Sema Iren Bili-bilin Maypangkep Na Ekila-kilasin Gropon Naemati
2
Nem si-kam ngo, Titus, itoloy mon memidin iren ma naemati i a-magen cha komay iyaybagay chiwa podnon toro-toro. 2 Sema iren iyangkaama, bilin mo ira i mesepol a itifel chiy piyan na angel cha. Mesepol a a-magen chiy mapteng tan kosto say merispiktar ira. Mesepol ngon manemnemnem ira. Tan mesepol a kostoy pengegwat cha maypangkep na podnon toro-toro na pamati thayo. Ainposoan komay semek ched echom, tan banay komay pan-anos cha na diga-digat.3 Sema iren iyangkeba-kol, bilin mo ira i emiin a a-magen cha ket, mesepol a iyaybagay cha naematid Afo Chiyos. Mesepol a nat on-omang ira tan nat mabotheng ira. Mesepol kitdin itoro chiy mapteng 4 say mebedin a bidinen chiy biin iyangkangalobo na koston pesing chen menmek na imbaliy cha tan anak cha. 5 Mesepol ngon bidinen chiy bibiin iyangkangalobo na manemnemnem ira tan edinis i nemnem cha tan ogadi ra. Mesepol a taripatoen chiy pamilja ra, mahaasi ira, tan ipatoray chiy angel ched ma imbaliy cha. Tep no a-magen na bibii ira jay, nat medamsis miy esel Afo Chiyos.
6 Inges toy dalekin ngangalobo. Mesepol a itifel chiy piyan na angel cha. 7 Tan si-kam ngo, amag mon koston emiin ira jay say si-kathoy onoran na echom a too. Sema pantorom, mesepol a ainposoan tan ibilang mon epateg a chiliy naintorom. 8 Sema ngon ese-esel mo, mesepol a mapteng tan podno say eg cha damsisen. Tep no inges nithan i a-magen mo, onbaing ira ma naengonkontred si-kathayo tep nagwariy mebedin a ipabasol ched si-kathayo.
9 Sema iren bagaen, bilin mo ira i patien chiy afo ra na emiin a naima-imag cha say mechadsahan iriy afo ra. Kowan mod si-kara i mesepol a nat onsongsongbat ira 10 tan nat mengibot ira. Pebiybiy cha et koma i naepiyal ired emiin a naima-imag cha. Et no inges nithan i emiin a naimag cha, mechejaw i podnon toro-toro maypangkep Afo Chiyos a engisalakan cha si-kathayo.
11 Tep inbiybiy Afo Chiyos i kaasi tho say mebedin a maysalakan i emiin a tothoo. 12 Kagol na kaasin Afo Chiyos, nainpaamta thod si-kathayo i mesepol a bebnekan tayo ira ma naiyaykontred piyan Afo Chiyos tan sema iren ngaaw a kamkam a panchadsahan iren ma nat naematid Cristo. Mesepol kitdin itifel tayoy piyan na angel tayo, onoran tayoy esantoan a panbiyag, tan a-magen tayoy panchadsahan Afo Chiyos basta gwara kiya pay laeng chiya dobong. 13 Sejay komay pesing tayon manbiyag niman a pansesesked tayo na emangkanamnamen manpachadsak cha si-kathayo. Sema emangkenamnama, si-nengen tayoy kinachiyos Jesu Cristo na timpon pan-oli tho did jay, a si Criston epateg a Chiyos tayon engisalakan cha si-kathayo. 14 Si-kathoy engiawat na angel ton metiy para cha si-kathayo say maydibchi kiyed emiin a panakabalin na basol. Imag to man say dinisan to kiya, et say panbedin to kiyen esantoan a too thon onsi-met a mengemag na mapteng. 15 Sejay ira, itoro-torom ired ma tothood tan. Bilin mo ira i a-magen cha ira man, tan ibonget mo ira no gwariy iyankolangan cha tep agpayson gwariy karebengan mon mengemag niwan. Nagwara komay mandamsis na nakigwan mo.