Caj u muchꞌquintajob u bʌj ich u cajar Jerusalén
15
Jun yarob xib caj rucꞌob ich u ruꞌumin Judea caj rucꞌob tu ruꞌumin quir u binob ich u cajar Antioquía.
Caj cꞌuchob caj ocob u camsicob a mac a yacsmʌnob tu yorob.
Robob caj u yaꞌaraj:
―Wa mʌꞌ ja quibex a tsꞌiriquex a bʌqꞌuerex an ten bic u naj beticob u winiquirob judío,
quireꞌ a baꞌ caj u yaꞌaraj Moisés uch,
jeroj mʌꞌ ju taquiquechex Cꞌuj.
2 A Pablojoꞌ yejer Bernabéjoꞌ mʌꞌ quet yorob yejer a baꞌ caj u yaꞌarajob,
rajen cꞌam u tꞌʌnob yejerob,
chen mʌꞌ cꞌuchaꞌan yor u quetquinticob u yorobiꞌ.
A yacsmʌnob tu yorob caj u yirajob mʌꞌ u quetquintajob u yorob,
rajen caj u tucrajob caꞌ xicob ich u cajar Jerusalén Pablo yejer Bernabé quet yejer u jer jun yarob a yacsmʌnob tu yorob.
Caj tuchiꞌtajob caꞌ xicob tu yʌnob a xiboꞌ a tetaꞌb ten Jesús quir u tsecꞌtaꞌr u tꞌʌn,
bayiriꞌ xan,
yejer u jach tsꞌurirob a yacsmʌnob tu yorob tu cu muchꞌquinticob u bʌj quir u cꞌujinticob Cꞌuj.
3 Araꞌbob u binob tu berir tenob a yacsmʌnob tu yorob ich u cajar Antioquía.
Araꞌbob u binob Pablo yejer Bernabé.
Jeroj caj rucꞌob Bernabé yejer Pablo,
caj manob yiricob u yet acsaꞌorirob ich u ruꞌumin Fenicia yejer u yet acsʌꞌorirob ich u ruꞌumin Samaria.
Tuj ocob tu cu muchꞌquinticob u bʌj a yacsmʌnob tu yorob,
jeroj caj u tsicbʌtajob tiꞌ bic a mʌꞌ u winiquirob judío caj u pꞌʌtajob a baꞌ camsaꞌbob ten u nunquirob quir u sayʌrob tu pach Cꞌuj.
Barej caj yubob yaꞌaraꞌ ten Pablo yejer Bernabé tiꞌ a yacsmʌnob tu yorob jeroj jach quiꞌjij u yorob.
4 Barej caj cꞌuchob Pablo yejer Bernabé ich u cajar Jerusalén,
caj acsaꞌbob ten a yacsmʌnob u yorob yejer a mac a tuchiꞌtaꞌb ten Jesús quir u tsecꞌtaꞌr u tꞌʌn Jesús yejer u jach tsꞌuriob a yacsmʌnob tu yorob,
a nuxibeꞌ.
Bayiriꞌ xan,
Pablo yejer Bernabé caj u tsicbʌtajob tu cotor bic tabar caj yamtaꞌbob Pablo yejer Bernabé ten Cꞌuj.
5 Chen jun yarob fariseos pʌchaꞌan ten u yet winiquirob judío,
robob u yacsmʌnob tu yorob caj ricꞌob quir u tsicbarob,
jeroj caj u yaꞌarajob:
―Mʌꞌ ja wirej,
a jeꞌ winiquirob a mʌꞌ u winiquirob judío a caj u yacsob tu yorob u tꞌʌn Jaj Tsꞌur caꞌ u yʌn tsꞌirob u bʌqꞌuer an ten bic cu naj beticob u winiquirob judío tiꞌ u chan och a xibeꞌ.
Bayiriꞌ xan,
caꞌ ic chich arex tiꞌob caꞌ u quibob tu cotor a baꞌ u tsꞌibmʌn ic nunquirex Moisés.
6 Rajen a xiboꞌ,
a ju tetmʌn Jesús quir u tsecꞌtaꞌr u tꞌʌn yejer u jach tsꞌurirob a yacsmʌnob tu yorob a nuxiboꞌ,
caj u muchꞌquintob u bʌj soc u pꞌeriꞌquinticob u tucurob.
7 Caj tsꞌoc yaꞌab u tsicbarob,
caj riqꞌuij Pedro quir u tsicbar xan yejer u yet acsʌꞌorirob,
a tiꞌ,
muchꞌaꞌanobiꞌ caj u yaꞌaraj tiꞌob:
―Uꞌyex baꞌ quin waꞌaric techex in wet acsʌꞌorirechex.
A techexoꞌ,
a werex bic caj u tetenoꞌ Cꞌuj uch ichechex quir u yʌnxchun in tsecꞌtic u tꞌʌn ich a mac a mʌꞌ u winiquirob judío soc robob caꞌ u yubejob u jach tsoyir u tꞌʌn Cꞌuj soc u yacsicob tu yorob u tꞌʌn Jesús.
8 A Cꞌujoꞌ,
u cꞌʌꞌor u pixam mac biquiraꞌ caj u tsꞌajaj ic najtex caj u cꞌʌmaj a mac a mʌꞌ u winiquirob judío.
Mʌꞌ ja wirej,
Cꞌuj caj u tsꞌajaj tiꞌob u Tajꞌor u Pixam Cꞌuj an ten bic caj u tsꞌajaj toꞌonex xan.
9 Mʌꞌ ja wirej,
Cꞌuj caj u yajquintaj a mac a mʌꞌ u winiquirob judío an ten bic caj u yajquintoꞌonex xan,
quireꞌ quet caj u rucꞌsaj u siꞌpirob,
caj u pꞌoꞌaj u pixamob a caj u yacsajob tu yorob.
10 Biquinin bajeꞌrer ca tsꞌiquintiquex Cꞌuj,
quireꞌ a mac a mʌꞌ u winiquirob judío tu ca tsꞌʌriquex u pachob ij quet acsaꞌorirex soc yaj yubicob tu yorob,
quireꞌ u tꞌʌn Moisés.
Mʌꞌ ja wirej,
mʌꞌ cꞌuchaꞌan u yorob ic nunquirex tiꞌ u tꞌʌn Moisés,
baxuc toꞌonex xan.
11 Rajen toc pꞌʌtex a waquex u tsꞌirob u bʌqꞌuer a mʌꞌ u winiquirob judío bayiriꞌ tu ca waꞌariquex caꞌ u quibob a baꞌ cu yaꞌaric ich u tꞌʌn Moisés.
Mʌꞌ ja wirej,
ic Jaj Tsꞌurirex Jesucristo caj u rucꞌsaj toꞌonex ic siꞌpirex wa ber caj tij cacsajex tij corex u tꞌʌn Cꞌuj,
quireꞌ Cꞌuj cu betic tsoy tiꞌ tu cotor mac.
Bayiriꞌ xan,
Cꞌuj caj u rucꞌsaj tiꞌob u siꞌpirob,
ber caj u yacsajob tu yorob u tꞌʌn Cꞌuj,
a mʌꞌ u winiquirob judío ―baxuc caj u yaꞌaraj Pedro tiꞌ a mac muchꞌaꞌanob.
12 Rajen tu cotor mac caj tsꞌoc u yubicob a baꞌ caj u yaꞌaraj Pedro mʌꞌ ju jocꞌar u tꞌʌnob,
caj u mʌcaj u chiꞌob.
Jeroj caj ricꞌob Pablo yejer Bernabé quir u tsicbarob tiꞌ u yet acsaꞌorirob,
a tiꞌ muchꞌaꞌanob.
Jeroj tuneꞌ,
robob caj u yubajob Pablo yejer Bernabé a baꞌ caj u tsicbatajob bic caj tsꞌaꞌb u mucꞌob ten Cꞌuj soc u yesicob carem beyaj,
bayiriꞌ soc u yesicob a baꞌ cu jacꞌʌr u yorob tiꞌ a mʌꞌ u winiquirob judío.
13 Wa ber caj tsꞌoc u tsicbarob Pablo yejer Bernabé,
jeroj caj riqꞌuij Jacobo u tsicbar tiꞌ a mac a tiꞌ muchꞌaꞌanob.
Rajiꞌ,
caj u yaꞌaraj tiꞌob:
―Uꞌyex baꞌ quin waꞌaric techex in wet acsaꞌorirex.
14 A Simón Pedrojeꞌ tsꞌoc u tsicbatic an bic caj tetaꞌb a mʌꞌ u winiquirob judío ten Cꞌuj quir u cꞌujinticob jach Cꞌuj,
soc yaꞌab cu sayʌrob tu pach Cꞌuj.
Mʌꞌ ja wirej,
Pedro caj u yʌnxchun u tsecꞌticob u tꞌʌn Cꞌuj ich a mʌꞌ u winiquirob judío.
15 A baꞌ caj u betaj Pedro uch raꞌ a quet yejer a baꞌ araꞌb ten a mac a tsꞌaꞌb u tucur ten Cꞌuj quir u tsꞌibtic a baꞌ u cꞌat Cꞌuj.
Uꞌyex baꞌ cu yac:
16 Caꞌ bin tsꞌocac a ray u qꞌuininoꞌ,
jeꞌ in wʌcꞌʌs ureꞌ,
quij Jaj Tsꞌur.
Irej a mac cu wʌcꞌʌs tsꞌʌpquintic yatoch a rʌc jupcꞌʌjoꞌ.
Jeꞌ in wʌcꞌʌs tsꞌʌpquintic a rʌc jupcꞌʌjoꞌ soc tsoy.
Baxuc a tenoꞌ,
a baywoꞌ jeꞌ in wʌcꞌʌs pʌyicob caꞌ u cꞌujintenob an ten bic caj u cꞌujintenob uch tu qꞌuinin cuxaꞌan David uch,
quij.
A baywoꞌ jeꞌ in wʌcꞌʌs pʌyic quir u cꞌujintiquenob soc u beyajob tenob xan,
quij.
17 Baxuc jeꞌ in bin in pʌyej tu cotor mac tu cʌjaꞌanob,
a mac a mʌꞌ u winiquirob judío caꞌ u pachtejob u sʌyʌrob tin pachob,
soc tenob yʌninob.
18 Baxuc caj u yaꞌarej ten a mac a cu tsꞌic ic najtiquex baꞌ a cu bin tar tu chꞌic chunin uch.
19 ’Rajen a tenoꞌ ―quij Jacobo―,
quin tucric mʌꞌ a naj xaxaqꞌuiquex u tucurob a mac a mʌꞌ u winiquirob judío.
Mʌꞌ baꞌwir caꞌ ij carex u tsꞌirob u bʌjob an ten bic u winiquirob judío quireꞌ caj u yacsajob tu yorob.
Mʌꞌ ja wirej,
caj u pꞌʌtob a baꞌ camsaꞌb ten u nunquirob quir u sayʌrob tu pach Cꞌuj.
20 A tenoꞌ,
tin tꞌʌn tiꞌtiꞌ caꞌ ic tsꞌibtex tiꞌob,
caꞌ ij caꞌariquex tiꞌob,
mʌꞌ tsoy u janticob baꞌ esaꞌan tiꞌ u yochir tus cꞌuj.
Caꞌ ij caꞌarex tiꞌob,
mʌꞌ tsoy u wenʌn yejer mac a mʌꞌ u mamoꞌ,
wa mʌꞌ u racꞌ xan.
Caꞌ ij caꞌarex tiꞌob,
mʌꞌ u yʌn chiꞌicob bʌcꞌ,
a tiꞌ toy yʌn u qꞌuiqꞌueroꞌ.
Arej u sisbʌstob u qꞌuiqꞌuer soc u chiꞌicob.
21 Mʌꞌ ja wirej,
baxuc bajeꞌrer,
caꞌ ic betex,
quireꞌ raꞌiriꞌ u qꞌuininoꞌ a uchoꞌ,
a tenoboꞌ u winiquirenob judío caj in tsecꞌtob u tꞌʌn Moisés,
quireꞌ jujuntur ich u cajarob u winiquirob judío tu cu naj muchꞌquinticob u bʌj soc u cꞌujinticob Cꞌuj tiriꞌ cu xaquicob u tꞌʌn Moisés tu qꞌuinin u jesicob u bʌj u winiquirob judío.
22 Caj u pꞌeriꞌquintaj yorob yejer u yet acsaꞌorirob,
caj u tetob u yet acsaꞌorirob quir u tuchiꞌtaꞌrob ich u cajar Antioquía.
A ju jach tsꞌuriroꞌ caꞌ tur caj u tetaj,
a ju cꞌabaꞌoꞌ Judas.
Chen caꞌ tur u cꞌabaꞌ,
Barsabás.
A junturoꞌ,
Silas u cꞌabaꞌ.
A mac tetaꞌbob ten Jesús ucheꞌ,
rajiꞌob pꞌeriꞌquintej yorob.
Rajiꞌob pꞌeriꞌquintej yorob u jach tsꞌurirob a yacsmʌnob tu yorob ich u cajar Jerusalén.
Yet acsaꞌorirob tu muchꞌaꞌanob rajiꞌob pꞌeriꞌquintej yorob xan,
caj tetaꞌb Judas yejer Silas soc u binob u nupintejob Pablo yejer Bernabé.
23 Caj binob yet binac a jeꞌ juꞌunaꞌ a cu yaꞌaric:
“A tenob,
tu tetenob Jesús quir in tsecꞌticob u tꞌʌn,
quet yejer u jach tsꞌurirob a yacsmʌnob tu yorob,
a tiꞌ yʌnob ich u cajar Jerusalén quin tꞌʌnicob techex tu cotorechex ich u cajar Antioquía a mʌꞌ u winiquirob judío a yacsmʌnob tu yorob.
Baxuc a tiꞌ cʌjaꞌanob ich u ruꞌumin Siria quin tꞌʌnicob techex xan.
Baxuc a tiꞌ cʌjaꞌanob ich u ruꞌumin Cilicia quin tꞌʌnicob techex.
24 Caj in wuꞌyajob yaꞌaraꞌ tiꞌ tar tarob tu yʌnechex jun yarob xiboꞌ.
Caj in wuꞌyajob rucꞌob ich u cajar Jerusalén,
cax chen tacob tu yʌnechex,
mʌꞌ tenob tuchiꞌtobiꞌ.
Quireꞌ a ray a xiboꞌ,
cu yaꞌaricob techex,
quireꞌ cu xaxaqꞌuicob a tucurex.
Mʌꞌ ja wirej,
caj yaꞌaraj techex a mac a yacsmʌnob tu yorob yʌn tsꞌirex a wotꞌerex an ten bic cu naj beticob u winiquirob judío.
Bayiriꞌ xan,
caj u tus arajob quiꞌ cʌnantex u tꞌʌn Moisés.
25 Rajen a tenoboꞌ,
caj in quetquintajob in worob caꞌ in tuchiꞌtob caꞌtur xib caꞌ xicob yejer Pablo,
yejer Bernabé caꞌ tsicbanʌcob techex.
Jach yajbir Pablo yejer Bernabé ten tu cotoroꞌonex a teraꞌ a yacsmʌnob tu yorob u tꞌʌn Jesús.
26 Mʌꞌ ja wirej,
yaꞌab u tenin orac u quinsaꞌb Pablo yejer Bernabé,
quireꞌ raꞌ u beyajob a cu beticob tiꞌ ic Jaj Tsꞌurirex Jesucristo.
27 Rajen caj in tuchiꞌtajob Judas yejer Silas quir u toc aric techex a baꞌ tsicbʌjenob a teraꞌ ich u cajar Jerusalén.
28 Mʌꞌ ja wirej,
u Tajꞌor u Pixam Cꞌuj caj u yam tenob a baꞌ quin tucricob,
rajen jach tsoy quir in waꞌaricob techex a jeraꞌ.
Mʌꞌ in tsꞌʌrob a pachex soc wa yaj a wuꞌyiquex u tꞌʌn Moisés.
Jarariꞌ caꞌ a quibex a baꞌ quin tsꞌibticob techex bajeꞌrer:
29 Mʌꞌ a yan jantiquex a baꞌ cu yesicob tiꞌ u yochir u tus Cꞌuj.
Mʌꞌ a yʌn chiꞌiquex bʌcꞌ a tiꞌ toy yʌn u qꞌuiqꞌueroꞌ.
Yʌn rʌc sisbʌstex u qꞌuiqꞌuer soc a chiꞌiquex.
Mʌꞌ a yan uqꞌiquex u qꞌuiqꞌuer bʌcꞌ.
Mʌꞌ a yʌn wenʌnex yejer a mac a mʌnaꞌ u mamoꞌ,
bayiriꞌ xan,
a mʌnaꞌ u racꞌ,
bayiriꞌ xan a mʌꞌ u chꞌamʌnoꞌ.
Wa ca quibiquex a jeꞌ tin tsꞌibtajob techex jach tsoy tan a betiquex.”
Jeroj tsꞌoc in tsꞌibticob techex.
30 Caj tsꞌoc u tsꞌibticob u juꞌunin caj tuchiꞌtaꞌb Pablo yejer Bernabé.
Yet binacob Judas yejer Silas.
Caj rʌc binob ich u cajar Antioquía.
Caj cꞌuchob caj u tꞌʌnajob caꞌ tacob u rʌc muchꞌquinticob u bʌj a yacsmʌnob tu yorob quir u tsꞌabʌr tiꞌ u juꞌunin a tsꞌibtaꞌb ten a yacsmʌnob tu yorob ich u cajar Jerusalén.
31 A yacsmʌnob tu yorob caj u yubajob a baꞌ tsꞌibaꞌan tu juꞌunin,
caj jach ne quiꞌjij yorob,
rajen caj u chichquintaj yorob caj u yubobiꞌ.
32 Bayiriꞌ xan,
Judas yejer Silas tsꞌaꞌb u tucurob ten Cꞌuj quir u tsecꞌticob a baꞌ u cꞌat Cꞌuj,
jeroj tuneꞌ,
yaꞌab u tenin caj u tsecꞌtob u tꞌʌn tiꞌ u yet acsaꞌorirob soc u chichquintaꞌr u yorob.
Bayiriꞌ xan,
tan u yamtaꞌob ten Silas yejer Judas soc taj cu yacsicob tu yorob.
33 Judas yejer Silas tiꞌ yʌnob uch yaꞌab u qꞌuinin ich u cajar Antioquía.
Caj caꞌ sutnʌjob tu pach quir u wʌcꞌʌs bin ich u cajar Jerusalén ich yʌjtuchiꞌyʌjirob.
Chaꞌb u bin Judas ten a yacsmʌnob tu yorob ich u cajar Antioquía.
Robob caj u yaꞌarajob tiꞌ:
―Caꞌ u quiꞌ cʌnantech Cꞌuj.
34 Chen Silas tiꞌ pꞌatij ich u cajar Antioquía,
caj u tucraj jach tsoy u pꞌatʌr.
35 Bayiriꞌ xan,
tiriꞌ pꞌatob Pablo yejer Bernabé ich u cajar Antioquía.
Robob caj u pꞌeriquintajob u bʌj yejer u jer yaꞌab caj u camsob u tꞌʌn Jaj Tsꞌur,
bayiriꞌ caj u tsecꞌtob u jach tsoyir u tꞌʌn Jaj Tsꞌur.
Pablo cu bin u tsecꞌtic u tꞌʌn Jaj Tsꞌur ich u jer ruꞌum
36 Caj tsꞌoc u man yaꞌab u qꞌuinin Pablo caj u yaꞌaraj tiꞌ Bernabé:
―Jeroj cux ―quij Pablo―,
caꞌ ij quirej tu cotor u cajarob tub ic tsecꞌmʌn u tꞌʌn Jaj Tsꞌur uch.
Caꞌ ij tꞌʌnej,
caꞌ ij quirej bic yiraꞌ ij quet acsaꞌorirex.
―Mʌꞌ tsoy a pʌyiquiꞌ.
Mʌꞌ ja wirej,
caj u pꞌatoꞌon ich u cajar Panfilia.
Mʌꞌ ja wirej,
mʌꞌ tarij ic tsecꞌtej u tꞌʌn Cꞌuj yejeroꞌon uchiꞌ.
39 Jeroj tuneꞌ,
mʌꞌ ju quetquintajob u yorob rajen caj u jʌsob u bʌj quireꞌ mʌꞌ periꞌob u tucurob.
Bernabé caj u pʌyaj Juan Marcos caj oc ich u chemin cꞌacꞌnab quir u binob ich u petenin Chipre.
40 Chen Pablo caj u tetaj Silas quir u bin yejer.
Jeroj tune,
a yacsmʌnob tu yorob,
caj tsꞌoc u tꞌʌnicob Cꞌuj caj u cꞌubajob caꞌ cʌnantaꞌc Pablo yejer Bernabé ten Cꞌuj tu cu binob.
41 Jeroj tun,
caj rucꞌob Pablo yejer Silas quir u manob tu ruꞌumin Siria yejer u ruꞌumin Cilicia.
Caj cꞌuchob tu cu naj muchꞌquinticob u bʌj a yacsmʌnob tu yorob Pablo yejer Silas caj u chichquintajob u yorob u yet acsaꞌorirob.