Timoteo u yet binacob yejer Pablo yejer Silas
16
Pablo yejer Silas caj cꞌuchob ich u cajar Derbe yejer u cajar Listra.
Ti taroꞌ caj u nupꞌajob Timoteo a yacsmʌn tu yoriꞌ.
U nʌꞌ Timoteo u winiquir judío a mac a yacsmʌn tu yor xan,
chen u tet Timoteo u winiquir griego.
2 A mac a yacsmʌnob tu yorob ich u cajarob Listra yejer u cajar Iconio cu yaꞌaricob:
“Jach tsoy a Timoteojoꞌ.”
3 Pablo u cꞌat u pʌyic caꞌ xic beyaj yejer Timoteo.
Chen caj yʌn tsꞌiraꞌb u yotꞌer Timoteo an ten bic cu naj beticob u winiquirob judío soc caꞌ xic yejer Pablo.
Mʌꞌ ja wirej,
tar cu bin ich u winiquirob judío quireꞌ robob u toc erob u tet Timoteo u winiquir griego.
Mʌꞌ u cꞌat u tsꞌiquintaꞌr Timoteo ten Pablo u winiquirob judío,
rajen tsꞌiraꞌb Timoteo.
4 Caj u rʌc tsicbʌtob tiꞌ yacsmʌnob tu yorob a baꞌ araꞌan ten a mac a tetaꞌb ten Jesús quir u tsecꞌtaꞌr u tꞌʌn yejer a baꞌ araꞌan ten u jach tsꞌurirob a yacsmʌnob tu yorob a nuxiboꞌ a tiꞌ yʌnob ich u cajar Jerusalén.
Mʌꞌ ja wirej,
caj u tsicbʌtajob a baꞌ araꞌan tiꞌob a baꞌ caꞌ u quibob a mʌꞌ u winiquirob judío.
5 Rajraꞌ cu chichquinticob yorob a yacsmʌnob tu yorob tu cu manob Pablo yejer Silas.
Tsꞌajaꞌan yor jach pimtarob jujuntur u qꞌuinin.
Pablo caj u wʌyʌcꞌtaj xib a tiꞌ yʌnoꞌ ich u ruꞌumin Macedonia
6 Barej caj u chꞌʌctajob u ruꞌumin Frigia yejer u ruꞌumin Galacia,
mʌꞌ chaꞌb u bin Pablo yejer u yet beyaj ten u Tajꞌor u Pixam Cꞌuj ich u ruꞌumin Asia.
Mʌꞌ chaꞌb u tsecꞌticob u tꞌʌn Jaj Tsꞌur ti taroꞌ.
7 Barej caj cꞌuchob tu xur u ruꞌumin Misia,
caj u tucrajob u binob ich u ruꞌumin Bitinia.
Chen mʌꞌ chaꞌb u binob ten u Tajꞌor u Pixam Cꞌuj Jesús.
8 Jeroj caj u potmastajob tu xur u ruꞌumin Misia hasta caj cꞌuchob ich u jor u chemin cꞌacꞌnab u cꞌabaꞌ Troas.
9 A ray acꞌbiroꞌ,
Pablo caj u wʌyʌcꞌtaj xib.
Caj u yiraj chꞌiquicbar u xibir u ruꞌumin Macedonia.
Chich caj u yaꞌaraj tiꞌ:
“Cojen ich u ruꞌumin Macedonia Pablo caꞌ a yam tenob.”
10 Barej caj tsꞌoc u wʌyʌcꞌtic xib,
a ju xibir u ruꞌumin Macedonia.
Caj u sebquintaj u bin Pablo yejer u yet beyajob.
Caj u tsꞌaj u bʌj,
quij Lucas,
ich u ruꞌumin Macedonia.
Caj binob u cʌxtej chem soc u binob.
Yerob jach taj xan,
tan u pʌyaꞌr u berob ten Cꞌuj quir u tsecꞌtaꞌr u jach tsoyir u tꞌʌn Cꞌuj ich u ruꞌumin Macedonia.
Pablo yejer Silas ich u cajar Filipos
11 Caj rucꞌoꞌonex ich u jor u chemin Troas,
caj binoꞌonex,
quij Lucas,
yejer u chemin cꞌacꞌnab.
Jach taj caj binoꞌonex ich u petenin cꞌacꞌnab u cꞌabaꞌ Samotracia.
Caj sasij caj binoꞌonex yejer chem quir ij cꞌuchurex ich u cajar Neápolis.
12 Caj jocꞌoꞌonex,
quij Lucas,
ich chem,
caj binoꞌonex ich u cajar Filipos.
Ti cʌjaꞌan gobernador tu ruꞌumin Macedonia.
Jach coꞌoch u cajar Filipos,
mʌnaꞌ u jer jach coꞌoch ich u ruꞌumin Macedonia.
Caj bin u winiquirob romano ich u cajar Filipos quir u tsꞌurinticob u winiquirob filipos.
Tiriꞌ pꞌatoꞌonex yaꞌab u qꞌuinin ich u cajar Filipos.
13 Caj cꞌuchij tu qꞌuinin u jeꞌrar u winiquirob judío caj jocꞌoꞌonex,
quij Lucas,
tu cajar Filipos.
Caj binoꞌonex tu cu muchꞌquinticob u bʌjob u winiquirob judío quir u cꞌujinticob Cꞌuj.
Aroꞌ tiꞌ yʌn ich chiꞌ sʌyab.
U winiquirob judío ix tiꞌ cu naj tꞌʌnicob Cꞌuj ich u chiꞌ chan sʌyab.
Jeroj caj curʌjoꞌonex caꞌ ic tsicbʌtex tiꞌ u tꞌʌn Cꞌuj.
Tiꞌ yʌn xquic a tiꞌ muchꞌaꞌanobeꞌ.
14 Tiꞌ yʌn tuririꞌ xquic tub muchꞌaꞌanob a mac cu jach cꞌujintic Cꞌuj.
Rajiꞌ yubaj a baꞌ caj u tsicbʌtaj Pablo.
U cꞌabaꞌ a xquicoꞌ,
Lidia.
Yʌjcanin baraꞌan chʌc nocꞌ.
Raꞌ cʌjaꞌan uch ich u cajar Tiatira.
Cꞌuj yamtej Lidia quir u cꞌʌmic a baꞌ araꞌb ten Pablo.
15 Barej caj acsaꞌb jaꞌ tu joꞌr Lidia yejer tu cotor mac a tiꞌ yʌn tu yatoch Lidia.
Raꞌ tu tꞌʌnajoꞌonex:
―Wa ca wiric jach taj caj in wacsaj tin wor u tꞌʌn Jesús,
arej in wacsechex tin watoch ―quij Lidia.
Chich caj u pʌyajoꞌonex rajen binoꞌonex.
16 Tuririꞌ u qꞌuinin tan ic binex ich ber,
quij Lucas,
quir ic tꞌʌniquex Cꞌuj ich chiꞌ chan sʌyab.
Jeroj tic nupajex tuririꞌ xquic a ju cꞌurew mac.
A jeꞌ xquic acaꞌan u quisinin,
rajen a baꞌ caꞌ bin taqueꞌ rajiꞌ yer.
Rajen a jeꞌ xiquicaꞌ cu nejaric u taqꞌuin tiꞌ u jach tsꞌurirob.
Quireꞌ cu yaꞌaric a baꞌ caꞌ bin taqueꞌ,
rajen cu nejaric u taqꞌuin quir u tsꞌic tiꞌ u jach tsꞌurirob.
17 Caj say a jeꞌ xquicaꞌ tu pach Pablo yejer a tenoboꞌ.
Cꞌam caj u yaꞌaraj tiꞌ mac soc u yubicob:
―A jeꞌ xibob cu yamticob Cꞌuj a mac jach carem.
Jeꞌ u tsecꞌticob techex bic tabar ca rucꞌsiquex a siꞌpirex.
18 Yaꞌab u qꞌuinin cu yaꞌaric a ray xquicoꞌ ich u pach Pablo,
rajen choquij yor Pablo.
Caj u sut u bʌj caj u pʌctaj a ray xquicoꞌ.
Caj u tꞌʌnaj quisin,
a acaꞌan tiꞌ xquicoꞌ.
Chich caj u tꞌʌnaj Pablo:
―Joqꞌuen quisin ich u cꞌabaꞌ Jesucristo,
caꞌ a pꞌʌtej a xquicoꞌ.
Raꞌiriꞌ u qꞌuinin seb caj joqꞌuij u quisinin.
19 Barej u jach tsꞌurirob a ray xquicoꞌ,
caj u yirajob mʌꞌ tu cu jaricob u taqꞌuinob,
quireꞌ caj u yirajob mʌnaꞌ u quisinin.
Robob caj u chucajob Pablo yejer Silas caj binob purbir Pablo yejer Silas tiꞌ u jach tsꞌurirob u cajar Filipos,
tiꞌ yʌnob tu cu naj canicob u baꞌtac.
20 Caj cꞌuchob caj u yaꞌarajob u jach tsꞌurirob a xquicoꞌ:
―A jeꞌ xibob u winiquirob judío,
cu pꞌusic yorob mac a tiꞌ yʌn ich u cajar Filipos.
21 Robob cu camsicob toꞌonex u tꞌʌn u nunquirob u winiquirob judío cax u winiquiroꞌonex romano.
Mʌꞌ ja wirej,
mʌꞌ tsoy ij cʌniquex u tꞌʌn u nunquirob u winiquirob judío,
quireꞌ baxuc caj u yaꞌaraj toꞌonex ic reyex César.
22 Caj tsꞌiquintaꞌb Pablo yejer Silas ten a pimoꞌ tu muchꞌaꞌanob ich u jach tsꞌurirob u cajar Filipos.
A juezob caj tsꞌaꞌb tꞌʌn tiꞌob quir u jʌtʌr u nocꞌob quir u jatsꞌʌrob u pachob.
Quir u jatsꞌʌrob u pachob yejer cheꞌ.
23 Caj tsꞌoc yaꞌab u teninob caj jatsꞌ u pachob,
caj binob purbirob tu cu naj mʌꞌcarob mac.
Araꞌb tiꞌ a yʌjcʌnanyʌjir tu cu mʌꞌcar mac:
―Caꞌ quiꞌ cʌnantej Pablo yejer Silas soc mʌꞌ u jocꞌarob.
24 A yʌjcʌnanyʌjiroꞌ,
caj tsꞌoc yubic yaꞌaraꞌ tiꞌ,
caj u yacsaj Pablo yejer Silas tu cuch cꞌarʌroꞌ yoc.
Ti cꞌarij u yocob ich cheꞌ quir u cꞌarʌr yocob.
Caj u yacsaj jun cꞌas tu cu mʌꞌcar mac,
a jach chꞌic tam u japninoꞌ.
25 Caj cꞌuchij chumuc acꞌbir cu cꞌayob Pablo yejer Silas,
bayiriꞌ xan,
cu tꞌʌnicob Cꞌuj.
Tan uꞌyabar u cꞌayob Pablo yejer Silas ten a tiꞌ yʌn u yet mʌꞌcaꞌanob winiquirob xan.
26 Jach seb caj tarij u chꞌic yum u pec ruꞌum,
rajen caj pecnʌjij,
cax u yoc naj tu cu mʌꞌcaꞌanob.
Jeroj caj qꞌuepʌjij u jor tu mʌꞌcꞌaꞌanob.
Rʌc pitij u mascabir u cꞌʌbob tu cotor mac tu mʌꞌcaꞌanob,
caj rʌc quib yocob ich cheꞌ.
27 Caj ajij yʌjcʌnanyʌjir tu cu naj mʌꞌcar mac caj u yiraj jepʌjaꞌan u jor tu mʌꞌcaꞌanob.
Jeroj tuneꞌ,
caj u jaraj u mascab quir u wʌcꞌʌs ramic u bʌj soc u quimin,
yer putsꞌob u cʌnanwinicob.
28 Pablo cꞌam caj u puraj u tꞌʌn tiꞌ:
―Mʌꞌ a quinsic a bʌj,
rʌc tiꞌ yʌnenobiꞌ.
29 Yʌjcʌnanyʌjir caj u tꞌʌnaj caꞌ tac u purej quib quir u yercꞌacꞌtaꞌr u ber.
Caꞌ ocac tu cu mʌꞌcar mac,
caj u cꞌʌnaj yacab caj oquij.
Cu quiquinrʌncʌr u cꞌʌbob yejer tu cotor u winiquirir quireꞌ jaqꞌuij yor.
Caj cꞌuchij ich Pablo yejer Silas caj u puraj u bʌj ʌcʌtanob Pablo yejer Silas quir u sʌjtaꞌ.
30 Seb caj jocꞌsaꞌb Pablo yejer Silas ten yʌjcʌnanyʌjir tu cu mʌꞌcar mac,
caj araꞌb tiꞌ Pablo yejer Silas:
―In yajechex ―quij―,
baꞌ quin bin in betej quir u jawarob in siꞌpirob?
―quij.
31 Robob caj u yaꞌarajob tiꞌ:
―Acsej ta wor u tꞌʌn in Jaj Tsꞌurob Jesucristo.
Jeꞌ u taquiquech yejer tu cotor mac a tiꞌ yʌn ta watoch.
32 Caj u tsecꞌtajob u tꞌʌn Jaj Tsꞌur ich yatoch yʌjcʌnanyʌjir tu cu mʌꞌcar mac.
Caj u rʌc uꞌyajob tu cotor mac a tiꞌ yʌn ich yatoch.
33 Cax acꞌbir caj u pꞌoꞌaj tu jatsꞌ yejer cheꞌ uch.
Caj u pꞌoꞌaj u qꞌuiqꞌuer tu jatsꞌob.
Seb caj acsaꞌb jaꞌ tu joꞌr a yʌjcʌnanyʌjir tu cu maꞌcʌr mac ten Pablo yejer tu cotor mac a tiꞌ yʌn tu yatoch yʌjcʌnanyʌnir tu cu maꞌcʌr mac.
34 Caj tsꞌoc yacsaꞌb jaꞌ tu joꞌrob caj jansaꞌb Pablo yejer Bernabé tu yatoch.
Rajiꞌ jach quiꞌ yor quireꞌ caj u yacsaj tu yor u tꞌʌn Jaj Tsꞌur.
Bayiriꞌ xan,
tu cotor mac tu yatoch quiꞌ yorob xan quireꞌ tu yacsajob tu yorob xan.
35 Caj sasij caj tuchiꞌtaꞌb policía ten a juezob u tsꞌurirob u cajar Filipos quir u chaꞌbʌr u binob Pablo yejer Silas.
36 Caj cꞌuchij yʌjcʌnanyʌjir tu cu maꞌcʌr mac ich Pablo yejer Silas.
Rajiꞌ caj u yaꞌaraj:
―A juezob u tsꞌurirob u cajar Filipos caj u yaꞌarajob caꞌ xiquechex quireꞌ cu chaꞌbʌr a binex.
Rajen caꞌ u cʌnantechex Cꞌuj,
caꞌ xiquechex.
37 Chen Pablo mʌꞌ ju quibaj u bin,
rajen caj u yaꞌaraj tiꞌ a policía:
―A tenoꞌ u winiquirenoꞌ romano,
chich u jʌtsꞌenoꞌ ich ʌcʌtan tu cotor mac.
Mʌꞌ ju cʌxtajob wa cꞌas tin betajoꞌ wa mʌnaꞌ cꞌas caj in betajoꞌ.
Caj u chen mʌquenoꞌ tu cu naj maꞌcʌr mac.
Bajeꞌrer u cꞌatob u mucu jocꞌsiquenob,
rajen mʌꞌ jin binob hasta u bʌjiriꞌ a juezob cu tarob u jocꞌsiquenob .
38 A policíajoꞌ,
caj bin yaꞌarej tiꞌ a juezob.
Caj u yubob yaꞌaraꞌ ten policía wa ju winiquir romano,
caj u chꞌajob sajquirob a juezoboꞌ.
39 Caj binob a juezoboꞌ ich Pablo yejer Silas,
jeroj,
caj u yaꞌarajob tiꞌob:
―Jawsenob,
quireꞌ tin mʌquechexob.
Caj jocꞌsaꞌbob Pablo yejer Silas ten a juezoboꞌ tu cu maꞌcʌr winiquirob.
Caj u yaꞌarajob tiꞌob:
―Xenex wa tsoy ta tꞌʌnex,
caꞌ xiquechex ich u jer cajar.
40 Tiꞌ binob Pablo yejer Silas ich yatoch Lidia,
caj tsꞌoc u jocꞌsicob tu cu maꞌcʌr mac uch.
Jeroj caj rʌc manob yirej u yet acsaꞌorirob quir u chichquinticob u yorob.
Caj tsꞌoc u yiricob u yet acsaꞌorirob,
caj bin Pablo yejer Silas.