caj ij cacsex tij corex tiꞌ Cristo,
caj u siptoꞌonex tiꞌ a baꞌ tsꞌibtaꞌb ich u tꞌʌn Moisés uch,
quireꞌ quet caj quimoꞌonex yejer Jesús ich u cruz.
Rajen quic beyajex tiꞌ Cꞌuj,
quireꞌ caj u tsꞌajaj toꞌonex u ricꞌben cuxtar u Tajꞌor u Pixam Cꞌuj,
soc mʌꞌ biqꞌuin ic tsꞌurintiquex a baꞌ tsꞌibaꞌan ich u tꞌʌn Moisés.
Ic siꞌpirex yejer a baꞌ tsꞌibaꞌan ich u tꞌʌn Cꞌuj
7 Mʌꞌ jij carex wa jach cꞌas a baꞌ tsꞌibaꞌan ich u tꞌʌn Moisés.
Mʌꞌ cꞌasiꞌ,
quen.
Mʌꞌ ja wirej,
u tꞌʌn Moisés caj u yesaj toꞌonex baꞌ jach cꞌas,
raꞌ ic siꞌpirex.
Quireꞌ jeꞌ wa jij querex wa tij cacsex ic siꞌpirex caj ij pachtiquex u baꞌtac mac?
Mʌꞌ ja wirej,
u tꞌʌn Moisés caj yaꞌaraj:
“Mʌꞌ ja yʌn pachtex u baꞌtac mac.”
Rajen ij querex baꞌ ic siꞌpirex.
8 Mʌꞌ ja wirej,
caj u cꞌʌnaj u tꞌʌn Moisés soc u tumtic ij corex wa quic pachtiquex tij corex tu cotor a baꞌ jach cꞌasoꞌ.
Mʌꞌ ja wirej,
taroꞌ cu yaꞌaric ich u tꞌʌn Moisés,
a baꞌ mʌꞌ tsoy toꞌonex.
Chen wa mʌnaꞌ u tꞌʌn Moisés mʌꞌ ij querex wa quic manex ij cacsex tic siꞌpirex.
9 A uchoꞌ,
mʌꞌ jij quiꞌ najtex a baꞌ tsꞌibaꞌan ich u tꞌʌn Moisés.
A toꞌonexoꞌ,
caj ic tucrex jach tsoyoꞌonex.
Chen caj ij quiꞌ najtex a baꞌ tsꞌibaꞌan ich u tꞌʌn Moisés uch,
jeroj,
a ray u qꞌuininoꞌ caj ij quirex ij cacsex tic siꞌpirex.
Tij quirex mʌꞌ quiꞌ ij corex,
orac u tsꞌic ic mucꞌyajex toꞌonex.
10 A baywoꞌ,
caj ic cꞌʌꞌotex a baꞌ tsꞌibaꞌan ten Moisés uch,
rajiꞌ caj ic tus tucrex rajiꞌ cu tsꞌic ij cuxtarex,
jariꞌ caj u chen tsꞌatoꞌonex quir ij quiminex.
11 Mʌꞌ ja wirej,
caj u tus araj toꞌonex quireꞌ u cꞌasir ij corex.
Ij querex uch wa cꞌuchaꞌan ij corex ic tus betex uch tu cotor a baꞌ tiꞌ yʌn ich u tꞌʌn Moisés,
a caj u toc aꞌara toꞌonex u tꞌʌn,
chen raꞌiriꞌ tꞌʌn cu yaꞌaric wa jeꞌ u bin tsꞌabir ic mucꞌyajex,
quireꞌ raꞌ ic siꞌpirex.
12 A ray tunoꞌ,
u tꞌʌn Moisés,
a caj u tsꞌibtaj uch,
rajiꞌ u tꞌʌn Cꞌuj.
Tu cotor a baꞌ tsꞌibaꞌan jach tsoy,
quireꞌ taj.
13 Bic tabar a baꞌ jach tsoy an ten bic u tꞌʌn Moisés caj u yesaj toꞌonex bin in caj quiminex?
Mʌꞌ ja wirej,
jach tsoy u tꞌʌn Moisés,
quireꞌ caj u yes ij cacsiquex ic siꞌpirex,
rajen cu tsꞌabʌr ij quiminex.
A baꞌ tsꞌibaꞌan ich u tꞌʌn Moisés tsoy,
quireꞌ caj u yesaj toꞌonex a baꞌ sipir caj ij cacsex.
Rajen a baꞌ araꞌb tiꞌ Moisés ten Cꞌuj tsꞌaꞌb tiꞌ,
soc chʌcaꞌan ij quiriquex a baꞌ quic betiquex jach cꞌas.
14 Mʌꞌ ja wirej,
u Tajꞌor u Pixam Cꞌuj,
caj u tsꞌajaj u tꞌʌn tiꞌ Moisés,
chen a toꞌonexoꞌ,
quic manex tiꞌ a baꞌ quic pachtiquex tij corex,
a baꞌ jach cꞌasoꞌ.
Raꞌ quic tsꞌurintiquex,
a cꞌasoꞌ.
15 Rajen mʌꞌ jin betej a baꞌ in cꞌat in betic.
Cax a baꞌ mʌꞌ jin cꞌat,
raꞌ quin betej.
A tenoꞌ,
mʌꞌ jin wer biquinin baxuc quin betic aroꞌ.
16 Rajen wa quin wacsic in siꞌpir,
cax mʌꞌ jin cꞌat in wacsic tin siꞌpir,
jeroj quin cꞌʌꞌotic a baꞌ tsꞌibaꞌan ich u tꞌʌn Cꞌuj,
a caj u tsꞌibtaj Moisés jach tsoy,
quireꞌ cu maꞌquintic in ber tiꞌ a baꞌ jach cꞌasoꞌ.
17 Chen mʌꞌ ten betiquiꞌ.
Mʌꞌ ja wirej,
u cꞌasir a acaꞌan tin wor,
raꞌ cu betic a baꞌ mʌꞌ jin cꞌat in betej.
18 Rajen ij querex jach taj mʌnaꞌ u tsoyir acaꞌan tin wor,
quireꞌ cax in chen pacht a baꞌ jach tsoyoꞌ mʌꞌ ju cꞌuchur in wor in betej,
quij.
19 Quireꞌ in chen cꞌat in betic a tsoyoꞌ,
chen mʌꞌ cꞌuchaꞌan in wor in betej a tsoyoꞌ.
Chen a baꞌ mʌꞌ tsoyoꞌ,
raꞌ quin betic cax mʌꞌ jin cꞌat in betic.
20 Wa quin chen betic a baꞌ mʌꞌ jin cꞌateꞌ,
rajen mʌꞌ ten betic aroꞌ,
chen in siꞌpir a acaꞌan tin woroꞌ raꞌ acsic in siꞌpir.
21 A werex baꞌ in ber a tenoꞌ?
A tenoꞌ,
in jach cꞌat in betic a tsoyoꞌ,
chen a cꞌasoꞌ,
a acaꞌan tin woroꞌ raꞌ cꞌastic in ber.
22 Jeroj tin woroꞌ,
in jach cꞌat in tsꞌurintic u tꞌʌn Cꞌuj.
23 Cax in jach cꞌat in tsꞌurintic u tꞌʌn Cꞌuj,
chen tiꞌ yʌn baꞌ a cu chich pʌyiquen,
soc in wacsic a baꞌ quin pachtic tin woroꞌ,
rajraꞌ cu yacsic in siꞌpir.
24-25 Rajen otsiren,
a tenoꞌ,
in jach cꞌat a baꞌ u cꞌat Cꞌuj,
chen a tiꞌ yʌn,
baꞌ a cu chich pʌyiquen soc u yacsic in sipir.
Mac cu bin u siptiquen tiꞌ a baꞌ cu chich pʌyiquen quir in quinsaꞌr?
“Bayoꞌ”,
quin waꞌaric tiꞌ Cꞌuj,
quireꞌ in wer cu siptiquen Jesucristo ic Jaj Tsꞌurirex.