3 Anosim i diga-digat a nadiya-kaman tayon naematid Cristo Jesus a inges to ma nainpasing na naepiyal a solcharon naiyanosan toy diga-digat. 4 Tep nagwariy solcharon mekibiyang cha obda na sibilyan, no diket sema obda na solcharo i naima-imag to bengat say sema afo niwa solcharo, mepnek cha si-katho. 5 Nemnem mo ngo i toon mekidongba. Nagwariy kongkona tho no eg to onoran i dinteg na pandongba. 6 Sejay i sa-kin arig. Sema masdon man-a-chen, si-katho komay medebas a mengeda na bingay chiwa afit. 7 Nemnem mo ira ja kigwan kod si-kam, et tolongan token Afo Chiyos say mebedin a egwathan mon emiin.

8 Nemnem mo na olay si Jesu Criston inpanpawil Afo Chiyos a si-kathoy polin David. Setan i mapteng a chamag a nainkasabak. 9 Kagol na pankasabaan kon ta mapteng a chamag, naedigathanak tan iyaykalebosak men singen naiyanbasol. Nem sema esel ngon Afo Chiyos, nat mebedin a maykalebos. 10 Isonga, naiyano-anosan kon emiin ira jay a diga-digat tep sema mapteng a chamag ket, para cha panmaptengan na toon pinispis Afo Chiyos. Naiyano-anosan kon emiin say sema iren pinispis Afo Chiyos, maysalakan ira kagol na pamati red Cristo Jesus, et say mayka-chom ired kamaptengan a biyag a nagwariy pengingkaan to.

11 Seja iren ese-esel, podno:

14 Ipala-palagip mo ired ma naematid tan ira ja bili-bilin ko, tan bilin mo ira cha sangoanan Afo Chiyos say eg cha pansosongbathan i banag na ese-esel tep nagwariy silbi tho, no diket oncharal na pamati iren ma naiyanki-ngel. 15 Ipahat mon a-magen i panchadsahan Afo Chiyos say apolbaran toka. Isigoradom i kostoy pantorom na kinapodnon esel Afo Chiyos. Et singen ingesen moy naiyan-obden nat onbaing na naimag to. 16 Mesepol a nat mekitabtabtabal ka na nagwariy silbi thod nemnem Afo Chiyos tep sema iren naengamag niwan, karkaron man-aaragwi ired Afo Chiyos. 17 Sema nakigwa-kigwan cha, singen inges toy sahit a naiyaygwadsak et oncharal na angel. Iyaybilang ires Hymenaeus tan si Philetus ired tan a naengowan iren man. 18 Sejay iren daleki, imaragwi mala ired podno, tan nakigwan cha i iyakcheng mala konoy inpanpawil na iyangketiy. Kagol na naintoro-toro cha, emangkecharal i pamati na echom. 19 Nem sema iren podnon naematid Cristo, ono-onoran chiy podnon toro-toron Afo Chiyos. May-arig ired ma iyaytegwenan na baliy a ebahed na olay. Et gwariy iyaysolat chiwan a kigwan to i “Amten Afo Chiyos i tothoo tho.” Kigwan to ngod man i “Sema toon naematid Criston Afo thayo, mesepol a bebnekan toy ngaaw.”

20 Chiwa banay a baliy na baknang, nat man-iinges ira ma naaosal. Gwara ira ma aamag na balitok tan silbir, tan gwara ngo ira ma aamag na kejow tan degdeg. Sema echom, naaosal para cha ainportantin kesa-nofan, tan sema echom ngo, naaosal para na gwiya-gwa-gwa. 21 Sema toon naimaragwid emiin a ngaaw, may-arig ired ma naaosal para cha ainportantin kesa-nofan. Tep iyayka-chom cha Afo Chiyos, tan iyaybagay a osalen Afo Chiyos tep esagana ma toon mengemag na kompormin mapteng a ma-mag.

22 Isonga, aragwiim i piyan na bedolekin ngaaw, tan ipahat mon a-magen ira jay a onorim i mapteng a panbiyag, petpetim i pamatim, semek moy echom mo, tan mekiolnos ked panbiyag mo ired ma edinis i nemnem ton naematid Criston Afo thayo. 23 Nem sema iren toon kolang i amta tho, aragwiim ira man a tabtabalan chen nagwariy silbi tho. Tep amtam i bakal bengat i panpa-noan to. 24 Sema naiyansilbid Criston Afo thayo, nat mekibakal koma, no diket mahaasi komed emiin a too. Alisto komen mantoro, tan anosan to komay diga-digat. 25 Mesepol a dodop i panbidin to ired ma naengontred si-katho. Tep sa-dathan emon Afo Chiyos i nemnem cha say manbabawi ira na basol cha et amtaen chiy podno. 26 Et onmapteng mowan i nemnem cha, et onbolos ired ma Diablon enaol cha si-kara say a-magen chiy piyan to.