Sema Solat Paul Cha
TITUS
Sema Kapoanan Na Solat
1
Si-kak si Paul a bagaen Afo Chiyos tan apostolis Jesu Cristo. Into-no thoak Cristo say pekedsang koy pamati iren ma pinispis Afo Chiyos a tothoo tho, et say ipaamtak ired si-kariy podnon toro-toron naengitorong cha panbiyag a panchadsahan Afo Chiyos. 2 Naima-imag ko ira jay say egwathan cha i gwariy namnamaen chen biyag a nagwariy pengingkaan to. Tep si-kathoy inkarin Afo Chiyos nonta aneng to pay parsowaen i dobong, et nat naiyan-itek. 3 Et nontan a koston timpon pinispis Afo Chiyos, inpaamta tho ired ma tothooy minsahi maypangkep na kaysalakanan. Tan si Afo Chiyos a engisalakan cha si-kathayo, inpiyal tod si-kak iwa minsahi, et inbilin to ngo i ikasabak iwan.4 Titus, seja solat, para cha si-kam a nainbilang kon agpayson anak kod pamati. Sapay koma gwared si-kam i kaasi tan talnen naedafod Afo Chiyos a Awa thayo tan si Cristo Jesus a engisalakan cha si-kathayo.
Sema Maypangkep Iren Ma Naengibalnay Na Naemati
5 Sema kagol na engipayasan kod si-kam chitha Crete, say olnosen moy mesepol pay a ma-mag chithan, et say chotohan mo iriy mengibalnay na sa-ki tan sa-kin gropon naematid emiin a siyo-siyodad chithan. Amag moy inbili-bilin kod si-kam nontan maypangkep iren jay. 6 Sema mengibalnay a chotohan mo, mesepol a nagwariy maypabasol cha si-katho. Mesepol ngon sa-ki bengat i imbaliy to tan eg iyanbii-bii. Sema ngo iren aanak to, mesepol a naemati ngod Cristo tan nagwariy maypabasol cha si-karen inges to ma naiyantoleng ira tan naengamag na ngaaw. 7 Tep sema naengibalnay iren ma naemati, si-kathoy iyaypiyalan na obden Afo Chiyos. Isonga, nagwara komay maypabasol cha si-katho. Nat ikayang to komay nemnem to, nat inam-ay komen onbonget, tan nat mabotheng koma. Nat mabekal koma, tan nat aagom pay koma na pilak. 8 No diket mesepol a sintilen to et iriy bisita tan piyan to na olay a a-magen i mapteng. Manemnemnem koma tan naintifel to komay piyan na angel to. Mesepol a maronong tan esantoan. 9 Petpetan to komay iyaytorod si-kathon naepiyal tan podno. Et mebedin a toroan toy echom niwa podnon toro-toro. Et mebedin ngon songbathan to ira ma naengontra na podnon toro-toro tan ipaamta thod si-kariy kamali ra.
Sema Maypangkep Iren Ma Naiyantoro Na Nat Podno
10 Say kagol a engowanan ko niyay, chakel i toon eg cha piyan a onoran i podnon toro-toro, no diket natiyabtabal cha i nagwariy silbi tho. Naenaol ira, agdalo sema iren Hodjon naengowan i emiin a naemati ket, mesepol a mekogit a inges to ira. 11 Mesepol a pesalcheng mo ira ma too tep nachichal chiy pamati na chakel a too, angken emiin cha sa-kin pamilja. Naintoro chiy nat maytoro koma tep piyan cha bengat a manpilak chiwan. 12 Gwariy kaidian chen profiten engowan i “Sema iren i-Crete, maitek ira. Emanekot iren inges toy athap a animal. Esarot ira tan mahibel ira.” 13 Podno ira jay a kigwan niwa profiten i-Crete. Isonga, mesepol a ibonget mon chili ira ta naematid tan say agpayson egwathan chiy podnon toro-toro maypangkep na pamati ra. 14 Ibonget mo ira say onsalcheng iren manki-ngel na is-istoriya na Hodjon nat podno, tan isalcheng chen onoran i bili-bilin na toon iyanbeneg na podnon toro-toro. 15 Sema toon edinis i nemnem to, nainbilang ton emiin a edinis. Nem sema too ngon ensekig i nemnem ton nat naematid Cristo, nagwariy nainbilang ton edinis tep ensekig miy nemnem to tan eg to mahaidasin i mapteng cha ngaaw. 16 Sema toon inges to man, nakigwan cha i amta res Afo Chiyos, nem naesi-neng ngorechan chiwa naimag cha i nat podnoy nakigwan cha. En-owes iren Afo Chiyos, tan nat napiyati res Afo Chiyos, tan nagwaren polos i kabaalan chen mengemag na mapteng.