Nicodemo cu tar u tsicbar yejer Jesús
3
A uchoꞌ tiꞌ yʌn u winiquir judío a fariseojoꞌ a uchoꞌ,
rajiꞌoꞌ u cꞌabaꞌ Nicodemo.
Rajiꞌ tuririꞌ u tsꞌurir ich u winiquirob judío.
A fariseojoꞌ cu quibicob a baꞌ araꞌb ten u nunquir u winiquirob judío.
2 Oqꞌuin caj bin Nicodemo tu yʌn Jesús quir u tsicbar yejer.
Caj yaꞌaraj tiꞌ:
―In wʌjcamsʌyʌjirech.
In wer Cꞌuj tu tuchiꞌtech quir a camsicoꞌon.
Wa mʌꞌ Cꞌuj tu tuchiꞌtech,
mʌꞌ cꞌuchaꞌan a wor a wesic carem beyaj an ten bic ca betic.
Jesus habla con Nicodemo (Juan 3.1-21)
3 Jesús caj yaꞌaraj tiꞌ:
―Taj quin waꞌaric tech.
A mac u cꞌat u yocar tu cu reyintic Cꞌuj,
u Tajꞌor u Pixam Cꞌuj yʌn u tsꞌic u cuxtar a cu tar ich caꞌanan.
Irej wa ju caꞌ rochaꞌr ten u nʌꞌ.
4 Nicodemo caj yaꞌaraj tiꞌ Jesús:
―Bic tabar u caꞌ rochar ten u nʌꞌ quireꞌ uch chꞌijic?
Mʌꞌ cꞌuchaꞌan yor u caꞌ ocar ich u nʌcꞌ winic soc u caꞌ rochaꞌ ten u nʌꞌ.
5 Jesús caj u nuncaj tiꞌ,
tan yaꞌaric tiꞌ:
―Taj a baꞌ quin wac tech.
Mʌꞌ chen jariꞌ jaꞌ cu yacsaꞌ ta joꞌr,
caꞌ a cꞌʌmej u Tajꞌor u Pixam Cꞌuj quireꞌ baxuc toc araꞌb ten Cꞌuj.
A baywoꞌ cꞌuchaꞌan a wor a wocar tu cu reyintic Cꞌuj.
6 Tu qꞌuinin caj u rochech a nʌꞌ,
rajiꞌ quir a chen cuxtar ich yocꞌocab.
Tu qꞌuinin cu tsꞌic tech a cuxtar u Tajꞌor u Pixam Cꞌuj,
raꞌ cu tar ich caꞌanan,
rajiꞌ quir a cuxtar munt qꞌuin.
Aroꞌ irej wa tu caꞌ rochech a nʌꞌ.
7 Mʌꞌ ju jacꞌʌr a wor Nicodemo quireꞌ tin waꞌaraj tech aroꞌ.
Mʌꞌ ja wirej,
u Tajꞌor u Pixam Cꞌuj jeꞌ u tsꞌic a cuxtar a cu tar ich caꞌanan soc cꞌuchaꞌan a wor a bin caꞌanan.
8 A icꞌoꞌ cu rʌc man tu cotor.
Ca wuꞌyic u jum,
chen mʌꞌ a wer tub u tar,
mʌꞌ ja wer,
tu cu bin.
Baxuc aroꞌ tu cotor mac a tsꞌab u cuxtar a cu tar ich caꞌanan ten u Tajꞌor u Pixam Cꞌuj.
Cu chen beyaj tiꞌ techex chen mʌꞌ a werex bic tabar.
9 Nicodemo,
mʌꞌ toy u jach quiꞌ najtiꞌ caj u caꞌ nuncaj,
tan yaꞌaric:
―Bic tabar cu betic a baxuc aroꞌ?
10 Jesús caj a nuncaj tiꞌ tan yaꞌaric:
―A techoꞌ a neꞌer a camsic,
ca chen camsic u winiquirob judío.
Mʌꞌ wa ja najtej a tin waꞌaraj tech?
11 Jach taj quin waꞌaric tech Nicodemo.
A tenob in waꞌaricob tech a baꞌ in werob,
baxuc a baꞌ tin wirob.
Chen techex mʌꞌ ja quibex a baꞌ quin waꞌaricob.
12 Wa mʌꞌ ja quibiquex a baꞌ quin tsicbar techex,
a baꞌ yʌn ich yocꞌocab an ten bic caj in waꞌaraj yʌn u caꞌ rochiquech a nʌꞌ.
Jeꞌ wa ja quibic a baꞌ quin waꞌaric techex,
a baꞌ yʌn ich caꞌanan?
13 Jesús caj yaꞌaraj:
―Mʌnaꞌ mac binij ich caꞌanan caj wʌcꞌʌs ur teraꞌ quir yaꞌaric bicyʌraꞌ caꞌanan.
Chen a tenoꞌ cꞌuchaꞌan in wor in waꞌaric bicyʌraꞌ quireꞌ tiꞌ in tar ich caꞌanan quireꞌ a tenoꞌ irenechex.
Tiꞌ quin wʌcꞌʌs bin xan.
14 An ten bic ic nunquir Moisés caj u nacsaj can a betaꞌb tiꞌ mascab,
caj u nacsa yejer cheꞌ ich tacay ruꞌum.
Soc rajiꞌ quir u jawʌr a mac chiꞌbir ten can wa cu pʌctic.
An ten bic a canoꞌ caj nacsaꞌb ich cheꞌ baxuc ten caꞌ bin u bʌjen ich cruz soc u nacsiquen soc in jawsic u siꞌpir mac quireꞌ a tenoꞌ irenechex.
15 Wa mac cu yacsic tu yor ten quireꞌ bin u caꞌ bʌjbiren ich cruz soc in taquic tiꞌob,
jeꞌ u cuxtar munt qꞌuin.
Ic Tet Cꞌuj cu yajquintic tu cotor mac
16 ’Mʌꞌ ja wirej,
a Cꞌujoꞌ jach manan cu yajquintic tu cotor mac ich yocꞌocab.
Rajen tu tuchiꞌtaj u parar tuririꞌ.
Rajen tu cotor mac a cu yacsic tu yor tiꞌ cu bin tacbir soc mʌꞌ u bin erar ich cꞌacꞌ.
Chen cu bin tsꞌabʌr u cuxtar munt qꞌuin.
17 Ic Tet Cꞌuj tu tuchiꞌtaj u parar teraꞌ ich yocꞌocab.
Mʌꞌ tarij quir u tsꞌic u mucꞌyaj a tiꞌ yʌn ich yocꞌocab quireꞌ yʌn u siꞌpirob.
Mʌꞌ ja wirej,
tarij quir u yamtic tu cotor mac.
18 ’A mac cu yacsic tu yor tiꞌ cu bin tacbir ten u parar Cꞌuj,
mʌꞌ ju bin u boꞌotic u boꞌorir u siꞌpir.
Chen a mac a mʌꞌ u cꞌat u toꞌcar ten u parar Cꞌuj.
A Cꞌujoꞌ caj u toc tetaj tub u wich u bin,
quireꞌ mʌꞌ tu quibaj u tꞌʌn u parar a tuririꞌ,
rajiꞌ ij cʌj taquir.
19 Mʌꞌ ja wirej,
tarij u parar Cꞌuj ich yocꞌocab quireꞌ tu toc tucraj a Cꞌujoꞌ bic cu bin u rucꞌsic u siꞌpir mac.
Mʌꞌ ja wirej,
caꞌ bin tac u sasirir a aꞌacꞌbiroꞌ chʌcaꞌan a wiric baꞌ u ber wa cꞌas.
Baxuc xan caj tar u parar Cꞌuj chʌcaꞌan yiric wa yʌn u siꞌpir tu cotor mac.
Chen a winiquiroꞌ mʌꞌ u cꞌat u tar tu yʌn u parar Cꞌuj quireꞌ cu manob tu cꞌasir quireꞌ rajiꞌob cu jach pachticob u siꞌpirob.
20 Quireꞌ tu cotor mac a naꞌnij cu betic a cꞌasoꞌ mʌꞌ u cꞌat caꞌ iric a baꞌ cu betic.
Rajen mʌꞌ u cꞌat u tar tu yʌn u parar Cꞌuj.
21 Chen a mac a rajraꞌ cu betic a baꞌ u cꞌat Cꞌuj,
mʌꞌ ju chꞌaꞌej sajquir u tar yicnʌn u parar Cꞌuj.
Mʌꞌ ja wirej,
irir rajiꞌob yamtaꞌb ten Cꞌuj.
Juan a cu yacsic jaꞌ tu joꞌr mac, cu tsicbʌtic Jesús
22 Pachir caj binij Jesús yejer u camsʌwinicob ich u ruꞌumin Judea.
Tiꞌ pꞌat yejer u camsʌwinicob yaꞌab u qꞌuinin.
Jesús tu tsꞌaj u beyaj quir u yacsic jaꞌ tu joꞌr mac wa tu quib u tꞌʌn.
Juan testifica acerca de Jesús (Juan 3.22-36)
23 Baxuc Juan xan tan yacsic jaꞌ tu joꞌr mac ich u cajar Enón.
A Enónoꞌ cꞌʌs bʌytʌc u cajar Salim.
Quireꞌ tiꞌ yʌn yaꞌab yicꞌ jaꞌ.
A mac cꞌuchob ich Juan caj acꞌsaꞌb jaꞌ tu joꞌr wa tu quib u tꞌʌn xan.
24 Quireꞌ a Juanoꞌ,
mʌꞌ toy chucuc quir u maꞌcʌr,
tan yacsic jaꞌ tu joꞌr mac ich u cajar Enón.
25 Yʌn u camsʌwinicob Juan mʌꞌ quiꞌ yorob quireꞌ u winiquirob judío tan u binob ich Jesús caꞌ acsac jaꞌ tu joꞌrob.
Rajen u camsʌwinicob Juan quet tan u chich aricob tuririꞌ u winiquir judío.
26 U camsʌwinicob Juan caj binob yaꞌarej tiꞌ Juan tan yaꞌaricob tiꞌ:
―In wʌjcamsʌyʌjirech a mac tarij tub yʌnech uch ich pʌchir yaꞌarir Jordán a mac a ta waꞌaraj uch yʌn u tar.
A bajeꞌrer tiꞌ yʌn tan yacsic jaꞌ tu joꞌr mac,
tu cotor mac tan u rʌc bin yicnʌn.
27 Juan caj u nuncaj tan yaꞌaric tiꞌob:
―Mʌꞌ ja wirej,
u bʌjiriꞌ Cꞌuj cu tsꞌic u beyaj tiꞌ mac a baꞌ yʌn u betej.
28 A techexoꞌ caj a wuꞌyajex mʌꞌ jin mucraj tin toc araj:
Mʌꞌ Cristojen.
Mʌꞌ taren in taquechex.
A Cꞌujoꞌ,
tu tsꞌaj in beyaj quir in chen pʌyic u ber ij cʌjtaquirex.
29 A mac a caj u raqꞌuintaj a jeꞌ xquicaꞌ rajiꞌ u mam.
A mac u jach yajoꞌ cu yiric tan u chꞌic u racꞌ.
Cu yubic u tsicbar cu quiꞌ tar yor yubic tan u chꞌic u racꞌ.
Aroꞌ baxuc ten,
jach quiꞌ in wor in wiric u bin a pimoꞌ ich Jesús.
30 Juan caj yaꞌaraj:
―Mʌꞌ u neman u jumin ten,
chen a Jesúsoꞌ,
raꞌ cu jach jumintejob,
quireꞌ baxuc u cꞌat Cꞌuj.
A mac a cu tar ich caꞌananoꞌ
31 Juan caj yaꞌaraj tiꞌ u camsʌwinicob:
―A Jesúsoꞌ tuchiꞌtaꞌb ten Cꞌuj teraꞌ ich yocꞌocab,
rajiꞌ u tsꞌurir tu cotor baꞌ.
A tenoꞌ ―quij Juan―,
teꞌ toc yʌnenaꞌ ich yocꞌocab,
quin chen beyaj a teraꞌ.
A tenoꞌ,
quin chen aric techex a baꞌ quin wiric ich yocꞌocab.
A Jesúsoꞌ tar u tar ich caꞌanan,
rajen u neꞌer tu cotor baꞌ.
Rajen neyʌn u mucꞌ.
32 A Jesúsoꞌ cu yaꞌaric a baꞌ caj u yiraj tu yʌn a Cꞌujoꞌ.
Baxuc a baꞌ caj u yubaj,
rajiꞌ cu yaꞌaric.
Chen mʌꞌ yaꞌabiꞌ cu quibic a baꞌ cu yac.
33 Chen a mac a cu quibic u tꞌan Jesús quireꞌ tarij ich caꞌanan tan u quibic a baꞌ araꞌb tiꞌ Jesús ten Cꞌuj.
34 A Jesúsoꞌ tuchiꞌtaꞌb ten Cꞌuj,
rajen cu yaꞌaric u tꞌʌn Cꞌuj.
A Cꞌujoꞌ mʌꞌ ju pꞌisej mun cu tsꞌabʌr tiꞌ Jesús u Tajꞌor u Pixam Cꞌuj.
mʌꞌ ja wirej,
rajraꞌ yʌn u Tajꞌor u Pixam Cꞌuj tiꞌ.
35 Ic Tet Cꞌuj cu yajquintic u parar rajen caj u tsꞌaj tiꞌ tu cotor a baꞌ yʌn tiꞌ,
Cꞌuj caꞌ u cʌnantej u parar.
36 Tu cotor mac a cu yacsic tu yor tiꞌ u parar cu bin tacbir ten u parar Cꞌuj.
Munt qꞌuin cu bin cuxtar.
Tu cotor mac a mʌꞌ u cꞌat u yacsic tu yor tiꞌ,
mʌꞌ u bin tacbir ten u parar Cꞌuj.
Mʌꞌ u bin cuxtar munt qꞌuin,
tar cu bin ich cꞌacꞌ.
Yʌn u tsꞌabʌr u mucꞌyaj ten Cꞌuj.