Ic siꞌpirex quinsicoꞌonex, chen Cristo cu tsꞌic ij cuxtarex
6
Tin tꞌʌn yʌn mac cu bin u tus aꞌarej:
“Caꞌ ij quiꞌ acs ic siꞌpirex soc jach manan u yajquinticoꞌonex Cꞌuj.”
2 A tenoꞌ,
quin nunquic.
Cax mʌꞌ ic yʌn acsiquex ic siꞌpirex,
mʌꞌ biqꞌuinin quic acsic ic siꞌpirex,
quireꞌ an ten bic u baquer mac,
a jach quimin mʌꞌ cꞌuchaꞌan yor u wʌcꞌʌs acs u sipiriꞌ,
baxuc toꞌonex xan.
Rajen tsireꞌej,
cax mʌꞌ ic yʌn acsiquex ic siꞌpirex.
3 Uꞌyex baꞌ quin cꞌatic techex.
Mʌꞌ wa ja werex biquinin caj acsaꞌb jaꞌ ta joꞌrex?
Mʌꞌ ja wirej,
caj acsaꞌb jaꞌ ta joꞌrex soc yiric tu cotor mac wa pꞌeriꞌechex yejer Cristo.
Rajen caj acsaꞌb jaꞌ ta joꞌrex,
jeroj irej wa pꞌeriꞌ caj quimechex yejer Cristo.
4 Raꞌ u qꞌuinin caj acsaꞌb jaꞌ tic joꞌrex,
raꞌ u cꞌat yaꞌaric quimoꞌonex yejer Cristo.
Bayiriꞌ xan,
quet rʌc butꞌaꞌan ic baquerex yejer Cristo.
Rajen,
caj ricꞌsaꞌb Cristo ten u jach tsoyir u chichir u mucꞌ Cꞌuj ich u quimirir,
baxuc toꞌonex xan caj ricꞌsaꞌboꞌonex,
caj waysaꞌboꞌonex ten Cꞌuj soc ricꞌben winiquiroꞌonex.
Rajen caꞌ ic pꞌʌtex a baꞌ tic betex uch.
5 Quireꞌ a toꞌonexoꞌ,
pꞌeriꞌoꞌonex yejer Cristo,
rajen,
iroꞌonex wa quimenoꞌonex yejer Cristo caj quimij ich u cruz uch.
Rajen caj ricꞌsaꞌb Cristo ich u quimirir,
baxuc iroꞌonex wa ricꞌsaꞌboꞌonex ich ic quimirirex,
rajen ricꞌben winicoꞌonex.
6 Baꞌ u cꞌat yaꞌaric aroꞌ?
Ic toc erex,
a uchoꞌ,
caj manoꞌonex ich tu cotor u cꞌasir,
mʌꞌ jic tucrex a uchoꞌ,
chen bajeꞌrer ic toc erex,
quet caj bajoꞌonex yejer Cristo ich u cruz,
rajen,
mʌꞌ raꞌ quic tsꞌurintiquex a cꞌasoꞌ.
7 Mʌꞌ ja wirej,
an ten bic mac quimen mʌꞌ cꞌuchaꞌan yor yacsic u sipir,
baxuc toꞌonex xan.
8 An ten bic caj quimij Jesús ich u cruz,
baxuc toꞌonex xan,
rajen caj riqꞌuij Jesús ich u quimirir soc u wʌcꞌʌs cuxtar.
Baxuc quij cacsiquex tij corex quet caꞌ bin cuxracoꞌonex yejer Cristo.
9 Mʌꞌ ja wirej,
ic toc erex,
a Cristojoꞌ,
mʌꞌ cꞌuchaꞌan yor u wʌcꞌʌs quimin,
mʌꞌ ju bin caꞌ quimin biqꞌuin,
quireꞌ ricꞌsaꞌb ich u quimirir,
rajen mʌnaꞌ mac yʌn u mucꞌ quir u caꞌ quinsic Cristo.
10 Mʌꞌ ju wʌcꞌʌs quimin Jesús,
mʌꞌ ju bin caꞌ quimij biqꞌuin,
quireꞌ caj quimij,
chen teniꞌ cu quimin quir u rucꞌsic ic siꞌpirex.
Chen bajeꞌrer,
a Jesúsoꞌ cuxaꞌan quir u betic tu cotor baꞌ u cꞌat Cꞌuj.
11 Rajen,
caꞌ a tucrex a baxuquechex a mac jach taj quimij,
soc mʌꞌ cꞌuchaꞌan a worex a wacsiquex a siꞌpirex,
chen cuxaꞌanechex soc a betiquex tu cotor a baꞌ u cꞌat Cꞌuj.
Mʌꞌ ja wirej,
cuxaꞌanechex quireꞌ pꞌeriꞌechex yejer Jesucristo ic Jaj Tsꞌurirex.
12 Quireꞌ bin u caj quimin a winquirex,
rajen mʌꞌ ja chaꞌiquex u yacsiquex a siꞌpirex,
mʌꞌ a quibiquex a baꞌ cu pachtic a cꞌasoꞌ.
13 Mʌꞌ ja chaꞌiquex a tsꞌurintiquex cꞌasoꞌ a ca pachitiquex ta worex quir a betiquex,
a baꞌ mʌꞌ ju quiꞌquintej yor Cꞌuj.
Quireꞌ a toꞌonexoꞌ,
a uchoꞌ,
quimoꞌonex,
chen bajeꞌrer toc cuxaꞌanoꞌonex,
baxuc cu yiricoꞌonex Cꞌuj.
Rajen toc cꞌubechex a wʌcꞌʌs bʌjiriꞌex tiꞌ Cꞌuj,
soc a chen manex tu tsoyir.
14 Quireꞌ mʌꞌ baꞌwir quir a wacsiquex a siꞌpirex bajeꞌrer,
quij Pablo,
u tꞌʌn Moisés a baꞌ caj u tsꞌibtaj uch,
rayoꞌ mʌꞌ ja tsꞌurintiquex.
Mʌꞌ ja wirej,
rajiꞌ ca tsꞌurintiquex Cꞌuj,
a mac a jach yajechexoꞌ.
Mac a tsꞌurirex?
15 A tenoꞌ,
tin tꞌʌn,
yʌn mac bin u caꞌ u tus aꞌarej:
“Caꞌ ic pʌyex ic siꞌpirex,
raꞌ u qꞌuininoꞌ mʌꞌ jic tsꞌurintex u tꞌʌn Moisés,
mʌꞌ biqꞌuin,
chen jariꞌ Cꞌuj,
rajiꞌ quic tsꞌurintiquex bajeꞌrer,
rajen tu yajquin toꞌonex?”
16 Mʌꞌ ja wirej,
a mac a cu cꞌubic u bʌj,
quir u quibic u tꞌʌn u jer mac,
jeroj oc cꞌurewir.
Tin tꞌʌn,
a werex aroꞌ,
rajen wa ca manex tu cꞌasir ca quibiquex a cꞌasoꞌ,
jeroj oquechex ta cꞌurewirex.
U boꞌorir cu bin tsꞌabir techex,
quir a quiminex.
Chen wa ca quibiquex Cꞌuj,
caꞌ ocaquechex u cꞌurewechex Cꞌuj.
Rajiꞌ cu bin u tsꞌic techex a cuxtarex,
a baꞌ jach tsoy.
17 A uchoꞌ,
caj a manex ich u cꞌasir,
chen bajeꞌrer quin jach aꞌaric tiꞌ Cꞌuj:
“Bayoꞌ”,
quireꞌ caj a wuꞌyajex a mac a caj u tsecꞌtaj techex u jach tsoyir u tꞌʌn Cꞌuj caj a quibex a wacsiquex ta worex tiꞌ Jesús.
18 Rajen,
a Cꞌujoꞌ,
caj u jawsechex tiꞌ a siꞌpirex a ca tsꞌurintiquex uchoꞌ,
soc u yacsiquechex u cꞌurewechex Cꞌuj.
19 A tenoꞌ,
quin camsiquechex an ten bic mac cu tsicbar ich yocꞌocab,
quireꞌ a baxucoꞌ,
a mac a tiꞌ yʌn ich yocꞌocab cu bin u najtob.
Mʌꞌ ja wirej,
a uchoꞌ,
ca manex ich tu cotor u cꞌasir soc a quiꞌ acsic a siꞌpirex.
Baxucoꞌ xan,
bajeꞌrer,
quiꞌ manenex tu tsoyir soc a cʌniquex Cꞌuj a manex tu tsoyir.
20 Quireꞌ a uchoꞌ,
ca manex a quiꞌquint a worex ich tu cotor u cꞌasir,
rajen mʌꞌ cꞌuchaꞌan a worex a cꞌʌs manex tu tsoyir,
chichin.
21 Arex ten wa quiꞌ a worex tu ca manex tu cꞌasir uch.
Tin tꞌʌn,
mʌꞌ jach quiꞌ a worex uch,
chen bajeꞌrer caj a chꞌaj suraquirex tu manechex tu cꞌasir uch.
Mʌꞌ ja wirej,
a mac a cu yacsic u siꞌpir cu bin u tsꞌaꞌbir u mucꞌyaj.
22 Chen bajeꞌrer,
jach taj caj a toc pꞌʌtex a siꞌpirex caj a wacsex a siꞌpirex uch,
quireꞌ caj a quibajex u tꞌʌn Cꞌuj.
Rajen caj a cꞌubex a bʌjex tiꞌ Cꞌuj soc u tsꞌic techex a cuxtarex munt qꞌuin.
23 Mʌꞌ ja wirej,
u boꞌorir u siꞌpir mac quir u tsꞌabir u mucꞌyaj.
Chen a Cꞌujoꞌ,
caj u sijatoꞌonex quir ij cuxtarex munt qꞌuin quireꞌ tij cacsex tij corex tiꞌ Jesucristo ic Jaj Tsꞌurirex.