Pablo yejer Bernabé ich u cajar Iconio
14
Caj cꞌuchob Pablo yejer Bernabé ich u cajar Iconio,
caj binob tu cu muchꞌquinticob u bʌj u winiquirob judío ich u chan najir tu cu naj cꞌujinticob Cꞌuj.
Pablo yejer Bernabé caj u tsecꞌtajob u tꞌʌn Cꞌuj.
Caj u rʌc uꞌyajob bic tabar caj u tsecꞌtajob Pablo yejer Bernabé rajen yaꞌab caj u yacsajob tu yorob cax u winiquirob judío cax a mʌꞌ u winiquirob judío.
2 Chen raꞌ mʌꞌ u winiquirob judío caj pꞌusaꞌb yor ten u winiquirob judío a mʌꞌ yacsmʌnob tu yorob caj u tucrajob cꞌas tiꞌ a yacsmʌnob tu yorob u tꞌʌn Jesús.
3 Rajen tiriꞌ pꞌatob yaꞌab u qꞌuinin caj u camsob u tꞌʌn Jesús.
Cax pꞌusaꞌbob u yorob a mʌꞌ u winiquirob judío ten u winiquirob judío,
Pablo yejer Bernabé mʌꞌ u jacꞌʌr u yorob u tsecꞌticob u tꞌʌn Jesús.
Cꞌuj caj u tsꞌajaj u mucꞌ quir u yesic tiꞌob carem beyaj,
bayiriꞌ xan,
a cu jacꞌʌr u yorob mac,
soc yerob jach taj Cꞌuj cu tsecꞌticob u tꞌʌn,
bayiriꞌ xan,
soc yerob Cꞌuj cu jach tucric mac.
4 Chen mʌꞌ pꞌeriꞌob u yorob ich a ray cajaroꞌ.
Mʌꞌ ja wirej,
junbuj u cajar tsoy yiricob Pablo yejer Bernabé,
chen u jer junbuj u cajar quet yorob yejer u winiquirob judío,
mʌꞌ tsoy yirir Pablo yejer Bernabé.
5 Caj u pꞌeriquintajob u bʌj yejer a mʌꞌ u winiquirob judío yejer u winiquirob judío quet yejer u jach tsꞌurirob u cajar,
caj u pꞌeriꞌquintob u bʌj quir u chuquicob u pachob Pablo yejer Bernabé.
U cꞌatob u chꞌinic u joꞌrob Pablo yejer Bernabé.
6 Caj u yubob bin u caꞌob chꞌinbir u joꞌrob,
caj putsꞌob Pablo yejer Bernabé.
Caj rucꞌob ich u cajar Iconio caj cꞌuchob ich u cajar Listra tu ruꞌumin Licaonia.
Tiꞌ binob xan,
tu nʌtsꞌaꞌan u chan cajarob bʌytʌc tiꞌ u cajar Licaonia.
7 Tiriꞌ caj u tsecꞌtob u jach tsoyir u tꞌʌn Cꞌuj.
Tiꞌ chꞌinij u joꞌr Pablo ich u cajar Listra
8 Tiꞌ yʌn tuririꞌ xib ich u cajar Listra,
mʌꞌ ju ximbar,
cajʌn mech yoc.
U toc berer caj rochaꞌb ten u nʌꞌ uch.
Mʌꞌ ju ximbar tiꞌ curaꞌaniꞌ.
9 A cajʌn mech yocoꞌ,
caj u yubaj tu cotor a baꞌ cu yaꞌaric Pablo,
caj pʌctaꞌb u wich ten Pablo a cajʌn mech yocoꞌ,
quireꞌ caj u yiraj caj u yacsaj tu yor a cajʌn mech yocoꞌ.
Rajen bin u caꞌ jawsaꞌbir yoc ten Cꞌuj.
10 Cꞌam caj araꞌb tiꞌ ten Pablo:
―Riqꞌuen,
taj ca chꞌictar yejer a woc.
Jeroj seb caj sitꞌnʌj caj chꞌicrʌj,
caj u yʌnxchun u ximbar.
11 Barej caj u yirajob a pimoꞌ u riqꞌuir a cajʌn mech yoc uch.
Caj u yirajob jawsaꞌb ten Pablo,
jeroj tuneꞌ,
cꞌam awʌtnʌjob a pimoꞌ ich u tꞌʌn u winiquirob licaonia caj u yaꞌarajob:
―Caꞌtur cꞌuj caj tarob teraꞌ.
Tar u tarob caꞌanan irej toꞌonex ic winquirirex.
12 Caj pach u cꞌabaꞌ Bernabé,
Júpiter an bic u cꞌabaꞌ a cu tus cꞌujinticob.
Caj pach u cꞌabaꞌ Pablo xan,
Mercurio u cꞌabaꞌ a cu tus cꞌujinticob xan ich u cajar Listra.
Caj pach ten a mac a cʌjaꞌanob ich u cajar Listra.
Caj pach Pablo Mercurio quireꞌ Pablo raꞌ yʌjtꞌʌnir mac ir u cꞌabaꞌob u tus cuj Mercurio.
13 A mac a tiꞌ cʌjaꞌanob ich u cajar Listra tiꞌ cꞌʌxaꞌan u najir tu cu cꞌujinticob u tus cꞌujob Júpiter tu cu yocarob tu cajar.
Jeroj caj tarob u purejob wacʌx,
yajaj ton,
caj tar u puraj sacerdote u winiquirob licaonia tu cu naj cꞌujinticob u tus cꞌuj Júpiter.
Jeroj caj u tsꞌajaj u yujintej u topꞌcheꞌ ich u car wacʌx a yajaj toneꞌ.
Tabar u quinsaꞌr wacʌx quir u toquic quir u quinsaꞌ tiꞌ Pablo yejer Bernabé quir u cꞌujintaꞌrob.
14 Caj u najtajob caj tarob cꞌujinbir Pablo yejer Bernabé,
caj u jʌtajob u nocꞌ Pablo yejer Bernabé soc yer mʌꞌ tsoy u cꞌujintaꞌrob ten mac.
Pablo yejer Bernabé,
caj u cꞌʌnajob yacab tu yʌn a pimoꞌ,
cꞌam awatʌnʌjob Pablo yejer Bernabé caj u yaꞌarajob:
15 ―Baꞌwir techex ca betiquex aroꞌ in wet xibirechex?
Mʌꞌ cꞌujenobiꞌ,
xibenob baxuc a techexoꞌ.
Rajen caj tarenob in tsecꞌticob u tꞌʌn Cꞌuj techex soc a pꞌʌtiquex a baꞌ ca betiquex bajeꞌrer.
Mʌꞌ baꞌwir techex ca cꞌujintiquex a tus cꞌuj,
quireꞌ mʌꞌ cꞌujiꞌ quireꞌ mʌꞌ cuxaꞌaniꞌ.
Caꞌ a cꞌujintex a cuxaꞌanoꞌ.
Mʌꞌ ja wirej,
Cꞌuj caj u betaj caꞌanan,
Cꞌuj caj u betaj cꞌacꞌnab yejer tu cotor baꞌ tiꞌ yʌn.
A Cꞌujoꞌ,
caj u betaj ruꞌum ich yocꞌocab yejer tu cotor baꞌ yʌn.
Tu cotor sab Cꞌuj caj u betaj xan.
16 An ten bic u naj cuxtarob mac uch Cꞌuj tu chaꞌj u cuxtarob a mac a mʌꞌ u winiquirob judío.
17 Mʌꞌ ja wirej,
tsoy caj u betaj Cꞌuj tiꞌ tu cotor mac,
rajen yerob tu cotor mac tiꞌ yʌn Cꞌuj ich caꞌanan.
Mʌꞌ wa taj a Cꞌujoꞌ cu chaꞌic u tar jaꞌ quir u chꞌisic u pʌcꞌar mac tu cotor,
soc u ne tsꞌajic u wich u pʌcꞌar soc tiꞌtiꞌ yoꞌochoꞌ,
a tsꞌaꞌb ten Cꞌuj soc u quiꞌtarob u yorob tu cotor mac?
18 Cax yubej yaꞌaraꞌ tiꞌob ten Pablo a jeꞌ tꞌʌnaꞌ,
yaj yubob yaꞌaraꞌ tiꞌob ten Pablo.
Orac mʌꞌ ju yubicob,
quireꞌ orac u quinsob yajaj ton wacʌx quir u toquicob u sijej tiꞌob quir u quiꞌquiꞌ cꞌujintaꞌrob Pablo yejer Bernabé.
19 Chen caj cꞌuchob u winiquirob judío a mʌꞌ ju yacsob tu yorob u tꞌʌn Jesús.
Tar cꞌuchob ich u cajar Listra.
Jun yarob tiꞌ u tarob ich u cajar Antioquía,
u jer jun yarob tiꞌ u tarob ich u cajar Iconio.
Caj tarob u pꞌusicob u yorob u winiquirob listra quir u chꞌininob u joꞌr Pablo.
U winiquirob listra caj u quibajob u tꞌʌnob rajen caj u chꞌinajob u joꞌr Pablo.
Caj tsꞌoc u chꞌininob u joꞌr Pablo,
yerob quimij,
jeroj caj u chopʌytob u purej ich tancab u cajar.
20 Chen barej,
caj u muchꞌquintob u bʌj a mac a yacsmʌnob tu yorob tu charaꞌan u baquer Pablo,
jeroj caj riqꞌuij,
caj wʌcꞌʌs binij ich u cajar Listra.
Caj sasij Pablo yejer Bernabé caj rucꞌob quir u binob ich u cajar Derbe.
21 Caj cꞌuchob ich u cajar Derbe caj u tsecꞌtajob u jach tsoyir u tꞌʌn Cꞌuj soc yerob bic tabarob u rucꞌsaꞌob u siꞌpirob ten Jesús.
Yaꞌab mac tu yacsajob tu yorob u tꞌʌn Jesús ich u cajar Derbe.
Barej caj tsꞌoc aroꞌ caj sutnʌjob tu pachob.
Caj wʌcꞌʌs binob ich u cajar Listra,
bayiriꞌ xan ich u cajar Iconio,
bayiriꞌ xan ich u cajar Antioquía.
22 A Pablojoꞌ yejer Bernabé caj u chichquintajob u yorob a yacsmʌnob tu yorob.
Caj u chich tꞌʌnajob soc rajraꞌ cu yacsicob tu yorob.
Rajen caj u yaꞌaraj tiꞌob:
―Yaꞌab caꞌ bin mucꞌyajnʌcoꞌonex tiꞌ u tꞌʌn Cꞌuj quireꞌ tu caꞌ ij cocarex tu cu reyintic Cꞌuj.
23 Jujuntur caj u tetajob u jach tsꞌurirob tub u muchquinmʌnob u bʌj a yacsmʌnob tu yorob,
chen jun yarob tetaꞌb ten Pablo yejer Bernabé.
Jeroj tuneꞌ,
caj u yʌn pꞌʌtajob u janʌnob quir u sʌjticob Cꞌuj,
bayiriꞌ xan,
caj u tꞌʌnajob Cꞌuj.
Caj tsꞌoc a jeraꞌ,
caj u yaꞌaraj tiꞌ a yacsmʌnob tu yorob Bernabé yejer Pablo:
―Caꞌ u cʌnantejtechex Jaj Tsꞌur quireꞌ caj a wacsajex ta worex u tꞌʌn.
Pablo yejer Bernabé caj urob ich u cajar Antioquía a tiꞌ yʌn ich u ruꞌumin Siria
24 Barej caj tsꞌoc u chꞌʌcticob u ruꞌumin Pisidia caj cꞌuchob ich u cajar Perge a tiꞌ yʌn ich u ruꞌumin Panfilia.
25 Caj cꞌuchob ich u cajar Perge tiꞌ caj u tsecꞌtob u tꞌʌn Cꞌuj.
Caj tsꞌoc u tsecꞌticob u tꞌʌn Cꞌuj caj binob ich u cajar Atalia.
26 Caj ocob ich chem quir u bin ich u cajar Antioquía.
Mʌꞌ ja wirej,
tiꞌ ich u cajar Antioquía caj u cꞌʌmob u beyajob.
Tiriꞌ xan tetaꞌbob ten a yacsmʌnob tu yorob caj tsꞌoc u tꞌʌnicob Cꞌuj uch.
Bajeꞌrer,
tsꞌoc u beyajob rajen caj u sutob tu pachob.
27 Barej caj urob caj u muchꞌquintajob u bʌj a yacsmʌnob tu yorob tu cu naj cꞌujinticob Cꞌuj quireꞌ u cꞌatob yubicob u tꞌʌn Pablo yejer Bernabé.
Robob caj u toc arajob tiꞌob bic Cꞌuj caj cꞌanob Pablo yejer Bernabé quir u beticob a baꞌ u cꞌat Cꞌuj.
Caj u toc arob tiꞌob bic Cꞌuj caj u chaꞌj u yacsicob tu yorob a jach pim mac a mʌꞌ u winiquirob judío.
28 Yaꞌab u qꞌuinin tiꞌ pꞌatob Pablo yejer Bernabé ich yicnʌn a yacsmʌnob tu yorob.