Sema Iren Diga-digat A Mepesamak No Kaonoran Alin Akow
3
Nemnem moy maypangkep niyay. No kaonoran alin akow, gwara diy timpon paladoy pandigat. 2 Tep no kaonoran alin akow, say nemnemnemen na too, si-kara bengat. On-agom pay ira na pilak, onpahi-tek ira, tan ikayang chiy nemnem ched echom. Baingan chiy echom, nat patien chiy awecha tan inecha, nat mansalamat ira, tan nat rispiktaren ches Afo Chiyos. 3 Nat sesmeken chiy echom cha, nat pekawanan chiy naiyanbasol cha si-kara, tan omangen chiy echom. Nat mahatifel chiy piyan na angel cha, emanekot ira, tan owesen chiy mapteng. 4 Traidoren chiy echom cha, a-magen chiy kairi-irin nat nemnemnemen chiy panpa-noan to, tan iyaykayang a chiliy nemnem cha. Tep nat si Afo Chiyos i sesmeken cha, no diket sema panchadsahan na angel cha. 5 Ibili-biling chen manchejaw cha Afo Chiyos, nem nat itolok chen mantoray i panakabalin Afo Chiyos cha si-kara tep nat piyan chen mesa-dathan i ngaaw a ogadi ra. Aragwiim i toon inges to man. 6 Tep sema echom, naiyanpasiyal ired kebali-baliy say saolen chiy bibiin kolang i pengegwat cha, et say onoran iren ma bibiiy afil chen toro-toro. Sema iren bibii, naebel-athan ira na basol cha, tan inam-ay iren ma-gwis cha basol tep ngaaw i kamkam cha. 7 Sema iren bibiin inges to man, nainki-ngelan cha na olay i badon toro-toro, nem nat mahaidasin chiy podnon toro-toro. 8 Sema iren toon naenaol iren ma bibii, ngaaw i nemnem cha, tan sema pamati ren bili-biling, nagwariy silbi thod nemnem Afo Chiyos. Nakiyontra riy podnon toro-toron inges tos Jannes tan si Jambres a engontred Moses nontan da. 9 Nem sema nainpanaol ched too, nat onbayag tep amtaan na tothoo i mahedsel ira ma naiyantoron inges tos Jannes tan si Jambres.Sema Bilin Say Memasig Si Timothy Cha Pamati Tho Tan Sema Pantoro Tho Na Esel Afo Chiyos
10 Nem si-kam, Timothy, amtam i intorok, sema inpasing kon manbiyag, tan sema pangkep na biyag ko. Amtam i itsora na pamatik, anos ko, semek kod echom, tan pan-anos kod kompormin naepasamak cha si-kak. 11 Amtam ngoy nainpamadigat ched si-kak tan digat ko ngon inges toy diya-kaman kod Antioch, Iconium, tan Lystra. Agpayson paladoy diga-digat a diya-kaman ko, nem tiyolongan toak Criston Afo thayo maypangkep na emiin iren man. 12 Tan nat si-kak bengat i napiyadigat cha, nem emiin a toon piyan ton mengemag na panchadsahan Afo Chiyos tep iyayka-chom ired Cristo Jesus. 13 Nem sema iren toon ngaaw a naenaol, onkarkaro pay i ngaaw a ogadi ra. Nasiyaol chiy echom tan naesaol ngo ira. 14 Nem si-kam, itoloy mon agpayson memati na iyachal mon amtam i podno tep amtam i naepiyal ira ma iyantoron man cha si-kam. 15 Manipod nonta kanga-ngam, amtam i podnon toro-toron iyaysolat cha esel Afo Chiyos. Sema iren toro-toro, inpaamta red si-kam i pesing mon maysalakan babaen na pamatid Cristo Jesus. 16 Sema emiin a iyaysolat cha esel Afo Chiyos, naedafod Afo Chiyos, et ebanol i osal to tep naintoro thod si-kathayoy podno, nainpaamta thod si-kathayo no iyanbasol kiya, nabinidin to kiya maypangkep na pena-dat na ngaaw a naima-imag tayo, tan naintoro thod si-kathayoy pesing a mengonod na esantoan a panbiyag. Naintoro tho ira jay 17 say si-kathayon naiyansilbid Afo Chiyos, nagwariy kolang cha si-kathayo, tan mansagana kiyen mengemag na emiin a mapteng.