3
Wa jach taj aroꞌ,
bic tabar jach manan tsoy u winiquirob israel,
chen u jer a mʌꞌ ju winiquirob israel mʌꞌ tsoyiꞌ?
Baꞌwir tun,
cu tsꞌiricob u bʌqꞌuerob an ten bic nanij cu beticob u winiquirob israel?
2 Mʌꞌ ja wirej,
jach manan tsoy tiꞌob.
Quireꞌ a Cꞌujoꞌ,
caj u batꞌan tsꞌaja tiꞌob u winiquirob israel u tꞌʌn soc u quiꞌ cʌnanticob.
3 Chen wa yʌn jun yarob u winiquirob israel mʌꞌ ju quibob Cꞌuj,
ca tucriquex wa Cꞌuj mʌꞌ ju bin u nupꞌsic a baꞌ caj u toc araj tiꞌob uch,
cax a jun yarob u winiquirob israel mʌꞌ u quibobiꞌ?
4 Aroꞌ mʌꞌ tajiꞌ,
a Cꞌujoꞌ,
taj cu tsicbar,
cax wa mac cu tus.
Quireꞌ baxuc tu tsꞌibaꞌan tu cu yaꞌaric a mac tsꞌab u tucur ten Cꞌuj a tarij tu yor:
A baꞌ cu yaꞌaric Cꞌuj cu jocꞌar u tajir.
Baxuc jeꞌ u jocꞌar u tsoyir cax cu taquicob u joꞌr.
Baxuc tsꞌibaꞌan uch.
5 Uꞌyex baꞌ cu yaꞌaric a mac chich u joꞌroꞌ bajeꞌrer:
“Wa raꞌ cu yesic taj yor Cꞌuj,
tu quin man tu cꞌasir biquinin cu coyen taquic in joꞌr quir in mucꞌyaj,
rajen mʌꞌ tsoy a Cꞌujoꞌ”,
baxuc cu tus aꞌaric a mac chich u joꞌroꞌ.
6 Wa jix tʌcoj cu coyen taquic u joꞌr mac Cꞌuj.
Jeꞌ wa ju cꞌuchur u yor Cꞌuj u taꞌquic u joꞌr mac tu cotor a yʌn u siꞌpir?
Mʌꞌ ju cꞌuchur u yor Cꞌuj u taꞌquic u joꞌr mac.
7 Uꞌyex baꞌ cu yaꞌaric a mac a chich u joꞌroꞌ:
“A Cꞌujoꞌ,
quij,
mʌꞌ ju yʌn tsꞌic in mucꞌyaj quireꞌ quin tus.
Baxuc cu tus aric mʌꞌ ja wirej,
quireꞌ quin tus,
rajiꞌ cu yesaꞌr tiꞌ mac bic tabar jach carem Cꞌuj,
bayiriꞌ xan,
bic tabar jach taj u tꞌʌn”,
baxuc cu tsicbar a mac a chich u joꞌroꞌ.
8 Rajen,
rajiꞌ cu yaꞌaric:
“Cax manex tic siꞌpirex,
quireꞌ jach tsoy caꞌ ij quesex jach taj Cꞌuj”,
baxuc cu tus aꞌaric.
Bayiriꞌ xan,
cu tus pʌqꞌuicob in pach quireꞌ cu yaꞌaricob baxuc quin camsic xan,
aroꞌ mʌꞌ tajiꞌ.
Jach tsoy,
ix tʌcoj caꞌ tsꞌabʌc u mucꞌyaj ten Cꞌuj tiꞌob,
quireꞌ cꞌas cu tucricob ten,
quij Pablo.
Tu cotoroꞌonex rʌc yʌn ic siꞌpirex
9 Bic tabar tuneꞌ,
a tenob u winiquirenob israel jach manan tsoyenob quireꞌ u winiquirenob israel,
chen u jer mac,
a mʌꞌ ju winiquirob israel,
mʌꞌ tsoyiꞌ.
Mʌꞌ tajiꞌ,
quireꞌ tic toc araj techex wa tu cotoroꞌonex yʌn ic siꞌpirex,
cax u winiquiren israel,
cax mʌꞌ ju winiquiren israel.
10 Baxuc tiꞌ tsꞌibaꞌan ich u tꞌʌn Cꞌuj uch xan:
A teꞌ ich yocꞌocab,
quij yaꞌar Cꞌuj,
mʌnaꞌ mac taj yor,
tuririꞌ.
11 Mʌnaꞌ mac u cꞌat yer a baꞌ u cꞌat Cꞌuj,
mʌꞌ u cꞌat u yet man yejer Cꞌuj xan.
12 Caj u rʌc pꞌʌtob a baꞌ caj yaꞌaraj Cꞌuj quir u bin ich u jer tus cꞌuj.
Mʌnaꞌ mac cu man tu tsoyir,
tuririꞌ.
13 An ten bic u mucnʌj tu cu muquicob u baquer mac,
baxuc u chiꞌob mac,
irej wa tuꞌ u chiꞌob,
quireꞌ cu cʌrʌxtꞌʌnticob mac.
Robob tu cu tsicbarob yejer mac,
cu tusaricob mac.
U tꞌʌnob a cu tsicbarob a cu jocꞌar tu chiꞌob,
irej u yʌquir u coj can,
raꞌ irej wa cu quinsicob mac.
14 Robob nanij cu cʌrʌxtꞌʌnticob mac,
bayiriꞌ,
nanij u tsꞌictarob.
15 U chen cꞌat u quinsicob u jer mac.
16 Cax tu cu binob cu choquinticob u yor mac.
17 Mʌꞌ ju sisquinticob u yorob mac tu cʌjaꞌanobiꞌ.
18 Mʌꞌ ju sʌjticob Cꞌuj.
Baxuc caj tsꞌibtaꞌb ich u tꞌʌn Cꞌuj uch tiꞌ mac.
19 A toꞌonexoꞌ,
ij querex a baꞌ tan tu yaꞌaric Cꞌuj,
aroꞌ cu yaꞌaric biquiraꞌ u winiquirob israel.
A baywoꞌ,
mʌꞌ cꞌuchaꞌan yor u tusaricob:
“A tenoboꞌ,
mʌnaꞌ in siꞌpirob.”
Mʌꞌ ja wirej tu cotor mac bin u caꞌ ʌcʌtan tiꞌ Cꞌuj,
soc u nunquicob tiꞌ u siꞌpirob.
Mʌꞌ ja wirej,
u tꞌʌn Moisés,
a baꞌ cu sayʌrob tu pachob u cʌnicob u winiquirob israel.
Raꞌ cu yaꞌaric bic tabar caꞌ cuxracob.
20 Rajen mʌnaꞌ mac cꞌuchaꞌan yor yaꞌarej:
“Taj in wor ʌcʌtan tu wich Cꞌuj,
quireꞌ caj in toc betaj tu cotor a baꞌ cu yaꞌaric ich u tꞌʌn Moisés.”
Mʌꞌ ja wirej,
a baꞌ tsꞌibaꞌan ich u tꞌʌn Moisés cu chen esic toꞌonex bic tabar quic manex tu cꞌasir.
A Cꞌujoꞌ cu chen taquicoꞌonex wa quij cacsiquex tij corex tiꞌ
21 Chen bajeꞌrer Cꞌuj caj u yesaj toꞌonex bic tabar u rucꞌsic ic siꞌpirex tic pixamex.
Mʌꞌ raꞌ u tꞌʌn Moisés a cu sayʌrob tu pach u cʌnicob u winiquirob israel.
Chen ich a raꞌiriꞌ u tꞌʌn,
a xiboꞌ,
a tsꞌaꞌb u tucur ten Cꞌuj tiꞌob caj u tsꞌibtob jeꞌ u taquicoꞌonex Cꞌuj biqꞌuineꞌ.
22 Chen bajeꞌrer,
tu cotor mac a cu quibic Jesucristo,
a Cꞌujoꞌ cu rucꞌsic u siꞌpir tu pixam.
Baxuc cu bin u betic tiꞌ a mac a cu quibic,
quireꞌ a Cꞌujoꞌ,
pꞌeriꞌ yiricoꞌonex an ten bic mac a yʌn u siꞌpirob.
23 Mʌꞌ ja wirej,
biquinin Cꞌuj pꞌeriꞌ yiricoꞌonex?
Quireꞌ tu cotoroꞌonex caj ij cacsex ic siꞌpirex.
Rajen,
a Cꞌujoꞌ,
mʌꞌ cꞌuchaꞌan yor yaꞌarej:
“Jach tsoyechex”,
quireꞌ mʌnaꞌ mac cu man tu tsoyir an ten bic Cꞌuj u cꞌat.
24 Quireꞌ raꞌ tu yajquin toꞌonex an ten bic tsoy tu tꞌʌn Cꞌuj.
Mʌꞌ ja wirej,
caj u sija toꞌonex u cuxtar munt qꞌuin a raꞌ u qꞌuininoꞌ caj ij cacsaj tij corex tiꞌ Jesucristo.
Mʌꞌ boꞌorir u caꞌ,
quireꞌ Jesús caj u boꞌotaj u boꞌorir ic siꞌpirex.
25 Quireꞌ a Cꞌujoꞌ caj u tacoꞌonex.
Mʌꞌ ja wirej,
u bʌjiriꞌ Jesús,
caj u boꞌotaj u boꞌorir ic siꞌpirex.
Rajen mʌꞌ ju bin tsꞌabir ic mucꞌyajex quireꞌ jocꞌ u qꞌuiqꞌuer Jesús toꞌonex,
caj quimij toꞌonex.
Mʌꞌ ja wirej,
a Cꞌujoꞌ caj u cꞌubaj Jesús quir u quimin soc u jawsic ic siꞌpirex wa quic chen acsic ij corex tiꞌ.
A baywoꞌ,
Cꞌuj caj u yesaj toꞌonex bic jach taj u yor a raꞌ u qꞌuinin caj u mucꞌtaj u siꞌpirob a mac cuxaꞌanob uch,
a mac a mʌꞌ ju quibob Cꞌuj uch.
26 Barej,
caj quimij Jesús ich cruz,
aroꞌ cu yesic bic tabar caj u yajquin toꞌonex Cꞌuj,
quireꞌ u cꞌat ij querex tsoy cu betic a Cꞌujoꞌ,
bayiriꞌ xan,
cu rucꞌsic u siꞌpir a mac a cu yacsic tu yor tiꞌ Cristo.
27 Quireꞌ Jesucristo,
caj u rucꞌsaj ic siꞌpirex,
rajen quij cacsiquex tij corex tiꞌ.
Rajen mʌꞌ cꞌuchaꞌan ij corex caꞌ ij carex:
“In bʌjiriꞌ quin taquic in bʌj tuj in quibaj a baꞌ tsꞌibaꞌan ich u tꞌʌn Moisés.”
Rajiꞌ mʌꞌ ju bin u taquic mac.
28 Tij toc uꞌyex bic tabar Cꞌuj cu bin u rucꞌsic toꞌonex ic siꞌpirex,
wa quij cacsiquex ij corex tiꞌ Cristo.
Mʌꞌ jij cuꞌyex wa Cꞌuj cu bin u rucꞌsic toꞌonex tic siꞌpirex,
wa quij quibiquex u tꞌʌn a tu tsꞌibtaj Moisés uch.
29 Ca chen tucriquex wa Cꞌuj,
rajiꞌ Cꞌuj chen tiꞌ u winiquirob israel?
Mʌꞌ wa rajiꞌ u Cꞌuj xan,
cax mʌꞌ ju winiquirob israel?
Rajiꞌ jach taj,
rajiꞌ xan,
u Cꞌujir,
cax tiꞌ a mac a mʌꞌ ju winiquirob israel.
30 Quireꞌ tuririꞌ Cꞌuj yʌn,
rajen a Cꞌujoꞌ cꞌuchaꞌan yor yiric mac taj yor,
a cu yacsic tu yor tiꞌ Cristo,
cax u winiquirob israel,
cax wa mʌꞌ ju winiquirob israel.
31 Rajen,
mʌꞌ tajiꞌ wa mac cu yaꞌaric toꞌonex caj ic pꞌʌtex a baꞌ tsꞌibtaꞌb ten Moisés raꞌ u qꞌuinin caj ij cacsajex ij corex tiꞌ Jesucristo.
Mʌꞌ ja wirej,
raꞌ u qꞌuinin caj ij quiꞌ acsex ij corex,
jeroj raꞌ u qꞌuininoꞌ caj yʌnxchun ij quibiquex Cꞌuj.