13
Quin chich aric techex.
Tu cotor mac caꞌ u quibej a baꞌ cu yaꞌaric u tsꞌurir ic ruꞌumex.
Mʌꞌ ja wirej,
Cꞌuj caj u tetaj a mac a cu yocar u tsꞌurir ic ruꞌumex.
Cꞌuj caj u tsꞌajaj tiꞌob u beyaj soc ic tsꞌurintiquex.
2 Rajen a mac a mʌꞌ ju quibej a baꞌ cu yaꞌaric u tsꞌurir ic ruꞌumex,
baxuc mʌꞌ ju quibej Cꞌuj a mac a tu tsꞌaj tiꞌob u beyajob.
Rajen bin u caꞌ tsꞌabir u mucꞌyajob wa mʌꞌ ju quibobiꞌ.
3 Mʌꞌ ja wirej,
a mac a acsaꞌb tu beyaj ten u racꞌob,
tsꞌaꞌb u beyaj mʌꞌ quir u jacꞌsic u yorob a mac a cu beticob a tsoyoꞌ.
Acsaꞌb tu beyajob quir u jacꞌsic yor a mac a cu manob tu cꞌasir.
Wa ja cꞌat mʌꞌ ju pecsicob a worex tu cʌjaꞌanechex,
jeroj toc betex a tsoyoꞌ,
soc yiricob tsoyechex.
4 Robob ocob tu tsꞌurir ic ruꞌumex,
cu beyaj tiꞌ Cꞌuj soc u yamtiquechex.
Caꞌ toc chꞌajex sajquirex tiꞌob,
quireꞌ raꞌ u beyajob quir u tsꞌic u mucꞌyajob tiꞌ a mac a cu manob tu cꞌasir.
Wa mʌꞌ cꞌas caj a betex mʌꞌ baꞌwir ca chꞌiquirex sajquirex tiꞌob.
5 Rajen,
caꞌ a quibex tiꞌ a mac acsaꞌb tu beyaj ta ruꞌumex.
Quireꞌ a werex taj ca betiquex quireꞌ ca wuꞌyiquex ta worex caꞌ a quibex u tꞌʌnob.
6 Rajen,
caꞌ a boꞌotex u boꞌorir u cꞌʌb u tsꞌurirob a ruꞌumex.
Mʌꞌ ja wirej,
robob cu beyajob tiꞌ Cꞌuj,
rajen quir u tsꞌocsicob u beyajob Cꞌuj.
Caꞌ a boꞌotex tiꞌob.
7 Wa mʌꞌ a boꞌtmʌnex a boꞌorex,
toc boꞌtex.
Boꞌotex a boꞌorex yejer gobierno,
cax a mac a cu cꞌʌmicob u boꞌor gobierno.
Sʌjtex a mac tsoy a sʌjtiquexoꞌ.
Quiꞌ tꞌʌnex a mac tsoy a tꞌʌniquexoꞌ.
8 Caꞌ bin boꞌotac a boꞌorex jariꞌ caꞌ a chen pacran yajquintex a bʌjex.
Quireꞌ a cu yajquintic mac caj u nupꞌsaj tu cotor a baꞌ cu yaꞌaric ich u tꞌʌn Moisés.
9 Uꞌyex baꞌ cu yaꞌaric ich u tꞌʌn Moisés:
“Mʌꞌ ja manex yejer u racꞌ mac.
Mʌꞌ ja yʌn quinsiquex mac.
Mʌꞌ ja waꞌcriquex baꞌ.
Mʌꞌ ja pachtiquex a baꞌ yʌn mac.”
Yʌn tun,
u jer yaꞌab baꞌ ich u tꞌʌn Cꞌuj a ricꞌsaꞌan ten Cꞌuj soc caꞌ ic betex.
Tu cotor a jeꞌ tꞌʌnaꞌ,
toc nupꞌaꞌan wa ca betiquex a baꞌ quin waꞌaric techex a jeraꞌ:
“Yajquintex mac irej a wʌcꞌʌs bʌjiriꞌ ca yajquintic.”
10 Mʌꞌ ja wirej,
wa ca yajquintiquex mac,
mʌꞌ ja bin a cꞌasquintiquex mac.
Rajen wa ca yajquintiquex mac,
ca quibiquex tu cotor a baꞌ tsꞌibaꞌan ich u tꞌʌn Cꞌuj.
11 Caꞌ a quibex tu cotor a jeꞌ tꞌʌnaꞌ,
a tan tin waꞌaric techex quireꞌ jach tabar ic Jaj Tsꞌurirex u yuꞌur.
Tsireꞌej,
a manex ich a cꞌasoꞌ.
Tsꞌajaꞌan a worex a quiꞌ acsiquex ta worex.
A ray u qꞌuininoꞌ caj ij cacsex tij corex ij querex mʌꞌ jach tabar u qꞌuinin quir u yuꞌur ic Jaj Tsꞌurirex,
chen bajeꞌrer jach tabar u cꞌuchur ij Jaj Tsꞌurirex quir u taquicoꞌonex.
12 A jeꞌ ruꞌumaꞌ,
tu cʌjaꞌanoꞌonex irej wa tiꞌ yʌn tu yacꞌbirir quireꞌ yʌn u siꞌpirob a teraꞌ ich yocꞌocab.
Chen bajeꞌrer,
tin tꞌʌn,
tabar u sastar.
Mʌꞌ ja wirej,
tabar u cꞌuchur Cristo,
caꞌ bin cꞌuchuc,
jeꞌ u rucꞌsic tu cotor u siꞌpir a teꞌ yʌnaꞌ.
A ray u qꞌuininoꞌ,
irej wa cu sastar.
Rajen caꞌ ic pꞌʌtex a baꞌ cu beticob a mac a tiꞌ toy cu manob tu yacꞌbirir quireꞌ robob mʌꞌ yerob Cristo.
Tsꞌajaꞌan ij corex ij cacsex tij corex tiꞌ Cꞌuj soc cꞌuchaꞌan ij corex ic mucꞌtex a cꞌasoꞌ,
a cu tar toꞌonex.
Caꞌ manacoꞌonex tu sasirir.
13 Caꞌ manacoꞌonex tu tsoyir an ten bic mac a yʌn u sasirir Cristo tu yorob.
Mʌꞌ jic yʌn manex tu yacꞌbirir.
Mʌꞌ jic yʌn cajchʌjʌrex.
Mʌꞌ jic yʌn manex yejer xquic.
Mʌꞌ jic yʌn manex tu cꞌasir.
Mʌꞌ jic yʌn tsꞌictarex.
Mʌꞌ ju yʌn qꞌuextar ij corex.
14 Caꞌ manacoꞌonex yejer Jesucristo ic Jaj Tsꞌurirex soc mʌꞌ ic pachiquex tij corex ic betex a baꞌ jach cꞌasoꞌ.