A Cꞌujoꞌ taj cu bin u taꞌquic u joꞌr mac
2
Arej in waꞌarej tiꞌ a mac a cu pʌqꞌuic u pach tu cotor mac,
wa yʌn u siꞌpir.
Rajiꞌ mʌꞌ cꞌuchaꞌan yor yaꞌaric a ju bʌjiriꞌoꞌ:
“A tenoꞌ,
quij,
mʌnaꞌ in siꞌpir”,
quij,
cax maquiꞌ.
Mʌꞌ ja wirej,
a baꞌ cu betic mac baxuc raꞌiriꞌ cu betic xan.
Rajiꞌ cu yaꞌaric:
“Mʌꞌ tsoy a baꞌ ca betej”,
quij,
baxuc raꞌiriꞌ mʌꞌ tsoy a baꞌ cu betic xan.
2 Chen ij querex wa Cꞌuj cu yaꞌaric mac a cu betic baxuc aroꞌ toc yʌn u siꞌpirob.
Bayiriꞌ xan,
ij querex a baꞌ cu yaꞌaric Cꞌuj rajiꞌ taj.
3 Rajen tu cotor mac mʌꞌ tsoy ju tus tucric wa mʌꞌ ju bin u boꞌotic u boꞌorir u siꞌpirob.
Jeꞌ u boꞌoticob u boꞌorir u siꞌpirob,
quireꞌ an ten bic rajiꞌ caj u tacaj u joꞌr u racꞌob,
baxuc Cꞌuj cu bin taquic u joꞌrob xan.
Mʌꞌ ja wirej,
quet bayiriꞌ,
caj betob xan.
4 Quireꞌ rajiꞌ mʌꞌ ju yirej wa jach tsoy a Cꞌujoꞌ,
mʌꞌ yer xan wa Cꞌuj cu mucꞌtic baꞌ,
quireꞌ jach nemʌꞌ bic a Cꞌujoꞌ,
rajen ix tʌcoj mʌꞌ ju tucrej Cꞌuj.
Mʌꞌ ju yirej,
rajraꞌ nemʌꞌ bic Cꞌuj quireꞌ cu pajic u qꞌuinin caꞌ bin u cꞌaxej yor mac,
soc u pꞌʌtic a cꞌasoꞌ.
5 Chen rajiꞌ mʌꞌ ju yubaj a baꞌ cu yaꞌaric Cꞌuj,
mʌꞌ u cꞌat u cꞌaxic yor,
rajen cu jach tꞌajar u boꞌorir u siꞌpir,
bin u caꞌ u cꞌʌmej caꞌ bin cꞌuchuc tu qꞌuinin u xur tꞌʌn.
6 A raꞌ u qꞌuinin tunoꞌ,
cu bin tsꞌabir ten Cꞌuj tiꞌ jujunturoꞌonex a baꞌ jach taj an ten bic caj ic betex teꞌ ich yocꞌocab uch a cuxaꞌanoꞌonex uch.
7 A Cꞌujoꞌ,
jeꞌ u tsꞌic toꞌonex ij cuxtarex munt qꞌuin,
wa rajraꞌ ic manex tu tsoyir,
quireꞌ ij cꞌat ij cuxtarex ich caꞌanan.
Jeroj,
wa quic manex tu tsoyir,
a Cꞌujoꞌ,
jeꞌ u quiꞌ acsicoꞌonexeꞌ soc ij cuxtarex munt qꞌuin.
8 Chen a Cꞌujoꞌ,
bin u caꞌ tsꞌictar yejer a mac a cu yaꞌaricoꞌ nojnoj u bʌjiriꞌ cu tucric.
Rajen bin u caꞌ tsꞌabir u mucꞌyaj ten Cꞌuj,
quireꞌ mʌꞌ ju quibaj u tajir u tꞌʌn Cꞌuj,
chen cu man tu cꞌasir.
9 Tu cotor mac a yʌn u siꞌpir ich yocꞌocab,
cax u winiquirob israel bin u caꞌ tsꞌabir u mucꞌyajob ten Cꞌuj,
quireꞌ raꞌ tu yʌn uꞌyob u tꞌʌn Cꞌuj uch,
pachir a mʌꞌ ju winiquirob israel cu bin tsꞌabir u mucꞌyaj ten Cꞌuj.
10 Chen a mac a cu manob tu tsoyir,
a Cꞌujoꞌ jeꞌ u yiric nenoꞌj.
A Cꞌujoꞌ,
jeꞌ u tucric jach tsoy,
rajen cu bin u quiꞌtar u yor,
quireꞌ mʌnaꞌ baꞌ cu tucric.
Baxuc cu bin yubicob,
cax u winiquirob israel,
cax mʌꞌ ju winiquirob israel.
11 A Cꞌujoꞌ,
quet u rʌc iric tu cotor mac,
quireꞌ tʌc quet cu bin boꞌtbir.
12 Robob,
a mac a mʌꞌ yerob u tꞌʌn Cꞌuj a caj u tsꞌibtaj Moisésoꞌ,
wa yʌn u siꞌpirob,
bin u caꞌ tsꞌabir u mucꞌyajob ten Cꞌuj,
chen mʌꞌ ju tocar u joꞌrob ten u tꞌʌn Moisés.
Wa caj u pʌyajob u siꞌpirob a mac a toc yʌn a baꞌ tsꞌibtaꞌb ten Moisés uch,
raꞌ cu bin taquic u joꞌrob,
u tꞌʌn Moisés.
13 Mʌꞌ ja wirej,
a Cꞌujoꞌ,
mʌꞌ cꞌuchaꞌan yor yaꞌaric taj yor a mac a mʌꞌ u quibej,
a cu chen uꞌyic u tꞌʌn Moisés,
chen mʌꞌ ju betej a baꞌ cu yaꞌaric.
Chen a Cꞌujoꞌ,
cꞌuchaꞌan yor yaꞌaric tiꞌ mac,
taj yor a cu quibic a baꞌ cu yaꞌaraꞌ tiꞌ.
14 Iric a mac a mʌꞌ ju winiquirob israel.
Robob,
mʌnaꞌ tiꞌ u tꞌʌn Moisés,
chen yʌn qꞌuin robob cu beticob a baꞌ cu yaꞌaric ich u tꞌʌn a caj u tsꞌibtaj Moisés.
Quireꞌ tu yorob,
yerob a baꞌ jach tsoy.
Rajen a baꞌ cu tucricob,
raꞌ u tꞌʌn Moisés tiꞌob.
15 A mac a mʌꞌ ju winiquirob israel wa cu beticob a baꞌ jach tsoyoꞌ,
raꞌ cu yesic yerob tu yorob a baꞌ cu yaꞌaric ich u tꞌʌn Moisés.
Mʌꞌ ja wirej,
robob yerob tu yorob,
wa ber cu beticob a tsoyoꞌ,
yerob xan,
wa ber cu beticob a cꞌasoꞌ.
Bayiriꞌ xan,
yʌn qꞌuin cu tucricob:
“Biquinin caj in betaj cꞌas?”
Yʌn qꞌuineꞌ,
yerob caj u betob a tsoyoꞌ.
16 Mʌꞌ ja wirej,
caꞌ bin cꞌuchuc tu qꞌuinin a pꞌisaꞌan ten Cꞌuj,
rajiꞌ cu bin jocꞌsic u parar Jesucristo,
soc rajiꞌ cu bin u tsꞌic u mucꞌyaj tiꞌ a mac a cu manob tu cꞌasir,
cax a baꞌ caj u muc u betob.
Baxuc caj yaꞌaraj ich u jach tsoyir u tꞌʌn Cꞌuj,
a caj in tsecꞌtaj uch.
U winiquirob israel yejer u tꞌʌn a tsꞌibtaꞌb ten u nunquir Moisés
17 Arej in waꞌarej techex a mac u winiquirob israel.
Rajiꞌ cu tucric tu quiꞌ cʌnantaj a baꞌ,
caj u tsꞌibtaj u nunquir Moisés uch,
rajen u nonoj bʌjiriꞌ cu tus tsicbar u bʌjiriꞌ tus aꞌaric wa jach manan yajbir ten Cꞌuj.
18 Rajiꞌ aꞌarej xan,
yer a baꞌ u cꞌat Cꞌuj.
Rajiꞌ aꞌarej xan,
yer a baꞌ tsoy u betic,
bayiriꞌ rajiꞌ aꞌarej xan,
yer a baꞌ mʌꞌ tsoy u betic,
quireꞌ caj u cʌnaj a baꞌ caj u tsꞌibtaj u nunquir Moisés uch.
19 U bʌjiriꞌ cu tus tucric yer bic tabar u camsic a mac a mʌꞌ yer u tꞌʌn Moisés.
Rajiꞌ aꞌarej bin u caꞌ u sasiquint u tucur a mac an ten bic tiꞌ yʌnob ich yacꞌbirir,
quireꞌ mʌꞌ yerob Cꞌuj.
20 Rajiꞌ cu tus tucric cu camsic a mac a mʌꞌ yerob baꞌ tiꞌ Cꞌuj.
Rajiꞌ cu tus tucric,
wa cꞌuchaꞌan yor u camsic a mac a mʌꞌ camsaꞌb tiꞌ a baꞌ tiꞌ yʌn ich u tꞌʌn Cꞌuj.
Rajiꞌ cu tus tucric caꞌ bin u pʌy u berob a mac a mʌꞌ toy u quiꞌ cʌnob,
quireꞌ rajiꞌ u tus yer a baꞌ tsꞌibaꞌan ich u tꞌʌn Cꞌuj a uchbenoꞌ,
a baꞌ tsoy caꞌ u cʌnej mac.
21 Jaj ix tʌcoj,
wa ber cu camsic mac,
tin tꞌʌn,
u bʌjiriꞌ mʌꞌ toy u quiꞌ cʌniꞌ a baꞌ cu camsic.
Rajiꞌ cu tsecꞌtic tu cu cꞌujinticob Cꞌuj wa mʌꞌ tsoy u yaꞌcric baꞌ,
jaj ix tʌcoj u berer yaꞌcric baꞌ.
22 Rajiꞌ u winiquirob israel,
a cu yaꞌaric wa mʌꞌ tsoy mac u pʌyic xquic,
a yʌn u mamoꞌ,
chen tin tꞌʌn,
rajiꞌ cu pʌyic xquic a yʌn u mamoꞌ.
Bayiriꞌ xan,
rajiꞌ cu yaꞌaric mʌꞌ tsoy tu tꞌʌn wa mac cu betic u tus cꞌuj.
Chen tin tꞌʌn,
rajiꞌ u berer yaꞌcric a baꞌ tiꞌ yʌn tu cu binob u tus cꞌujinticob cꞌuj,
a mac a mʌꞌ yerob Cꞌuj,
a baꞌ mʌꞌ tsoy tu tꞌʌn.
23 Cu yubic jach tus carem,
quireꞌ yʌn tiꞌ a baꞌ tsꞌibtaꞌb ten u nunquir Moisés,
chen mʌꞌ ju betic a baꞌ cu yaꞌaric ich u tꞌʌn Moisés,
rajen cu pꞌastic Cꞌuj.
24 Rajiꞌ u winiquirob israel caj u tus betob a baꞌ cu yaꞌaric ich u tꞌʌn Cꞌuj tu caj u yaꞌaraj:
“Quireꞌ raꞌ u sipirob u winiquirob israel,
rajen pꞌastaꞌb tiꞌ Cꞌuj ten a mac a mʌꞌ ju winiquirob israel.”
Baxuc caj tsꞌibtaꞌb ich u tꞌʌn Cꞌuj uch.
25 Tin tꞌʌn,
wa caj u quibaj a baꞌ tsꞌibtaꞌb ten Moisés uch,
jach tsoy cu bin yubic tu yor a mac u winiquirob israel.
Chen wa mʌꞌ ju quibej a baꞌ tiꞌ yʌn ich u tꞌʌn Moisés,
a ray u qꞌuininoꞌ,
caj waysaꞌbob tiꞌ mʌꞌ ju winiquirob israel.
26 Bayiriꞌ xan,
a mac a mʌꞌ ju winiquirob israel bin u caꞌ waysaꞌbirob irej wa ju winiquirob israel.
Baxuc cu bin tar tiꞌ,
wa cu quibic a baꞌ tsꞌibtaꞌb ten Moisés.
27 Mʌꞌ ja wirej,
a techexoꞌ,
u winiquirechex israel,
bin u caꞌ tacbir a joꞌrex ten a mʌꞌ ju winiquirob israel,
soc u tsꞌabʌr a mucꞌyajex ten Cꞌuj.
Quireꞌ a techexoꞌ,
mʌꞌ ja quibex a baꞌ tiꞌ yʌn ich u tꞌʌn Moisés,
cax toc yʌn techex toc rʌc tsꞌibaꞌan u tꞌʌn Moisés,
cax caj a cꞌʌmex a tsꞌiriquex a bʌqꞌuerex an ten bic caj yaꞌaraj Cꞌuj uch.
Mʌꞌ ja wirej,
robob a mʌꞌ ju winiquirob israel caj u quibob a baꞌ tiꞌ yʌn ich u tꞌʌn Moisés,
cax mʌꞌ tu cꞌʌmaj u tsꞌiric u bʌqꞌuer an ten bic nanij cu beticob u winiquirob israel,
rajen jeꞌ u taquicob a joꞌrex a mʌꞌ u winiquirob judío.
28 Mʌꞌ rajiꞌ yʌnin Cꞌuj,
cax u parar u nunquir Abraham,
cax ir bajen u wich u winiquirob israel,
mʌꞌ rajiꞌ yʌnin Cꞌuj.
Mʌꞌ rajiꞌ yʌnin Cꞌuj quireꞌ caj u cꞌʌmaj u tsꞌiric u bʌqꞌuer an ten bic nanij cu betic u winiquirob israel.
29 Uꞌyex baꞌ quin wac,
a werex wa mac rajiꞌ yʌnin Cꞌuj,
rajiꞌ a yʌn Cꞌuj tu yor.
A baxucoꞌ,
jach taj tsꞌiraꞌan u bʌqꞌuer an ten bic nanij cu betic u winiquirob israel,
a raꞌ u qꞌuininoꞌ cu beyaj Cꞌuj tu yor yejer u Tajꞌor u Pixam Cꞌuj.
Mʌꞌ ja wirej,
robob jach tsoy irir ten Cꞌuj,
mʌꞌ chen ich u racꞌob xan.