Jeroj Cꞌuj caj u cꞌʌmoꞌonex
5
Cꞌuj caj u rucꞌsaj ic siꞌpirex,
quireꞌ tij cacsex tij corex tiꞌ.
Mʌꞌ ja wirej,
Jesús caj u pꞌeriꞌquintaj ij corex tiꞌ Cꞌuj,
soc mʌnaꞌ baꞌ quic tucriquex bajeꞌrer.
2 Mʌꞌ ja wirej,
Cꞌuj caj u betaj tsoy toꞌonex,
quireꞌ tij cacsex tij corex tiꞌ Cristo.
Rajen quiꞌ ij corex quireꞌ ij querex tu quic binex ich u sasirir Cꞌuj.
3 Mʌꞌ chen quiꞌ in worob quireꞌ aroꞌ,
jach quiꞌ in worob xan,
cax a teraꞌ quin mucꞌyajob.
Mʌꞌ ja wirej,
in werob a baxucoꞌ,
cu chichtar in mucꞌob ich Cꞌuj soc quin mucꞌticob baꞌ,
cax a baꞌ cu tar tin wocꞌorob.
4 Mʌꞌ ja wirej,
barej caj chichij ic muqꞌuꞌex tu quic mucꞌyajex,
a raꞌ u qꞌuininoꞌ,
Cꞌuj cu bin yaꞌaric:
“Jach tsoyechex”,
rajen quic chꞌuctiquex Cꞌuj cu bin u yacsicoꞌonex ich u sasirir.
5 Quireꞌ baxucoꞌ,
quic chꞌuctiquex,
rajen mʌꞌ jic bin ic chꞌic suraquirex tiꞌ a baꞌ quic chꞌuctiquex ij quirex.
Mʌꞌ ja wirej,
u Tajꞌor u Pixam Cꞌuj,
a tsꞌaꞌb ten Cꞌuj toꞌonex,
cu tsꞌic ic najtex wa Cꞌuj u jach yajoꞌonex.
6 Barej a uchoꞌ,
mʌꞌ cꞌuchaꞌan ij corex ic pꞌʌtiquex a cꞌasoꞌ,
mʌꞌ ij querex xan,
bic tabar ic taquiquex ic bʌjex,
jeroj caj cꞌuchij tu qꞌuinin,
a toc pꞌisaꞌan ten Cꞌuj uch,
caj quimij Cristo tiꞌ a mac a mʌꞌ yerob Cꞌuj.
7 Jaj ix tʌcoj,
ij querex mac,
jeꞌ u quimin tiꞌ a mac jach taj yoroꞌ.
Chen tin tꞌʌn,
ix tiꞌ,
mʌnaꞌ mac cu quimin tiꞌ a mac a jach tsoy yoroꞌ.
8 Chen tiꞌ toy yʌnoꞌonex ich a cꞌasoꞌ,
caj cꞌuchij Cristo quir u quimin toꞌonex,
a baywoꞌ,
ij querex jach manan u yajoꞌonex Cꞌuj.
9 A bajeꞌreroꞌ,
Cꞌuj caj u rucꞌsaj ic siꞌpirex,
quireꞌ tarij Cristo caj jocꞌ u qꞌuiqꞌuer caj quimij ich u cruz.
Rajen,
ij querex Cristo,
caj u tacoꞌonex soc Cꞌuj mʌꞌ ju tsꞌictar yejeroꞌonex caꞌ bin xuruc tꞌʌn.
10 A uchoꞌ,
quireꞌ yʌn ic siꞌpirex,
rajen tic pꞌactex Cꞌuj.
Chen caj quimij u parar Cꞌuj,
jeroj sisquintaꞌb yor Cꞌuj ten Cristo.
Jeroj Cristo,
caj u pꞌeriꞌquintaj ij corex yejer Cꞌuj,
rajen mʌꞌ ju tsꞌajej ic mucꞌyajex Cꞌuj,
quireꞌ riqꞌuij Jesús ich u quimirir.
11 Mʌꞌ jaririꞌ,
cax caj u tacoꞌonex tu quic bin ic mucꞌyajex,
bajeꞌrer,
quiꞌ ij corex yejer Cꞌuj,
quireꞌ ic Jaj Tsꞌurirex caj u pꞌeriꞌquintaj ij corex yejer Cꞌuj.
Adán yejer Cristo
12 Quireꞌ Jesús,
caj u pꞌeriꞌquintaj ij corex yejer Cꞌuj,
rajen mʌꞌ ju bin u tsꞌajex ic mucꞌyajex Cꞌuj,
a toꞌonexoꞌ,
rajen quic bin cuxtarex munt qꞌuin.
Mʌꞌ ja wirej,
quireꞌ tuririꞌ mac,
Adán xan,
rajiꞌ ic chꞌic nunquirex,
rajiꞌ caj u yʌnxchun u yacsic u siꞌpir teꞌ ich yocꞌocab.
Quireꞌ u siꞌpir ic nunquirex Adán,
rajen tij cʌnex,,
rajen xan,
quireꞌ tij cʌnex jeroj cu quimin mac quireꞌ yʌn u siꞌpirob.
13 Cax mʌꞌ toy araꞌac ten Cꞌuj Moisés caꞌ u tsꞌibtej u tꞌʌn ich u joꞌr u witsir Sinaí,
teꞌ ich yocꞌocab tu cotor mac cu manob tu cꞌasir.
Chen tu mʌnaꞌ u tꞌʌn Moisés,
rajiꞌ mʌꞌ ju tac u joꞌr mac,
cax yʌn u siꞌpirob.
Mʌꞌ ja wirej,
mʌꞌ yerob wa yʌn u siꞌpirob.
14 Chen a mac a mʌꞌ ju pʌyob u siꞌpirob an ten bic ic chꞌic nunquirex Adán caj u pʌy u siꞌpir.
Mʌꞌ ja wirej,
Adán caj u pʌy u siꞌpirob quireꞌ mʌꞌ u quibaj a baꞌ araꞌb tiꞌ ten Cꞌuj.
Cax mʌꞌ baxuc u siꞌpirob tu cotor mac,
robob caj quimob xan,
quireꞌ raꞌ u siꞌpirob tu chꞌic chun yejer Adán.
Rajraꞌ tiꞌ yʌn u siꞌpirob a mac hasta cꞌuchij tu qꞌuinin caj u tsꞌibtaj u tꞌʌn Cꞌuj Moisés uch.
A Adánoꞌ,
caj u yʌnxchun ic siꞌpirex teꞌ ich yocꞌocab,
chen caj tarij Jesús,
a mac tetaꞌb ten Cꞌuj tu chꞌic chun tu cotor baꞌ,
raꞌ caj u yacsoꞌonex tu tsoyir Cꞌuj.
15 A baꞌ caj u tsꞌaja toꞌonex Adán quir ij quiminex u tirir tiꞌ,
mʌꞌ quet yejer a baꞌ caj u tsꞌaja toꞌonex Jesúcristo.
Quireꞌ raꞌ u siꞌpir Adán,
cax tuririꞌ mac,
yaꞌab mac caj quimob.
Baxuc xan tiꞌ Jesucristo,
cax tuririꞌ mac,
jeroj,
caj u tsꞌa u tsoyir toꞌonex Cꞌuj,
quireꞌ u yajoꞌonex,
jeroj caj tacoꞌonex Jesús.
16 A Adánoꞌ,
chen tuririꞌ mac,
caj u pʌyaj u siꞌpir,
jeroj caj u rʌc pʌyaj ic siꞌpirex tu cotoroꞌonex,
rajen Cꞌuj cu yaꞌaric:
“Tu cotor mac yʌn u siꞌpir.”
A baꞌ caj u cꞌasquintaj ic chꞌic nunquirex Adan,
a Jesúsoꞌ caj u toc rʌc tsoyquintaj a baꞌ tu betaj Adán uch.
Rajen,
a baꞌ caj u betaj Jesús,
a Cꞌujoꞌ,
cꞌuchaꞌan yor jach tsoy yiric.
17 Quireꞌ ic chꞌic nunquirex Adán,
cax tuririꞌ caj u pʌy u siꞌpir,
jeroj,
tu cotoroꞌonex bin in caj quiminex.
Chen bajeꞌrer,
quireꞌ u jer mac,
rajiꞌ Jesucristo,
rajen a Cꞌujoꞌ,
quireꞌ tsoy tu tꞌʌn caj u jaws ic siꞌpirex.
Rajen a Cꞌujoꞌ,
caj u yiroꞌonex taj ij corex.
Rajen tu cotor mac a cu cꞌʌmic a baꞌ jach manan tsoy tu tꞌʌn Cꞌuj cu bin u reyinticob Cꞌuj munt qꞌuin ich caꞌanan.
18 Mʌꞌ ja wirej,
wa jach taj tuririꞌ mac caj u pʌy u siꞌpir,
raꞌ ic chꞌic nunquirex Adán,
rajen bin in caj quiminex.
Baxuc yejer a jeraꞌ,
u jer mac caj u betaj a baꞌ tajiꞌ,
rajiꞌ Cristo.
Rajen a baꞌ caj u betaj Cristo,
a Cꞌujoꞌ cꞌuchaꞌan yor yiric tu cotor mac tsoy yor quireꞌ jawsaꞌb u siꞌpirob,
rajen bin u caꞌ tsꞌaꞌbir u cuxtarob munt qꞌuinob.
19 Quireꞌ tuririꞌ mac mʌꞌ ju quibaj a baꞌ araꞌb tiꞌ ten Cꞌuj,
rajen caj u yacsaj u siꞌpirob tu cotor mac,
rajen tu cotor mac cu manob tu cꞌasir.
Baxuc xan,
tiꞌ u jer mac tuririꞌ xan,
rajiꞌ Jesucristo,
quireꞌ caj u quibaj a baꞌ araꞌb tiꞌ ten Cꞌuj,
rajen yaꞌab mac irir ten Cꞌuj tsoy yorob.
20 Mʌꞌ ja wirej,
caj araꞌb ten Cꞌuj Moisés caꞌ u tsꞌibtej u tꞌʌn Moisés soc yiric tu cotor mac mun u siꞌpirob caj u yacsob uch.
Bajeꞌrer,
ic toc erex mun a yʌn u sipir ich yocꞌocab,
bayiriꞌ xan,
jach manan ij querex a mun jach tsoy tu tꞌʌn caj u rucꞌs ic siꞌpirex.
21 A uchoꞌ,
tu cotor mac bin u caꞌ quiminob,
quireꞌ caj u yacsob tu sipirob.
Chen Cꞌuj,
quireꞌ jach manan cu yajquinticoꞌonex.
Mʌꞌ ja wirej,
quireꞌ jach tsoy tu tꞌʌn Jesucristo,
jeroj Cꞌuj cꞌuchaꞌan yor yiricoꞌonex tsoy ij corex,
rajen bin in caj cuxtarex munt qꞌuin.