Sejay a solat, insolat Paul cha Titus a Gentile a ematid Jesu Cristo. Sema inpangisolat ton jay, nonta A.D. 63-65 emo la.

Nonta emati wes Titus cha Cristo, iyanbalin na kadgwen Paul, et ekiolo-olop cha Paul ired ekila-kilasin dogad. Sa-kin kimowanan cha, chiwed banay a dogad a dinigwed na baybay a engaranan na Crete. Nonta iyan-iya-iyan ired man, ekiobdes Titus cha Paul a mankasaba na mapteng a chamag. Et inpayas Paul si Titus cha Crete say itoloy Titus a mantoro ired ma ematid man.

Idi engkay, nonta insolat Paul iyay, gwara iriy chegwen banay a problima ired ma ematid Crete. Pilmiro, sema iren echom a emati, naiyonoran chiy ngaaw a naima-imag na kaidian chen inges to ma pan-ite-itek tan sarot. Maykadgwa, gwara iriy Hodjon naiyantoro-toro ired ma emati na iyay-afi-afil chiwa podnon toro-toron Afo Chiyos. Isonga, insolat Paul iyay say bidinen tos Titus na pesing a pengisingpet iren man a problima.

Gwara iriy tedon ainportantin timed ja solat. Pilmiro, inpalagip Paul cha Titus i sema iren chotohan Titus a mengibalnay iren ma emati, mesepol a mapteng i ogadi ra. Sejay i ainportanti tep sema echom a tood man, naiyonoran chiy ngaaw a panbiyag, tan sema echom ngo, naintoro chiy nat podno. Maykadgwa, inbilin Paul cha Titus i maypangkep na itoro tho koma ired ma ekila-kilasin gropon ematin inges toy iyangkaama, iyangkeba-kol, bedoleki, tan sema iren bagaen. Maykatdo, in-iksplikar ngon Paul i panbiyag a mesepol a onoran iren ma naemati tep iyaysalakan ma ira.